Ongeteruich ma Ongeru el Suobel
A Dolecholt a Omengull er Kid el kirel a Klengar ma Rasech
Ngkirel el ua ngerang a osenged el kirel a klengar? (1)a omelecheb er a rengalek? (1)
Te mekerang a Rekristiano e ochotii el kmo te blechoel el kerekikl? (2)
Ngmekngit a domekoad a charm? (3)
Ngera bebil er a omeruul a diak lolecholt a omengull el kirel a klengar? (4)
Ngerang a llechul a Dios el kirel a rasech? (5)
Tiang ngdirrek el luldimukl er a oidel a rasech? (6)
1. A Jehovah a Uchul a klengar. Ma rokui el di ngar a ngilai a klengar er tir er a Dios. (Psalm 36:9) A klengar a chedaol er a medal a Dios. Ngmo lmuut er a klengar er a dirkak lemechell el ngalek me ngkmal mekreos er a Jehovah. Me ngmekngit er a osengel a Dios a ldurengud el omekoad er a ngalek el dirkak lemecherrungel a okurulel er a chelsel a delel a delal.—Exodus 21:22, 23; Psalm 127:3.
2. A remera el Kristiano a blechoel el kerekikl me ngdiak lemetemall. Te kirir el kerekikl ma mlirir ma blirir a diak demetemall a dengar er ngii. (Duteronomi 22:8) A remesiungel a Dios a diak lolasem a tekoi ma lechub e ngrolel a omilil el sebechel el tomall a klengar er tir. Ngdirrek el diak lousekool aike el meringel el klekool el mo uchul e te melemall er a rebebil. Te dirrek el mengeroid er tir er aike el rolel a omilil ma lechub e ngongelaod el melisiich a uldikel ma meringel el odechelakl.—Psalm 11:5; Johanes 13:35.
3. A klengar er a charm a dirrek el chedaol er a medal a Ulemeob. A Kristiano a sebechel el lomekoad a charm me lebo er ngii a kelel ma bilel ma lechub e ngomekerreu er ngii er a rakt maike el kdekudel el tekoi el duubech el kirel a klengar er ngii. (Genesis 3:21; 9:3; Exodus 21:28) Engdi ngmekngit a domekoad a charm el di diak a uchul e ngkuk di klekool ma lechub e ngdi omilil er kid a uchul.—Osisechakl 12:10.
4. A chomeloko el dekool, ma omelamech el buuch, ma usbechel a mekngit el kar a tekoi el diak el kirir a Rekristiano. Aika el tekoi a mekngit e le (1) ngrullid el mo sibai, e (2) ngmelemall a bedenged, e (3) diak leklikiid. (Rom 6:19; 12:1; 2 Korinth 7:1) Ngsebechel el kmal mo meringel a dongoit aika el tekoi el bla bo desau er ngii. Engdi ngkmal kired el meruul el uaisei me bo dodeuir a rengul a Jehovah.
5. A rasech a dirrek el kmal mekreos er a osengel a Dios. A Dios a melekoi el kmo a soul, ma lechub a klengar er a chad, a ngar er a rasech. Me seikid a uchul e ngmekngit a donga rasech. Ngdirrek el mekngit a donga tech el dimlak bo lungil el motobed a rsechel. A lsekum a charm a chulebeng a telil ma lechub e ngmlad er a bedikl, e ngdiak el kirel el kall. A lsekum e nguleburech ma lechub e nguleboes, e ngkirel el mereched el motobed a rsechel a lsekum me ngmo kall.—Genesis 9:3, 4; Levitikus 17:13, 14; Rellir 15:28, 29.
6. Ngmekngit a dekengei a oidel a rasech? Molatk er tia el tekoi el kmo, a Jehovah a soal a domekiai er kid er a rasech. Me ngbelkul a kmo ngdiak el kired el lolsiseb er a bedenged el loeak a ngii di el rolel a rsechel a kuk ta er a chad ma lechub e ngrseched el mla ta el motobed e medechel. (Rellir 21:25) Ma remera el Kristiano a diak el kengei a oidel a rasech. Ngsebechir el kongei a bebil er a kuk di ngodech el bedengel a ukeruul, el ua oidel aike el klekedall el diak a rasech er ngii. Ngsorir el melemolem el ngar, engdi ngdiak lolasem el lolsobel a klengar er tir el oeak a lolemall a llechul a Dios.—Matteus 16:25.
[Siasing el ngar er a 25 el llel]
A dodeuir a rengul a Dios, e ngkired el lomekiai er kid er a oidel a rasech, ma omeruul el diak leklikiid, ma dirrek el tekoi el sebechel el mo uchul a telemellel a klengar er kid