A Lot a kiliei lobengkel a angko er ngii er a Abraham er a beluu er a Kanaan. Cherengel a taem e a Abraham me a Lot a kmal mlo betok a chermir me ngmlo kekerei a chutem. A Abraham a dilu er a Lot: ‘Ngmla mo diak el sebeched el kiei el terung er a chimo el basio. Me molilt el kmo ke mo er me ngak kbo er sel bitang.’ A Abraham ngdiak lochotii el kmo ngkmal dimlak di lolatk er a di ngii?

A Lot a milsa klebokel el beluu el mlara bita er a mats el lokedongall el Sodom. Ngkmal mle betok a ralm er ngii e mellekulek a chetemel. Me ngileltii tiang e millukl el mong ngii me a telungalek er ngii.

A rechad er a Sodom me a rechad er a mats er a Gomora el mlara bita er tir a kmal mle medengerenger. Te kmal mlo medengerenger me a Jehovah millib el mo melemall aika el teblo el mats. Engdi Dios a mle soal lolsobel er a Lot me a telungalek er ngii me ngulderecheterir a reteru el anghel el mo melekoi er ngii el kmo: ‘Mereched! Mchiis el tuobed er tia el mats! A Jehovah mo melemall er ngii.’

Me nguaisei engdi a Lot a dimlak lemereched el tuobed. Ngulemekioud er ngii. Me a rechanghel a ngiluu ngii me a bechil me a reteru el ngelekel el redil e kilerseterir lotebedeterir er a beluu e dilu er tir el kmo: ‘Mrurt! Mchiis me msobel! E lak momes el bedul uriul. Omchisngekl el bedul uriul, e ko mad!’

Sera lebora mats el ngklel a Soar e a Jehovah ultengelii a chull el ngau me a sulfur er a Sodom me a Gomora. Aika el teblo el mats a di miltemall el mo diak. A bechil a Lot a dimlak lolengesenges er a Jehovah e chilsngekl el bedul uriul me ngulebult el mo bleob el sar! Engdi Lot me a rengelekel a chiliis el diak el klsakl e le te ullengesenges er a Jehovah. Nglocha kmal mlo mekngit a rengrir er a bechil a Lot el dimlak lolengesenges. Engdi ngulterekokl el mle dmeu a rengrir el ullengesenges a ulekrael er a Jehovah.

A Abraham a ulsisecheklii a ngelekel er a Isak el mo betik a rengul er a Jehovah e mo oumerang a rokui el telbilel. Engdi Isak er a bocha le 25 a rekil e a Jehovah ullengit er a Abraham el mo meruul er a kmal meringel el tekoi. Tiang ngmle ngerang?

A Dios a dilu er a Abraham el kmo: ‘A kulengit me mnguu a di ta el ngelekem e bo mtengetengii el delaol tenget er a rois el ngar er a beluu er a Moria.’ A Abraham a dimlak lodengelii a uchul me a Jehovah a ullengit er ngii el mo meruul er tiang engdi ngdi ullengesenges er a Jehovah.

Me a bo lekukuk er a dirk tutau e a Abraham a ngiluu a Isak me a reteru el mesiungel e mirrael el mora Moria. Uriul er a edei el klebesei e te mocha omes er a rois el ngar cheroid. A Abraham a dilu er a remesiungel me longiil e ngii me a Isak a mirrael el mo melenget. A Abraham a ngilai a idungel el msang a Isak me ngolab e ngii a ngiluu a oles. Me a Isak a uleker er a demal el kmo: ‘Ngngar er ker a charm el bo dolenget er ngii?’ Me a Abraham a dilu el kmo: ‘Rungalek, a Jehovah a mo meskid a charm.’

Sera lebora rois e te tileketekii a olengetongel. E seikid a Abraham a lilechet a chimal me a ochil a Isak e mechiuii er a olengetongel.

Me a Abraham er a lebedir a oles e a anghel er a Jehovah a mlara eanged e melekoi el kmo: ‘Abraham! Lak molemall er a ngalek! Ak mla mo medengei el kmo koumerang er a Dios e le ke kilengei el mo tongetengii a ngelekem.’ A Abraham a milsa sechal el sib el mla mechiseksikt a orsul er a kerrekar. Ngdi mle mereched el kodekedii a Isak e tongetengii a sib.

Ngulemuchel er tiakid el sils e a Jehovah mlo omekedong er a Abraham el sechelil. Ke medengelii a uchul? A Abraham a mirruul a rokui el tekoi el lullengit er ngii a Jehovah, el mo lmuut er a lak lodengelii a uchul me a Jehovah olengit er ngii.

A Jehovah liluut el omelekl er a telbilel el mora Abraham el kmo: ‘Ak mo omekngeltengat er kau, e mo omdois er a ruldidellel a rsechem me a lechub ngrengelekem.’ Tia belkul a kmo a Jehovah mo omekngeltengat er a rokui el lungil el chad loeak a telungalek er a Abraham.