17 EL SUOBEL

A Jesus Ngmera el Uangerang?

Printed Edition

Sel dosuub el kirel aike el ledilung me a lurruul a Jesus er a lengar tia el chutem, e kede suub a blekerdelel el rullid el mo kmeed er ngii me a Demal el Jehovah. Ngera bebil er aika el blekerdelel? E mekera sebeched loukerebai er a Jesus er a klengar er kid?

1. Ngoeak a ngera el rolel e a Jesus a kmal di ua Demal?

A Jesus er a lengar er a eanged e ngulemes er a Demal e millai a klubelel er ngii el betok el biliol el rak. Sei a uchul me ngomdasu, omelechesiu, e meruul a tekoi el di uai a Demal. (Monguiu er a Johanes 5:19.) Ngmle cherrungel locholt a blekerdelel a Demal a uchul me ngmillekoi el kmo: “Ngikel mla mesekak a mla mesa Chedam.” (Johanes 14:9) Sel bo mungil medengelii a Jesus e ke dirrek el mo ungil medengelii a Jehovah. El ua tiang, a klechubechub er a Jesus el mora rechad ochotii a uldesuel a Jehovah el kirem.

2. Ngmekera Jesus e mla ochotii el kmo ngbetik a rengul er a Jehovah?

A Jesus a dilu el kmo: “Beluulchad a kirel el mo medengei el kmo ng betik a renguk er a Chedam, ma uchul mak meruul a ikel ledu er ngak a Chedam.” (Johanes 14:31) A Jesus er a lengar tia el chutem e ngulechotii a klou el bltkil a rengul el mora Demal loeak a lolengesenges er ngii el mo lmuut er a chelsel a kmal meringel el blekeradel. Ngdirrek el kmal mle soal mesaod el kirel a Demal e ullengeseu er a rechad el mo er ngii a deleuill er tir me a Jehovah.—Johanes 14:23.

3. Ngmekera Jesus e mla ochotii el kmo ngbetik a rengul er a rechad?

A Biblia melekoi el kirel a Jesus el kmo ng ‘obotech a rengul er a re chad.’ (Osisechakl 8:31) Ngulechotii tia el bltikerreng loeak a lolisiich e lolengeseu er a rechad. Ngmirruul ongasireng lolecholt er a klisichel me a dirrek el klechubechub er ngii. (Markus 1:40-42) Ngmle ungil omerellel el mora rechad e dimlak longetukel. A tekingel a milengelaod er tirke el lulerrenges er ngii e milsterir omelatk. Ngkilengei el mo chuarm e mad le ngkmal betik a rengul er a rechad. Me nguaisei engdi ngileakl el betik a rengul er tirke el loltirakl osisecheklel.—Monguiu er a Johanes 15:13, 14.

BOM DMOLECH EL MERRITER

Msuub a lmuut el betok el kirel a Jesus. E msuubii a rolel e ngsebechem el mo olecholt er a bltikerreng me a blekeruraurreng el uai ngii.

4. A Jesus a betik a rengul er a Demal

A kerebil a Jesus osisecheklid er a rolel e ngsebeched lochotii er a Dios a bltkil a rengud el mo er Ngii. Monguiu er a Lukas 6:12 me a Johanes 15:10; 17:26. A uriul er a omonguiu a derta el bades e mosaod er tia el ker:

Ngmekera sebeched loukerebai er a Jesus er a rolel a dochotii er a Jehovah el kmo ngbetik a rengud er ngii?

Jesus el meluluuch. — A Jesus a kmal mle betik a rengul er a Demal e mle blechoel el mengoit a taem el meluluuch el mo er ngii

5. A Jesus a mekngit a rengul er a rechad lousbech a ngeso

A Jesus a ngilai aike el luluusbech a rechad el mo ngaruchei er aike el lousbech. Mo lmuut er a lemesaul a bedengel me ngdirk ullengeseu er a rechad. Monguiu er a Markus 6:30-44 e mosaod aika el ker:

Ngera bebil er a rolel e a Jesus a ulechotii er tia el cheldecheduch el kmo ngomekerreu er a rechad?—Momes er a 31, 34, 41, me a 42 el kekerei el bades.
Ngera uldbechii a Jesus el mo olengeseu er a rechad?—Momes er a 34 el kekerei el bades.
A Jesus el ullecholt aika el blekerdelel a Jehovah, ngera ngosisecheklii er kau el kirel a Jehovah?
Ngera bebil er a rolel e ngsebeched loukerebai er a Jesus el ulemekerreu er a rechad?

Jesus el okiu a ongasireng e ngomeka er a seked er a retelael el chad el di olab a kleim el blauang me a teblo el mekekerei el ngikel. A redisaiplo a merous ngii el kall el mora resechal, redil, me a rengalek.

6. A Jesus a bekururau

A Jesus a mle bekururau alta ngdimlak a kmal ngerang er ngii, e millisiich er a rechad el dirrek el mo uaisei. Monguiu er a Rellir 20:35 e mosaod er tia el ker:

A doltirakl a tekingel a Jesus, e ngmekera sebeched el metik a deurreng?

Momes er a VIDEO e mosaod er tia el ker.

VIDEO: “There Is More Happiness in Giving”—Excerpt (4:00)

Ngera bebil er a rolel e ngsebeched lolecholt er a blekeruraurreng, alta ngdiak a kmal ngerang er kid?

Ke medengei el kmo ngerang?

A Biblia olisechakl er kid el mo meluluuch loeak a ngklel a Jesus. (Monguiu er a Johanes 16:23, 24.) Sel doluluuch el uaisei e kede ochotii el kmo, kede mtab aike el bla leruul a Jesus el kired me bo lsebeched el mo sechelil a Dios.

A REBEBIL A KMO: “A Dios a kmal diak lomekerreu el kmo kede chuarm.”