Molatk El Kmo Ngkirel El Mo Ua Ngerang A Blekerdelem

1, 2. Ngkired el mekerang me denguu a kengei er a Dios?

A RUUMESINGD el chad a kerekikl a omerellir e le ngchetirir a rechad a bo lengodech a uldesuir el bedul tir. Engdi kid el Kristiano a bai klou a ultutelel er kid a uldesuel a Jehovah el bedul kid. E le ngii Ngike el kot el ngarbab el Dios el “uchelel a rokui el klengar.”​—Psa. 36:9.

² A apostol el Petrus a dilu el kmo: “Ma le uaisei el meterakl el nguemed aika el tekoi el rokui, e ngkol kirel el mo ua ngera el chedaol a blekerdeliu me a omerelliu el olecholt a omeluu er a Dios.” (2 Pe. 3:11, NW) Me a lsoad el nguu a kengei er a Jehovah, e ngkirel a blekerdeled el mo klikiid e chedaol er a osengel. E tiang a uldimukl er a uldesued, omerelled, me a omengull er kid el mo er a Dios. Ngdirrek el kired el “olecholt a omeluu er a Dios” e le ngbetik a rengud er ngii. A Jehovah a “omes a reng” me ngmedengei el kmo a blekerdeled ngklikiid er a osengel me a lechub e ngdiak. Ngdirrek el medengei el kmo a omengull er kid ngmo er ngii el di ngii el tang me a lechub e ngdiak.​—1 Kr. 29:17.

3. Ngera el ker a kired el di kid el oker?

³ A Satan el Diabelong a diak el soal a bo denguu a kengei er a Dios. Ngbai kmal soal el mo er a tkurrebab el sebechel el melemall er a klausechelei er kid me a Jehovah. Me ngdi blechoel el ousbech a blulak el melasem el mengeblad er kid me bo lak dosiou er a Jehovah. (Jn. 8:44; 2 Ko. 11:13-15) Me ngungil a di lekid el oker el kmo, ‘Ngmekerang a Satan a longeblad er a rechad? Ngera sebechek el meruul me bo kumekerreu er a klausechelei er ngak me a Jehovah?’

NGMEKERANG A SATAN A LONGEBLAD ER A RECHAD?

4. Ngerang melasem el meruul er ngii a Satan el mo melemall er a deleuill er kid me a Dios? E ngera uchul?

⁴ A disaiplo el Jakobus a milluches el kmo: A “chad a di ngii el mor ongarm sel le mekesuseu e lobedikl er a ikel mekngit el soal a rengul. E a ikel mekngit el soal a rengul a be le dubech e ng mo mechellii a klengit; e a klengit, a le medechang e ng mechellii a kodall.” (Jak. 1:14, 15) A Satan a kmal soal el melemall er a deleuill er kid me a Dios me ngmelasem el mengesuseu er a rengud. E le rengud a uchelel a rokui el urunguled.

5, 6. (a) Ngmekerang a Satan a lolasem el mengesuseu er a rengud? (b) Ngera el edei el tekoi a lousbech a Satan el omekdubech a mekngit el urunguled? E ua ngera dechal sel lousbech aika el tekoi?

⁵ Ngmekerang a Satan a lolasem el mengesuseu er a rengud? A Biblia a kmo: “A beluulchad el rokir a ngar eungel Ngikel Mekngit.” (1 Jn. 5:19) Me a Satan a ousbech a “tekoi er a beluulchad” el omedikl er a rechad. (Monguiu er a 1 Johanes 2:15, 16.) Ngar er a chelsel aika el mereko el betok el telael el rak, e a Diabelong a mla remuul a tekoi er tia el beluulechad el mo mengeblad er a rechad. Me kid el kiei er a chelsel a uchul me ngkired el omekerreu er kid er aika el bedeklel.​—Jn. 17:15.

⁶ A Satan a melasem el omekdubech a mekngit el urunguled. Ngmeruul er ngii el ousbech a edei el “tekoi er a beluulchad” el lulsaod a apostol el Johanes el (1) a “mekngit el ngelbesel a klechad,” (2) a “ikel leues a chad e nguibes er ngii” me a (3) “ikel rokui el uchul e ng kedidai a rengrir” a rechad. A Satan a uluusbech aika el edei el tekoi el mengetikaik er a Jesus er a lengar er a ked. E mla mo betok el rak el ousbech aika el tekoi a uchul me ngkmal meduch el ousbech el omedikl er a rechad. Ngdirrek el medengei el kmo ngera er ngii a oureor er a derta el chad. Me a uchei er a bo dosuub el omekerreu er kid, e a kot e bo desa rolel er a Diabelong e ngmle sebechel el mengeblad er a Eva engdi ngdimlak el sebechel el chobeldir a Ngelekel a Dios.

