8 EL SUOBEL

Mousbech a Okesiu Lolisechakl

Mateus 13:34, 35

KEDEB EL OMESODEL: Molengeriakl er a rolel a omolisechakl el ousbech a beot el okesiu el omeksemeriar er a rurrenges er kau, e osisecheklterir er aike el meklou a ultutelel el tekoi.

ROLEL A MORUUL ER NGII:

Molilt a beot el okesiu. Mosuub er a Jesus el ousbech a tekoi er a bek el sils el omeketakl a meklou a ultutelel el klemerang, me a beot el tekoi el smaod a meringel a omesodel el tekoi. Lak molechel a betok el omesodel a okesiu el rullii el mengal mo meringel. Bom kerekikl me a tekoi el mousbech el mesaod er a okesiu a mera el ngar ngii a otutel er a osisechakl me bo el sebechir a rurrenges er kau el mo medengei a tekoi el mosaod.

Bo mungil el omtab. Momtab er a beluulechad, e mosuub aike el babilenged a Rekristiano, e morrenges er a remeduch el sensei. E sel moruul uaisei, e ngsebechem el melai a klubelem er a okesiu el sebechem el mo ousbech me ke lmuut el mo ungil lolisechakl. Mketmokl aika el okesiu er a file er kau.
Molatk a tekoi el mo uchul a klungiolir a rurrenges er kau. Molilt a okesiu el uaike el tekoi er a bek el sils me aike el lesemeriar er ngii. E bom kerekikl me a okesiu el mousbech lak bo luchul e lomekrur, me a lechub e lolibas er tir.
Molisechakl er sel klou a ultutelel el tekoi. Mosaod er a klou a ultutelel el tekoi el ngar er a okesiu, e lak molasem el mesaod a betok el mekekerei el tekoi. Bom kerekikl me a rurrenges er kau lak di lolatk er a okesiu el mulsaod er ngii, e bai dirrek el lolatk er a klou a ultutelel el tekoi el ngar er a okesiu.