Reference el kirel a Subeled er a Miting er a Klengar me a Omesiunged
JULY 4-10
MEKREOS EL TEKOI EL NGAR ER A BIBLIA | 2 SAMUEL 18-19
“Barsilai a Ungil Kerebai el Kirel a Tabesul el Uldasu”
Moba Klengariourreng er a Chelsel a Taem er a Ringel
5 A blekerdeled a sebechel lochotii el kmo kede oba klengariourreng me a lechub e ngdiak er sel taem el lemengodech a ngerachel el mloterekokl er kid me a lechub e ngblekerdelel a klengar er kid. Me ngsebeched el nguu a klubeled er a Barsilai el ngii a kmal mle kmeed el sechelil a King el David. Sera bo el 80 a rekil, e a David a ullengit er ngii el mo kiei er a Jerusalem lobengkel. Me alta tiang a kmal mle klou el chetengakl el tekoi, engdi a Barsilai a dilu el kmo ngbai ungil a lenguu tia el techall el msa Kimham el locha mle ngelekel.—2 Samuel 19:31-37.
Mesa Klungiolel a Klisichir a Remekekerei
7 Molatk er a Barsilai el ngii a mle okai a rekil er a lolengit er ngii a King David el mo chedal a ngarbab el kort er ngii. Ngika mle tabesul a uldesuel me ngmle kotouar er a ongtil a king. A Barsilai a mle medengei el kmo ngdiak el sebechel remuul a betok e le ngkmal chudelang me ngullengit me a kekerei el chad el Kimham me lebong lomtechei er ngii. (2 Sa. 19:35-37) A remechudelang lodam a di ua Barsilai el kmal dmeu a rengrir el mechititerir a remekekerei me te ngmai a techall er a omesiou.
Moba Klengariourreng er a Chelsel a Taem er a Ringel
6 Ngera me a Barsilai a ultngeklii tia el okedong? Nglocha chiliis a ngerachel, me a lechub e ngmle soal a di beot el rolel a klengar? Ngdiak, ngbai olechotel a klengariourreng er ngii, e le ngmle medengei el kmo ngmla mengodech a blekerdelel a klengar er ngii, e dirrek el mle ungil medengei a tekoi el dikea lsebechel el remuul. (Monguiu er a Galatia 6:4, 5.) Me ngkired el mo ua Barsilai el mo diak di dolatk a soad me a lechub e domekesiu er kid el mo er a rebebil, e ngbai soad el msa Jehovah aike el kot el ungil er kid. Tiang a lmuut el klou a ultutelel er a ngii di el ileakl el ngerachel me a lechub e ngchetengakl el tekoi. (Galatia 5:26) Me a lsekum e ngmo ngariou a rengud e kede kongei el teloi er a rudam er kid el mengebkall er a Jehovah e dirrek lolengeseu er a rebebil.—1 Korinth 10:31.
Morriter er a Tekingel a Dios
‘Ak Mlor a Klaidesachel e Mla Rokir’
19 A lsekum e ngar ngii a chelitechetul a bedengem e omdasu el kmo ngdiak a medengelii a ringelem, e ngungil molatk a blekeradel el dilubech el mora Mefiboseth. (2 Sa. 4:4) Ngchilarm e le ngmle chitechut, e dirrek a King David a mle cheleuid loukerrekeriil er ngii. Aikang a dilubech el mora Mefiboseth el diak el kngtil a uchul. Engdi ngdimlak lebechei ngii el tekoi me lerellii el mo mekngit a uldesuel; ngbai uleba omereng el saul el kirel aike el ungil tekoi er a klengar er ngii. Ngmirreng a sulel a David el kirel a ungil blekerdelel el bedulngii er a uchei. (2 Sa. 9:6-10) Me sera bo lecheleuid a David loukerrekeriil, e ngmlo ungil lomtab a tekoi. E dimlak lebechei a cheleuid er a David me lerellii el mo kesib a rengul. Ngdirrek el dimlak loltelechakl er a Jehovah el kirel a omerellel a David. Ngbai ulsiik a rolel e mo sebechel lolengeseu er a king el lengileltii a Jehovah. (2 Sa. 16:1-4; 19:24-30) A Jehovah a liluches a chisel a Mefiboseth er a chelsel a Tekingel me ngsebeched el ngmai a klubeled er ngii.—Rom 15:4.
