42 EL SUOBEL
Ngera Ngmelekoi a Biblia el Kirel a Klemesobil me a Chebechiil?
Ngar er a bebil siukang e te oumerang el kmo, a lak bo lebechiil a chad e ngdiak el sebechel mo er ngii a deurreng er a klengar er ngii. Me nguaisei ngdiak el rokui el bechiil el chad a dmeu a rengrir me a diak el rokui el mesobil el chad a diak el deu a rengrir. A Biblia melekoi el kmo a klemesobil me a chebechiil a sengk.
1. Ngera bebil er a klungiolel a demesobil?
A Biblia melekoi el kmo: “Ngikel mo bechiil a mor a ungil tekoi, e ngikel diak bo le bechiil a mor a lmuut el ungil tekoi.” (Monguiu er a 1 Korinth 7:32, 33, 38.) Ngoeak a ngera rolel e a mesobil el chad a “mor a lmuut el ungil tekoi”? A mesobil Kristiano a diak a bechil el kirel lomekerreu er ngii. Me ngngar ngii a ilmeklel el meruul a lmuut el betok. El ua tiang, a rebebil a sebechir el menglou omesiungir, el ua mora kuk ta er a beluu e olengeseu lomerk er a klumech. Ngaruchei er ngii, ngsebechir el mengoit er a lmuut el klou el taem lolekeed er tir er a Jehovah.
2. Ngera bebil er a klungiolel a bo debechiil er a llach?
A chebechiil a di ua klemesobil el ngar ngii a ileakl el klungiolel. A Biblia melekoi el kmo, “a re terung a kuk ungil er a di tang.” (Olisechakl 4:9) Tia tokubets el uaisei el kirir a remera el Kristiano loltaut omellach er a Biblia el ngar er a chebechiielir. A rubekel el mo bechiil er a llach a tibir el mo kaubltikerreng, kakull, e mengreos er a tang me a tang. Sei a uchul me te omelechesiu er a osebechakl el ileakl er a rechad el kuk di dmak el kiei. Me a chebechiil a rullii a mesisiich el uchetemel a telungalek el tir oungalek.
3. Ngua ngera osengel a Jehovah el kirel a chebechiil?
A Jehovah er a lerellii a kot el chebechiil e ngdilu el kmo: “Sechal a mecherei a demal ma delal e mo obengkel a bechil.” (Genesis 2:24) A Jehovah soal a bechiil el sechal me a bechiil el redil a bo lekaubltikerreng e lolemolem el dmak er a klemengetel a klengar er tir. Ngdi kongei er a omerort el chebechiil a lsekum a chad a mora laokreng. Ngar er a chelsel tia el blekeradel, e ngmsa techellel ngike el dimlak lebora klengit el kmo, ngmo merort er a chebechiil me a lechub e ngdiak.a (Mateus 19:9) Jehovah kmal diak lekengei er a Kristiano me bo lebetok a bechil.—1 Timothy 3:2.
BOM DMOLECH EL MERRITER
Msuubii a rolel e ngsebechem el metik a deurreng e odeuir a rengul a Jehovah a omesobil me a obechiil.
4. Bo mungil lousbech er a sengk er a klemesobil
Jesus ulemes er a klemesobil el sengk. (Mateus 19:11, 12) Monguiu er a Mateus 4:23 e mosaod er tia el ker:
Ngmilekera Jesus e ousbech er a sengk er a klemesobil el mesiou er a Demal e olengeseu er a rechad?
Rekristiano sebechir el metik er a deurreng sel lousbech er a klemesobil er tir el ua Jesus. Momes er a VIDEO e a uriul e mosaod er tia el ker.
Ngoeak a ngera el rolel e a remesobil el Kristiano sebechir lousbech er a klemesobil er tir, el mo uchul a betok el klungiaol?
Ke medengei el kmo ngerang?
A Biblia diak losaod el kmo ngtela rekim e ngungil bo bechiil. Me nguaisei, engdi ngmelisiich er a chad me longiil el mo “engelakl er a taem er a ngibes er a klengeasek er ngii,” el ngii a sebechel rullii el mo meringel er ngii a ungil melilt.—1 Korinth 7:36, NW.
5. Bo mungil melilt er ngike el bo bechil
Omelilt er a mo bechid a ta er a kot el klou a ultutelel el omelilt el obo moruul er ngii. Monguiu er a Mateus 19:4-6, 9 e a uriul e mosaod er tia el ker:
Ngera uchul me ngdiak lungil a Kristiano lorreched el mo bechiil?
