Reference el kirel a Subeled er a Miting er a Klengar me a Omesiunged
© 2023 Watch Tower Bible and Tract Society of Pennsylvania
MAY 1-7
MEKREOS EL TEKOI EL NGAR ER A BIBLIA | 2 KRONIKA 17-19
“Momes er a Rechad el Ua Lomes er Tir a Jehovah”
Kau, Ke Mo Oltaut Aika el Tekoi el Bla Msichedekl er a Rengum?
7 Chelechang e kede kuk mo mesaod er a kerebil a ngelekel a Asa el Jehosafat. Ngika mla er ngii a ungil el blekerdelel el Jehovah a kmal mle ungil a rengul el kirel. E sel lultuil er a Jehovah, e ngmirruul a betok el ungil el tekoi. Engdi ngdirrek el mirruul a bebil el mekngit el omelilt. El ua tiang, ngkilengei me a ngelekel el sechal a mlo bechil a ngelekel a King el Ahab el kmal mle mekngit el chad. A uriul, e a Jehosafat a mlo obengkel a Ahab e oumekemad er a rechad er a Siria, alta profet el Mikaia a ulemeklatk er ngii me ngdiak bo loumekemad. Ngar er tia el klaumekemad, e a rechad er a Siria a uldechelakl er a Jehosafat e millasem el omekoad er ngii. (2 Kronika 18:1-32) Me sera luut el mo er a Jerusalem, e a profet el Jehu a uleker er ngii el kmo: “Kau ng kirem el olengeseu er a re mekngit e oubltikerreng el mor tirkel mengemikr er a RUBAK?”—Monguiu er a 2 Kronika 19:1-3.
Molatk er a Klou el Bltkil a Rengul a Jehovah
8 A Jehovah a soal a bo dodengei el kmo ngbetik a rengul er kid me ngomes el engelakl er aike el chelitechetud. Ngomes er kid e osiik aike el klungioled. (2 Kr. 16:9) Tiang a chemolt er a omerellel el mo er a King er a Juda el Jehosafat. A ta el taem e ngika el Jehosafat a kilengei el obengkel a King el Ahab el mo oumekemad el omerober er a beluu er a Ramothgilead er a rechad er a Siria. Me alta e a re 400 el klsuul el profet a dilu er a Ahab el kmo ngmo mesisiich er a mekemad, engdi a mera el profet er a Jehovah el Mikaia a dilu er ngii el kmo ngmo mechitechut. Me a Ahab a mlad er a mekemad e a Jehosafat a kmal mlo metacherbesul el kileed e ngmad. Me sera lluut el mo er a Jerusalem e a Jehovah a ulderchii a Jehu el mo mellach er a Jehosafat. Engdi a Jehu a dirrek el dilu er ngii el kmo: “E ngdi ngar ngii a ungil er kau.”—2 Kr. 18:4, 5, 18-22, 33, 34; 19:1-3.
9 Ngar er a uchelel a omengederederel a Jehosafat e ngulderecheterir a remengeteklir a rechedal me a re Levait me a reprist el mo er a rokui el mats er a Juda el olisechakl er a rechad el kirel a Llechul a Jehovah. Me ngkmal mle ungil el merael a ureor el uchul me a rechad el kiliei el iliuekl er tir a dirrek el mlo oba dakt el bedul a Jehovah. (2 Kr. 17:3-10) Nguaisei, a Jehosafat a rirellii a klebelung el tekoi engdi a Jehovah a dimlak lobes a ungil el tekoi el leriruul. Me tia el cheldecheduch er a Biblia a mekltkid el kmo kid el diak demecherrungel a uchul me kede mo remuul a cheleuid, engdi a Jehovah a melemolem el olecholt er a bltkil a rengul el bedul kid a lsekum kede osiik a ngeso er ngii el mera el ngar er a rengud.
Morriter er a Tekingel a Dios
Dosiou er a Jehovah el Oba Rengud el Rokir!
10 A ngelekel a Asa el Jehosafat “a uleltirakl er a rolel a demal er a Asa.” (2 Kronika 20:31, 32) Ngmilekerang? Ngmle ua omerellel a demal el millisiich er a rechad me lolemolem el mengull er a Jehovah. Nguleldurech er a rechad el mo er a betok el mats er a Juda el mo olisechakl er a rechad el kirel a “babier er a llechul a RUBAK.” (2 Kronika 17:7-10) Ngdirrek el mlo er aike el beluu er a mo bedul a diluches er a renged er a Israel el mo osiik er a rechad el kiei er aike el bukl el beluu er a Efraim, e “olluut er tir el mor a RUBAK.” (2 Kronika 19:4) A Jehosafat a mle king “el milsiou er a RUBAK el oba rengul el rokir.”—2 Kronika 22:9.
11 Chelecha el taem e a Jehovah a soal a rokui el chad a bo lemosisechakl el mo medengelii, e kid el rokui a dirrek el sebeched lolengeseu el meruul er tia el ureor. Me kau, ke mla rullii a turrekong er kau el mo teloi er tia el ureor er a bek el buil? Ngsoam el losisecheklterir a rebebil lousbech er a Biblia me bo lsebechir el dirrek el mo mengull er a Jehovah? Ke meluluuch el kirel tia el tekoi? A lsekum e ngmo blak a rengum, e a Jehovah a sebechel ngosukau el mo er ngii a chad el mosuub a Biblia lobengkel. Ke kongei el mo mesuub lobengkel a chad, alta e ngmo kirem el chemoit a sesei er aike el mededaes el temem? Ngdirrek el sebeched el ngosuterir a rebebil el mla mo diak loldingel el lmuut el mo mesiou er a Jehovah el di ua omerellel a Jehosafat. A remechuodel er a ongdibel a dirrek el oterekokl a temir el olengeseu er tirke el milsuld a ngklir el ngar er a belurir, el tir a locha mla mo diak loruul er a klengit el lurruul er ngii.
