Armageddon​—A Rebebil Te Kmo Tiang Ngerang?

“Me te mlo mechudel er sel lulngakl el Armageddon el tekoi ra Hebru.”​—CHOCHOLT 16:16.

NGERA ke mo melatk er ngii sel mrengesii a tekoi el “Armageddon”? Ke locha mo melatk el kirel a klou el tellemall. Alta tia el tekoi a di ta el lemocholt er a Biblia, engdi tirke el chad el oltobed a chais er a beluu me a remengeteklel a klechelid a blechoel el mesaod er ngii.

Aike el merael a chisel el uldasu el kirel a Armageddon, ngoltirakl aike el lolisechakl a Biblia? Ngkmal ungil a bo dodengelii a nger er tiang. E ngera uchul? E le klemerang el kirel a Armageddon a sebechel el rullau el mo mimokl er a dakt el kirel a ngar medam el klebesei, e ngar er ngii a lerellii er a uldesuem el kirel a Dios.

Molatk el kirel aika el edei el ker, e momekesiu aike el merael a chisel el uldasu el kirel a Armageddon el obengkel aike el mera el lolisechakl a Biblia.

1. A ARMAGEDDON NGTELLEMALL EL MO ER NGII EL RECHAD A UCHUL?

A rechad er a omeluches me a rechad er a omerriter a blechoel el ousbech er a tekoi el “Armageddon” el kirel a tellemall el mo er ngii el rechad a uchul. El uai tiang, a Kot me a Ongeru el Mekemedil a Beluulechad a lullekoi el kirel el kmo ng Armageddon. A uriul er aika el mekemad, e a rechad a mle bekikl el kmo a Merikel me a Rosia a mo kaumekemad el ousbech a meklou el dub. A rechad el oltobed a chais er a beluu a ulemekedong er tiang el kmo ng “Armageddon el mo er ngii el meklou el dub a uchul.” Chelecha el sils, e a rechad er a omerriter el medakt el kmo a klikingelel a beluu a mo uchul a klou el ngeldechel a blekerdelel a eanged, a omeklatk el kirel a merekung el “Armageddon er a eltel a beluulechad.”

A belkul a tekingir: A rechad a ngar er ngii a klou el klisichir el omtebechel er a blekerdelel a beluulechad er a ngar medad el taem me a rokui el klengar el ngar er a chelsel. Me a lsekum a kabelment a diak loruul a tekoi el oba llomeserreng, e a beluulechad a mo metemall.

Aike el lolisechakl a Biblia: A Dios a diak el bo el bechititerir a rechad me lolemall er tia el chutem. A Biblia a olterekokl a rengud el kmo a Jehovaha a dimlak lebebii a beluulechad el “di bechachau el beluu.” E ngbai rirellii el mo “basio el kirir a re chad el kiei er ngii.” (Isaia 45:18) A Dios a mo “okngemedeterir tirikel olekngemed ra belulechad,” er a bai lebechititerir a rechad me letemellii.​—Chocholt 11:18.

2. A ARMAGEDDON NGKLOU EL TELLEMALL EL UAI A DESIU?

A lebebil er a taem e a rechad er a omeluches a ousbech er a tekoi el “Armageddon” el mesaod el kirel a meklou el tellemall el uai a desiu. El uai tiang, sera 2010 e a ta er a chais er a beluu a milsaod el kirel a “ ‘Armageddon’ er a Haiti.” Ngmilsaod el kirel a ringel, tellemall, me a kodellir a rechad el mlo er ngii el klou el desiu el tilemellii sel beluu a uchul. A rechad er a omeluches me a remeruul a mubi a ousbech er tia el tekoi el mesaod a blekeradel el mla duubech me aike el blekeradel el lebekikl el kmo ngmo duubech er a ngar medad el taem. El uai tiang, te mla ousbech er a tekoi el “Armageddon” el mesaod el kirel aike el lomdasu el kmo ngmo duubech a lsekum a klou el bad el ngar er a melidiul a subechii er a beluulechad.

A belkul a tekingir: A Armageddon a tekoi el duubech er a di mitil a taem el uchul a kodellir a rechad el diak a telemellir. Ngdiak a kmal ngera el sebechem el rullii el mo omekerreu er kau er ngii.

Aike el lolisechakl a Biblia: A Armageddon a diak el tekoi el duubech er a di mitil a taem el uchul a kodellir a rechad. Ngbai ngar sel taem, e ngdi tirke el mekngit a mo dibus. A Biblia a tibir el kmo ngdi kmedung e a “re dengerenger a mo dibus; ke mo osiik er tir, ngdi mo diak ke betik er tir.”​—Psalm 37:10.

3. A DIOS NGMO MELEMALL ER TIA EL CHUTEM ER A ARMAGEDDON?

Ngbetok el chad er a klechelid a oumerang el kmo ngmo er ngii a ulebongel el ultok er a delongelel a ungil me a mekngit el mo uchul a ulebengelel tia el beluulechad. A omesuub el lurruul er ngii a Princeton Survey Research Associates er a beluu er a Merikel a miltik el kmo a 40 el basent er a remeklou el chad a oumerang el kmo a beluulechad a mo nguemed er a “mekemad er a Armageddon.”

A belkul a tekingir: A rechad a diak el kirir el kiei er tia el chutem el mo cherechar, me tia el chutem a dimlak lemeruul el kirel el medechel el mo cherechar. A Dios a ulemeob er a rechad el mo omdasu el kmo te mo mad er a ta er a klebesei.

Aike el lolisechakl a Biblia: A Biblia a bleketakl el ouchais el kmo a Dios a “mla toketekii a beluulchad el mesisiich el ngar omekedecheraol er ngii, ng kmal diak bo le mengukl.” (Psalm 104:5) Ngmelekoi el kirir a rechad el kiei er tia el chutem el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.”​—Psalm 37:29.

Me ngbleketakl el kmo, a Biblia a omtok a betok el merael a chisel el uldasu el kirel a Armageddon. Me ngngera klemerang el tekoi?

[Footnote]