Lak ‘Doltelechakl Er A Jehovah’

1, 2. Ngera uchul me ngdiak el kired el oltelechakl er a Dios el kirel a mondai el ngar er ngii er tia el chutem? Momekesiu.

KA DI molatk er a chad el kmal ungil a chebechiielel el mo remei e metik er a blil el di telemall a klalo er a chelsel. A kingall me a belatong me a rokui el klalo a di berriid. Me a klebokel el blil a ua letilaut er ngii a meses el eolt. Omomdasu e ngmo oltelechakl er techang? Ngmo melekoi el kmo, “Ngera uchul me a mechas er ngak a rirellii tiang?” Ngdiak, ngulterekokl el mo melekoi el kmo, “Ngtecha rirellii tiang?” E le ngungil el medengei el kmo a bechil a kmal diak el sebechel el meruul el uaisei.

² Chelechang e a beluulechad a mla metemall. A chutem, ralm me a eolt a mla mo mui a mekikiongel er ngii me a rechad a di sorir a uldikel me a delengerenger. Engdi kede mla suubii er a Biblia el kmo aika el tekoi a diak el kngtil a Jehovah. Ngmilebii tia el beluulechad el mle kirel el mo paradis el delengcheklir a rechad. (Gen. 2:8, 15) A Jehovah a Dios er a bltikerreng. (1 Jn. 4:8) Me a Biblia a ochotii el kmo a Satan el Diabelong a “merreder er tial beluulchad” me ngii a uchul a betok er aika el mondai.​—Jn. 14:30; 2 Ko. 4:4.

3. Ngmekerang e sebechel el mo cheleuid a uldesued el kirel a mondai er kid?

³ Me nguaisei, engdi ngdiak el sebeched el oltelechakl er a Satan el kirel a rokui el mondai er kid. E ngera uchul? E le bebil er a mondai el dechelebangel a mo er ngii e le kid el mlo remuul a cheleuid. (Monguiu er a Duteronomi 32:4-6.) Me alta e kede kongei er tia el uldasu, engdi kid el diak demecherrungel a uchul me ngsebechel el mo cheleuid a uldesued el kirel a mondai er kid. E tiang a kmal kdekudel el tekoi. (Osi. 14:12) E le ngsebechel el mo kesib a rengud e mo oltelechakl er a Jehovah er a bai domes el kmo ngkngtid me a lechub e ng Satan a uchul a mondai er kid.​—Osi. 19:3.

4, 5. Ngoeak a ngera el rolel e a Kristiano a mo oltelechakl er a Jehovah?

⁴ Ngsebechel el mo kesib a rengud e oltelechakl er a Jehovah? Ngdiak bo luchul a klungioled a bo lekesib a rengud e doltelechakl er ngii. (Isaia 41:11) Ngkmal diak el sebeched el mo kesib a rengud e dokoad er a Dios. Ngklemerang, nglocha diak bo dolekoi el kmo kede oltelechakl er a Jehovah, engdi a Osisechakl 19:3 a kmo: “A klebelngul a chad a nguu el osisebii er a tellemall, e ngii a oltelechakl er a RUBAK.” Me tiang a ochotii el kmo a chad a sebechel el mo kesib a rengul er a Dios e di ngar er a rengul e ngoltelechakl er Ngii. E tia el uldesuel a sebechel el mo chemolt er a omerellel. El ua tiang, nglocha mo diak el blak a rengul er a omesiungel el mo er a Jehovah me a lechub e ngmo diak el teloi er a ongdibel el mengull er Ngii.

⁵ Ngera sebechel el mo uchul e kede oltelechakl er a Jehovah? Kede mekerang e oibngid er tia el tekoi? Ngkired el mo medengei a nger er aika el ker me bo el sebeched el omekerreu er a deleuill er kid me a Jehovah el Dios!

KEDE MEKERANG E MO “OLTELECHAKL ER A RUBAK”?