MAY 8-14
MEKREOS EL TEKOI EL NGAR ER A BIBLIA | 2 KRONIKA 20-21
“Moumerang er a RUBAK el Dios er Kemiu”
Dmak el Mengiil er a Ulebongel er Tia el Beluulechad
8 Sera taem er a King el Jehosafat, e a klou e mesisiich el urrurt er a resoldau a mlo oumekemad er a rechedal a Dios. (2 Kr. 20:1, 2) Me te milekerang a rechad er a Israel er a lemerma tirka el cheraro? Te mle ultuil er a Jehovah e milluluuch el olengit a ulekrael er ngii. (Monguiu er a 2 Kronika 20:3, 4.) A derta el chad er a Israel a dimlak lolasem el di tir el osiik a rolel a loruul a tekoi, te bai mlo dmak el kldibel. A Biblia a kmo: “Isei e a rokui el sechal er a Juda a dilechor er medal a RUBAK, ma re becherir, ma re ngelekir el meklou ma re mekekerei a ulebengterir.” (2 Kr. 20:13) Tir el rokui a mlo ultuil er a Jehovah e ullengesenges a rokui el tekoi el mildung. Te millemolem el dmak me a Jehovah a ulemekerreu er tir er a recherrouir. (2 Kr. 20:20-27) Me tiang a ungil el kerebai el kirir a rechedal a Dios sel bo lechelebangel a ultok.
Redirk Mlo Bechiil el Obekel, Mrellii a Klengar er Kemiu el Mo Iliuekl er a Omesiungiu el Mora Jehovah
7 A Jehovah milengedecheduch er a Jehosafat loeak a Levait el Jahasiel. A Jehovah dilu el kmo: “Di bo mobechobech e mongiil, e kom mo mesa klisiich el lomeskemiu a RUBAK.” (2 Kr. 20:13-17) Tia kora diak el rolel a doumekemad. Me nguaisei engdi aika el ulekrael a mlara Jehovah el dimlak el le mlara er a rechad. A Jehosafat a uluumera el ulsirs er a Jehovah e riruul aike el rokui el ledilung. Sera lebo lolsiuekl er a recherraro e ngdimlak el ngititerir a rekot el ungil soldau el mora medal e te bai rechad er a chelitakl a mlora medal a mekemad. Me a Jehovah ultutii a telbilel el mora Jehosafat e rirellii el mo mesisiich er a recherrouel.—2 Kr. 20:18-23.
Morriter er a Tekingel a Dios
it-1 1271 par. 1-2
Jehoram
A bechil a Jehoram er a Athalia a dirrek el uchul me ngdimlak loltirakl er a melemalt el omerellel a demal er a Jehosafat. (2Ki 8:18) Ngika dimlak di lokodeterir a retelolem el ochellel me a rebebil el mengeteklel a Juda, ngdirrek el rirelleterir a rechad el mo cheroid er a Jehovah e mengull a klsuul el chelid. (2Kr 21:1-6, 11-14) Temel omengederederel a mle mui er a ringel me a ultok. A Edom a mlo omtok, me a Libna me ngdirrek el mlo omtok er a Juda. (2Ki 8:20-22) Ngar er a babilengel a Elias el mora Jehoram e ngdilu er ngii el kmo: “A RUBAK a mo olsecher er a re chedam, ma re ngelekem, ma re bechim, e mo tomall a kloklem.” Me kau el King Jehoram, “me ngmer kau a meringel el rektel a delechim el mo bek el sils el di lorael el mengal mo meringel.”—2Kr 21:12-15.
Me a rokui el tekoi a mlo uaisei. Jehovah milechititerir a rechad er a Arab me a Filistia me te nguu a beluu e ngoititerir a rebechil a Jehoram me a rengelekel el mo kelebus. A Dios a di milecherei a kot el kekerei el ngelekel er a Jehoahas (dirrek lokedongall el Ahasia) me ngchemiis, le ngtelbilel el obengkel a David el kirel a Renged a uchul. “Uriul er a ikal rokui e a RUBAK ulsecherii [a Jehoram] er a meringel el rektel a delechil.” Eru el rak er uriul e “ngii el rakt a mirrael el mo meringel” me ngdi mle telkib e ngmad. Me ngmlo merek a klengar er ngika el kmal mekngit el chad el “dimlak a mekngit a rengul er ngii er a le mad.” Ngmildakl er a belual a David “e ngdi dimlak le bor a olekellir a re king.” A Ahasia mlo mtechir el king.—2Kr 21:7, 16-20; 22:1; 1Kr 3:10, 11.
MAY 15-21
MEKREOS EL TEKOI EL NGAR ER A BIBLIA | 2 KRONIKA 22-24
“Jehovah Omekngeltengat er Tirke el Olecholt er a Blekeu”
w09 4/1 24 par. 1-2
Mekngit el Klausechelei a Uchul me a Joas a Chilitii a Jehovah
NGKMAL mle mekngit el taem el kirel a Jerusalem, el sel mats el ledechor er ngii a templo er a Dios. A King Ahasia dirk lulekodir. E mera el meringel er kid a melatk er a blo loruul er ngii a delal er a Athalia. Ngika milekodeterir a rengelekel a ngelekel er a Ahasia! E ngerang? E le ngmle soal ngii a mengedereder.