JULY 11-17
MEKREOS EL TEKOI EL NGAR ER A BIBLIA | 2 SAMUEL 20-21
“A Jehovah Dios er a Llemalt”
A Ker el Mla er a Remenguiu
Tia el telbiil a kmal dirk uluureor er a temel a King Saul. Ngika mlo diak loltirakl er tia el telbiil e millasem lomekoad er tir. Tia uchul me ngmla er ngii a “klengit er a koadelchad . . . [er] a Saul ma telungalek er ngii.” (2 Sa. 21:1) E a David a mocha king. Me a rechad er a Gibeon el silobel a mlo mengedecheduch er ngii el kirel. A David ulleker er tir el kmo ngmekera lesemecheklii a kngtil a Saul e bo lsebechel a Jehovah lomekngeltengat er a beluu. Tirka dimlak lolengit a udoud te bai ullengit me bo lokodeterir a reteuid er a rengelekel ngika el “chad el ulemekoad” er tir. (Ule. 35:30, 31) Me a David a kilengei er a ongterir.—2 Sa. 21:2-6.
Tia diak di louchais er kid el kirel a tekoi el dilubech er a reksi. A llechul a Dios a bleketakl. Ngmelekoi el kmo: “Re ngalek me ng diak le mokoad el kirel a tellemall el le riruul a re demerir ma re derrir.” (Dut. 24:16) Me a Jehovah diak bo lekengei er a kodellir tirka el teru el ngelekel a Saul el sechal me a reteim er a rengelekel a ngelekel a lsekum e ngdimlak a telemellir. Tia el llach a dirrek el dilechelir el kmo: “A chad a mo mokoad el di kirel a ikel tellemall el ngii a riruul.” Me ngbelkul a kmo tirka el ngelekel a Saul a locha dirrek el mle teloi er ngii er a lolasem lolekngemed er a rechad er a Gibeon. Me te merridm el kirel a kngterir.
Morriter er a Tekingel a Dios
A Remechuodel el Kristiano a ‘Oureor el Obengked el kirel a Deuil a Rengud’
14 A rechedal a Jehovah el meliuekl er a beluulechad a melemolem el mesiou er a Dios, alta Satan me a rebebil a melasem el omekringel er tir. A rebebil er kid a mla chelebangel a kmal meringel el tekoi. Engdi kede mle mui el oumerang er a Jehovah e di mle blak a rengud er a chelsel aika el kmal meringel el blekeradel, el di ua David el mla er ngii a klisichel el mekodir a Goliath. Engdi ngar er ngii a taem e kede mo omdasu el kmo ngdikea klisiched el outekangel er a beluulechad er a Satan, me ngbeot er kid el mo mechitechut a rengud er aike el mle sebeched el outekangel er a uchei. Ngar aikaikid el taem, e a ngeso el lebeskid a ta er a remechuodel a sebechel el ngosukid el lmuut el mo dmeu a rengud e mo mesisiich. Te betok er kid a mla mongeseu el oeak tia el rolel. A pioneer el odos el 60 me a derengel a rekil a dilu el kmo: “Ngmla er ngii a taem el dimlak lungil a renguk, me a berkel a klumech a rirellak el kmal mo mesaul. Me a ta er a remechuodel a mlo medengelii tiang me ngmilengedecheduch er ngak. A cheldechedemam el mlengai er a bades a kmal mlo uchul a omelisiich. Ak mlo oltirakl a ulekrael el lebilskak el mlo uchul a klungiolek. Ngkol ua ngera el bltikerreng a lulechotii er a bo lodengelii a chelitechetul a renguk e lengesukak!” Ngkmal ungil sel dodengei el kmo te ngar er ngii a remechuodel el omekerreu er kid e di kltmokl el olengeseu er kid, el ua Abisai el mle kltmokl el mo olengeseu er a David.