6, 7. Ngera uchul me a rechad er a Israel er a taem er a Moses a ulemuchel el mengeremrum el kirel a Jehovah?

⁶ Ngera sebechel el rullii a blak a rengul el mesiungel a Jehovah el mo oltelechakl er a Dios el di ngar er a rengul? Tia el suobel a mo mesaod a eim el tekoi el sebechel el rullid el mo kesib a rengud. Kede dirrek el mo mesuub a bebil el kerebai er a Biblia el kirir a rechad el mlo “oltelechakl er a RUBAK.”​—1 Ko. 10:11, 12.

⁷ A mekngit el tekingir a rechad a sebechel el mengesuseu er kid. (Monguiu er a Duteronomi 1:26-28.) Ka di molatk a tekoi el lurruul a Jehovah el kirir a rechad er a Israel. Nguleltengel a teruich el ringel er a beluu er a Ekipten e milekodir a Farao me a resoldau er ngii er a Bekerekard el Daob. Me a rechad er a Israel a mlo mimokl! (Exo. 12:29-32, 51; 14:29-31; Psa. 136:15) Tirka el chedal a Dios a mle kltmokl el mo soiseb er a Beluu er a Nglat. Engdi te ulemuchel el mengeremrum el kirel a Jehovah. Te milekerang e oriid a klaumerang er tir er a taem el bochu lesiseb er tia el beluu? A reteruich el ourabek a uluuchais a mekngit el tekoi el kirel a beluu el mlo uchul me a rechad a mlo mechitechut a rengrir e medakt. (Ule. 14:1-4) Me a Jehovah a dimlak lebechititerir me bo lesiseb er sel “ungil el beluu” er seikid el taem. (Dut. 1:34, 35) Me ngera kede suubii er tiang? A mekngit el tekingir a rechad a sebechel el mengitechut a klaumerang er kid e rullid el mo mengeremrum el kirel a rolel a Jehovah a lomekrael er a rechedal er chelechang.

8. Ngera uchul me a rechad er a Juda er a taem er a Isaia a uleltelechakl er a Jehovah el kirel a mondai er tir?

⁸ A ringel me a chelebuul a sebechel el mengitechut er a rengud. (Monguiu er a Isaia 8:21, 22.) Sera taem er a Isaia e a rechad er a Juda a mle chuarm, e le te kiliei el iliuekl er a recherrouir e dirrek el mle klou a ngelsengesel a kall er a beluu. Engdi ngmla er ngii a lmuut el ta er a klou el mondai. Te mlo diak lorrenges er a Jehovah me ngmlo mechitechut a deleuill er tir el obengkel. (Amo. 8:11) Ngdimlak lebo er a Jehovah el olengit a ngeso, e te bai uleltelechakl er ngii me ngike el king er tir el kirel a mondai el mla er ngii. Me ngdi osisiu, a lsekum ngmo mechitechut a rengud el ringel me a lechub e ngkuk bebil el mondai er a klengar a uchul, e ngsebeched el mo oltelechakl er a Jehovah e omdasu el kmo ngdimlak lengesukid er sel taem el desal ousbech er ngii.

9. Ngera uchul me a rechad er a Israel er a taem er a Esekiel a mle cheleuid a uldesuir el kirel a omerellel a Jehovah?

⁹ Ngdiak dodengei a rokui el tekoi el dilubech. A rechad er a Israel er a taem er a Esekiel a dimlak lodengei a rokui el tekoi el dilubech a uchul me te ulemdasu el kmo ngdimlak lemelemalt a omerellel a Jehovah. (Ese. 18:29) Te ulemdasu el kmo ngmla er ngii a llemeltir el oukerrekeriil a omerellel a Dios, alta ngdimlak lungil el medengelii sel uchul me ngmirruul a tekoi. Me kid ngsebechel el mo uaisei a uldesued? Ngar er ngii a cheldecheduch er a Biblia el locha mo meringel er kid el mo medengei a belkul. Me a lechub e ngdiak dodengelii a uchul me a klengar er kid a kmal meringel. Me seikid e ngsebeched el mo omdasu el kmo a Jehovah a “diak le melemalt” a omerellel.​—Job 34:5.