Engdi a Athalia dimlak lodengei el kmo te ulsebelii a ta er a ngelekel a ngelekel, el Joas. Ngsoam el mo medengei el kmo ngmilekera mo uaisei? Ngika el ngalek a mla er ngii ochedal a demal el ngklel a Jehoseba, el milertii er a templo er a Dios. Ngmle sebechel meruul er tiang e le bechil a mle Ngarbab el Prist Jehoiada. Tir el terung ulterekeklii el kmo ngdiak a ngera el duubech el mora Joas.
w09 4/1 24 par. 3-5
Mekngit el Klausechelei a Uchul me a Joas a Chilitii a Jehovah
Ngmle elolem el rak el lulemart er a Joas er a templo. Ngar isei e ngmilsuub el kirel a Jehovah me a llechul. E sera lebo el euid a rekil, e a Jehoiada mirruul aike el kirel el rullii a Joas el mo king. Ngsoam el mo medengei el kmo ngngera ngmirruul a Jehoiada me a ngera dilubech el mora delal a Joas el mechas el mekngit el Kuin Athalia?—
Jehoiada ulemekedong er a re badikard er a reking er a Jerusalem. Nguluuchais er tir el kmo ngii me a bechil a ulsebelii a ngelekel a King Ahasia. E seikid e ngulechotii a Joas er tir, me te mlo mesa el kmo ngika ngike el kirel mengedereder. Me te tilbir el kmo ngera te mo meruul er ngii.
Jehoiada ultebedii a Joas e loia krone er a bdelul. Seikid e a rechad a “ulemrotech e oldiu el kmo, ‘Bo le kemanget a klengar er a king.’” Tirka el badikard iliueklii a Joas lomekerreu er ngii. A Athalia er a lerengesii a cherrodech e ngrirurt el mong el mo merrob er ngii engdi Jehoiada dilu er a re badikard me te mekodir.—2 King 11:1-16.
it-1 379 par. 5
Olekull, Blil Olekull
Melemalt el chad e Ngarbab el Prist Jehoiada ngiluu a ileakl el chetengakl el mo medakl er a “belual a David el teloi er a re king.” Ngika di ta el chad el diak a rsechel el mora kleking el medung el kmo ngngiluu tia el omelakl.—2Kr 24:15, 16.
Morriter er a Tekingel a Dios
it-2 1223 par. 13
Sekaria
12. Ngelekel a Ngarbab el Prist Jehoiada. Uriul er a lemad a Jehoiada e a King Joas a mlo cheroid er a mera el omengull, e orrenges a cheleuid el ulekrael er a bai lorrenges er a reprofet er a Jehovah. A ta er ngii er a Sekaria (2Kr 22:11) a milengelechel er a rechad el kirel tiang engdi te dimlak lobult. Te bai miltechii a Sekaria er a bad el mekodir. Me a lemedei a Sekaria e ngdilu el kmo: “A RUBAK lomes e lolaitechei.” Tia el ongit el ulaoch a tilaut, er a bo lemechitechut er a Siria a Juda me a dirrek el sel taem el reteru er a sibai er a Joas a milekodir le ngii el “milekodir a ngelekel a Prist Jehoiada.” A Grik Septuagint me a Latin Vulgate a kmo a Joas a mlad el kirel a “ngelekel” a Jehoiada. Engdi Masoretic text me a Syriac Peshitta a kmo “rengelekel” el locha melekoi el uaisei el melutk er a klengarbab er a ngelekel a Jehoiada er a Sekaria el profet e prist.—2Kr 24:17-22, 25.
MAY 22-28
MEKREOS EL TEKOI EL NGAR ER A BIBLIA | 2 KRONIKA 25-27
“A RUBAK a Sebechel el Mo Meskau a Lmuut el Betok er a Ikei”
it-1 1266 par. 6
Joas
Joas a dirrek el milleng er a dart el telael er a resoldau er ngii el mo oumekemad er a Edom el kirel a Juda. Me nguaisei engdi a “tal profet” a uchul oluteterir alta ngmilechoit a eua el tol silber ($660,600) el olengrir. Tirka kmal mlo kesib a rengrir e le nglocha mle sorir aike el klalo el bo el ruiim er a mekemad. Me sera lorael el lmuut el mo remei er a diluches e te mlo oumekemad aike el beluu er a Juda el ngar er a delongelel a Samaria me a Beth Horon e ruiim a betok el klalo er ngii.—2Kr 25:6-10, 13.
“Mchermii” a Ungilreng er a Jehovah—Oeak a Ngera el Rolel?
16 Mkengei el chemoit a tekoi el soam el kirel a Jehovah. Tia diak lebelkul a kmo a bo dodeuir a rengul a Jehovah e ngkired el chemoit a rokui el tekoi el soad. (Oli. 5:19, 20) Me nguaisei engdi a lsekum ngdiak el soad el menglou er a omesiunged e le ngchetid el mengoit a soad el tekoi, e ngsebeched el mo rullii a cheleuid el tekoi el lerirellii ngike el chad er a okesiu er a Jesus el mle meringel loureor el mengudel a ungil kloklel engdi ngdimlak lolatk er a Dios. (Monguiu er a Lukas 12:16-21.) A odam el Christian el kiei er a France a melekoi el kmo, “Ngdimlak kumsa Jehovah me a telungalek er ngak sel kot lungil er a temek me a klisichek.” Me ngii me a bechil a mlo pioneer. Me nguaisei, ngmle kirir el chemoit a urerir me bo el sebechir el rullii tia el turrekong er tir. Te milechelii a kekerei el siobai er tir er a omengetmokl me bo lsebechir el mesiou er tir, e silubii el mo ungil a rengrir er aike el ngar ngii er tir. Me te ouuchel a rengrir er a omelodech el lurruul? A Christian a kmo, “Chelechang e ngmera el dmeu a rengmam er a omesiungam e mera el ungil a rengmam el omes er a re study er kemam me a return visit er kemam el mesuub el kirel a Jehovah.”
Morriter er a Tekingel a Dios
w07 12/15 10 par. 1-2
Ngngar Ngii a Mesisiich el Kldemem er a Klemerang Lolengeseu er Kau?