JULY 18-24
MEKREOS EL TEKOI EL NGAR ER A BIBLIA | 2 SAMUEL 22
“Multuil er a Jehovah el Kirel a Ngeso”
cl 19 par. 11
Ngmera el Sebechem el Mo ‘Kmeed . . . er a Dios’?
11 Nguaisei, kede menguiu el kmo a “klisichel [a Dios] a imis el klou.” (Isaia 40:26) Engdi ngkmal mera el ileakl sel donguiu el kirel a losobelterir a rechad er a Israel er a Bekerkard el Daob e lomekerreu er tir el 40 el rak er a ked. Kede kora meluches er a uldesued er a lobii a daob er a belngel. E a rebekord el 3,000,000 el chad a merael er bebul a medirt el bertakl me a daob a ua kboub el dechor er a bita me a bitang. (Exodus 14:21; 15:8) Ngsebechem el mesa ulekerreuil a Dios er a lengar er a ked. A ralm a tilobed er a risois. E a becheleleu el tane a rirebet er a chutem el kelir. (Exodus 16:31; Ulecherangel 20:11) Me a Jehovah ochotii el kmo ngdiak di lengar ngii a klisichel ngdirrek lousbech er ngii el kirir a rechedal. Ngdiak el lesal kmal olterekokl er a rengud el kmo kede meluluuch el mora mesisiich el Dios el ngii a “omderungel er kid e klisiched, el di blechoel el kldmokl el olengeseu er a belsechel a chelebuul”?—Psalm 46:1.
A Jehovah a Blak a Rengul e Kltmokl el Ousubes
3 A blak a rengul el chad a melemalt a omerellel el mo er a betik er a rengul. Ngoubltikerreng el mo er ngii sel lolemolem el olengeseu e lolisiich er ngii. Ngkltmokl el meruul el uaisei er a chelsel a ungil el taem me a mekngit. A Biblia a melekoi el kmo a Jehovah a “blak a rengul.” Ngdiak a ngii di el chad el sebechel el mo mekesiur a blakerreng er ngii.—Dut. 32:4.
4 Ngmekerang a Jehovah e ochotii el kmo ngblak a rengul? Ngblechoel el olengeseu er a reblak a rengrir el mesiungel. E a ta er tir el King el David a uleldanges er a Jehovah el kirel a blakerreng er ngii. (Monguiu er a 2 Samuel 22:26.) Sera lechelebangel a meringel el blekeradel a David e a Jehovah a mle blechoel el omekrael, e omekerreu e mesebechakl er ngii. (2 Sa. 22:1) Me a David a mlo medengelii sel blakerreng er a Jehovah el okiu a tekingel me a omerellel el olengeseu er ngii. Ngera uchul me a Jehovah a mle blak a rengul el mo er a David? E le David el mle blak a rengul el mo er ngii. A Jehovah a kmal mo dmeu a rengul el omes er a blakerreng er a remesiungel, e mo ochotii a blakerreng el mo er tir.—Osi. 2:6-8.
Morriter er a Tekingel a Dios
Momekeroul er a Klengariourreng
7 A klengariourreng er a Jehovah a kmal mle klou a lerellii er a uldesuel a David, me ngdilu el kmo: “RUBAK, kau a cheuotelek e osebelek; ke mla ngosukak e ongesecheklak.” (2 Samuel 22:36) A David a milsaod el kmo a klengariourreng er a Jehovah el omekerreu er ngii a uchul me ngmle ngarbab a deruchellel. (Psalm 113:5-7) Me nguaisei, aike el ungil el blekerdeled, me a duch er kid me a techelled a rokui el lebilskid a Jehovah. (1 Korinth 4:7) Me a chad el olecholt er a klengariourreng a mo “kot el ngarbab” e le Jehovah a mo sebechel el ousbech er ngii. (Lukas 9:48) Me bo dosaod.
