A tekoi er a Hebru el Bethel a belkul a kmo “blil a Dios.” (Genesis 28:17, 19) Tia el ngakl a kmal ungil el kirel aike el basio el bla leketmokl a Resioning er a Jehovah el meliuekl er a beluulechad el rokir el ousbech el omekrael e melisiich er a ureor er a berkel a klumech. A Chelechad er a Ruungerachel a mesiou el ngar sel klou el obis er kemam el ngar er a New York State er a beluu er a Merikel, e oungerachel a ureor er aike el obis er a Resioning er a Jehovah el ngar er a betok el beluu. Tirke el mesiou el ngar er aika el basio a okedongall el telungalek er a Bethel. Nguai a ta el telungalek, te dmak el kiei, e oureor, e omengur, e mesuub a Biblia el ngar er a kltarreng.​—Psalm 133:1.

Ngileakl el basio el rechad er ngii a mla tonget a klengar er tir el mo mesiou. Ngar er a bek el Bethel, e te ngar er ngii a Rekristiano el sechal me a redil el mla tonget a klengar er tir el mo meruul a soal a Dios me a tekoi el kirel a Renged el mui el taem. (Mateus 6:33) Ngdiak a ta er tir el uduudel, engdi te rokui el ngar er ngii a basio el lekiei er ngii me a kelir me a sesei el udoud el lomesterir el kirel aike el lousbech. A rokui el chad el ngar er a Bethel a chemur a urerir, el oureor el ngar er a obis, me a uum, me a basio el lomengur er ngii. Ngdirrek el ngar er ngii a remeruul a babier, me a remengetmokl, me a remesilek, me a remeruul aike el kirel ruoll me a lmuut el bebil er a ureor.

Ngbasio el melisiich er a ureor er a berkel a klumech er a Renged. A moktek er a bek el Bethel a mengetmokl a tekoi me bo el sebechir a rebetok el chad el mo medengelii a klemerang er a Biblia. Tia el babier a ta er a olechotel tiang. Ngmilluches el oeak a ulekrael er a Chelechad er a Ruungerachel, e mlodurokl el oeak a computer el mo er aike el obis er tirke el oliuid, e mlotobed el oeak aike el meklou el mesil el meruul a babier el ngar er a bebil er a Bethel, e mlodurokl el mo er a kuk betok er a 110,000 el ongdibel. Sel loruul el uaisei, e a telungalek er a Bethel a olengeseu el mengetmokl er tia el kmal orechudel el ureor, el ngii a berkel a ungil chais.​—Markus 13:10.

• Te rua techang a mesiou el ngar er a Bethel, e ngera el ngeso a mla meketmokl el kirir?

• Ngera el orechudel el ureor a lolengeseu el mengetmokl er ngii tirke el mesiou el ngar er a Bethel?

Tirke el ngar er a Bethel a meruul a kakerous el tekoi el omekerreu er a ureor er a berkel a klumech el ngar er a tang me a lechub e ngbetok el beluu. A rebebil a oureor el oliuid a babier, me a remeruul a babier, me a remeruul a audio me a video me a lechub e te omekerreu a kuk bebil er a ureor er sel beluu.

Ngar er ngii a chelechad el omekerreu a ureor. A Chelechad er a Ruungerachel a omekngerachel er a orretel a derta er aika el obis el mo er a Chelechad el Omekerreu a Obis er a Resioning er a Jehovah, el tir a tedei me a lechub e te betok el mechuodel el rredemelel tia el ureor. Tia el chelechad a blechoel el ouchais er a Chelechad er a Ruungerachel el kirel a ngelsecheklel a ureor me a ngii di el mondai el duubech er aike el beluu el loungerachel. A chouaika el tekoi a ngosuir a Chelechad er a Ruungerachel el mo melilt a suobel el bo loltobed er a babier, me a miting, me aike el meklou el ongdibel. A rumtechei er a Chelechad er a Ruungerachel a blechoel el mo oldingel aike el obis er a Resioning er a Jehovah e omsa Chelechad el Omekerreu a Obis er a Resioning er a Jehovah a ulekrael el kirel a rolel a loltaut a ngerechelir. (Osisechakl 11:14) Ngmo er ngii a ileakl el prokuram el uldimukl er a cheldechedechal ngike el odam el omtechei er a klou el obis er kid el mo melisiich er tirke el ngar er aike el beluu el loungerachel.

A omelisiich a mo er aike el ongdibel el loungerachel. A rudam el olab a ngerachel el ngar er aika el obis a kongei a oketmeklel a beches el ongdibel. A rudam a dirrek el omekrael a urerir tirke el pioneer, me a remissionari, me a rudam el oldingel a ongdibel el ngar er aike el beluu el loungerachel. Te oungerachel aike el meklou el ongdibel me a okedecherul a beches el Blil a Ongdibel, e kerekikl el kirel a odureklel a babier el lousbech a bek el ongdibel. A rokui el tekoi el meketmokl er aika el obis a mo uchul a ungil el oketmeklel a ureor er a berkel a klumech.​—1 Korinth 14:33, 40.

• Ngmekerang a Chelechad el Omekerreu a Obis er a Resioning er a Jehovah e olengeseu er a Chelechad er a Ruungerachel?

• Ngera el ureor a meketmokl er a obis er a Resioning er a Jehovah?