SERA lebo el 16 a rekil a Usia e ngmlo king er a renged er a Juda. Ngmilengedereder el betok er a 50 el rak, lulemuchel er a ulebengelel aike el rak er a 800 B.C.E. el mora uchelel aike el rak er a 700 B.C.E. Ngdi mle kekerei e “mirruul a llemalt er medal a Dios.” Ngera ngilsuir el mo merael er a rolel a llemalt? A Bades a melekoi el kmo: “[A Usia] miltebechelii el osiik er a Dios er ser a dirk le chad a Sekaria el ngikel ulelsisechakl er ngii er omeluu er a Dios, me ng mle blak a rengul el mesiou er a Dios, ma Dios a ulemekngeltengat er ngii.”—2 Kronika 26:1, 4, 5.
Ngdiak dodengei a betok el kirel a Sekaria el ulemsa ulekrael er a king, ngdi aike el louchais er kid tia el cheldecheduch er a Biblia. Engdi ngika el “ulelsisechakl . . . er omeluu er a Dios,” a klou a lerirellii el mo er ngika el kekerei el king el meruul a llemalt. A The Expositor’s Bible a melekoi el kirel a Sekaria el kmo “ngmle medengei a chedaol llechukl, klou a experience er ngii er a tekoi er a klereng, e sebechel olisechakl a klemedengei er ngii.” A ta el chellimosk er a Biblia melekoi el kirel a Sekaria el kmo: “Ngika kmal mle medengei a ulaoch e . . . mle mellomes e blak a rengul e ungil chad; e sebeched el mesa el kmo ngkmal mle klou a lerellii er a klengar er a Usia.”
MAY 29–JUNE 4
MEKREOS EL TEKOI EL NGAR ER A BIBLIA | 2 KRONIKA 28-29
“Ngsebechem el Mesiou er a Jehovah Alta Ngmeringel a Ulekurulem”
Moukerebai er Tirke el Sechelil a Jehovah
8 A Hesekia a kmal mle ngodech a blekerdelel a klengar er ngii er a Ruth. Ngika el chad a mle chedal a renged el ngii a ileakl el chedal a Dios. Engdi ngdimlak el rokui el chad er a Israel a ullengesenges er a Dios. A demal a Hesekia el Ahas a kmal mle mekngit el king. Ngdimlak loba omengull el mo er a templo er a Dios e milengesuseu er a rechad el mo mengull a bebil er a chelid. Ngdirrek el millul er a rebebil er a Hesekia el ua tenget el mo er a klsuul el chelid. Me a klengar er a Hesekia er a dirk lekekerei a kmal mle mekngit!—2 Ki. 16:2-4, 10-17; 2 Kr. 28:1-3.
Moukerebai er Tirke el Sechelil a Jehovah
9 A mekngit el omerellel a Ahas a mle sebechel el rullii a Hesekia el mo mekngit a uldesuel el bedul a Jehovah. Me chelecha el taem e te ngar er ngii a rebebil el mlo kirir el outekangel a mondai el kuk beot er aike el lechilebangel a Hesekia, e mo omdasu el kmo ngar er ngii a llemeltir el “oltelechakl er a RUBAK,” me a lechub e ngmo mekngit a uldesuir el kirel a cheldebechelel. (Osi. 19:3) A rekuk bebil a omdasu el kmo a mekngit el blekerdelel a klengar er tir er a uchei, a uchul me ngmekngit a klengar er tir me a lechub e te di oltirakl aike el mekngit el omerellir a rechad er a blirir. (Ese. 18:2, 3) Engdi aika ngmera el tekoi?
10 Ngdiak el leuaisei. A omerellel a Hesekia a meketeklii el kmo ngdiak leuaisei! Ngkmal diak a ungil el uchul me ngmo kesib a rengud er a Jehovah, e le ngkmal diak el sebechel el melemall er a rechad. (Job 34:12) Ngmera el tekoi, a ruungalek a sebechir el osisecheklterir a rengelekir el mo ungil el ngalek me a lechub e te mo mekngit. (Osi. 22:6; Kol. 3:21) Engdi tiang a diak lebelkul a kmo a blekerdelir a rechad er a blid a uchul me ngungil me a lechub e ngmekngit a omerelled. E ngera uchul? E le Jehovah a mla meskid a sengk, el ngii a llemelted el di kid el melilt a tekoi el bo doruul. (Dut. 30:19) Me a Hesekia, ngmilekerang er a lousbech er tia el ileakl el sengk?
11 Me alta e a demal a ta er a kot el mekngit el king er a Juda, engdi a Hesekia a mlo ta er a kot el ungil el king. (Monguiu er a 2 King 18:5, 6.) Ngtilbir el diak bo loltirakl a mekngit el omerellel a demal. Ngbai mlo blak a rengul el orrenges er a reprofet er a Jehovah el ua Isaia me a Mika me a Hosea, e kilengei a ulekrael me a uleklatk er tir. Me ngmlo uchul e ngmle sebechel el sumechokl a betok el mondai el demal a mle uchul. Ngmilengikiid er a templo, e ullengit er a Dios me lousubes a kngterir a rechad, e dirrek el tilemall aike el bleob el chelid er a beluu. (2 Kr. 29:1-11, 18-24; 31:1) E sel taem el king er a Asiria el Senakerib a mlo oumekemad er a Jerusalem, e a Hesekia a ulechotii a klou el klaumerang er ngii me a blekeu, e le ngmlo ultuil er a Jehovah el kirel a ulekerreu e dirrek el millisiich er a rechedal. (2 Kr. 32:7, 8) Ngmla er ngii a taem el Hesekia a telkib el mlo kedidai a rengul, engdi sera losmechokl er ngii a Jehovah, e nguleba klengariourreng e ulebult er a mekngit el omerellel. (2 Kr. 32:24-26) Me a Hesekia a kmal ungil el kerebai el doltirakl er ngii, e le ngdimlak lebecherei a blekerdelel a klengar er ngii er a uchei me letemellii a klengar er ngii. Ngbai ulechotii el kmo ngsechelil a Jehovah.