2 Samuel 22:36, NW: Ke meskak a tekerengem er osobel, me a klengariourreng er kau a rullak el mo chetengakl.
JULY 25-31
MEKREOS EL TEKOI EL NGAR ER A BIBLIA | 2 SAMUEL 23-24
“Kau, Ke Kongei el Melenget?”
it-1 146
Arauna
Arauna kilengei el di msa David a chutem me a kerbou me a idungel, me nguaisei engdi ngii a dilu er ngii el kmo ngmo harau. A 2 Samuel 24:24 ochotii el kmo a David a milecherar a blil a omerusech el grain me a kerbou el 50 el sikel ($110). Me nguaisei engdi a 1 Kronika 21:25, NW ouchais el kmo a David a mle harau er a 600 el kolt el sikel (bekord el $77,000) el kirel a chutem. Ngike el milluches er a Ongeru el Samuel a di milsaod el kirel a ocheral a basio el mo blil olengetongel me a mle usbechall el klekedall el kirel omelenget el mileketmokl. Me a udoud el milechoit el losaod er ngii a di kirel aika el tekoi. Me nguaisei engdi ngike el milluches er a Kot el Kronika a mesaod el kirel aike el mle kirel a templo, el ngii a lulekedecherur er tia el chutem me a udoud el milechoit el kirel. (1Kr 22:1-6; 2Kr 3:1) Ngkmal mle klou a blil a templo me ngsebeched el kmo aika el 600 el kolt el sikel a milechoit el kirel tia el rokir el chutem el diak el di le sel kekerei el basio el lebilecherar a David el kirel a olengetongel.
Mosuub a ‘Teletelel a Klemerang’
8 A lsekum a chad er a Israel a millenget el mla er a rengul el mo er a Jehovah el olechotel a klou el omereng el saul er ngii, me a lechub e ngodersii a delaol el tenget el olengit a kengei er a Jehovah, e nglocha dimlak el meringel er ngii el melilt er a charm el mo tenget. Ngii el chad a mo dmeu a rengul el msa Jehovah sel kot el ungil er ngii. A Rekristiano er chelechang a diak loldars a tenget el mildung er a Llach er a Moses, engdi te meruul a tengetengir sel lousbech a temir me a klisichir me aike el ngar er ngii er tir el mesiou er a Jehovah. A apostol el Paulus a milsaod er a ochotel a omelatk er a Rekristiano me a “chomeruul lungil ma blekerurau” el ua tenget el oldeu er a rengul a Dios. (Hebru 13:15, 16) A osengir a rechedal a Jehovah el kirel a omesiungir a ochotii a omereng el saul er tir el kirel aike el rokui el tekoi el Dios a mla mesterir. Me ngngar er ngii a klaisisiu er a blekerdelir me a moktek er a Rekristiano el mesiou er a Jehovah er chelechang, me tirke el millenget a tengetengir el mla er a rengrir er a irechar.
Morriter er a Tekingel a Dios
Omesodel a Babier er Ongeru el Samuel
23:15-17. A David a mla er ngii a dmolech el omengull er ngii el kirel a llechul a Dios el kirel a klengar ma rasech me sei a uchul me ngngar er tia el taem e ngmilengeroid er ngii el mo meruul er a tekoi el mle osisiu el ua telemellel sel llach. Ngkired el lomekeroul er a choua ise el blekeradel el bedul aike el rokui el llechul a Dios.
AUGUST 1-7
MEKREOS EL TEKOI EL NGAR ER A BIBLIA | 1 KING 1-2
“Kau, Ke Melai a Klubelem er a Cheleuid el Omriruul?”
it-2 987 par. 4
Salomon
A Adonia me a rubengkel er a lerenges ongngak er a Gihon me a rechad el melekoi el kmo “Bo le kemanget a klengar er a King Salomon!” e te mlo medakt e chemiis. A Salomon ulechotii a budech el mo er ngii er a temel omengederederel er a lak lekengei el mo melaitechei. Me nguaisei engdi a lsekum ngmle blitokl a blekeradel e a Salomon a locha lulekodir. Me a Adonia chiliis el mora templo el kirel osebechakl, me a Salomon a dilu me lenguu el mei. Ngdilu er a Adonia el kmo ngdi melemolem el ngar engdi ngmo okodall a lsekum te metik a mekngit er ngii. E dmu er ngii me lmuut el mo remei.—1Ki 1:41-53.
