Reference el kirel a Subeled er a Miting er a Klengar me a Omesiunged
© 2024 Watch Tower Bible and Tract Society of Pennsylvania
NOVEMBER 4-10
MEKREOS EL TEKOI EL NGAR ER A BIBLIA | PSALM 105
“Ngdiak Lobes er a Telbilel el Mo Cherechar”
Ngmekera Sebeched el Smisichii a Klaumerang er Kid er a Telbilel a Jehovah er a Beches el Blekeradel?
11 Molatk a bebil er a tekoi el Jehovah tilib el mora rechedal el meringel er kid oumerang el kmo ngsebechel mo uaisei. Ngdilu er a Abraham me a Sara el kmo ngmo er ngii a ngelekir er a cheluodel. (Gen. 17:15-17) Ngdirrek el dilu er a Abraham el kmo a ruldidellel a rsechel a mo oubeluu er a Kanaan. A ruldidellel a rsechel a Abraham er a rechad er a Israel a mle sibai er a Ekipten el betok el rak, a uchul me ngmle meringel a doumerang el kmo ngmo uaisei. Engdi ngmera el tilaut. Uriul e a Jehovah dilu er a chudelang el Elisabeth el kmo ngmo er ngii a ngelekel. Ngdirrek el dilu er a Maria el dirkak a ta el bo loilil el kmo, ngmo mechellii a Ngelekel. Tia mo otutii a telbiil el lerirellii a Jehovah er a sers er a Eden er a betok el telael el rak er uchei!—Gen. 3:15.
12 Kede smisichii a klaumerang er kid er a klisichel a Jehovah el mo kutmeklii a beches el blekeradel loeak sel bo de dmolech el melatk aike el telbiil el leriruul e uleltaut. (Monguiu er a Josua 23:14; Isaia 55:10, 11.) Tia rullid el mo kltmokl lolengeseu er a rechad el mo medengei el kmo, a telbiil el beches el blekeradel a diak di el berrous. A Jehovah di mle ngii el melekoi el kirel a beches el eanged me a beches el beluulechad el kmo: “Ikal tekoi a merang e ulterekokl el mo tmaut.—Och. 21:1, 5.
it-2 1201 par. 2
Tekoi, A
Blebelel a Jehovah el ngar ngii a klengar er ngii me a diak a sebechel lousbech el lotutii a moktek er ngii. (Psa 103:20; 148:8) Ngkmal sebeched lultuil er a tekingel; aike el letib a Dios el mo meruul a kmal diak lobes el kutmokl. (Dut 9:5; Psa 105:42-45) Ngua lolekoi a Dios, a tekingel “a kmal diak bo le metom”; ngkmal diak leiit el lotutii a moktek er ngii.—Isa 40:8; 55:10, 11; 1Pe 1:25.
Morriter er a Tekingel a Dios
(Psalm 105:19, NW) el dimerekmo letaut a tekingel, A tekingel a Jehovah a mirrorem er ngii.
w86 11/1 19 par. 15
Rengeasek, Part er Kemiu er a Telungalek el Ngar ngii Deurreng me a Kltarreng
15 “A ochil a mle llechotel er a bombatel e mlar ngii a deel el meliuekl er a chiklel, el dimerekmo letaut a tekingel, A tekingel a Jehovah mirrorem er ngii.” (Psalm 105:17-19, NW) Ngmle 13 el rak el lechuarm a Josef el sibai e kelebus el dimerekmo letaut a telbilel a Jehovah. Tia el experience er ngii a mirrorem er ngii. Alta Jehovah dimlak el luchul aika el ringel el mlo er ngii, engdi ngmla er ngii a moktek er ngii a mechei me ngduubech. Me a Josef ngmo melemolem el loba omelatk er a “tekingel a Jehovah” alta ngkmal chelebangel a meringel el ringel? Ngmo mekeroul aike el lungil blekerdelel e mekurulii a kllourreng me a klengariourreng, e mo mesisiich er a tekoi er a klereng e rullii er a rengul el kutmeklii a meringel el ngerachel? A Josef er a lobiich er a ngau e ngtilobed el kolt, el bliochel el kolt e lmuut el mla mo mekreos er osengel a Dios, el kmal mle ungil lousbech er ngii er a uriul.—Genesis 41:14, 38-41, 46; 42:6, 9.
NOVEMBER 11-17
MEKREOS EL TEKOI EL NGAR ER A BIBLIA | PSALM 106
“Tulebes er a Dios el Osebelir”
“Ng Techa Olab el Mor a RUBAK?”
13 A rechad er a Israel a mle medakt er sel mengasireng el olechotel a klisichel a Dios, me a Moses a mlora Rois Sinai el mo mengedecheduch er a Jehovah el kirir. (Exodus 20:18-21) Engdi ngmlo meketeket el taem, e a Moses a dimlak be lemetengel el mora kiamp er tir. Me sel domes er ngii e ngua dedu el kmo tirka el chad a mlara medideriik el beluu el diak a mengeteklir. Me te mo mekerang? A rechad er a Israel a locha kmal mle ultuil er a mengeteklir el Moses. Te mlo suebek a rengrir me te dilu er a Aron el kmo: “Mrellii a chedud el mo mengetekled, ele ng diak dodengei el kmo ngera mla duubech er a Moses, ngikal chad el ultebedid er a Ekipten.”—Exodus 32:1, 2.