Morriter er a Tekingel a Dios
w12 2/15 24-25
Nathan—Mle Blak a Rengul el Melisiich er a Bliochel el Omengull
A Nathan a mle blak a rengul el mengull er a Jehovah me ngkmal mle dmeu a rengul el kongei er a telbilel a David el mo omekedechor er a basio el blil a bliochel el omengull. Me nguaisei engdi ngar tiakid el taem e ngmillekoi a di uldesuel e dimlak lebora Jehovah. Seikid el kesus a Dios a dilu er ngii me bo louchais a ngodech el tekoi er a king: A David a diak bo lomekedechor er a templo er a Jehovah. Ngta er a ngelekel a David el sechal a mo omekedechor er ngii. Engdi Nathan uluuchais er a David el kmo a Dios a meruul er a telbilel lobengkel el kmo a omerrederel a kleking er ngii “a mo diak a ulebengelel.”—2 Sa. 7:4-16.
A moktek er a Dios a dimlak loltirakl er a uldesuel a Nathan el kirel a okedecherul a templo. Engdi ngika dimlak longeremrum e ngbai ngiluu a rengul el moriou e mlo otirakl er a soal a Dios. Ngmera el ungil kerebai el kired a lsekum a Dios a mo mesmechokl er kid! Omerellel a Nathan el profet ochotii el kmo ngdimlak loridii a kengei er a Dios. E ngbai Nathan ulebengkel a Gad e te mlukreng er a Dios el mo olengeseu er a David el mengederoder er a re 4,000 el chad er ongngak el mo mesiou er a templo.—1 Kr. 23:1-5; 2 Kr. 29:25.
JUNE 5-11
MEKREOS EL TEKOI EL NGAR ER A BIBLIA | 2 KRONIKA 30-31
“A Ongdibel a Ungil el Kired”
it-1 1103 par. 2
Hesekia
Blakerreng er Ngii el Kirel a Mera el Omengull. Hesekia ulechotii a blakerreng er ngii el kirel omengull er a Jehovah er a lenguu a kleking er a le 25 a rekil. A kot el tekoi lerirellii a ngilai a chesimer er a templo e riruul a telemellel. E ulleker er a reprist me a re Levait e dilu er tir el kmo: “Ng ngar ngii er a renguk a mo meruul er a telbilek ngak ma RUBAK el Dios er a Israel.” Tia mle telbiil mo oba blakerreng e le alta telbiil er a Llach a mla er ngii engdi te dimlak loltirakl er ngii. Ngkmal mle blak a rengul el omekrael er a ngerechelir a re Levait, e liluut el mo er ngii a re ousekool a klekedall er ongngak me a remengitakl chelitakl er odanges. Ngmle Nisan el taem er a Baskua, engdi templo me a reprist me a re Levait a dimlak leklikiid. Me a lebocha el Nisan 16 a templo mla mekikiid me a klekedall er ngii a mla moluut. Me a ileakl el tngakireng a mileketmokl el kirel a Israel el rokir. A kot e a remengeteklel a beluu ullab a tenget el mora templo el tenget er a klengit el kirel a renged, olengetongel, me a rechad, e a uriul e te millenget a betok el telael el delaol tenget el mle tengetengir a rechad.—2Kr 29:1-36.
it-1 1103 par. 3
Hesekia
Rechad el dimlak el klikiid a uchul me ngdimlak el sebechir el meruul er a Baskua er sel blsechel. Me a Hesekia ultirakl er a llach el rirellii el mo sebechir tirke el diak el klikiid el meruul er ngii er a ta el buil er uriul. Ngika dimlak di lomekedong er a Juda ngdirrek lulemekedong er a Israel el rokir er a lodercheterir a rechad el mo merous a babier er a beluu el rokir, el mlara Beerseba el mora Dan. Ngdimlak el betok a kongei el mong, ngdi rekesai el chad er a Aser, Manase, Sebulun a ngilai a rengrir el moriou e mlora Jerusalem. Ngdirrek el mla er ngii a rebebil er a Efraim me a Isakar el mlong. Ngdirrek el betok er a rediak el chad er a Israel el mengull er a Jehovah a mlong. Ngdimlak lebeot er tirke el mlara diluches a mora Jerusalem. Te locha ua tirke el oderuchel el mlo chobangel a ultok me a omelenguul, e le aike el teruich el kebliil a mle chelsechusem er a klsuul omengull me a rechad er a Asiria ulemecheracheb er tir.—2Kr 30:1-20; Ule 9:10-13.
it-1 1103 par. 4-5
Hesekia
Uriul er a Baskua e te mirruul er a chedaol el sils er a Diak a Omkukel Blauang el euid el klebesei. Ngkmal mle dmeu a rengrir me a ongdibel a liluut el meruul er ngii el euid el klebesei. Chelsel tia el meringel el taem e a klengeltengat er a Jehovah a uchul me “ng mlar ngii a klou el deurreng er a Jerusalem, ele sel taem er a Salomon el ngelekel a King David el mei e ng dirkak a ua itia er a Jerusalem.”—2Kr 30:21-27.