10. Ngmekerang a chad e mo ua omerellel a Adam?

¹⁰ Ngdiak dekengei el kmo kede mlo mekngit. Ngike el kot el chad el Adam a uleltelechakl er a Dios el kirel a kngtil. (Gen. 3:12) Ngmle medengei el kmo ngmelemall er a llechul a Dios me ngmo obals el kirel a kngtil. Engdi nguleltelechakl er a Jehovah el ua lolekoi el kmo ngmilsang a mekngit el bechil. Te dirrek el ngar er ngii a rechad el ua omerellel a Adam el uleltelechakl er a Dios el kirel a kngterir. Me ngungil a di lekid el oker el kmo, ‘Ngsebechel el mo mechitechut a renguk e seselk a renguk el kirel a cheleuid el tekoi el kurruul me ak mo omdasu el kmo ngkmal meringel a llechul a Jehovah?’

11. Ngera sebeched el suubii er a omerellel a Jona?

¹¹ Kede mo omuchel el di melatk er a di kid. A profet el Jona a mlo kesib a rengul er sel taem el Jehovah a mlo chubteterir a rechad er a Ninive. (Jon. 4:1-3) E ngera uchul? Nglocha mle chetil a rechad er a beluu a bo lomdasu el kmo ngii a klsuul el profet e le ngdimlak lemetemall a beluu el uaike el ledilung. Me a Jona a di mle kerekikl el melatk er a chisel er a bai lolatk a mo klungiolir a rechad er sel beluu. Me kid ngsebeched el mo omdasu el ua Jona? A lsekum kede di melatk er a di kid e ngmo diak dolatk aike el lousbech a rechad. El ua tiang, nglocha mla mo betok el rak el douchais er a rechad el kmo a sils er a Jehovah a kmedang. Ngmo kesib a rengud er a Jehovah sel lolenguul er kid a rechad el kmo ngdirkak lemei sel sils?​—2 Pe. 3:3, 4, 9.

NGMEKERANG E MO DIAK ‘DOLTELECHAKL ER A RUBAK’?

12, 13. Ngkmal kired el mekerang a lsekum ngmo ngodech a uldesued el kirel a tekoi el loruul me a lechub e ngomechei a Jehovah?

¹² Kede mo mekerang a lsekum ngmo ngodech a uldesued el kirel a tekoi el loruul me a lechub e ngomechei a Jehovah? Ngdiak el rolel a llomeserreng a domdasu el uaisei. A Osisechakl 19:3 a omeklatk er kid el kmo ngsebechel el mo cheleuid a osenged e mo oltelechakl er a Jehovah el kirel a mondai el di mle kid el muchelii. Me bo dosaod a eim el tekoi el ngosukid me lak bo lekesib a rengud er a Jehovah.

¹³ Molemolem el melisiich er a deleuill er kau me a Jehovah. A lsekum ngar er ngii a kmes el deleuill er kid me a Jehovah e ngdiak bo lekesib a rengud er ngii. (Monguiu er a Osisechakl 3:5, 6.) Ngkmal kired el oumerang er a Jehovah. Ngkmal diak el kired el omdasu el kmo a uldesued a kuk ungil er a uldesuel me a lechub e domdasu el kmo kid a kmal meklou a ultuteled el chad. (Osi. 3:7; Oli. 7:16) Tiakid el uldesued a ngosukid me ngdiak doltelechakl er Ngii sel leduubech a mekngit el tekoi.

14, 15. Ngera sebechel el ngosukid me lak demekesuseu er a mekngit el tekingir a rechad?