Morriter er a Tekingel a Dios
w06 7/1 11 par. 9
Omesodel a Babier er a Ongedei ma Ongeua el Psalm
106:36, 37. Aika el bades a oldak er a omengull el bleob el chelid el obengkel a omelenget el mo er a remengelengalek el reng. Tiang a olecholt el kmo a chad el ousbech a bleob el chelid a mo chederedall er a klisichir a remekngit el reng. Ma Biblia a omeklatk er kid el kmo: “Bo mkerekikl el mengeroid er kemiu ra bleob el chelid.”—1 Johanes 5:21.
NOVEMBER 18-24
MEKREOS EL TEKOI EL NGAR ER A BIBLIA | PSALM 107-108
“Moreng a Sulel a Jehovah, e le Ngii a Ungil”
w07 7/1 22 par. 2
A Ongdibel Bo Loldanges er a Jehovah
2 A ongdibel a diak el cheldebechel er a rechad el kausechelei el di mo kldibel e merekong. Ngdiak el cheldebechel er a rechad er a beluu ma lechub e ngkldibel er a rechad el kaisisiu a siukang er tir ma lechub e ngsorir a osisiu el tekoi el ua sports. A ongdibel a bai mleketmokl el kirel a odengesel a Jehovah el Dios. Tia mle uaisei er a mong el mei, el ua lomeketakl er ngii a babier er a Psalm. Ngar er a Psalm 35:18 e kede menguiu el kmo: “Me bo kureng a sulem er a delongelir a re betok el chad; ak mo odengesau er mederir el rokui.” E a Psalm 107:31, 32 a melisiich er kid el kmo: “Ng kirir el mereng a sulel a RUBAK er a diak le mengodech el bltikerreng er ngii, el kirel a mengasireng el tekoi e le riruul el kirir. Ng kirir el ouchais er a klengarbab er ngii er ongdibel.”
Moreng a Sulel a Jehovah Me Bo Mukngeltengat
4 Ngar er ngii a tekoi el kired el meruul me dolemolem el oba omereng el saul. A kot e ngkired el melasem el omtab aike el ungil el tekoi el bla leruul a Jehovah el kired. E sola e ngkired el melebedebek el kmo, aika el tekoi ngmekerang e ochotii a bltkil a rengul a Dios el me er kid. A ta er a milluches er a psalm a mirruul el uaisei e mlo mechas a rengul er aike el betok el ungil el tekoi el lurruul a Jehovah el mo er ngii.—Monguiu er a Psalm 40:5; 107:43.
Morriter er a Tekingel a Dios
it-2 420 par. 4
Moab
Uriul er a lebo el king a David e ngdirrek el mlo er ngii a mekemad er a delongelel a Israel me a Moab. A Moab a mlo mechitechut e mlo kirel ngar ngii a leharau er a David. Sera bo lemesisiich er a Moab a David e ngmilekodeterir a teblo er aike el kldei tiud er a rechad er a Moab. A David a dilu er tir me te mo blechobech el bad er a chutem e ngtukur a klemengetel tia el line er a rechad el mo medengei el kmo ngngera el teblo el tiud er ngii a bo lokodeterir me a ngera el tiud a di ngar. (2Sa 8:2, 11, 12; 1Kr 18:2, 11) Ngulterekokl el ngar tia el osisiu el mekemad e a Benaia el ngelekel a Jehoiada a “milekodeterir a re terung el merael a chisir el bekeu el chad er a Moab.” (2Sa 23:20; 1Kr 11:22) A klisiich el lengiluu a David er a Moab ultutii a ulaoch el ledillii a Balam e a 400 el rak er uchei el kmo: “A tal king, el ua medidiich el btuch a mo tuobed er ngii el beluu. Ng ua melech el btuch el ngar a Israel el mei. Ng mo olebedeterir a re merreder er a Moab, e choiuerteterir tirkel rokui el mekedidai a rengrir e mekngit el bekeu omerellir.” (Ule 24:17) Me ngika el milluches er tia el Psalm a locha millatk er tiang er a lolekoi el kmo a Moab a blil ‘orseuel ochil’ a Dios.—Psa 60:8; 108:9.
NOVEMBER 25–DECEMBER 1
MEKREOS EL TEKOI EL NGAR ER A BIBLIA | PSALM 109-112
Em Support er a King el Jesus!
w06 8/1 28 par. 6
A Omesodel a Babier er a Ongeim el Psalm
110:1, 2—Ngerang mirruul er ngii a “Rubak [er a David],” el Jesus Kristus, er a ledengchokl er a kadekmel a Dios? Uriul er a okisel, e a Jesus a mlengai el mo er a eanged e mlo er a kadekmel a Dios e milengiil el mo tmurk er a 1914 e mlo omuchel er a omengederederel el King. Chelsel aikaikid el taem e ngmilengedereder er a rubengkel, el tir a rengellitel, el omekrael er tir er a ureor er a berkel a klumech ma omeruul el disciplo e dirrek el mengetmokl er tir el mo mengedereder el obengkel el ngar er a Rengedel.—Mateus 24:14; 28:18-20; Lukas 22:28-30.
A Rumtok er a Dios a Diak el Sebechir el Mo Mesisiich!