A “MEKNGIT EL NGELBESEL A KLECHAD”

7. Ngmilekerang a Satan er a lousbech a “mekngit el ngelbesel a klechad” el mengetikaik er a Eva?

⁷ Kid el rokui a ousbech a kall me dolemolem el di ngar. A Dios a milebii tia el chutem el mo omekdubech a betok el bedengel a kall. A Satan a sebechel el ousbech a kall el mengetikaik er kid el mo meruul a tekoi el diak lodeuir a rengul a Dios. Me bo desa sel rolel e ngchilebeldir a Eva. (Monguiu er a Genesis 3:1-6.) Ngdilu er a Eva el kmo ngdiak lemad a bo lekelii a redechel a “kerrekar er a mo medengei a ungil ma mekngit.” Ngbai dilu el kmo a bo lekelii e ngmo uai a Dios. (Gen. 2:9) A mle belkul a tekingel a kmo a klengar er a Eva a dimlak lultuil er a blekongesenges er ngii el mo er a Dios. Tiang a mera el mle klou el cheleblad! Me a uriul er a ledelemii tia el uldasu er a uldesuel a Eva, e ngmlo kirel el di ngii el melilt el kmo ngmo mekerang: Ngmo otngeklii tia el uldasu me a lechub e ngmelemolem el omdasu er ngii me ngmukeroul a ngelbesel a rengul el kirel tia el rodech. Me alta e ngmle sebechel el menga redechel aike el kuk bebil er a kerrekar, engdi ngdi millemolem el melatk el kirel sel kerrekar el ngar er a belngel a sers. Me tiang a mlo uchul me ngkillii tia el rodech. Me a Satan a rirellii el mo nguibes a rengul er a tekoi el Ngike el Ulemeob er ngii a dilu el kmo ngdimlak el kirel el mo menga er ngii.

8. Ngmilekerang a Satan er a lousbech a “mekngit el ngelbesel a klechad” el mengesuseu er a Jesus? E ngera me ngdimlak loureor a chelebeldil?

⁸ A Satan a dirrek el millasem er a osisiu el cheleblad el mengeblad er a Jesus. Ngmillasem el mengeblad er a Jesus el ousbech a kall er sel taem er a lengar er a ked el 40 el sils me a 40 el klebesei el diak leblengur. Ngdilu er ngii el kmo: “A lsekum ke Ngelekel a Dios e mdu er tial bad me lobult el mo blauang.” (Lk. 4:1-3) Me a Jesus a mle chelebangel a eru el rolel a omelilt: Ngmle sebechel el ngiltii el diak lousbech er a klisichel el kirel a kall me a lechub e ngkongei el ousbech er ngii. Ngmle ungil el medengei el kmo ngdiak el kirel el ousbech er a klisichel el di meruul a soal. Me alta e ngkmal mle songerenger, engdi a klausechelei er ngii me a Dios a mle lmuut el klou a ultutelel er a kall. Me ngdilu el kmo: “A Chedaol Llechukl a kmo, ‘A klengar er a chad a diak di lultuil er a kall e le merekong; ng dirrek el ultuil er a bek el tekoi el tuobed er a ngerel a Dios.’”​—Mt. 4:4; Lk. 4:4.

A “IKEL LEUES A CHAD E NGUIBES ER NGII”

9. Ngmekerang a osenged e sebechel el mengetikaik er a uldesued? Ngmilekerang a Satan er a lousbech er ngii el mengeblad er a Eva?

⁹ A ta er a chelebeldil a Satan a losaod er ngii a Johanes el kmo, ngtekoi el “leues a chad e nguibes er ngii.” A chad a sebechel el mo omuchel el oureng er a kmung ngerang a lsekum ngomes er ngii. Me a Satan a uluusbech er tiaikid el omeruul el mengeblad er a Eva er a ledu el kmo: “Ng mo mellomes a rengmiu.” Me a cherengel a taem el lengellomel er tia el rodech a Eva, e ngmocha oureng el menga er ngii. Me a Eva a mlo omes er tia el kerrekar “ma redechel lungil osenged er ngii.”

10. Ngmilekerang a Satan er a lousbech a “ikel leues a chad e nguibes er ngii” el mengesuseu er a Jesus? E ngera mle nger er a Jesus?