A Biblia sebechel ngosukau el mo medengei a blekeradel el rullii a chad el mo ungil ongebechiall. A ngaruchei er ngii e mosiik er a chad el betik a rengul er a Jehovah.b Monguiu er a 1 Korinth 7:39 me a 2 Korinth 6:14. E mosaod aika el ker:
Ngera uchul me ngungil bo debechil a chad el dirrek el Kristiano?
Omomdasu e ngmo uangera uldesuel a Jehovah a lsekum kede mo bechil a chad el diak el betik a rengul er ngii?
A lsekum a teblo el charm el kmal kakerous a dmak el mengol er ongelungel, e ngmo uchul a klou el ringel el mo er tir. Ngdi osisiu, a Kristiano el mo bechil a chad el diak el ngar er a klemerang a mo chobangel a betok el mondai
6. Momes er a chebechiil el ua osengel a Jehovah
Ngar er a Israel er a irechar, e a rebebil el chad a mirrort a chebechiielir le te di millatk er tir. Monguiu er a Malakai 2:13, 14, 16 e mosaod er tia el ker:
Ngera uchul me a Jehovah ouketui a diak lemelemalt el dertel a chebechiil?
Laokreng me a omerort el chebechiil a uchul a klou el ringel el mora rengalek me ngike el dimlak a telemellel el buch
Momes er a VIDEO e a uriul e mosaod er a ker.
A lsekum ke bechil a chad el diak lebetik a rengul er a Jehovah, e ngera sebechem el meruul me lebo er ngii a deurreng er a chebechiielem?
7. Moltaut a llechul a Jehovah el kirel a chebechiil
A chad a locha mo kirel meringel loureor el mo oltaut a llechul a Jehovah el kirel a chebechiil.c Me nguaisei a Jehovah mo omekngeltengat er tirke el oltirakl a llechul. Momes er a VIDEO.
Monguiu er a Hebru 13:4 e mosaod aika el ker:
Omomdasu e ngkmal meringel a llechul a Jehovah el kirel a chebechiil? E ngera uchul me ke melekoi el uaisei?
Ngar er a betok el beluu e ngngar ngii a llach el kirel a de register a chebechiil me a lechub e ngdertel a chebechiil. A Jehovah olengit er a Rekristiano el mo oltirakl aika el llach. Monguiu er a Titus 3:1 e mosaod er tia el ker:
A lsekum ke bechiil, e ke mera el sure el kmo ke mera el bechiil er a llach?
A REBEBIL A LOCHA MO OKER: “Ngera belkul me kede mo bechiil? Ngdiak el sebechir a rechad el kuk di dmak el kiei?”
Ngmekera omonger?
SUMMARY
A klemesobil me a chebechiil a sengk el mlara Jehovah. A remesobil me a rebechiil a sebechir el metik a deurreng me a ungil klengar sel lekiei loltirakl er a soal a Jehovah.
Review
Ngmekera chad e sebechel mo ungil lousbech er a klemesobil er ngii?
Ngera uchul me a Biblia melekoi el kmo bo bechil a chad el dirrek el Kristiano?
Ngera di ta el rolel e a Bades a kongei er omerort el chebechiil?
A LSEBECHEM E MOMES
Ngera belkul a bo debechiil el “oltirakl er a Rubak”?
Momes a teblo el video el sebechel ngosukau el mo ungil melilt el kirel a rolel a de kasisiik me a chebechiil.
Mesa uchul me a ta el odam a feel el kmo aike el bla lebsang a Jehovah a lmuut el mekreos er aike el tekoi el lechiloit.
Ngera bebil er a tekoi lungil lolatk a chad el soal merort er a chebechiielel me a lechub e ngsoal mo chacheroid ngii me a bechil?
“Molecholt er a Odanges el Kirel ‘Sel Bla Lokur a Dios’” (A Ongkerongel, December 2018)
a Momes er a 4 el Endnote el kirel a chad el mo cheroid er a bechil alta ngdimlak a mora laokreng.
b Ngar er a bebil siukang, e ngchedam me a chedil a melilt er a mo bechil a ngelekir. A lsekum e nguaisei, e a ruungalek el betik a rengrir er a rengelekir a kot e te melatk el kmo, ngika el chad ngbetik a rengul er a Jehovah, el diak lolatk a udoud me a lechub e ngderuchall er a buai.
c A lsekum ke kiei lobengkel a chad el dirkak bo bechil, e ngomelilt er kau el mo bechiil me a lechub e ke sumesmechii.