3 A rechedal a Dios a mludechelakl er a uchelel a Lluich el dart el rak. El ngar er a betok el beluu, e a remekngit el chad a millasem el olekebai—chochoi, e merrob—er a berkel a ungil el chais er a Rengedel a Dios. Ngike el ngar er a bab el Cherroed, el Diabelong, a “choua choteb el laion el merael el meliuekl losiik ra bo le dekeueklii” a melisiich er tir. (1 Petrus 5:8) Uriul er a ullebengelel a telutk el “taem rar Chisentail” er a 1914, e a Dios a rirellii a Ngelekel el mo beches el King er a chutem, e millellach er ngii el kmo: “Mongedereder rar cherrouem.” (Lukas 21:24; Psalm 110:2) A Kristus a mlo oltaut er a klisichel a omerredel, me nguleldik er a Satan er a eanged e me ngdi merekong el ngar er a chutem. Ngii el diabelong a medengei el kmo ngkmal kedeb a temel a uchul, me ngoba meringel el cheldechuderreng a omtok er a rengellitel el Kristiano ma rekldemir. (Chocholt 12:9, 17) Ngera mlo rsel er aike el lultok er tirke el melemolem el omtok er a Dios?
Em Support er a Ongdibel er Kau
Ngera bebil er a rolel e ngsebechem lousbech a temem me a klisichel a bedengem el support er a ongdibel er kau? Kid el rokui a sebeched el lolengeseu er a ongdibel. El ua tiang, a rebebil el ngar er a ongdibel er kau te chuodel me a lechub e ngngar ngii a secherir? Ngsebechem el ngosuterir loeak omoltak er tir el mei er a miting? Me a lechub e ke olengeseu er tir el ngar er a kuk bebil er a rolel el ua shopping el kirir me a lechub ke olengeseu el clean er a blirir? (Monguiu er a Jakobus 1:27.) Ngdirrek el sebeched el volunteer el clean e maintain er a Blil a Ongdibel. Ngdiak a chad lorrimel er kid el meruul aikang. Ngbltkil a rengud el mora Dios er kid me a rudam er kid odbechid el “kongei el mong.”—Psalm 110:3.
Retelecholb el Sioning a sebechir el support er a ongdibel el ngar er a lmuut el bebil er a rolel. Rudam el olab a qualification el losaod a bades a sebechir el mo mesiou el ministerial servant e a cherengel a taem e ngsebechir el mo mesiou el ta er a remechuodel. E a rudam me a rudos a sebechir el support er a ureor er a berkel a klumech sel losiou el pioneer. A rebebil er a Resioning a sebechir lolengeseu a ureor el omekedechor me a lechub e te melukl el mora ongdibel lousbech a ngeso.
Morriter er a Tekingel a Dios
Bo Mesisiich el Oumerang er a Rengedel a Dios
15 A telbilel a Jehovah el mo er a Abraham me a mo er a David a oterekeklii el kmo a uldidellel a rsechel a redil a mo mengedereder el king. Engdi a lsekum a uldidellel a rasech a di mo king e merekong, e ngmo diak el sebechel a beluulechad el rokir el mukngeltengat. Ngika el uldidellel a rasech a dirrek el kirel el mo prist. E le te di prist a sebechir el oldars a tenget el mo melubet er a rechad er a kngterir me bo el sebechir el mo chedal a telungalek er a Jehovah el ngar er a eanged me a chutem. Me a Jehovah a rirellii a lmuut el ta er a telbiil el mo oterekeklii el kmo a uldidellel a rasech a mo prist, e tiang a telbilel a Jehovah el kirel a prist el ua Melkisedek.
16 A Dios a mileketeklii el mo er a King el David el kmo Ngii a mo meruul a telbilel el obengkel a Jesus el uldimukl er ngii a eru el tekoi. A kot, a Jesus a mo ‘dengchokl er a kadekmel’ a Dios el dimerekmo bo lemesisiich er a recherrouel. Me a ongerung, a Jesus a mo “prist el mo cherechar, el ngar a deruchellel a Melkisedek.” (Monguiu er a Psalm 110:1, 2, 4.) Ngera uchul me ngmo prist “el ngar a deruchellel a Melkisedek”? A uchei er a lenguu a Beluu er a Nglat a rengelekel a Abraham, e a Melkisedek a mle king er a mats er a Salem e dirrek el mle “prist er a Kot el Ngarbab el Dios.” (Heb. 7:1-3) A Jehovah a tiltkii a Melkisedek el mo king e prist, e di mle ngii el tang a ullab aika el eru el deruchall er a uchei er a Jesus. Me a lmuut el tang, ngdiak a chad el uleakuchei er a Melkisedek el ullab aika el deruchall e dimlak a mo omtechei er ngii, me ngdi ua le “prist el mo cherechar.”
17 Ngokiu tia el telbiil, e a Dios a tutkii a Jesus el mo prist. Ngmo “prist el mo cherechar el oltirakl er a deruchellel a Melkisedek.” (Heb. 5:4-6) Me tia el telbiil a meketeklii el kmo a Jehovah a ulterekokl el mo ousbech er a Rengedel a Mesias el mo otutii a moktek er ngii el kirel tia el chutem me a rechad.
DECEMBER 2-8
MEKREOS EL TEKOI EL NGAR ER A BIBLIA | PSALM 113-118
Ngmekera Sebeched el Mtechei a Sulel a Jehovah?
