Ongetiu el Suobel

A Remesiungel a Dios a Kirir el Mo Klikiid

Ngera me ngkired el mo klikiid er a bek el blekeradel? (1)

Ngera belkul sel dedu el kmo kede klikiid er a klereng? (2) ngklikiid a blekerdeled? (3) ngklikiid a uldesued? (4) ngklikiid a bedenged? (5)

Ngua ngera el cheldecheduch el diak leklikiid a kired el mengeroid er kid er ngii? (6)

1. A Jehovah el Dios a klikiid e chedaol. Ngsoal a remengull er ngii a lolemolem el klikiid—er a klereng er tir, ma blekerdelir, ma uldesuir, ma bedengir. (1 Petrus 1:16) Kede ousbech er a kmal klou el ducherreng me bo lsebeched el melemolem el klikiid er a osengel a Dios. Kid a kiei er a chelsel a diak el klikiid el beluulechad. Ngdirrek el kired el loutekangel el lomtok a chelitechetul a klechad er kid el kirel a klengit. Engdi ngkmal diak el kirel el mo mechitechut a rengud e demeterob.

2. A Deklikiid er a Klereng: A lsekum ngsoad el mesiou er a Jehovah, e ngkmal diak el kired el melemolem el lurrekodel a klsuul el losisechakl ma lechub e ngsiukang er a klsuul el klechelid. Ngkmal kired el tuobed er a klsuul el klechelid e diak dolengeseu er ngii er a ngii di el rolel. (2 Korinth 6:14-18; Chocholt 18:4) Sel ta el bla desuubii a klemerang el kirel a Dios, e ngkmal kired el kerekikl me ngdiak demechetakl er a rechad el lolisechakl a klsuul el tekoi.—2 Johanes 10, 11.

3. A Leklikiid a Blekerdeled: A Jehovah a soal a remengull er ngii a lolecholt a blekerdelir a remera el Kristiano er a bek el taem. (1 Petrus 2:12) Ngsebechel el mes a rokui el doruul, el mo lmuut er aike el domart er kid e meruul el tekoi. (Hebru 4:13) Ngkmal kired el mo klikiid er a ngii di el rolel a deleboes maike el mengelengalek el lomeruul er tia el beluulechad.​—⁠1 Korinth 6:​9-11.

4. A Leklikiid a Uldesued: A domekeek a uldesued er a klikiid, e bliochel el luldasu, e a omerelled me ngdirrek el mo klikiid. (Filipi 4:8) Engdi a dolemolem el melatk a diak el klikiid el tekoi, e ngmo uchul a mekngit el lomeruul. (Matteus 15:18-20) Ngkired el mengeroid er kid er aike el rolel a omilil ma lechub e ngongelaod el sebechel el mekidokl a uldesued. Ngsebeched el lomekeek a uldesued er a klikiid el luldasu el loeak a dosuub a Tekingel a Dios.

5. A Leklikiid a Bedenged: Tir el lomtechei er a Dios a uchul, e a Rekristiano a kirir el kerekikl a bedengir ma bilir me ngbeches e klikiid. Ngkired el melebal er a uriul er a dousbech er a chorchertoll, e dirrek el kired el melebal er a uchei er a domengur ma lechub e kede merutech a kall. A lsekum ngdiak a ungil el rolel a sewer, e a dach ma chemochem a kirel el medakl er a chelsel a chutem. (Duteronomi 23:12, 13) A lebeches a bedenged e ngsebechel el ngosukid me ngmesisiich a bedenged. A blil a chad el Kristiano a kirel el beches a chelsel ma ikrel. Ngkirel el bleketakl el lungil el kerebai er a chelsel a beluu.

6. A Klikiid el Rolel a Cheldecheduch: A remesiungel a Dios a kmal kirir el blechoel el melekoi a klemerang. A remelekoi a blulak a diak el sebechir el mo soiseb er a Rengedel a Dios. (Efesus 4:25; Chocholt 21:8) A Rekristiano a diak lousbech a sius. Ngdiak lorrenges ma ka lolekoi a mekngit el ngellakel ma mekikiongel el cheldecheduch el chelid. Ma klikiid el rolel a cheldechedecherir a uchul, e te bleketakl er a osengir a rechad el kmo te ileakl sel lengar er a ureor ma lechub e te ngar er a skuul ma dirrek el basio el lekiei er ngii.—Efesus 4:29, 31; 5:3.

[Siasing el ngar er a 18, 19 el llel]

A remesiungel a Dios a kirir el mo klikiid er a bek el tekoi