15 EL SUOBEL

Mochotii a Mesisiich el Klaumerang

1 Thesalonika 1:5

KEDEB EL OMESODEL: Mochotii el kmo ke kmal oumerang er a klemerang me a klungel a ultutelel a tekoi el mosaod.

Bo mungil el kutmeklau. Mosuub me bo mungil medengelii a tekoi el bo mosaod er ngii, me aike el meklou a ultutelel tekoi el ngar er a chelsel, me a rolel e a Biblia a ochotii el kmo ngklemerang. Molasem el ousbech a kesai el tekoi el meketakl a meklou a ultutelel el tekoi er a cheldechedecham. Molatk a rolel e ngii el tekoi a sebechel ngosuterir a rurrenges er kau. E moluluuch el kirel a chedaol reng er a Dios.

Molasem er a cheldechedecham lokiu sel molekoi er ngii el klou a ngerem me bo mungil medengelii, e bo mungil lotebedii.
Mousbech a tekoi el olecholt er a klaumerang er kau. Lak di momelekl a osisiu el tekoi el llechukl er a babier, e bai mousbech a di tekingem. Molilt a tekoi el molekoi el mo ochotii el kmo ke kmal oumerang a tekoi el mosaod.
Mongedecheduch lochotii el kmo ke oumerang a tekoi el mosaod. Bo lungil a klungel a ngerem. Molasem el omes a mederir a rurrenges er kau a lsekum ngdi ungilbesul.

A olechotel a klaumerang a diak el belkul a kmo ngsebechem el melekoi a ngii di el tekoi el mo melibas er a rechad, e di melisiich er a uldesuem, me a lechub e ke orrimel er a rechad. Me sel mongedecheduch e molasem el meruul er ngii el ngar er a rolel e ngsebechir a rechad el mesa el kmo ke oumerang a tekoi el mosaod.