Bo Meteketek er a Bltikerreng
13 Aika el tekingel a Jesus a bleketakl el olecholt el kmo, a kot e ngar er a uchei er a rokui el tekoi el kmo ngkired el mo betik a rengud er a Jehovah. Engdi, ngdiak demechell el oba cherrungel el bltikerreng el mo er a Jehovah. Ngkired el omekeroul er ngii. Sera de kot el orrenges el kirel, e kede mlo semeriar er aike el derirenges. E kede mlekekokid el mesuub el kirel er sera longetmokl er tia el chutem el kirir a rechad. (Genesis 2:5-23) Kede milsuub el kmo ngmilekerang er a klechad, e le ngdimlak longoit er kid er a lekot el soiseb er a telungalek er a klechad a klengit, e ngbai mirruul a tekoi el mo melubet er kid. (Genesis 3:1-5, 15) Ngulechotii a blekokuii el mo er a reblak a rengrir, e uldureklii a di ta el Ngelekel el mo ousubes a kngtid. (Johanes 3:16, 36) Aike el meklou el klemedengei a menglou er a omereng el saul er kid el mo er a Jehovah. (Isaia 25:1) A King el David a dilu el kmo ngmlo betik a rengul er a Jehovah e le Ulekerreuil el ngar er a bltikerreng a uchul. (Psalm 116:1-9) Me chelecha el taem, a Jehovah a omekerreu er kid, e omekrael er kid, e melisiich er kid. A bo lebetok el dosuub el kirel, e nglmuut el mo dmolech a bltikerreng er kid.—Psalm 31:23; Sefania 3:17; Rom 8:28.
w09 7/15 29 par. 4-5
Mkengei Loba Omereng el Saul e Morous el Loba Rengum el Rokir
Ngika el milluches er tia el Psalm a uleker: “Ng ngera sebechek el msa RUBAK el kirel a ikel rokui el klungiolel el mer ngak?” (Psa. 116:12) Ngera el klungiaol a lengilai? A Jehovah silsichii er a ‘lemedakt e mekngit a rengul.’ Me a lmuut kung ‘ngulsebelii er a kodall.’ A uchul me ngmle soal el mtechei a sulel a Jehovah. Ngera sebechel el meruul er ngii? Ngdilu el kmo: “Ak mo msa ikel bla ktib.” (Psa. 116:3, 4, 8, 10-14, NW) Ngrirellii er a rengul a mo oltaut a rokui el telbiil leriruul el mora Jehovah e oltaut a ngerechelel el mo er ngii.
Kau me ngdirrek el sebechem el meruul er a osisiu el tekoi. Ngoeak a ngera el rolel? Loeak omkiei lotirakl a llechul me a omellach er a Jehovah er a bek el taem. Me ngkmal klou a ultutelel omoterekeklii el kmo a omengull er kau a melemolem el kot el klou a ultutelel el tekoi er a klengar er kau e mecherei a chedaol reng er a Dios me ngomekrael a rokui el tekoi el moruul. (Oli. 12:13; Gal. 5:16-18) Me nguaisei ngdiak el sebechem el mtechei a rokui el tekoi el bla leruul a Jehovah el kirem. Engdi ngmo ‘rullii a rengul [a Jehovah] el mo ungil’ sel lomes er kau el loba rengum el rokir el mesiou er ngii. (Osi. 27:11) Ngmera el ileakl el techall el sebeched el rullii a rengul a Jehovah el mo ungil el ngar tia el rolel!
A Tekoi el Sebeched el Suub er a Babier er a Levitikus
9 Ongeru el klubeled: Kede mesiou er a Jehovah e le kede oba omereng el saul el kirel. Kede mo mesuub el kirel tia el tekoi lokiu sel dorriter a tenget er a budech, el ngii a ta er a klou a ultutelel el tedebechel a mera el omengull er a Israel er a irechar. Ngar er a babier er a Levitikus, e kede mesuub el kmo a chad er a Israel a sebechel odersii a tenget er a budech el “tenget er omerengelsaul.” (Lev. 7:11-13, 16-18) Me ngmeruul er tiang e le ngsoal, el diak lomdasu el kmo ngkirel meruul er ngii. Ngkongei el meruul er ngii e le ngmle betik a rengul er a Dios er ngii el Jehovah. Me ngii el chad, me a telungalek er ngii, me a reprist a mo menga er a techel a charm el mlo tenget. Engdi ngar ngii a bebil el klekedellel a charm el di mora Jehovah. Aika ngera el klekedellel ngii el charm?
10 Ongedei el klubeled: Ngbetik a rengud er a Jehovah a uchul me kede msa aike el kot el ungil er kid. A Jehovah a ulemes a laok el kot el ungil el klekedellel a charm. Ngdirrek el millekoi el kmo a bebil el klekedellel ngii el charm, el uldimukl er a kidney, a kmal mekreos. (Monguiu er a Levitikus 3:6, 12, 14-16.) Me a Jehovah a kmal mle dmeu a rengul a lsekum a chad er a Israel a kilengei el tonget aikaikid el klekedellel ngii el charm me a laok el mo er Ngii. A chad er a Israel el mirruul er tiang a ulechotii el kmo ngsoal msa Dios sel kot el ungil er ngii. Me ngdi osisiu, a Jesus a kilengei el msa Jehovah sel kot el ungil er ngii lokiu a loruul aike el rokui el sebechel el mo mesiou er a Jehovah e le ngii el mle betik a rengul er Ngii. (Jn. 14:31) A Jesus a mle dmeu a rengul meruul a soal a Dios, e dirrek el kmal mle betik a rengul er a llechul a Dios. (Psa. 40:8) Me a Jehovah a ulterekokl el kmal mle dmeu a rengul el mesa Jesus el kongei el mesiou er Ngii!
