Rengeasek el Odam, Ko Molengeriakl er a Omesiungiu?
1. Ngoingerang e ngkirel a ngeasek el odam el mo omuchel el oltaut er sel ulekrael el ngar er a 1 Timothy 3:1?
1 “A lsekum a chad a semeriar el mo [olengeriakl er a omesiungel] . . . , e ng soal el osiik er a kot el ungil el ureor.” (1 Ti. 3:1) Aika el mlukrael el tekoi a melisiich er a rudam el mo olengeriakl er a omesiungir me lebo er ngii a techellir el mesiou er a chelsel a ongdibel. A omomdasu e ngdi sebechem el meruul er tiang a lsekum e ke klou el chad? Ngbai ungil a lsekum e ke omuchel el olengeriakl er a omesiungem sel dirk omngeasek. Ngoeak tiang e ngsebechem el mosisechakl e dirrek el ochotii el kmo ngsebechem el mo ta er a remesiou er a ongdibel sel bo mklou el chad. (1 Ti. 3:10) A lsekum e ke ngeasek e mla metecholb el odam, e ke mekerang e mo olengeriakl er a omesiungem?
2. Ngmekerang e mukeroul e mocholt a blekerdelem el soam el mesiou er a rebebil?
2 Mesiou er a Rebebil: Ngdiak el kirem el obes el kmo ke olengeriakl el kirel a ungil el ureor, el diak el kirel a chetengakl. Me a leuaisei, e momekeroul er a urungulem el soam mo olengeseu er a rudam me a rudos er kau. A ta er a rolel a omoruul er tiang a oeak a molebedebek er a ungil el kerebil a Jesus. (Mt. 20:28; Jn. 4:6, 7; 13:4, 5) Molengit er a Jehovah me lengesukau el mo semeriar er a rebebil. (1 Ko. 10:24) Kau ngsebechem el olengeseu er tirke el ngar er a ongdibel el mla mo mechuodel me a lechub e te mechitechut? Ngsebechem el mo melaml, e meriik, me a lechub e ke meruul aike el kirel ketmekill er a Blil a Ongdibel? Kau ngdirrek el sebechem el otebedii a cheldecheduch er a Skuul el kirel a Urerel a Dios a lsekum e ngdimlak a sebechel el otebedii er seikid el kesus? Ke mo metik el kmo sel moruul a tekoi el kirir a rebebil, e ngmo uchul a deuil a rengum.—Rel. 20:35.
3. Ngua ngera klungel a ultutelel a deleuill er kau me a Dios, e mekerang a momekeroul er ngii?
3 Deleuill er Kau me a Dios: Ngkmal klou a ultutelel a lsekum a mesiou er a ongdibel a kmes a deleuill er ngii me a Dios er a bai lengar er ngii a ileakl el dechal me a lechub e ngtekoi el sebechel meruul. A chad el kmes a deleuill er ngii me a Dios a melasem el omes a tekoi el uai a Jehovah me a Jesus. (1 Ko. 2:15, 16) Ngolecholt a rodech er a chedaol el klisichel a Dios. (Gal. 5:22, 23) Ngdirrek el blak a rengul el omerk er a klumech e nguu a tekoi er a Renged el mo kot. (Mt. 6:33) Ngsebechem el omekeroul er a deleuill er kau me a Dios el oeak sel mketmeklii a taem el di kau el mesuub. Tiang a uldimukl er ngii a omengiuel a Biblia er a bek el sils, omengiuel a bek el Ongkerongel me a Awake!, me a omengetmeklem el kirel a miting me a dirrek el sel bo er a miting. (Psa. 1:1, 2; Heb. 10:24, 25) A Paulus er a lolisiich er a ngeasek el Timothy el mo olengeriakl er a omesiungel, e ngmilluches el kmo: “Bo mkerekikl . . . [a] tekoi el molisechakl.” (1 Ti. 4:15, 16) Me a leuaisei, e bo leblak a rengum el meruul aike el subelem el ngar er a Skuul el kirel a Urerel a Dios. Mongetmokl er kau el kirel a odingel, e bo blechoel el oldingel. Mketmokl e moureor el kirel a turrekong er kau el kirel a omesiungem, el uai omesiou el pioneer, ureor er a Bethel, me a lechub e ng Skuul er a Biblia el kirir a Remesobil el Odam. A lungil a deleuill er kau me a Dios e ngosukau el mo ‘mengeroid er kau er a ngibeserreng er a klengeasek.’—2 Ti. 2:22.
