Tia Ngmle Moktek er a Dios?

MONGUIU a simbung, e momes a TV, me a lechub e morrenges a razio. Ngkmal betok a chais el kirel a delengerenger, me a mekemad, me a re terrorist! E ka di molatk a mondai er a klengar er kau. Nglocha secher me a lechub e ngkodellel a betik er a rengum a kmal lomekberaod er a rengum. Ke locha di ua uldesuel a Job er a ledu el kmo, “ng diak a budech er ngak; ng diak a ulengellek, ma chelebulek a diak a ulebengelel.”—Job 3:26.

Di lekau loker el kmo:

Tia ngmoktek er a Dios el kirek me a rechad el rokui?
Ak mo er ker e metik a ongelaod el kirel a mondai el kchelebangel?
Ngsebechel el mo er ngii a budech er a beluulechad?

A Biblia a meskid a nger er aika el ker.

A BIBLIA A OLISECHAKL EL KMO A DIOS A MO SUMECHOKL AIKA EL TEKOI ER TIA EL CHUTEM.

“Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”—Ocholt 21:4

“A re chitechut a mo melechesokl e meloik.”—Isaia 35:6

“A re meiko a mo sebechir el omes.”—Isaia 35:5

“Tirkel rokui el mla mad a . . . mo tuobed er a debellir.”—Johanes 5:28, 29

“Ng mo diak a tal chad el kiei er a beluad el lmuut el mo mengeremrum el kmo ng smecher.”—Isaia 33:24

“Betok a redechel a wheat er a beluu.”—Psalm 72:16

A beluulechad el mla mo oltirakl er a moktek er a Dios: Remechuodel a lmuut el mo ngeasek, a resmecher me a remeiko a mo ungil, a rulekoad a lmuut el mo ngar, e betok a kall

MNGAI A KLUNGIOLEM ER A OSISECHEKLEL A BIBLIA

Lak di mereched el lomdasu el kmo aike el uleakuchei, a tekoi el di doureng. A Dios a mla tibir el kmo ngmo remuul aika el tekoi, e a Biblia a mesaod er a rolel a bo longetmokl.

Reteru el chad el mesuub er a Biblia el ousbech er a Biblia Olisechakl el babier

A Biblia a dirrek el louchais er a rolel e ngsebechel mo ungil a klengar er kau e mo dmeu a rengum. Ka molebedebek el kirel a sebekreng me a mondai er a klengar er kau. Aika locha uldimukl er a tekoi er a udoud, me a mondai er a telungalek, me a secherem, me a lechub e ngkodellel a betik er a rengum. A Biblia a sebechel el ngosukau e meskau a ongelaod loeak sel longer aika el ker:

Ngera uchul me kede chuarm?
Ngmekera e sebeched el outekangel a mondai el dechelebangel?
Ngmekera e sebechel mo er ngii a deurreng er a telungalek er kid?
Ngera duubech el mei er kid sel demad?
Ngsebeched el lmuut el mo meseterir a rebetik er a rengud el mla mad?
Ngmekera e sebechel el mo ulterekokl a rengud el kmo a Dios a mo oltaut a telbilel el kirel a ngar medad el klebesei?

Kau el menguiu er tia el babier a ochotii el kmo, ngsoam el mo medengei a osisecheklel a Biblia. E tia el babier a mo ngosukau. Bo modengei el kmo aike el parakurab a ngar er ngii a ker el obengkel el ngar er a ulebengelel a derta el llel. Te betok el miliol el chad a kmal sorir a chouaitia el rolel a omesuub el lobengterir a Resioning er a Jehovah el loeak a ker me a nger. Aki oureng el kmo kau me ngdirrek el mo soam el meruul er tiang. A Dios bo lomekngeltengat er kau er chelecha el bo mosuub el mo medengei el kmo, ngerang mera el lolisechakl a Biblia!