Omesodel a Babier er a Kot el King
1:49-53; 2:13-25—Ngera uchul ma Solomon a milekodir a Adonia er uriul er a bla lousubes a kngtil? A Bath-sheba dimlak bo lutebengii tiang, engdi a Solomon a mlo medengelii sel mera el mla er a rengul a Adonia ma uchul e ngngullengit er ngii el mo olengit er a king me lebsa Abisiag me bo lebechil. A David a dirkak el bo lobengkel, engdi a klebokel el Abisiag a mla er a uldasu el kmo ngkankiubain er a David. A doltirakl er a siukang er isel taem e ngika el dil a kirel el mo kloklel ngike el mo omtechei er a David. A Adonia a locha ulemdasu el kmo a bo lenguu a Abisiag el mo bechil, e ngsebechel el mo er ngii a techellel el melasem el mo melai er a kingall er a omerredel. Ngulemes er a ongtil a Adonia el ua lesoal el mo omerober er a omengederederel a king, ma Solomon a mileltii sel di mla uldesuel.
Morriter er a Tekingel a Dios
Omesodel a Babier er a Kot el King
2:37, 41-46. Ngkol ua ngera el kdekudel el tekoi a lsekum a chad a mo omdasu el kmo ngsebechel el diak lolengesenges a llechul a Dios mo chemiis er a otutel a llach! Tirke el ngar er ngii er a rengrir e oleiub er tir el diak loltirakl er a “chobutek el siseball el mora klengar,” a mo chormii a ringel er sel mekngit el omelilt er tir a uchul.—Matteus 7:14.
AUGUST 8-14
MEKREOS EL TEKOI EL NGAR ER A BIBLIA | 1 KING 3-4
“Kerresel a Llomeserreng”
Ngungil el Kerebai el Kiriu me a Lechub e Ngmekngit?
4 Ngar er a uchelel a kleking er a Salomon, e a Dios a mlo duum er ngii er a berrous e dilu er ngii me lolengit aike el soal. A Salomon a mle medengei el kmo ngdimlak a kmal duch er ngii a uchul me ngullengit el kirel a llomeserreng. (Monguiu er a 1 King 3:5-9.) A Dios a kmal mlo ungil a rengul er ngii el ullengit a llomeserreng e dimlak lolengit a kerruul me a chetengakl a uchul me ngmilsang a Salomon a “klou el llomeserreng ma sekutaberreng” me a dirrek el ilteet. (1 King 3:10-14) Me nguai sel lulsaod er ngii a Jesus, a llomeserreng er a Salomon a mirrael a chisel a uchul me a king el dil er a Siba a rirenges a chisel e mla er a kemanget el omerael el me orrenges er a llemesel a rengul.—1 King 10:1, 4-9.
5 Ngdiak el kired el omdasu el kmo kede mo nguu a llomeserreng el oeak a mengasireng el rolel. A Salomon a dilu el kmo “le ng [Jehovah] a meskid a llomeserreng” e dirrek el milluches el kmo ngkired el meringel el oureor me bo el sebechel el mo mellomes a rengud. Ngdilu el kmo: “Morrenges a tekoi er a llomeserreng, e molasem el mo ungil el omtab er ngii.” Ngobengkel tiang, e nguluusbech er a tekoi el kmo “mosiik” er a llomeserreng. (Osisechakl 2:1-6) Me ngbleketakl el kmo, ngsebechel el mo mellomes a rengud.
6 Me ngungil a doker el kmo, ‘Ngak ngbetik a renguk er a llomeserreng el di uai a Salomon?’ A diak el ulterekokl el tekoi er a keizai a mla rulleterir a rebetok el di mo melatk el kirel a ureor me a udoud me a rolel a lolib el kirel a tekoi er a skuul. E kuk mekerang el kirem kau me a ongalek er kau? A omelilt el moruul ngochotii el kmo ke omes er a llomeserreng er a Dios el klou a ultutelel? A omolodech er a osengem er a tekoi me a turrekong er kau, ngngosukau el mo dochel a llomeserreng er kau? Nguaisei, a dolai er a llomeserreng e dochotii er a klengar er kid a mo uchul a diak a ulebengelel el klungioled. A Salomon a milluches el kmo: “Cho mrengesak e ke mo medengelii a llemalt ma tabesul el omeruul. Ke mo medengei a ungil moruul.”—Osisechakl 2:9.