¹⁰ Ngmilekerang a Satan er a lousbech a “ikel leues a chad e nguibes er ngii” el mengesuseu er a Jesus? A Satan a “di mle ua rechedel a busechmad e ng ocholt er ngii a rengedel a beluulchad. E dilu er ngii el kmo, ‘Ak mo meskau omengedereder er a ikal rokui ma klebkellel.’” (Lk. 4:5, 6) A Jesus a dimlak leues a rokui el renged er tia el chutem e ngbai di ua lulemes a klebkellel aika el renged. A Satan a locha ulemdasu el kmo a Jesus a mo nguibes er a tekoi el lulemes, me ngdilu er ngii el kmo: “Ma lsekum ke mo terrob e mengull el meluluuch er ngak, e ak mo meskau el rokui.” (Lk. 4:7) Engdi a Jesus a kmal dimlak lekengei el mo ua blekerdelel a chad el oltirakl er a uldesuel a Satan. Me ngdi mle mereched el dmu el kmo: “A Chedaol Llechukl a kmo, ‘Mongull el meluluuch er a Rubak el Dios er kau, e di le ngii el tang cho mosiou er ngii!’”​—Lk. 4:8.

A “IKEL ROKUI EL UCHUL E NG KEDIDAI A RENGRIR”

11. Ngmilekerang a Eva e mecheblad er a Satan?

¹¹ Me a ulebongel el tekingel a Johanes a kmo: A “ikel rokui el uchul e ng kedidai a rengrir” a rechad. Sera lengar er tia el chutem a Adam me a Eva el di tir el terung, e ngdimlak el sebechir el lousimang e le ngdimlak a rechad el sebechir el olecholt aike el ngar er ngii er tir. Me nguaisei engdi ngmlo mekedidai a rengrir. A Satan a rirellii a Eva el mo omdasu el kmo ngar er ngii a tekoi el kirel nguu engdi a Dios a diak lekengei el lomsang. Me a Diabelong a dilu er ngii el kmo a lsekum ngmo kolii a redechel “sel kerrekar er a mo medengei a ungil ma mekngit,” e ngmo ‘ua Dios el medengei a ungil ma mekngit.’ (Gen. 2:17; 3:5) A Satan a mle soal a Eva a bo lomdasu el kmo ngsebechel el kiei el klengar er ngii a diak lultuil er a Jehovah. Me a kldidairreng a locha ta er a uchul me a Eva a mlo oumerang er tia el blulak el tekoi. Me ngkillii tia el blul el rodech e ulemdasu el kmo ngdiak bo lemad. Engdi ngkmal mle cheleuid a uldesuel.

12. A Satan nguluusbech er a ngera el ta er a rolel el mengesuseu er a Jesus? E ngera mle nger er a Jesus?

¹² A Jesus a milecherei a kot el ungil el kerebai el kirel a klengariourreng el kuk mle ngodech er a blekerdelel a Eva. A Satan a millasem el mengesuseu er a Jesus me bo loruul a tekoi el mengas a rengrir a rechad e lolasem er a Dios. Engdi a Jesus a kmal mle mesisiich el oltngakl er tia el tekoi e le ngdi olechotel a kldidairreng! Me ngkmal mle bleketakl a tekingel er a ledu el kmo: “A Chedaol Llechukl a kmo, ‘Lak mongarm er a Rubak el Dios er kau.’”​—Monguiu er a Lukas 4:9-12.

NGMEKERANG A DOMEKERREU ER A KLAUSECHELEI ER KID ME A JEHOVAH?

13, 14. Ngmekerang a Satan a lolasem el mengeblad er kid?

¹³ Chelecha el taem e a Satan a ousbech a osisiu el cheleblad el uluusbech el mengesuseu er a Eva me a Jesus. Ngousbech a “mekngit el ngelbesel a klechad” el mengesuseu er a rechad el mo er a deleboes me a lechub e ngimis el blengur me a omelim. Ngdirrek el ousbech a “ikel leues a chad e nguibes er ngii” el mengesuseu er a rechad el mo omes a siasing er a remeau el oumesingd el ngar er a Internet. Ngdirrek el ousbech a “ikel rokui el uchul e ng kedidai a rengrir” a rechad el rulleterir el di mo sorir a klisiich, chetengakl, me a betok el klalo!

¹⁴ A Satan a ousbech a “tekoi er a beluulchad” el ua chad er a omenged a lousbech a uaol. A uaol a kmal ungil er a osengel a ngikel engdi ngar er a chelsel a uaol e ngar er ngii a chirocher. Me ngdi osisiu, a Satan a ousbech a tekoi er a bek el sils el melasem el meruul er kid el mo omtok a llechul a Dios. Ngdirrek el soal a bo domdasu el kmo aike el dousbech el rullii a klengar er kid el mo ungil a lmuut el meklou a ultutelel er a doruul a soal a Dios. Me kau, ngsebechem el mecheblad er a Satan?