11 A omesiunged el mora Jehovah a di uaike el tenget er a budech e le ngochotii a uldesued el kirel a Jehovah. Kede msa Jehovah sel kot el ungil er kid, e meruul er tiang e le ngbetik a rengud er ngii loba rengud el rokir. Ngulterekokl el kmal dmeu a rengul a Jehovah sel lesterir a rebetok el miliol el kongei el mesiou er ngii e le ngbetik a rengrir er Ngii me a rolel! Me ngsebechel mo mechelaod a rengud sel dolatk el kmo a Jehovah a omes e dirrek el mengreos aike el doruul me a dirrek el sel uchul me kede meruul aika el tekoi. El ua tiang, a lsekum ke chudelang e mla mo diak el sebechem el remuul aike el soam el ngar er a omesiungem, e bo lulterekokl a rengum el kmo a Jehovah a ungil medengei. Alta e ke melatk el kmo ngdiak a kmal sebechem el meruul el kirel a Jehovah, engdi a Jehovah mesa bltkil a rengum el rullau me ke meruul aike el sebechem. E ngii a kmal dmeu a rengul er sel kot el ungil el sebechem el msang.
Morriter er a Tekingel a Dios
Ak Oba Omelatk el Kirel a Dios
9 Me ngbleketakl el kmo a ulaoch el ngar a Psalm 118:22 a omlaoch el kirel a okiis el mo er ngii er a uriul er a betok el dart el rak. Te mo otngeklii a Mesias e mo mekodir. Engdi ngii a lmuut el mo mekiis er a kodall e mo kot el klou a belkul el bad. Me sel lebekiis er a kodall a Jesus, e ngdi mo ngii el tang a oungakl er a “ngklel a di tal chad el bla le beskid a Dios el sebechel el osebelid.”—Rellir 4:12; Efesus 1:20.
DECEMBER 9-15
MEKREOS EL TEKOI EL NGAR ER A BIBLIA | PSALM 119:1-56
“Ngmekera Sebechel a Kekerei el Chad el Melemolem el Klikiid a Rolel?”
w87 11/1 18 par. 10
Kau, Ke Melemolem el Klikiid er a Bek el Rolel?
10 A Paulus ulemeklatk el ngar er a Efesus 5:5 el kmo: “Bo mungil medengei el kmo ng diak a chad el ngar a deleboes, ma lechub e ng mengelengalek el tekoi, ma lechub e ng nglemokel er a iltetel a beluulchad (ele ngklemokel a di ua omengull el bleob el chelid) el sebechel el mo nguu a blingelel er a Rengedel a Kristus ma Dios.” Me nguaisei engdi a bek el rak e te betok el telael a reprove me a lechub e ngmesuld a ngklir el deleboes el ‘klengit el kirel a bedengir’ a uchul. (1 Korinth 6:18, BT) Tia blechoel el duubech e le te diak el ‘klekar loltirakl er a Tekingel a Dios.’ (Psalm 119:9, NW) A rebetok er a rudam a blechoel el mo diak el klekar sel lengar er a vacation. Te mengoit a taem lobengterir a rechad er a beluulechad el dirrek el ngar er a vacation er a bai lobengterir a rudam me a rudos. Te melekoi el kmo ‘te kmal ungil chad’ me a rebebil er tir a mo teloi er tir el meruul a tekoi el sebechel mo uchul a telemellir. Ngdi osisiu a rebebil a kuk kmal mo friendly er a rechad er a urerir. A ta er a remechuodel el Kristiano a kmal mlo kmeed er a redil el ledak loureor me ngkilengei el choitii a telungalek er ngii e mo kiei el lobengkel! Tia uchul me ngmilsuld a ngklel. Ngmera el klemerang aike el lolekoi a Biblia, “A mekngit el klausechelei a tomii a ungil blekeradel”!—1 Korinth 15:33, BT.
w06 9/1 23 par. 1
“A Tekingem a Meskak a Deuil a Renguk”
A JEHOVAH a omesterir a rechedal a uleklatk me bo lsebechir el sumechokl a mondai el ngar er ngii er a chelsel aika el meringel el taem. A bebil er aika el uleklatk a dengai el oeak a omesubed er a Biblia, e dirrek el remenges el oeak a suobel ma dirrek el cheldechedecherir a rebebil el motobed er a miting er a Rekristiano. E a betok er aike el donguiu ma ike el derenges a diak lebeches el tekoi. Kede ulterekokl el mla mesuub a osisiu el suobel er a ngar er a mong. Le kid a rechad a blechoel el obes a uchul me ngkired el melemolem el melai a uleklatk el kirel a moktek er a Jehovah ma llechul ma osisecheklel. E kired el mo oba omereng el saul el kirel a uleklatk er a Dios, e le ngmelisiich er kid el mo melatk er a uchul e ngmlo soad a rolel a klengar el oltirakl er a soal a Dios. Sei a uchul ma chad er a psalm a milengitakl el mo er a Jehovah el kmo: “A tekingem a meskak a deuil a renguk.”—Psalm 119:24.
w10 4/1 24 par. 2
Molechib er a Medam er a Chelsengsang el Tekoi!
2 Me a tekoi el domes a dirrek el sebechel el mo uchul a telemelled. A osenged a sebechel el ngar ngii a lerellii er a uldesued el mekdebechii a mesisiich el uldesued me a urunguled el mo soad a tekoi. Ele kid el kiei er a chelsel a beluulechad el chederedall er a Diabelong a uchul, me kede omes a betok el mekikiongel el tekoi me a omeruul el ngii a sebechel el mereched el mengesang a osenged, e dirrek el mengesuseu er kid. (1 Johanes 5:19) Ngkmal el bleketakl a nglunguchel a ta er a milluches er a Psalm el kmo: “Mochib a medak er a chelsengsang, e momekngar er ngak el olab a tekingem.”—Psalm 119:37.