4. Ngua ngera klungel a ultutelel a blekeradel el bekongerachel me a blakerreng?
4 Bekongerachel me a Blakerreng: A rechapostol a dimlak lebekikl el kmo ngmo meketmokl a ureor me a lechub e ngdiak e le rudam el mloterekokl el mo merous a kall el mo er tirke el mle metacherbesrir el Kristiano er a irechar, a mle ungil a chisir e le te bekongerachel e blak a rengrir. Tiang a mlo uchul e ngmle sebechir el kuk melatk el kirel a bebil el meklou a ultutelel el tekoi. (Rel. 6:1-4) Me sel lebo er ngii a ngerechelem er a ongdibel, e moruul er ngii el ngar sel tkurrebab el sebechem. Moukerebai er a Noah, el ngii a mle kerekikl el oltirakl aike el ulekrael el lengilai el kirel a teketekel a arhe. (Gen. 6:22) A blakerreng a lomes er ngii a Jehovah el kmo ngklou a ultutelel e dirrek el ochotii el kmo ngmla mukeroul a deleuill er kau me ngii.—1 Ko. 4:2; momes er a baks el “Klungiolel a Osisechakl.”
5. Ngera me ngkirir a rengeasek el odam el mo olengeriakl er a omesiungir?
5 El di ua aike el ngar er a ulaoch, a Jehovah a orreched er a ureor el mengudel er a remelemalt a rengrir el chad. (Isa. 60:22) A bek el rak, e a bekord el 250,000 el chad a mo metecholb. A resechal el rredemelel a ureor e kmes a deleuill er tir me a Dios a usbechall el mo omekerreu a ngerachel er a ongdibel e le ngbetok a rebeches el chad el me soiseb er a klemerang. Chelecha el taem e ngkmal betok a ureor el ruoll el kirel a omesiunged el mo er a Jehovah. (1 Ko. 15:58) Rengeasek el odam, ko molengeriakl er a omesiungiu? A lsekum e ko meruul el uaisei, e ngbelkul a kmo ngsomiu el meruul er tia el kmal ungil el ureor!
[Blurb el ngar er a 2 el llel]
A resechal el rredemelel a ureor e kmes a deleuill er tir me a Dios a usbechall el mo omekerreu a ngerachel er a ongdibel e le ngbetok a rebeches el chad el me soiseb er a klemerang
[Baks el ngar er a 3 el llel]
Klungiolel a Osisechakl
A rengeasek el odam el rredemelel a ureor, a ngmai a klungiolir sel sekum a remechuodel a mesterir a ngerechelir e dirrek el olisechakl er tir. A uriul er a miting, e ngike el odam el oldingel a ongdibel a mle dengchokl er a stage el melisiich er a ta er a publisher. Ngmilsa ta el buik el dechor me nguleker er ngii a lsekum e ngmilengiil er ngii me bo lechadecheduch. Ngika el ngeasek el odam a dilu er ngii el kmo ngerechelel el vacuum er a stage sel bo lemerek a miting. Alta demal me a delal a mla mo sorir el merael, engdi ngii a dimlak el soal el merael el dimerekmo lerellii tia el ngerechelel. Ngika el odam el oldingel a ongdibel a kilengei el mo dengchokl er a kuk ta er a basio. Ngmelekoi el kmo: “A remechuodel el ngar sel ongdibel a mle kerekikl el olisechakl er a rengeasek el odam el oeak sel lomesterir a ngerechelir er a ongdibel. Sei a uchul me ngmle sebechir el ouchais er ngak el kirel a ngeasek el odam el rredemelel a mo ta er a remesiou er a ongdibel er sera kusiou er a ongdibel er tir.”