Kau ngsoam el mo merriter a bebil er a suobel el mo menglou er a klemedengei er kau er a Biblia? Kau ke semeriar el mo medengelii a omesodel a bades me a lechub e ngomesodel a chad, me a basio, me a lechub e ngklalo el mildung er a Biblia? Ngmla ta el molatk el kmo a Tekingel a Dios ngsebechel el ngosukau el kirel a tekoi el mengesang er a uldesuem? A leuaisei, e bo er a library er a Blil a Ongdibel.

Ngngar er ngii a babier el dousbech el merriter a suobel. Nglocha diak molab a rokui el babier el mlengai er a Biblia el babilengir a Resioning er a Jehovah el ngar er a omelekingem. Engdi a library er a Blil a Ongdibel a ngar er ngii a oumesingd er aike el dirk tilobed el babier. Nglocha dirrek el ngar er ngii a kakerous el oidel a Biblia me a ungil el dictionary me a kuk bebil el babier el sebechem el ousbech. Ngsebechem el ousbech er a library er a uchei me a uriul er a miting. A lsekum e ngngar er ngii a computer er a library, e nglocha ngar er ngii a Watchtower Library el ngar er a chelsel. Tiang a prokuram er a computer el ngar er ngii a betok el babier el ngar er a chelsel me a beot el rolel a omosiik a suobel, me a tekoi, me a lechub e ngbades.

Ngungil el kirir tirke el oltobed a cheldechedecherir er a Miting er a Klengar me a Omesiunged. Ngsebechem el mo ungil el ousbech er a library er a Blil a Ongdibel sel mongetmokl a cheldechedecham. Ngike el oungerachel er a Miting er a Klengar me a Omesiunged a oungerachel er a library. Ngkirel kerekikl el omes el kmo ngar er ngii aike el beches el babier e ungil a blechebechel. Ngii me a lechub e ngike el mesuub a Biblia el obengkem a sebechel el ochotii a rolel a omosiik a suobel el mousbech. Me nguaisei, engdi ngdiak el kirel a chad el ngmai a ngii di el babier er a library el mo tuobed er a Blil a Ongdibel. Ngkired el mo kerekikl a dousbech aika el babier e diak doluches er a chelsel.

A Biblia a mesaod el kmo a lsoad el metik er a “klemedengei er a Dios,” e ngkired el osiik er ngii el ua “mekreos el klalo.” (Osisechakl 2:1-5) A library er a Blil a Ongdibel a sebechel el ngosukau el mo omuchel el osiik a klemedengei er a Dios.

• Ngera el tekoi el ki mousbech el merriter a suobel a ngar er ngii er a library er a Blil a Ongdibel?

• Ngtechang a sebechel el ngosukau el mo meduch el ousbech er a library?

A Jesus Kristus a dilu er a rulebengkel el kmo: “Ma llemesiu a kirel ua isei el dmiich er mederir a rokui el chad, me te mo mes a ungil tekoi el moruul e mo odengesii a Demmiu el ngar a eanged.” (Mateus 5:16) Seikid a uchul me aki ousbech a beches el klekedall, el uai a Internet. A website er kemam el jw.org a sebeched el mo er ngii e metik a mera el omesodel a klaumerang me a tekoi el loruul a Resioning er a Jehovah. Ngera el tekoi a ngar er a chelsel?

Nger er a Biblia el kirel aike el ker el leblechoel el loker a rechad. Ngsebechem el metik a nger er a bebil er aike el meklou a ultutelel el ker el rechad a blechoel el oker. El ua tiang, a tract el Ngsebechel el Mo Diak a Ringel? me a Ngmera el Sebechir a Rulekoad el Lmuut el Me Ngar? a sebechem el omes er a website er kemam el ngar er a kuk betok er a 600 el omelekoi. Ngdirrek el sebechem el metik er a New World Translation el ngar er a kuk betok er a 130 el omelekoi me aike el babier el dousbech el mesuub er a Biblia, el uldimukl er a Ngerang Mera el Lolisechakl a Biblia? me aike el beches el A Ongkerongel me a Awake! A betok er aika el babier a sebeched el menguiu me a lechub e kede orrenges el oeak a website er kemam me a lechub e kede download el MP3, PDF me a lechub e ng EPUB. Ngdirrek el sebechem el print a bebil er a babier el mo olecholt er a chad el semeriar el ngar er a omelekingel! Ngdirrek el ngar er ngii a video el kirir tirke el ousbech a sign language el ngar er a betok el omelekoi. Ngsebechem el download e orrenges aike el ileakl el omengiuel a Biblia, me aike el sibai el mlengai er a Biblia, me a ungil el ongngak el sebechem el oldeu a rengum er ngii sel molengull.

Klemerang el tekoi el kirir a Resioning er a Jehovah. Ngdirrek el ngar er ngii a beches el chais me a video el kirel a ureram el meliuekl er a beluulechad, me aike el tekoi el lechelebangel a Resioning er a Jehovah, me a ureor el ki moruul el olengeseu er a rechad sel lengar er ngii a tellemall er a beluu. Ngsebechem el metik a omesodel aike el mo er ngii el meklou el ongdibel me a rolel e ngsebechem el omekedong aike el obis er a Resioning er a Jehovah.

Me ngoeak aikang, e aki olecholt a klemerang el mo er aike el beluu el meringel a debo er ngii. A rechad er a bek el meklou el beluu, el uldimukl er a Antarctica a ngmai a klungiolir er tia el klemerang. Aki meluluuch el kmo a “tekingel a Rubak lolemolem el di mereched el oberk” el mo er a beluulechad el rokir el kirel a klebkellel a Dios.​—2 Thesalonika 3:1.

• Ngoeak a ngera el rolel e a jw.org a ngosuterir a rebetok el chad el mo medengelii a klemerang er a Biblia?

• Ngera el tekoi a soam el mo medengei el ngar er a website er kemam?