Olechotel a kmo ngliluut el meteketek a mera el omengull, e tia dimlak di el taem er a deurreng, a mues er a blekeradel el dilubech er uriul. Uchei er a lluut el mo remei a rechad, e te mlo chorad a btangch, e ongkangk a olengetongel me a blil omengull el meluluuch a diak lemera el chelid er a beluu er a Juda me a Benjamin me a dirrek el Efraim me a Manase. (2Kr 31:1) Hesekia kiltmeklii a ungil kerebai er a le choredengii a brons el bersoech el lerirellii a Moses e le rechad a rirellii el mo chedrir, e melul ochod el mo er ngii. (2Ki 18:4) Uriul er tia el chedaol el sils e a Hesekia ulterekeklii el kmo ngmo melemolem a mera el omengull er a lomii er a reprist me a re Levait el oltirakl er a omesiou el lengar ngii. Ngmilengelechel er a rechad el mo olengesenges er a Llach e mo olab a tenget el ike el kirel a blingelir a reprist me a re Levait el mo mesterir. Me a rechad a kmal kilengei el oltirakl.—2Kr 31:2-12.
Morriter er a Tekingel a Dios
“Ma Lsekum Ko Medenge Ikal Tekoi e Meruul, e Kom Ngeltengat”
14 A lmuut el ta er a rolel e kede ochotii el kmo kede oba klengariourreng a okiu sel bo dungil lorrenges. A Jakobus 1:19 a omeklatk er kid el kmo bo “mereched el orrenges.” A Jehovah a kot el ungil el orrenges. (Genesis 18:32; Josua 10:14) El ua tiang, me donguiu er a cheldecheduch el ngar er a Exodus 32:11-14. (Monguiu.) Alta Jehovah a dimlak a ultutelel a bo lodengelii a uldesuel a Moses, engdi ngdi milecherei me ngouchais a uldesuel. Me kau, ngklou a rengum el rongesii a chad el rirellii a cheleuid er a uchei, e kongei el oltirakl er a uldesuel? A Jehovah a oba kllourreng el orrenges er a rokui el tir a oba klaumerang e meluluuch el mo er ngii.
15 Ka molatk el kmo: ‘A lsekum a Jehovah a kmal ngariou a rengul me ngsebechel lorrenges er a rechad el ua sel rolel er a lorrenges er a Abraham me a Rahel me a Moses me a Josua me a Manoa me a Elias me a dirrek el Hesekia, e ngak ngdiak bai le kirek el mo meruul er a osisiu el tekoi? Ngsebechek el mesterir a odanges a rokui el rudam er ngak lokiu sel kurrenges a uldesuir e bok kengei el oltirakl a lsekum ngsebechek? Ngar ngii a chad er a ongdibel er ngak me a lechub a telungalek er ngak el sebechek el lmuut el mo kerekikl er ngii? Ak mo mekerang el kirel tiang?’—Genesis 30:6; Mengeteklel 13:9; 1 King 17:22; 2 Kronika 30:20.
JUNE 12-18
MEKREOS EL TEKOI EL NGAR ER A BIBLIA | 2 KRONIKA 32-33
“Molisiich er a Rudam er Kau er a Chelsel a Meringel el Taem”
it-1 204 par. 5
Asiria
Senakerib. Senakerib el ngelekel a Sargon II, a mlo oldechelakl er a renged er a Juda er a 14 el rak (732 B.C.E.) er a omengederederel a Hesekia. (2Ki 18:13; Isa 36:1) Demal a Hesekia er a Ahas a uchul me te mlara cheungel a klisichel a Asiria engdi ngika mlo omtok er a Asiria. (2Ki 18:7) Me a Senakerib a siliseb er a Juda e ngilai a 46 el mats (momekesiu er a Isa 36:1, 2), e mlara Lakis e mengerechir er a Hesekia me lebsa ta el tol el kolt (bekord el $11,560,000) me a teruich el tol el silber (bekord el $1,982,000). (2Ki 18:14-16; 2Kr 32:1; momekesiu er a Isa 8:5-8.) Me alta te milsang aikang, engdi Senakerib uldercheterir a remelekingel el mo dmu er ngii el kmo, a Jerusalem lekengei el mo mechitechut. (2Ki 18:17–19:34; 2Kr 32:2-20) A Senakerib a liluut el mora Ninive er sel taem el Jehovah milekodeterir a re 185,000 el soldau er a Asiria er a chelsel a ta el kesus. (2Ki 19:35, 36) Ngar isei e a reteru el ngelekel el sechal a milekodir e a ngelekel er a Esarhadon a mlora kingellel er omerreder. (2Ki 19:37; 2Kr 32:21, 22; Isa 37:36-38) Aika el tekoi a llechukl er a delasech el bad el mesaod er a Senakerib me a dirrek el ta er aike el delasech el bad el kirel a Esarhadon, ngdi ta el okngemedir a resoldau er a Asiria dimlak lodekiar.
A Klungel a Ultutelir Tirke el Kot el Mesisiich el Merredeled er Chelechang
12 A Jehovah a di blechoel el kltmokl el ngosukid er sel taem el diak el sebeched el di kid el sumechokl a mondai er kid. Me nguaisei, engdi ngmengerechir er kid el mo meruul aike el sebeched el kirel a mondai er kid. Me a Hesekia a riruul aike el sebechel el kirel a blekeradel el ble lechelebangel er ngii. A Biblia a ochotii el kmo nguleker a uldesuir a “re merreder a urerel, ma re mesisiich el chedal” e “tilbir a mo torob a ralm er omoachel er a ikrel a beluu.” Ngdirrek el “mlo meleketek a cheuotelel a beluu el mle telemall e toketek a tebekebok er ngii. A ikrel ngiil cheuatel e ng liluut el toketekii a tar a cheuatel el meliuekl.” Ngdirrek el riruul a “betok el klekedall er a mekemad ma omekreakl.” (2 Kr. 32:3-5) Me seikid el taem e a Jehovah a uluusbech er a Hesekia, me a remerreder a urerel me a reblak a rengrir el profet er ngii el mesebechakl e omekrael er a rechedal.