Morriter er a Tekingel a Dios
w98 7/1 20 par. 15
A Jehovah a Dios er a Telbiil
15 Chelechang a klengelakel er a Abraham a mleketmokl el ua renged er a cheungel a Llach, e a Jehovah a ulemekngeltengat er tir el luleltirakl er a telbilel el mo er a demerir er a irechar. Sera 1473 B.C.E., e ngike el lulemtechei er a Moses, el Joshua, a ulemekrael er a Israel el mo soiseb er a Kanaan. A omingel a beluu er a delongelel aika el kebliil a uleltaut er a telbilel a Jehovah el mo msa klengelakel er a Abraham sel chutem. Sera lebo leblak a rengul a Israel, e a Jehovah a uleltaut er a telbilel el mo mesterir a kats er a recherrouir. Tiang a mle klemerang er a omengederederel a King el David. Sera lebo el temel a ngelekel a David el Solomon, a ongede el tekoi er a telbiil el mo er a Abraham a tilaut. “Ngmlo obdois a Judah ma Israel, el ua chelechol er a rriil, el mengang e melim e oldeu a rengrir.”—1 King 4:20.
AUGUST 15-21
MEKREOS EL TEKOI EL NGAR ER A BIBLIA | 1 KING 5-6
“Ulemekedechor el Olab a Chimorir me a Rengrir el Rokir”
w11 2/1 15
Ke Medengei el Kmo Ngerang?
A kerrekar el sidar er a Lebanon a merael chisel el mesisiich, klebokel, e ungil a bul kerrekar el dimlak el sebechel mekang er a charm. Me a Salomon a uluusbech a kot lungil klekedall el kirel a okedecherul a templo. Chelecha el taem engdi mekesai er aika el kerrekar a dechor er aike el rois er a Lebanon.
it-1 424
Sidar
Ngmle usbechall a rebetok el telael el chad el mo meluk aika el kerrekar el sidar e ngmai el mora daob er a Mediteranea er a Tyre me a lechub e ng Sidon e ochull e mechakl el mora Jopa. E te kmurs el mora Jerusalem. Tia mileketmokl loeak a contract el lerirellii a Salomon el obengkel a Hiram. (1Ki 5:6-18; 2Kr 2:3-10) A kerrekar a di merrael el mei me ngmle sebechir el melekoi el kirel a Salomon el kmo ngriruul a “kerrekar el sidar [el] di mle ua kerrekar el sikamor” er a temel omengederederel.—1Ki 10:27; momekesiu er a Isa 9:9, 10.
it-2 1077 par. 1
Templo
Me a Salomon a childerderii a ureor e rirelleterir a 30,000 el chad er a Israel el mo oureor er a Lebanon. Te mo kaitutechei el dersteruich el telael a mo oureor er a Lebanon el ta el buil e mo remei el eru el buil. (1Ki 5:13, 14) Ngrirelleterir a re 70,000 el “chad er a ngodech el beluu” el mo olengakt a bad me a 80,000 el mo melasech a bad. (1Ki 5:15; 9:20, 21; 2Kr 2:2) Ngtiletketerir a re 550 el chad el mo bdelul a ureor me a 3,300 el mengeteklel a ureor. (1Ki 5:16; 9:22, 23) A re 250 er tirka el uluungerachel a mle chad er a Israel e a re 3,600 a mle “chad er a ngodech el beluu.”—2Kr 2:17, 18.
Morriter er a Tekingel a Dios
g 5/12 17, baks
A Biblia Babier el Melemalt a Ulochel, Part 1
MELEMALT A SODEL ER A TAEM
A olechotel a kmo a Biblia melemalt omesodel sel losaod el kirel a taem a desa el ngar er a 1 King 6:1, el mesaod er sel taem el King Salomon a ulemuchel lomekedechor er a templo er a Jerusalem. Ngkmo: “Ng mle 480 el rak [479 el cherrungel el rak] er uriul er a le tobed er a Ekipten a re chad er a Israel, er a chelsel ongeua er a rak el longedereder er a Israel a Salomon er ongerul buil el Siv a ngklel, e a Salomon a milechelii a urerel a Templo.”