Morriter er a Tekingel a Dios
w05 8/1 21 par. 2
Moumerang er a Tekingel a Jehovah
2 A klou a ultutelel el tekoi er a Psalm 119 a klungel a ultutelel a tekingel a Dios, ma lechub a klumech er ngii. Ma bo lsebechel el melatk er ngii, e ngike el milluches er tia el chelitakl a rirellii el mo oltirakl er a blechebechel a alphabet. Aike el 176 el bades er ngii a oltirakl er a blechebechel aike el alphabet er a tekoi er a Hebru. Ngar er a tekoi er a Hebru, e a dertang er aike el 22 el bades er sel psalm a ngar er ngii a 8 el line er ngii el omuchel er a osisiu el llechukl. Me tia el psalm a melutk el mo er a tekingel a Dios, ma llechul, ma uleklatk, ma rolel, ma ulekrael er ngii, ma omellach er ngii, ma kerrekerilel, ma omelekingel. Me ngngar er tia el suobel me sel ongingil el suobel, e kede mo mesaod er a Psalm 119 el oltirakl er sel melemalt el oidel a Biblia er a tekoi er a Hebru. Sel dolatk er aike el experience er a remesiungel a Jehovah er a irechar me chelecha el taem a sebechel el melisiich er a klemedengei er kid el kirel tia el mlukreng el chelitakl e kilungii a deurreng er kid el kirel sel llechukl el Tekingel a Dios, el Biblia.
DECEMBER 16-22
MEKREOS EL TEKOI EL NGAR ER A BIBLIA | PSALM 119:57-120
Rolel e Ngsebeched Loutekangel a Ringel
w06 9/1 18 par. 2
Ng Meral Betik a Renguk er a Llechum!
2 Me ngungil a di lekau el oker er kau el kmo, “A llechul a Dios ngmlekerang e mlo uchul a ongelaod el mo er ngika el milluches er a psalm?” A tekoi el ngilsuir a ulterekokl el reng er ngii el kmo a Jehovah a mle semeriar er ngii. Ma ike el klungiaol el blo lolechesuar e le ngii el uleltaut a llechul a Dios a rirellii el mo dmeu a rengul e altang mlo chelebangel a ringel. Ngmle medengei el kmo a Jehovah a mle melemalt a blekerdelel el bedulngii. Ma lmuut el tang, a ulekrael er a llechul a Dios a rirellii ngika el milluches er a psalm el kuk mlo mellomes a rengul er a recherrouel e dirrek el ulsebelii a klengar er ngii. A blekongesenges er ngii er a llach a mlo uchul a budech ma ungil el ukltkel.—Psalm 119:1, 9, 65, 93, 98, 165.
Kau Ngkmal Betik a Rengum er a Uleklatk er a Jehovah?
3 Aike el uleklatk er a Dios a kmal mle mekreos el kirel a milluches er a psalm, el milngitakl el kmo: “A kureched, e ngdimlak bo kmeoud el mo orreked a llechum. Ak mle llechotel er a delengerenger el mle iliuekl er ngak. Ngdi dimlak kubes a llechum.” (Psalm 119:60, 61, NW) Aike el uleklatk er a Jehovah a ngosukid el mo outekangel a odechelakl e le ngultebechel a rengud el kmo a Demad er a eanged a sebechel el melebes a lechet el ousbech a recherroed el mo melechet er kid. El ngar er a ungil el temel, e a Jehovah a mo melubet er kid er a ngii di el tekoi el melenget er kid me ngmo sebeched el oltaut er a ureor er a berkel a Renged.—Markus 13:10.
w06 8/1 29 par. 4
A Omesodel a Babier er a Ongeim el Psalm
119:71—Ngngera sebechel el mo klungiolel a ongarm ma ringel? A ringel a sebechel el osisecheklid el mo mui el ultuil er a Jehovah, el oba blakerreng el meluluuch el mo er ngii, e mo meses el mesuub er a Biblia e oltaut a lolekoi. Ma lmuut el tang, a bo dechebangel a ringel e ngsebechel el ochotii a chelitechut el ousbech er a omesmechokl. A ongarm a diak el rellid el mo oba cheluached er a rengud a lsekum e kede mecherei me ngmengikiid er kid.
“Mlangel el Obengterir a re Lmangel”
3 Ngika el chubechub el Demad el Jehovah a ngike kot el ngarbab el omeskid a ongelaod er sel taem el dousbech er ngii. (Monguiu er a 2 Korinth 1:3, 4, BT.) Ngii ngike el kot el ngarbab el kerebai el kirel a klechubechub, e mla tibir el mo er a rechedal el kmo: “Ngak ngikel melisiich er kemiu.”—Isaia 51:12; Psalm 119:50, 52, 76.
5 Me ngkmal ulterekokl a rengud el kmo a Jehovah a mo ngosukid. Me lak domai er a rengud el meluluuch el mo er ngii el subedii er a ringelel a uldesued me a kngtil a rengud. Me ngmera el mo mechelaod a rengud sel dodengei el kmo a Jehovah a ungil medengelii a ringeled, e ngii a dirrek el mo meskid a ongelaod el dousbech! Engdi ngmekera loruul er tiang?
Morriter er a Tekingel a Dios
w06 8/1 29 par. 5
A Omesodel a Babier er a Ongeim el Psalm
119:96—Ngera belkul a ‘ngelsengesel a rokui el cherrungel’? A meluches er a psalm a melekoi er a osengel a chad el kirel a chelerrungel. A mla er a uldesuel a kmo a osengel a chad el kirel a chelerrungel a ngar er ngii a telkelel. E ngar er a kuk bitang, a llechul a Dios a diak a telkelel, me ngomekrael a bek el blekeradel er a klengar. A New International Version a melekoi el kmo: “Ak mesang a telkelel a rokui el chelerrungel, engdi ngdiak a telkelel a llechum.”