¹⁴ Lak bechei a mekngit el tekingir a rechad me longesuseu er kau. Ngmla er ngii a betok el uchul me a rechad er a Israel a mle kirir el oumerang el kmo a Jehovah a mo ngosuterir el mo soiseb er a Beluu er a Nglat. (Psa. 78:43-53) Engdi sel taem el tirke el teruich el ourabek a uluuchais a mekngit el tekoi el kirel sel beluu, e a rechad er a Israel a “ulebes er a klisichel” a Jehovah, el belkul a kmo te ulebes aike el bla leruul el mo er tir. (Psa. 78:42) Me a lsekum kede melebedebek el kirel aike el betok el ungil el tekoi el bla leruul a Jehovah el mei er kid, e kede lmuut el mo kmeed er ngii. E tiang a mo uchul e ngdiak debechei a tekingir a rechad me longeroid er kid er a Jehovah.​—Psa. 77:11, 12.

¹⁵ A lmuut el ta er a tekoi el sebechel el mengeroid er kid er a Jehovah a sel bo lemekngit a uldesued el kirir a rudam me a rudos er kid. (1 Jn. 4:20) Sera lemetutk a Aron el mo ngarbab el prist e a rechad er a Israel a milengeremrum el kirel, me ngar er a osengel a Jehovah e ngua lulengeremrum er Ngii. (Ule. 17:10) Me ngdi osisiu, a lsekum kede mengeremrum el kirir tirke el lousbech er tir a Jehovah el omekrael er a urerel er tia el chutem, e ngua dongeremrum el kirel a Jehovah.​—Heb. 13:7, 17.

16, 17. Ngera uchul me ngdiak el kired el oltelechakl er a Jehovah el kirel a mondai er kid?

¹⁶ Lak dobes, a Jehovah a diak luchul a mondai er kid. Sera taem er a Isaia, e a rechad er a Israel a mla mo diak losiou er a Jehovah, engdi Ngii a dirk mle soal el olengeseu er tir. (Isa. 1:16-19) Me sel bo dechelebangel a mondai er chelechang e ngmelisiich er kid sel dodengei el kmo a Jehovah a kmal omekerreu er kid e soal el ngosukid. (1 Pe. 5:7) Ngdirrek el tibir el kmo ngmo meskid a klisiched me ngsebeched el melemolem el blak a rengud el mo er ngii.​—1 Ko. 10:13.

¹⁷ A Job a chilarm er a diak el melemalt el omeruul alta ngmle blak a rengul el mo er a Jehovah. Me sel bo dechuarm e lak dobes el kmo a Jehovah a diak luchul a ringel el mei er kid. A Biblia a kmo ngkmal betik a rengul er a llemalt e ouketui a chelebirukel. (Psa. 33:5) Ngkired el mo ua sechelil a Job el Elihu el mle medengei el kmo a Jehovah a kmal diak el sebechel el meruul a mekngit me a lechub e ngchelebirukel. (Job 34:12) A Jehovah a meskid a “bek el ungil e cherrungel sengk.” Me ngkmal diak el ngii a uchul a mondai er kid.​—Jak. 1:13, 17.

18, 19. Ngera uchul me ngdiak el kired el omdasu a mekngit el bedul a Jehovah? Momekesiu.

¹⁸ Lak bo lemekngit a uldesued el bedul a Jehovah. A Dios a cherrungel me a uldesuel a kuk ngarbab er a uldesued. (Isa. 55:8, 9) Me a lsekum ngariou a rengud e medengei a chelitechetud, e kede mo kongei el kmo ngdiak dodengei a rokui el tekoi. (Rom 9:20) Oumesingd el taem e ngdiak dodengei a rokui el tekoi el dilubech. Me kede locha kongei el kmo tia el bades a klemerang sel ledu el kmo: “A chad el omuchel el mengedecheduch er a kerrekeriil a ua leklemerang a cheldechedechal, el mo lmuut er sel taem el lemei a chad el mo oker a ker er ngii.”​—Osi. 18:17, New International Version.