A Biblia ochotii el kmo a ongeua el rak er a omengederederel a Salomon a mle 1034 B.C.E. A domechur el bedul er uriul el 479 el cherrungel el rak e kede mora rak er a 1513 B.C.E., el ngii sel taem el rechad er a Israel a tilobed er a beluu er a Ekipten.
AUGUST 22-28
MEKREOS EL TEKOI EL NGAR ER A BIBLIA | 1 KING 7
“Desuub er Aike el Eruo el Tang”
w13 12/1 13 par. 3
“A Risois er Ngii a . . . Sebechiu el Mengiis a Sintsiu”
King Salomon a uluusbech a betok el sintsiu el meruul a klekedellel a templo er a Jerusalem. Betok er ngii a mlara demal er a David er a loumekemad aike el beluu er a Siria. (1 Kronika 18:6-8) Sel “chaibibeob el tangk el brons” el luluusbech er ngii a reprist el meriso er tir a mle sebechel otekau a 17,500 el gallon el ralm e locha mle 30 el ton a berredel. (1 King 7:23-26, 44-46) E mla er ngii aike el teblo el tang el brons el mle dechor er a siseball er a templo. Aika mle 26 el fit a klemengetel e aike el mlo bdelul a mle bekord el 7.3 el fit a telongklel. Aika mle 3 el ints a kbekbel e 5.6 el fit a kerrekrel. (1 King 7:15, 16, NW; 2 Kronika 4:17) Ngkmal mechas a rengud sel dolatk a idisel a sintsiu el luluusbech el meruul aikang.
it-1 348
Boas, II
Sel tang el ngar er a mo bedul a diluches a lulngeklii el Boas, el locha belkul a kmo “er a Klisiich.” Sel tang el ngar er a mo bedul a dimes a lulngeklii el Jakin el belkul a kmo, “A [Jehovah] Le Teketekii.” Me sel dodak aika el teblo el tekoi e donguiu er ngii lomuchel er a klisiched el mora klitechetud e ngmelekoi el kmo, ‘A [Jehovah] le teketekii [a templo] er a klisiich.’—1Ki 7:15-21.
Morriter er a Tekingel a Dios
it-1 263
Omeriso
Omengetmeklel a bedenged a longerechir er ngii a Jehovah el kirir tirke el chedaol e bliochel el mengull er ngii. Tia bleketakl el meues er a ureor er a chedaol tento me a uriul er a templo. Sel taem a lemechedaol a Ngarbab el Prist el Aron me a rengelekel a merriso er tir er a uchei er a lotuu aike el bilir. (Exo 29:4-9; 40:12-15; Lev 8:6, 7) A reprist uluusbech a ralm er a brons el kanadarai el mlara mekesekesel a chedaol tento el merriso chimorir me a ocherir e sera lebora templo e te uluusbech er a brons el tangk. (Exo 30:18-21; 40:30-32; 2Kr 4:2-6) A ngarbab el prist a merriso el eru el taem er a Sils er a Tngakireng. (Lev 16:4, 23, 24) Ngike el milengetakl er a kaming el mo er cherroid, ngike el mlo melai a medechel er a tenget el charm, me ngike el ngiluu a bekerkard el kerbou el mo tuobed er a kiamp a mle kirel melechong e smilek a bilel luluubail er a uchei er a lesiseb er a kiamp.—Lev 16:26-28; Ule 19:2-10.
AUGUST 29–SEPTEMBER 4
MEKREOS EL TEKOI EL NGAR ER A BIBLIA | 1 KING 8
“Nglunguchel a Salomon er Mederir a Rokui el Chad”
w09 11/1 15 par. 9-10
Moleketek a Nglunguchem el Okiu a Omesubel a Biblia
9 A lsoad a lemorenges a nglunguched, e ngkired el meluluuch el mera el ngar er a rengud. Ngar er a 8 el bliongel er a 1 King, e a Salomon a milluluuch el mera el ngar er a rengul er a mederir a rechedal el mle kldibel er a Jerusalem el mlo mengedaol er a templo er a Jehovah, er a rak er a 1026 er a uchei er a taem er kid. A uriul er a lenguu a blil a telbiil el mo loia er a chelsel a Kmal Chedaol el Delemerab e a klebkellel a Jehovah a milekekii a templo, me a Salomon a milluluuch el uleldanges er a Dios.
