Ongeteruich ma Ta el Suobel
Aike el Klaumerang ma Siukang el Diak Loldeu er a Rengul a Dios
Ngera el bedengel a klaumerang ma siukang a mekngit? (1)
A Rekristiano ngkirir el loumerang el kmo a Dios a Trinidad? (2)
Ngera ma remera el Kristiano a diak longedaol er a Kurismas, ma Easter, ma lechub e ngtanziobi? (3, 4)
Ngsebechir a rulekoad el melemall er a redi ngar? (5)
A Jesus ngmlad er a kerus? (6)
Ngua ngerang a klungel a ultutelel a doldeu er a rengul a Dios? (7)
1. Ngdiak el rokui el klaumerang ma siukang a mekngit. Engdi Dios a diak lekengei aike el klaumerang ma lechub e ngsiukang el uchelel a mlengai er a klsuul el klechelid ma lechub e ngomtok a osisechakl er a Biblia.—Matteus 15:6.
2. Trinidad: A Jehovah ng Trinidad—el tede el chad el luldak el di mo chimo el Dios? Ngkmal diak! E le Jehovah, el Chedam, a “di ta el mera el Dios.” (Johanes 17:3; Markus 12:29) A Jesus a mle kot el mechell el Ngelekel, e ngii a chederdall er a Dios. (1 Korinth 11:3) Ma Chedam a kuk ngar er a bab er a Ngalek. (Johanes 14:28) E a chedaol el reng a diak el chad; e ngbai klisichel a Dios.—Genesis 1:2; Rellir 2:18.
3. Kurismas ma Easter: A Jesus a dimlak lemechell er a December 25. Ngmilechell er a locha kirel a October 1, el ngii a taem er a chelsel a rak el klekar a sib a dirke chomechei a cheremir er a rikl sel leklebesei. (Lukas 2:8-12) A Jesus a dimlak lolekoi er a Rekristiano el mo mengedaol er a cherellel. Ngbai, millekoi er a redisciplo er ngii el mo meruul er a omekltkir, ma lechub e ngtekoi el mo omeklatk er tir, er a kodellel. (Lukas 22:19, 20) A Kurismas maike el tekoi el loruul a rechad er a Kurismas a mla er a klsuul el klechelid er a irechar. A siukang er a Easter, el ua usbechel a ngais ma usangi a dirrek el losisiu, el luchelel a mla er a klsuul el klechelid er a irechar. A rekot el Kristiano a dimlak longull e longedaol er a Kurismas ma lechub el Easter, ma remera el Kristiano er a chelecha el sils me te dirrek el uaisei.
4. Tanziobi: Ngdi teblo el omerellel a tanziobi a losaod a Biblia el lurruul a rechad el tir a dimlak longull er a Jehovah. (Genesis 40:20-22; Markus 6:21, 22, 24-27) A rekot el Kristiano a dimlak loruul a tanziobi. A siukang er a omerellel a tanziobi a mleuuchel er a klsuul el klechelid er a irechar el mei. Ma remera el Kristiano a kerous a present e dmak el loldeu a rengrir er a kuk di ngodech el taem er a chelsel a rak.
5. Dakt el Kirir a Rulekoad: A rulekoad a diak lsebechir el meruul a ngii di el ngerang ma ka lolechesuar a ngii di el ngerang. Ngdikea lsebeched el ngosuterir, me tir a diak lsebechir el melemall er kid. (Psalm 146:4; Olisechakl 9:5, 10) A soul a mad; el diak lolemolem el ngar er a uriul er a kodall. (Esekiel 18:4) Engdi bebil er a taem e a remekngit el anghel, el domekedo er tir el kmo mengelengalek el reng, a meruul er tir el leko te reng ma lechub e te delebengel a chad el mlad. Me ngmekngit a ngii di el siukang ma lechub e ngomerellel a tekoi el lolecholt a dakt el kirir ma lechub e ngomengull el kirir a rulekoad.—Isaia 8:19.
6. Kerus: A Jesus a dimlak el mad er a kerus. Ngbai mlad er a di teluo el kerrekar. Sel tekoi er a Griik el loleiuid er ngii el mo “kerus” er a chelsel a betok el Biblia a melekoi el kirel a di teluo el kerrekar. Sel teletelel a kerus a mlengai er a klsuul el klechelid er a irechar. Ma kerus a dimlak lousbech er ngii ma ka lulengull er ngii a rekot el Kristiano. Ma omomdasu, e ngmelemalt a dousbech er a kerus er a chelsel a omengull er kid er a chelechang?—Duteronomi 7:26; 1 Korinth 10:14.
7. Nglocha kmal mo meringel a omongoit a bebil er aika el klaumerang ma siukang. Ma rechedam ma resechelim a locha mo melasem el melekoi er kau me lak molodech er a klaumerang er kau. Engdi a doldeu er a rengul a Dios e ngkuk bai klou a ultutelel er a doldeu a rengrir a rechad.—Osisechakl 29:25; Matteus 10:36, 37.
[Siasing el ngar er a 22 el llel]
A Dios a diak el Trinidad
[Siasing el ngar er a 23 el llel]
A Kruismas ma Easter a mla er a klsuul el klecheld er a irechar el mei
[Siasing el ngar er a 23 el llel]
Ngdiak a ungil el luchul e kede mengull er a rulekoad ma lechub e kede medakt er tir