A Klungel a Ultutelir Tirke el Kot el Mesisiich el Merredeled er Chelechang
13 A uriul e a Hesekia a rirellii a tekoi el lmuut el klou a ultutelel er a di longaud a omoachel e loleketek a cheuatel. Ngii el mle ungil el klekar a uchul me ngmilengideb er a rechad e millisiich er tir er a ledu el kmo: “Kele bochu medakt er a king er a Asiria ma re betok el soldau el longetakl er tir. Ele klisiich el dobang a ngarbab er a klisichel. Ng di olab a klisichel a klechad, e kid a lobengked a RUBAK el Dios er kid el olengeseu er kid e oumekemad a mekemedid.” Ngulemeklatk er a rechad el kmo a Jehovah a mo oumekemad el kirir. Me a tekingel a millisiich a klaumerang er tir er a Dios me te mlo bekeu. A Hesekia me a remerreder a urerel me a remesisiich el chedal, me a dirrek el profet el Isaia me a Mika a ulechotii el kmo te mle ungil el klekar el ua letilbir a Jehovah el okiu a profet er ngii.—2 Kr. 32:7, 8; monguiu er a Mika 5:5, 6.
Morriter er a Tekingel a Dios
Ngera Mera el Bulterreng?
11 Cherengel a taem e a Jehovah ulenger a nglunguchel a Manase. Ngmilsa el kmo ngmera el mla mengodech a blekerdelel e tia mle bleketakl el ngar er a nglunguchel. Me a Jehovah uluusubes er ngii e rirellii el lmuut el mo king. A Manase mlora tkurrebab el sebechel lochotii el kmo ngmera el mla obult. Ngrirellii a tekoi el dimlak lerellii a Ahab. Ngngilodech a blekerdelel. Ngulemtok a klsuul omengull e millisiich er a rechad el mo mengull er a Jehovah. (Monguiu er a 2 Kronika 33:15, 16.) Tia kmal uluusbech er a blekeu me a klaumerang e le ngika el Manase a kmal mle mekngit el kerebai el kirel a telungalek er ngii, remetelil a beluu, me a rechad er a beluu el betok el rak. Engdi chelecha el ulebengelel a klengar er ngii e ngmillasem el omult a bebil er aike el mekngit el tekoi el leriruul. Ngika locha kmal mle ungil olengeseu er a ngelekel a ngelekel er a Josia e le ngika mlukeroul el kmal mo ungil king.—2 Ki. 22:1, 2.
12 Ngera kede suubii er a Manase? Ngika ngiluu a rengul el moriou engdi ngar ngii a lmuut el bebil er a tekoi el leriruul. Ngmilluluuch lolengit er a klechubechub. Ngdirrek el ngilodech a blekerdelel. Ngmle meringel loureor el omult a mekngit el leriruul e mlora tkurrebab el sebechel el mengull er a Jehovah. Ngdirrek el ullengeseu er a rechad el mo mengull er a Jehovah. A kerebil a Manase a mesterir omelatk tirke el mla remuul a kmal mekngit el tekoi. Ngkmal sebeched el mesa el kmo a Jehovah a kmal “ungil, e ousubes a tellemall.” (Psa. 86:5) A Jehovah a ousubes er tirke el mera el lobult.
JUNE 19-25
MEKREOS EL TEKOI EL NGAR ER A BIBLIA | 2 KRONIKA 34-36
“Kau, Ke Mui el Melai a Klungiolem er a Tekingel a Dios?”
it-1 1157 par. 4
Hulda
A Josia er a lorrenges er a omengiuel a “Babier er a Llach,” el lebiltik er ngii a ngarbab el prist Hilkia er a loruul er a telemellel a templo, e nguldercheterir a rechad el mo melai er a uldesuel a Jehovah. Me te mlora Hulda el ngii uluuchais a tekingel a Jehovah el kmo aike el rokui el dellebeakl el ngar er a “babier” a mo duubech el mo er tia el renged el mla mo oltirakl a klsuul el chelid. A Hulda a dilechelir el kmo, a Josia el uleltubokl er ngii er medal a Jehovah a uchul me ngdiak bo leues aika el dellebeakl e mo mad el ngar er a budech.—2Ki 22:8-20; 2Kr 34:14-28.
w09 6/1 16 par. 20
Moba Blakerreng el kirel a Blil a Jehovah!
20 Sel taem er a loruul er a klou el ureor a King el Josia, e a Ngar er a Bab el Prist el Hilkia “a miltik er a babier er a Llach er a RUBAK, sel Llach el Dios a ngiluu el msa Moses.” Me ngngiluu el msang a melechesel a king el Safan me ngmilenguiu er ngii el mo er a Josia. (Monguiu er a 2 Kronika 34:14-18.) Ngera dilubech? A king a di mle mereched el sodelii a ikrel a bilel e lmangel, e dilu er a rechedal me loluluuch el mo er a Jehovah. Ngoeak a profet el dil el Hulda, e a Dios a milsumech a kerrekerilel el mo er a renged er a Juda el kirel a rolel a omengull el bleob el mileketmokl er a chelsel a beluu. Engdi a Jehovah a miles a ungil el omerellel a Josia er a lekikidii a rengedel er a omengull el bleob el chelid. Me alta e a meklou el chelebuul a mla moterekokl el mo er tia el renged el rokir, engdi a Josia a millemolem el uleba kengei er a Jehovah. (2 Kronika 34:19-28) Ngera kede suubii er tia el tekoi? Ngsoad el mo ua Josia el mereched el oltirakl a ulekrael er a Jehovah. E mo kerekikl el orrenges a uleklatk me bo lsebeched el diak bo dechelsechusem er a rumtok a mera el osisechakl me a ultok el ngii a sebechel el choitechetur a omengull er kid. Me kede oba ulterekokl el reng el kmo a Jehovah a sebechel el mes a blakerreng er kid el kirel a mera el omengull el ua tekoi el dilubech el mo er a Josia.