DECEMBER 23-29
MEKREOS EL TEKOI EL NGAR ER A BIBLIA | PSALM 119:121-176
Rolel e Kede Mengeroid er Kid er a Diak a Ultutelel el Chamireng
Bechei a Llechul a Dios me a Omellach er Ngii Me Loksongii a Ukltkem
5 A lsekum ngsoad a llechul a Dios a lengesukid e ngkmal kired el meruul a lmuut el betok er a di donguiu me a lechub e di dodengei. Ngkired el mo betik a rengud er a llechul, e mo oba omengull el kirel. A Biblia a melekoi er kid el kmo: “Mouketui a mekngit, e le betik a rengmiu er a ungil.” (Amos 5:15) Engdi ngmekera doruul el uaisei? Ngkired el mesuub el mo omes a tekoi el ua osengel a Jehovah. Ka molatk er tiaikid el rolel, ngkora diak lungil a cheliuem me a toktang a dmu er kau el kmo ke mo menga ungil er a bedenged el kall, e mo exercise, e meruul a bebil el omelodech er a klengar er kau. Me kultirakl a tekingel e mlo mesa klungiolel! Me ngua ngera uldesuem el kirel a tekingel ngika el toktang?
6 Me ngdi osisiu, ngike el Ulemeob er kid a mla meskid a llach el mo omekerreu er kid er a telemellel a klengit, e rullii a klengar er kid el mo ungil. El ua tiang, a Biblia osisecheklid el kmo ngdiak el kired el omulak, e mengeblad, e merechorech, e meruul a deleboes me a tekoi er a uldikel me a koadelchad, me a lechub e ngtekoi er a olai. (Monguiu er a Osisechakl 6:16-19; Ocholt 21:8) Me sel bo desa klungiolel a dolengesenges er a Jehovah, e a bltkil a rengud el mo er ngii me a llechul a mukeroul.
w93 4/15 17 par. 12
Rengeasek, Ngngera Moltoir?
12 A ngaruchei er ngii e ngkirem el suubii el mo ouketui, mo mederdirk, e chetemiu a mekngit. (Psalm 97:10) Ngmekera sebechem el mo ouketui er a tekoi el uchelel e ngkora fun e soam? Loeak sel molatk a mo rsel omerellem. “Lak kom mecheuid; a Dios a diak le mecheblad, ele ikel lolalem a chad, ia ikei a bo loridm. Ngikel di meruul a soal a klechad er ngii a mo remiid; e ngikel meruul a soal a Reng, a mo ngar el diak a ulebengelel.” (Galatia 6:7, 8) Sel bo lsoam el kongei er a mengesuseu er kau e molatk er a rolel e ngkmal mo tomellii a rengul a Jehovah. (Momekesiu er a Psalm 78:41.) Dirrek el molatk er a possibility er kau el mo dioll me a lechub e ke ngmai a rakt el uai a AIDS. Molatk er a ringel el bo molechesuar er ngii me a self-respect er kau el bo moridii. Nglocha dirrek el ngar ngii a bo letemellii el kemanget el taem. A ta el redil Kristiano a kmo: “Ngak me a bechik a mlo dmak el bad er a uchei er aki bo mkaodengei. Me alta ki di diul mla mo Kristiano, engdi a klengar er kemam er a uchei el kirel a tekoi er a cheliuaiu a uchul mondai me a omengerirs er a chelsel a chebechiielam.” Ngdirrek el diak el soad el lobes el kmo kede mo oriid a ileakl el techall el dolab er a ongdibel me a lechub e ngmesuld a ngkled! (1 Korinth 5:9-13) Ngar ngii a tedeb el deurreng el worth er aikang?
Morriter er a Tekingel a Dios
Bo Lulterekokl a Rengum el Kmo a ‘Tekingel [a Dios] a Di Klemerang’
2 Kid el mesiungel a Jehovah a ulterekokl a rengud el kmo ngii a “Dios er a klemerang” e ngii a soal sel kot lungil el kired. (Psa. 31:5, NW; Isa. 48:17) Kede medengei el kmo ngsebeched loumerang aike el lolekoi a Biblia. Kede oumerang el kmo a “cherrengelel a [tekingel a Dios] a di klemerang.” (Monguiu er a Psalm 119:160.) Kede kongei a tekingel a ta el chellimosk er a Biblia el milluches el kmo: “Ngdiak a ngii di el tekoi el bla el delii a Dios el klsuul me a lechub e ngdiak bo el taut. A rechedal a Dios a sebechir loumerang a tekingel e le te oumerang er ngika el Dios el melekoi.”
DECEMBER 30–JANUARY 5
MEKREOS EL TEKOI EL NGAR ER A BIBLIA | PSALM 120-126
Te Lilangel e Melalem, engdi Te Uleba Deurreng el Meridm
w04 9/1 24 par. 10
Te Ngeltengat Tirke el Mengebkall er a Dios
10 Sel dekengei el mo oba ongelungel er a kledisciplo, e kede okoad el omtok er a Satan. A Jakobus 4:7 a tibir el kmo: “E momtok ra diabelong me le chiis er kemiu.” Tia diak lebelkul a kmo ngbeot el tekoi. Omesiou el mo er a Dios a ousbech er a klou el telekangel. (Lukas 13:24) Engdi Biblia a mla tibir el ngar er a Psalm 126:5 el kmo: “Mrelleterir tirkel lilangel ra lolalem a dellomel, me longudel ra blsechel chomeridm el oba deurreng!” Chochoi, kid a mengull er a Dios el ngii a medengei a saul. “Tirikel osiik er ngii a le besterir chomeksulir,” e ngii a omekngeltengat er tirke el mengebkall er ngii.—Hebru 11:6.
