Ngike el Chad el Ngildechii a Beluulechad

Betok el biliol el chad a mla kiei e mad er tia el chutem. E betok er tir a dimlak el rruul a tekoi el mo uchul e bo lorael a chisir. Engdi, a rebebil er tir a ngar er ngii a tekoi el bla el rruul el kirel a reksi me a klengar er kau er a bek el sils.

KE MEKIIS er a tutau e mengetmokl er kau el mo oureor. Me ke mekerdii a dengki e mengetmokl er kau. E nguu a ta er a babier el bo monguiu er ngii sel omngar er a taxi. E lotkii el kmo ngkirem el melim er a kerum el kerul a baiking el ngii a ngosukau el mo mesisiich er a telemall er a bedengem. Ngirk ulemuchel a sils er kau e ke mla ngmai a klungiolem er a tekoi el riruul a rebebil el merael a chisir el chad.

Michael Faraday A milechell er a 1791 er a England. Ngika el hakase a milebii a mota me a mesil el omult a klisiich el mo kamik er a dengki. Aika el tekoi el lurruul a mlo uchul e a rebetok el chad a mlo sebechir el ousbech a dengki.

Ts’ai Lun Ngmle ngarbab el chad er a ureor er a blil a king er a Sina, el lullekoi er ngii el kmo ngmilechelii a ta er a rolel a doruul a babier, er a bekord el rak er a 105 er a taem er kid el mlo uchul a otebedel a betok el babier.

Johannes Gutenberg Ngchad er a Dois er sera rak er a 1450 el rirellii a kot el mesil el oltobed a babier el lousbech a type el doldideiuid a ungelel. Tia el mesil a rirellii a otebedel a babier el mo beot a cheral a uchul me ngbetok el babier el mesaod a kakerous el tekoi a tilobed el sebechir a rechad el omes.

Alexander Fleming Sera 1928, e a chad er a omesuub el chad er a Scotland a milekedbechii a kerul a baiking e milengeklii el penicillin. Tia el kar a klou a usbechel er a chelechang el omkar a telemall er a bedenged.

Me ngbleketakl el kmo, aika el tekoi el bla el rruul tirka el mekesai el chad a mla rulleterir a rebiliol el chad el mo ngmai a klungiolir er ngii me a lechub e te oldeu a rengrir er a klisichel a bedengir.

Engdi ngngar er ngii a ta el chad el kmal ngodech er a rokui el chad. Ngdiak lorael a chisel el kirel a tekoi er a science el lebiltik er ngii me a lechub e ngtekoi er a ukeruul. Ngika el chad el mla er a chebuul el delengchokl el mlad er a bekord el 2,000 el rak er a mla me mong a milecherei a klumech, el ngii a kmal mesisiich el klumech el kirel a omelatk me a ongelaod. Me sel dolebodeb er a klungel a tekoi el bla el rellii tia el klumech er a klengar er a rechad er a beluulechad el rokir, e a rebetok a mo kongei el kmo ngii ngike el mera el ngildechii a beluulechad.

Ngika el chad a mle Jesus Kristus. Ngera el klumech a lulemerk er ngii? E tia el klumech ngerang rullii er a klengar er kau?