Morriter er a Tekingel a Dios
Kau, Ke Mo Oltaut Aika el Tekoi el Bla Msichedekl er a Rengum?
15 Ngera sebeched el suub er a Josia? Alta Josia a mle ungil el king, engdi ngriruul a cheleuid el omeruul el mlo uchul a kodellel. (Monguiu er a 2 Kronika 35:20-22.) Ngera dilubech? A Josia a miluchelii a mekemad el obengkel a King er a Ekipten, alta e ngdimlak a ungil el uchul e ngmeruul er ngii. Me a Neko a dilu er a Josia el kmo, ngdimlak el soal el mo oumekemad er ngii. A Biblia a mesaod el kmo, a tekoi el lullekoi a Neko a mle “tekingel a Dios.” Engdi a Josia a mlo oumekemad me ngmlad. Me ngera uchul me nguldechelakl er a Neko? A Biblia a diak losaod.
16 A Josia a mle kirel el merriter el kmo aike el tekingel a Neko, ngmera el mla er a Jehovah me a lechub e ngdiak. Ngmilekerang? Ngbai mle kirel el oker er a Jeremia el ta er a profet er a Jehovah. (2 Kronika 35:23, 25) Ngdirrek, a Josia a mle kirel el melatk aike el klemera el tekoi. A Neko a mle kirel el mo er a Karkemish el mo oumekemad a bebil el renged el diak el Jerusalem. Me a Neko a dimlak el lolasem el melenguul er a Jehovah me a lechub a rechedal. Me a Josia a dimlak el kerekikl el omtab aika el tekoi er a uchei er a lolilt el mo meruul a tekoi. Ngera klubeled er tiang? Sel lengar er ngii a mondai er kid me bo el kired el meruul a omelilt er kid, e ngkired el melatk el kmo ngera soal a Jehovah a bo doruul.
17 Sel bo el kired el meruul a omelilt, e ngkired el me a kot e melatk el kmo ngera el omellach er a Biblia a sebechel el ngosukak e mekera kultaut er a klengar er ngak. Ngar er a chelsel a bebil el blekeradel, e nglocha mo soad el meruul a betok el omerriter er aika el babilenged me a lechub e kede olengit a ngesou er a remechuodel. Ngsebechel el olengeseu er kid el mo omdasu a bebil el omellach er a Biblia. Ka molatk er tia el blekeradel: A odos a bechil a chad el diak el Sioning. E ngika el odos a mla rullii a telbilel a rengul el mo oldingel er a ulterekokl el sils. (Rellir 4:20) Engdi ngar seikid el sils, e a bechil a diak el soal a bo loldingel. Me ngdmu er ngii el kmo ngkmal dirkak el longoit a taem el dmak el terung me ngsoal el nguu el mo er a kmung ker. Me ngika el odos a millatk a Bades er a Biblia el sebechel el olengeseu er ngii el mo meruul a ungil el omelilt. Ngmedengei el kmo ngkirel el olengesenges er a Dios, e a Jesus a mengelechel er kid el mo meruul er a remo disaiplo. (Mateus 28:19, 20; Rellir 5:29) Ngdirrek el diak lobes el kmo a bechil el redil a kirel el mengull er a bechil, e dirrek a remesiungel a Dios a kirir el oba delemedemekerreng. (Efesus 5:22-24; Filipi 4:5) Me a ngika el bechiil el sechal, ngmelasem el merrob er ngii me ngdiak bo loldingel, me a lechub engdi soal el mengoit a taem el obengkel er seikid el sils? Me kid el mesiungel a Jehovah a uchul me ngsoad el meruul a omelilt er kid el ngar er a melemalt el rolel e dirrek el odeuir a rengul a Jehovah.
JUNE 26–JULY 2
MEKREOS EL TEKOI EL NGAR ER A BIBLIA | ESRA 1-3
“Becherei a Jehovah Me Lousbech er Kau”
Kau Ke Mesa Lilsang a Sekaria?
NGKMAL mle klou a deurreng. A Jehovah el Dios a “rirellii a rengul a Sairus el king er a Persia” el mo ngubeteterir a rechad er a Israel el mle blebaol el betok el rak er a Babilon. A king a ultebedii a tekingel el kmo a Rechijudea a mora belurir el mo “lmuut el toketekii a templo er a RUBAK el Dios er a Israel.” (Esr. 1:1, 3) Tia mera el mle ungil tekoi! A mera el omengull er a di ta el mera el Dios a lmuut el mo meteketek er sel beluu el lengiluu el mesterir a rechedal.
A Kuruma me a Krone a Omekerreu er Kau
2 A Sekaria a mle ungil medengei el kmo a Rechijudea el liluut el mo er a Jerusalem a tirke el milengull er a Jehovah. Tir tirke el ‘meltuchel er a reng er a Dios’ el mechei blirir me a siobai er tir er a Babilon. (Esra 1:2, 3, 5) Te chilitii a basio el ble lungil el medengelii, e mo er a beluu el betok er tir a kmal dirkak a ta lebo er ngii. A lluut er a okedecherul a templo er a Jehovah a kmal mle klou a ultutelel el mo er tirke el Rechijudea el kilengei el mo merael er a kengaol el omerael el bekord el 1,000 mael (1,600 kilometer) el okiu a meringel el rael.
Morriter er a Tekingel a Dios
A Omesodel a Babier er a Esra
1:3-6. El ua rebebil er a Rengalek er a Israel el di kiliei er a Babilon, e a Resioning er a Jehovah er a chelecha el sils el diak el sebechir el mo soiseb er a mui el taem el ureor ma lechub e bo losiou er aike el beluu el ousbech a ngeso a dirrek el kmal olengeseu e melisiich er tirke el sebechir e dirrek el melenget el kirel tia el ureor er a berkel a klumech ma omeruul el disaiplo.