A Isak a mle 40 a rekil er a bo lebechil a Rebeka. Ngkmal mle betik a rengul er ngii. Cherengel a taem e ngmlo er ngii a reteru el ngelekir el kebtot el sechal.

Me a klou a lulngeklii el Esau e a kekerei a Jakob. A Esau a kmal mle soal a tekoi er omelisebekl e kmal mle meduch lomekbat a charm. Engdi a Jakob a mle soal el di ngar er a blai.

Tiakid el taem e sel lemad a chedam er a telungalek e ngike el kot el klou el ngalek el sechal a mo ngmai a oumesingd er a chetemel me a ududel a demal. Tia domekedong er ngii el kmo ngdiukes. A denguu er a telungalek er a Isak e tia el diukes a mle uldimukl er ngii aike el ileakl el telbiil el Jehovah tilib el mora Abraham. A Esau a dimlak lomekerreu el kirel aika el telbiil, engdi a Jakob a mle medengei el kmo ngkmal meklou a ultutelel.

A ta er a klebesei e a Esau a mlo omoes e me remei el kmal mesaul a bedengel. Ngtirrengur a ungil a bul el kall el lurruul er ngii a Jakob me ngdilu er ngii el kmo: ‘Ak kmal songerenger! Me bebil er a ilecha el bekerkard el sub!’ Me a Jakob a kmo: ‘Ok, engdi a kot em promise er ngak el kmo ak mo nguu a dikesem.’ Me a Esau a dilu el kmo: ‘Mongera belkul a diukes! Mnguu. Ngdi soak obeskak a kelek.’ Omomdasu ngmle smart er a Esau a meruul er tiang? Ngdiak. A Esau ulterur a kmal mekreos el tekoi el di kirel a chimo el belatong el sub.

A Isak er a lesal kmal chudelang e ngmlo kirel lomekngeltengat er a kot el klou el ngelekel el sechal. Engdi a Rebeka a ngilsuir ngike el kekerei el Jakob el nguu tia el klengeltengat. Sera bo lodengei a Esau e ngkmal ngilasech a rengul e millib a mo omekoad er a ochellel. A Isak me a Rebeka mle sorir el protect er a Jakob me te dilu er ngii el kmo: ‘Morael el mo kiei lobengkel a okdemelem er a Laban el dimerekmo bo lak el kesib a rengul a Esau.’ A Jakob a ullerrenges er a rechad er a blil e chiliis.

A Jehovah mle promise er a Jakob el kmo ngmo protect er ngii el ua ble le protect er a Abraham me a Isak. Me a Jakob a mlo kiei er a Haran. Ngar isei e ngmlo bechiil e mo er ngii a klou el telungalek er ngii e kmal mlo merau.

Cherengel a taem e a Jehovah a dilu er a Jakob el kmo: ‘Mluut el mora beluam.’ Me a Jakob me a telungalek er ngii ulemuchel er a kemanget el omerollir el lmuut el mo remei. Ngar tia el omerollir e a rechad a mle dmu er a Jakob el kmo: ‘A obekum er a Esau a ngar er a omerollel el mei ngii me a re 400 el chad!’ A Jakob a mlo medakt el kmo a Esau a soal el melemall er ngii me a telungalek er ngii. Me ngmilluluuch el mora Jehovah el kmo: ‘A kulengit me mosebelak er a obekuk.’ A bo lekukuk e a Jakob a uleldurokl a betok el sib, kaming, kerbou, kiamo, me a donkey el sengk el mora Esau.

Tiakid el kesus er a bo le di lengii el tang a Jakob e ngmilsang a anghel! Ngii me a anghel a mlo kaibedechakl. Te di mle kaibedechakl el mungii a llomes. Me alta Jakob a meltemall engdi ngdimlak lekengei el give up. Me a anghel a dilu er ngii el kmo: ‘Mereko mchitak.’ Engdi a Jakob a dilu el kmo: ‘Ngdiak chitau el dimerekmo momekngeltengat er ngak.’

Me a anghel a mocha omekngeltengat er a Jakob. Chelechang e ngmla mo medengei el kmo a Jehovah diak bo lebecherei a Esau me bo letemellii.

Seikid el tutau e a Jakob a milsang a Esau me a re 400 el chad el ngar cheroid el merael el mei. Me a Jakob a uleak medal a telungalek er ngii el mo outubuach er medal obekul e osus er ngii el euid el taem. A Esau a rirurt el mong el mechulii a Jakob. Tirka el teru el odam a dul lilangel e rirellii a budech. Omomdasu, e ngmle uangerang a uldesuel a Jehovah el kirel omerellel a Jakob?

A uriul e a Esau me a Jakob a di diul mlo remei. Ngmle 12 a ildisir a rengelekel a Jakob el sechal. A ngklir a Ruben, Simeon, Levi, Juda, Dan, Naftali, Gad, Aser, Isakar, Sebulun, Josef, me a Benjamin. A Josef el ta er tir a luluusbech er ngii a Jehovah el olsobel er a rechedal. Ke medengei el kmo ngmilekera Jehovah lousbech er ngii? Ka me bo desang.