15. Kede mekerang e oukerebai er a Jesus me lak demecheblad er a Satan?

¹⁵ A Eva a mlecheblad er a Satan engdi a Jesus a dimlak. Bek el taem el lolasem a Satan el mengeblad er a Jesus e ngulenger er ngii el uluusbech a Bades e dmu el kmo: “A Chedaol Llechukl a kmo.” Me a lsekum ngblak a rengud el mesuub er a Biblia, e ngmo sebeched el ungil el melatk a Bades el ngosukid er sel taem el bo dechelebangel a omengesuseu. (Psa. 1:1, 2) Me sel dolatk a kerebai er tirke el mle blak a rengrir el mesiungel a Dios e ngdirrek el sebechel el ngosukid el mo blak a rengud el di uai tir. (Rom 15:4) Me a lsekum kede oba dmolech el omengull el bedul a Jehovah, e mo betik a rengud er aike el tekoi el betik a rengul er ngii e ouketui aike el chetil el tekoi, e ngmo uchul a ulekerreuid.​—Psa. 97:10.

16, 17. Ngera ngrullii er kid a omelebedebeked?

¹⁶ A apostol el Paulus a melisiich er kid el mo ungil el ousbech er a omelebedebeked el mo omdasu el uai a Jehovah el diak el ua rechad er tia el beluulechad. (Rom 12:1, 2) Me ngomeklatk er kid el kmo ngkired el mo kerekikl a uldesued er a ledu el kmo: “Aki ousbech el olturk a cheleuid el omesodel a tekoi; ma ikel rokui el tekoi el lousbech a re chad el mekedidai a rengrir el omtok a meral tekoi el dodengei el kirel a Dios. Aki chosimer a rokui el uldasu e mult el mo oltirakl er a Kristus.” (2 Ko. 10:4, 5) Me a uldesued a kot el mesisiich el sebechel el mengesuseu er kid, me ngkmal kired el melasem el di omdasu el kirel aike el tekoi el lodeuir a rengul a Dios.​—Fil. 4:8.

¹⁷ Ngkmal kired el oltngakl a mekngit el uldasu a lsekum ngsoad el mo klikiid. Ngkired el mo betik a rengud er a Jehovah el ‘klikiid a rengud.’ (1 Ti. 1:5) Engdi a rengud a kot el cheblad, e dirrek el meringel el bo dolechesukid el kmo kede mla mechetikaik er a “tekoi er a beluulchad.” (Jer. 17:9) Me ngklou a ultutelel el dotireklii a tekingel a Paulus el kmo: “Ka bo mungil el merriter er kemiu e mosekemiu el kmo kom ungil el oltirakl a cho moumeral tekoi.” Me sel dosuub er a Biblia e ngungil a di lekid el oker el kmo, ‘A uldesuek me a urungulek ngoldeu er a rengul a Dios?’​—2 Ko. 13:5.

18, 19. Ngera uchul me ngsoad el mo blak a rengud el mesmechokl a blekerdeled el mo odeuir a rengul a Jehovah?

¹⁸ A ta er a tekoi el sebechel ngosukid el mo oltngakl a “tekoi er a beluulchad” a ngar er a tekingel a Johanes el kmo: “A beluulchad ma ikel rokui el ngar a chelsel, el lesal ngemokel a rengrir a re chad er ngii, a di mei el remiid; e ngdi ngikel meruul a ikel odeuir a rengul a Dios a di melemolem er a klengar er ngii el diak a ulebengelel.” (1 Jn. 2:17) Sel domtab er tia el beluulechad er a Satan e ngua di lolemolem el diak a ulebengelel. Engdi ngmo er ngii a ulebengelel. Me sel dodengei el kmo a rokui el tekoi er tia el beluulechad a kmedu el mo nguemed e ngosukid me ngdiak demecheblad er a Satan.

¹⁹ A apostol el Petrus a milluches el kmo ngkirel a blekerdeled el mo odeuir a rengul a Dios er chelecha el di ‘dongiil e dorreched er sel Sils er a Dios el mei, el bo le medul er ngii el mo diak a eanged ma ikel ngar ngii er a eanged di lobulech er a kleald el mo diak.’ (2 Pe. 3:12) Ngkmal di kmedung e sel sils a mei me a Jehovah a mo okngemed a rokui el tekoi er tia el beluulechad er a Satan. A Satan a dirk melemolem el ousbech a “tekoi er a beluulchad” el mengeblad er kid el ua omerellel el mo er a Eva me a Jesus. Ngkmal diak el soad el mo ua Eva el di melemolem a ngelbesel a rengud. E le tia el omeruul a rullid el mo ouchelid er a Satan. Ngkired el mo ua Jesus el oltngakl aika el chelebeldil a Satan alta ngkmal ungil er a osenged. Me bo leblak a rengud el rokui el mesmechokl a blekerdeled el mo odeuir a rengul a Jehovah.