Ngerang a Sheʼohlʹ me a Haiʹdes?

A BIBLIA er a lekot el melluches e nguluusbech er a tekoi er a Hebru el sheʼohlʹ me a tekoi er a Grik el haiʹdes el kuk betok er a 70 el taem. E aika el tekoi a mesaod el kirel a kodall. A lebebil er a taem e a Biblia el tekoi er a Belau a oliuid er ngii el “debull.” Engdi oumesingd el taem e ngoleiuid er ngii el “beluu er a ngau,” me a “beluu er a kodall,” me a lechub e ng “belurir a re mla mad.” Me nguaisei, engdi aika diak el melemalt el oidel a tekoi el sheʼohlʹ me a lechub e ng haiʹdes. Me aika el tekoi ngngera mera el belkul? Ka me bo domes er a rolel a Biblia a lousbech aika el tekoi.

A Olisechakl 9:10 a melekoi el kmo: “Ng diak le bor ngii a ureor ma uldasu ma lechub e ng klemedengei ma lechub e le llomeserreng er a beluu er a kodall [Sheʼohlʹ] el kau a mor ngii.” Tia el tekoi el Sheʼohlʹ ngmelutk el kirel a debellel me a lechub ngsel basio el dedileklii a betik er a rengud er ngii? Ngdiak e le Biblia sel losaod el kirel a debellel a chad e ngdiak lousbech er a tekoi er a Hebru el sheʼohlʹ me a tekoi er a Grik el haiʹdes. (Genesis 23:7-9; Mateus 28:1) Me a dirrek el Biblia a diak lousbech er a tekoi el sheʼohlʹ el melutk el kirel a olekellir a telungalek me a lechub e ngolekull el delakl a rechad er ngii.​—Genesis 49:30, 31.

Me a sheʼohlʹ ngmelutk el kirel a ngerang? A Tekingel a Dios a omeketakl er ngii el kmo, a sheʼohlʹ me a haiʹdes a melutk el mo er a tekoi el kuk klou er a di olekellir a rebetok el chad. El uai tiang, ngar er a Isaia 5:14 e ngmesaod el kirel a sheʼohlʹ el kmo, ‘nglai a chesmerel el soal el mo omerekakl er a remla mad.’ Me alta Sheʼohlʹ a mla merekakl a rebetok el mla mad el chad engdi ngdiak el bo el mesubed a rengul, el dirk melemolem el losiik er tirke el bo lomerekakl er tir. Ngdiak el uai a bek el olekull el telkael a ildisir a rechad el mo delakl er ngii. A sheʼohlʹ a “dirk mengiil er a re mad el chad.” (Osisechakl 27:20) Ngdiak el sebechel el mo mui me a lechub e bo lemeseked. Me a leuaisei, a Sheʼohlʹ me a Haiʹdes a diak el mera el basio e ngbai di belkul a tekoi. Ngokesiul a basio el rokui el mla mad el chad a ngar er ngii e mechiuaiu er a kodall.

A osisecheklel a Biblia el kirel a okiis a ngosukid el lmuut el mo ungil medengei a belkul aika el tekoi el Sheʼohlʹ me a Haiʹdes. A Biblia a ousbech er a Sheʼohlʹ me a Haiʹdes sel losaod el kirel a kodall el ngar er ngii a omelatk er a okiis el kirel.a (Job 14:13; Rellir 2:31; Ocholt 20:13) A Tekingel a Dios a dirrek el ochotii el kmo tirke el mla mad el ngar er a Sheʼohlʹ me a Haiʹdes a uldimukl er a remilsiou er a Jehovah me a redimlak losiou er Ngii. (Momes er a Genesis 37:35 me a Psalm 55:15, el loleiuid er a Sheʼohlʹ el “belurir a re mla mad”) Me a Biblia a olisechakl el kmo, “ngmorngii chokiis rar melemalt mar diak le melemalt.”​—Rellir 24:15, BT.