10 A dosuub a nglunguchel a Salomon e ngungil a domtab aike el tekoi el mesaod el kirel a nglunguuch el mera el ngar er a rengrir a rechad. A Salomon a mle medengei el kmo ngdi ta el Jehovah a medengei a reng er a rechad. (1 King 8:38, 39) A osisiu el nglunguuch a ochotii el kmo ngngar er ngii a omelatk el kirel a chad el rirebet er a klengit e ‘mera el ouuchel er a rengul.’ Sel lemodechelakl a rechedal a Dios er a recherrouir, e a Jehovah a ulterekokl el rongesterir a lsekum a nglunguchir a mera el ngar er a reng er tir. (1 King 8:48, 58, 61) Me nguaisei, ngkmal kired el meluluuch el mera el ngar er a rengud.
Mkider a Melemalt el Chim el Ngar er a Nglunguuch
7 A doluluuch el ngar er a buai ma lechub ngdi kid el tang, e a klou a ultutelel el llach er a Biblia el kired el melatk er ngii a kmo ngkired el mo olecholt a klengariou el reng el ngar er a nglunguched. (2 Kronika 7:13, 14) A King el Solomon a ulechotii a klengariou el reng er a loluluuch el ngar er a buai er a temel a omengedaol er a templo er a Jehovah el ngar er a Jerusalem. A Solomon a dirk rirekir a ureor el omekedechor er a ta er aike el kot el klebokel el blai er tia el chutem. Ngdi, ngmle ngariou a rengul el meluluuch el kmo: “Ngdi Dios ngkol sebechel kiei ra chutem? Cholebo e ngdiak motekau ra eanged el rokir, e mekera e sebechem el motekau er tial templo el bla kteketekii?”—1 King 8:27.
8 El uai a Solomon, ngkirel el mo ngariou a rengud sel domtechei er a rekuk bebil el ngar er a nglunguuch. A lta ngdiak el soad el olecholt a cheleblad el cheledaol, e ngdi a klengariou el reng a mocholt er a delecherul a ngered. A ngariou a rengul el nglunguuch a diak loldiu, ma lechub ngkora ousimang. Ngdiak longedidai er a chad el meluluuch, e ngbai mengedidai er ngike el doluluuch el mo er Ngii. (Matteus 6:5) A klengariou el reng a mocholt lokiu aike el dolekoi er a nglunguched. A lsekum kede meluluuch el oba klengariou el reng e ngdiak dorrimel er a Dios el mo meruul a tekoi er a roled. Kede bai olengit er a Jehovah el mo meruul a tekoi el oltirakl er a uldesuel a rengul. A milluches er a psalm a ulechotii a melemalt el uldasu er a lolengit el kmo: “Mosobelemam e Rubak, mosobelemam! Rubak, mngesukemam me di bo lungil a rokuil tekoi!”—Psalm 118:25; Lukas 18:9-14.
Morriter er a Tekingel a Dios
it-1 1060 par. 4
Eanged
Salomon el ngike el ulemekedechor er a templo a dilu el kmo a Dios a “diak [el] motekau er a eanged el rokir.” (1Ki 8:27) A Jehovah milebii a melidiul me ngkuk ngarbab er a rokui el tekoi, me a “ngklel a kuk chetengakl er a ikel rokui el ngodech el ngakl; a klebkellel a ngar bab er a chutem ma eanged.” (Psa 148:13) Ngsebechel meluk er a klungel a melidiul oba klemengetel a chimal. (Isa 40:12) A tekingel a Salomon a diak lebelkul a kmo ngdiak a ileakl el basio el lengar ngii a Dios. Me a lechub e lolekoi el kmo a Dios a meliuekl er kid e ngar er a chelsel a rokui el tekoi. E le Salomon a dilu el kirel a Jehovah el kmo ng “ngar a blil a [delengcheklel] er a eanged” e orrenges er kid.—1Ki 8:30, 39.