Ngmo Uangera Klisichel a Klaumerang er Kau?
17 Kau, ngmekngit a rengum er a kodellel a betik er a rengum? Mongoit a taem el melisiich er a klaumerang er kau er a okiis loeak sel monguiu a cheldecheduch er a Biblia el kirel a okiis. Kau, ngmekngit a rengum le ngar ngii a chedal a telungalek er kau el mla mesuld a ngklel? Mosuub er a Tekingel a Dios el mo olterekokl er a rengum el kmo ngdiak a mo ungil el ua rolel a Dios a lomesmechokl. Me a ngii di el omelsemai el omchelebangel er ngii mousbech er ngii el techall el mo melisiich er a klaumerang er kau. Moluluuch louchais er a Jehovah aike el rokui el ngar er a rengum. Lak moleakl er kau er a rechad e bai molemolem lolekeed er kau er a rudam me a rudos er kau. (Osi. 18:1, NW) Moruul aike el tekoi el mo ngosukau el outekangel el mo lmuut me a lsekum e ke meruul el merael a iuechel a medam. (Psa. 126:5, 6) Lak mongoit a miting, odingel, me a omengiuem er a Biblia. Molemolem el ulturk osengem er a klengeltengat el bo mngai er a ngar medad. Sel momes er a rolel e a Jehovah a olengeseu er kau, e ngmo smisichii a klaumerang er kau er ngii.
Moutekangel el Ngar er a Ureor er a Omeridm!
13 Aikel tekoi el ngar er a Psalm 126:5, 6 a mera el mengelaod er a rechad er a omeridm me tirke el chuarm er a odechelakl el dmu el kmo: “Mrelleterir tirkel lilangel ra lolalem a dellomel, me longudel ra blsechel chomeridm el oba deurreng! Tirkel lilangel ra ltobed el olab a tane a mo lmuut el mei el mengitakl ra deurreng, el olab a lriridm el mei!” Aike el tekingel a milluches er a psalm el kirel a omelalem ma omeridm a okesiu er a ulekerreuil ma klengeltengat er a Jehovah el mo er a rengellitel el mlo remei er a uriul er a klsibai er a Babilon er a irechar. Ngmle klou a deurreng er tir er a ngebetir, engdi te mlo lmangel el omriid a tane er a chutem el mle cheloit er a temel a 70 el rak er a klsibai er tir er a ngodech el beluu. Engdi, tirke el mlo melalem e milleketek a mlo dmeu a rengrir er a redechel a urerir er a uriul.
14 Kede locha mo lmangel sel bo dechuarm er a ongarm ma lechub sel taem kid ma lechub a rekldemed el oumerang a chuarm el kirel a llemalt. (1 Petrus 3:14) A urered er a omeridm a kora kmal meringel er a kot el uchul e le ngdiak domes a ngii di el ngerang el olecholt a redechel a omesiunged. Engdi lsekum kede melemolem el melalem e melubs, e a Dios a omekdubech, el kuk ngar er uchei er a uldesued. (1 Korinth 3:6) A ungil el okesiu er tiang a ngar er aike el dilubech er a omerusel a Biblia maike el babier el mesaod er a Biblia.
Morriter er a Tekingel a Dios
Kau, Ke Omes el Bedul Techang?
KEDE kiei er a taem er a “uriul sils” el mo er ngii a “blsechel a ringel.” (2 Timothy 3:1, BT) Me a klengar a lmuut el mengal mo meringel er uchei er sel taem el Jehovah a mo okngemedii tia el mekngit el beluulechad, e toketekii a mera el budech er tia el chutem. Tiaikid a uchul me kede mo melatk el kmo, ‘Ngak, a kumes el bedul techang el kirel a ngeso me a ulekrael?’ Kede locha di mereched el onger el kmo el “Bedul a Jehovah,” e tiaikid a kot lungil el nger.
2 Ngera belkul a domes el bedul a Jehovah? E mekera doterekeklii a rengud el mo melemolem lomes el bedulngii sel lebo er ngii a mondai er kid? A irechar e a ta el milluches er a Biblia a milsaod er a klungel a ultutelel a domes el bedul a Jehovah er sel taem el dousbech a ngeso. (Monguiu er a Psalm 123:1-4.) Ngdilu el kmo sel domes el bedul a Jehovah, e kede di ua mesiou el di omes el bedul a mastang er ngii. Lokiu a ngera el rolel? A mesiou a omes el bedul a mastang er ngii me a lechub e ngultuil er ngii el mo msa kelel e dirrek lomekerreu er ngii. Engdi ngdirrek el blechoel lomes el bedulngii me bo lodengei el kmo ngera soal a mastang er ngii a bo loruul, e kmal kirel el mo remuul. Me ngdi osisiu, ngkmal kired el kerekikl el mesuub a Tekingel a Dios er a bek el sils me bo dodengei a soal a Jehovah a bo doruul, e kmal kired el mo remuul. E seikid e ngmo ulterekokl a rengud el kmo a Jehovah a mo ngosukid er sel taem el dousbech a ngeso.—Efesus 5:17.