¹⁹ Ka molatk oleko a chad el kmal sechelim a rirellii a ngodech el tekoi el diak modengelii a uchul me ngmirruul er ngii. Ke di mereched el mo omdasu el kmo a tekoi el lerirellii a kmal mekngit? Ngdiak, ke bai mo omdasu el kmo nglocha diak modengei a rokui el tekoi el dilubech. Me a lsekum ngmo uaisei a uldesued el kirir a resechelid el tir a diak lemecherrungel, e ngkmal kired el meruul er a osisiu el tekoi el bedul a Demad el ngar er a eanged. A omerellel me a uldesuel a lmuut el ngarbab er a uldesued!

20, 21. Ngera uchul me ngkmal diak el kired el oltelechakl er a Jehovah el kirel a mondai er kid?

²⁰ Lak dobes er sel mera el uchul a mondai er kid. Ngkired el kongei el kmo a bebil er a mondai er kid a dilubech el kid a uchul. (Gal. 6:7) Ngdiak el kired el oltelechakl er a Jehovah el kirel. E ngera uchul? Ka di molatk, ngera sebechel el mo duubech a lsekum a chad a omekall er a mlai el kmal bekerurt e meliuekl a kab? Ngsebechel el mo accident. Omomdasu, ngika el chad ngmo oltelechakl er a kombalii el mirruul er a mlai? Ngkmal diak! Me ngdi osisiu, a Jehovah a mla meskid a ilmekled el melilt a tekoi. Engdi ngdirrek el mla osisecheklid el mo meduch el melilt a tekoi. Me ngdiak el kired el oltelechakl er a Jehovah a lsekum kede mo meruul a cheleuid.

²¹ Engdi ngdiak el rokui el mondai a duubech el cheleuid me a lechub e ngmekngit el omerelled a uchul. A bebil el tekoi a duubech e le “taem ma techall a mor a re bek el chad.” (Oli. 9:11) Ngdirrek el ungil a lak dobes el kmo a Satan a uchul a kmal betok el mekngit el tekoi el ngar er ngii er a beluulechad er chelechang. (1 Jn. 5:19; Och. 12:9) Me a Satan a cherroued el diak el Jehovah!​—1 Pe. 5:8.

MOMEKERREU ER A MEKREOS EL DELEUILL ER KAU ME A JEHOVAH

22, 23. Ngerang a kired el melatk er ngii a lsekum ngmo mechitechut a rengud el mondai er kid a uchul?

²² Sel bo mchelebangel a meringel el tekoi, e molatk er a omerellel a Josua me a Kaleb. Tirke el teruich el ourabek a uluuchais a mekngit el kirel a Beluu er a Nglat, engdi a Josua me a Kaleb a uluuchais a ungil el tekoi el kirel. (Ule. 14:6-9) Te uluumerang er a Jehovah. Engdi ngmle kirir el mo obengterir a rechad er a Israel el merael er a ked el 40 el rak. Me tirka el terung te mlo kesib a rengrir e mengeremrum e le tir el ulemdasu el kmo ngdimlak el kirir el obals? Ngdiak, e le te uluumerang er a Jehovah me ngulemekngeltengat er tir el kirel. Me alta e a ruumesingd el chad er a Israel a mlad er a ked, engdi a Jehovah a kilengei er a Josua me a Kaleb me te mlo soiseb er a Beluu er a Nglat. (Ule. 14:30) Me a Jehovah a dirrek el mo omekngeltengat er kid a lsekum ngdiak “bo de mesaul el meruul” a soal.​—Gal. 6:9; Heb. 6:10.

²³ Ngkirem el mekerang a lsekum ngmechitechut a rengum el mondai er kau, cheleuid el tekoi el moruul, me a lechub e ngcheleuid el omerellir a rebebil a uchul? Molatk aike el kmal ungil el blekerdelel a Jehovah me aike el betok el ungil tekoi el bla letibir el mo meskau. Ka di molatk, ngmo ua ngerang a klengar er kau omko ngdimlak a kmes el deleuill er kau me ngii. Mada, molemolem el kmeed er a Jehovah e lak bo el kesib a rengum e moltelechakl er ngii!