Lak Mrellau el Mo Diak Mchetengakl

1, 2. (a) Ngera belkul a tekoi er a Hebru el “klebkall”? (b) Ngera el ker a bo donger?

NGERA uldesuem sel mrengesii a tekoi el chetengakl me a lechub e ngklebkall? Ke mo melatk a klebokel el blebelel a Dios? (Psa. 19:1) Ke mo melatk a odanges me a chetengakl el mo er tirke el merau, mellomes a rengrir me a rengarbab el chad? Ngar er a Biblia e a tekoi er a Hebru el “klebkall” me a lechub e “ngchetengakl” a osisiu a belkul er a tekoi el berraod. A irechar e a udoud a mle rruul er a kolt me a silber. Me a klungel a udoud a mle ultuil er a berredel. Me a cherengel a taem e a rechad a mlo ousbech er a tekoi el berraod el mesaod er a tekoi el mekreos e klou a belkul.

² A rechad a blechoel el oldanges er tirke el olab a klisiich e merael a chisir el chad. Engdi a Dios ngomes er a ngerang er a chelsel a chad e omsang a klebkall? A Osisechakl 22:4 a kmo: “Moluu er a RUBAK, e le bor iou a rengum, me bo meteet, e mkuoll, e le kemanget a klengar er kau.” E a Jakobus a milluches el kmo: “Mnga rengmiu el mer iou er medal a Rubak, me bo longesecheklemiu.” (Jak. 4:10) Ngerang a klebkall el lomeskid a Jehovah? Ngera mo uchul e ngdiak denguu tia el klebkall? Kede mekerang e ngosuterir a rebebil el mo nguu?

3-5. Ngmekerang a Jehovah a longebkall er kid?

³ A ta er a milluches er a Psalm a uluumerang el kmo a Jehovah a mo rullii el mo chetengakl. (Monguiu er a Psalm 73:23, 24.) Ngmekerang a Jehovah a loruul er a rebekongesenges el chad el mo chetengakl? Ngoeak sel lekengei er tir e lomekngeltengat er tir er a betok el rolel. El ua tiang, ngolengeseu er tir el mo medengei aike el soal, e dirrek el mesterir a techellir el mo omak a deleuill er tir el obengkel.​—1 Ko. 2:7; Jak. 4:8.

⁴ A Jehovah a dirrek el kobkellid el meskid a techelled el mo ouchais er a ungil chais. (2 Ko. 4:1, 7) Me sel deteloi er a berkel a klumech el oldanges er Ngii e ngmo kobkellid me kede dirrek el mo uchul a klungiolir a rebebil. Me Ngii a tibir el kmo: “Ngak a bai mo mengull er a re mengull er ngak.” (1 Sa. 2:30) A Jehovah a mengebkall er tirke el omerk er a klumech el okiu sel lekengei er tir. Me a rebebil er a chelsel a ongdibel a dirrek el mo chemat er tir.​—Osi. 11:16; 22:1.

⁵ Ngmo ua ngerang a klengar er tirke el olengesenges er a Jehovah? A Biblia a tibir el kmo: “Ng mo meskau a klisiich el mo oubeluu er a beluu, e ke mo mesa ngikel dengerenger el modik.” (Psa. 37:34) Me a remesiungel a Dios a oba omelatk el mo kiei el mo cherechar.​—Psa. 37:29.

“NGAK A DIAK KUSIIK ODENGESIR A RE CHAD”

6, 7. Ngera uchul me a rebetok a dimlak loumerang el kmo a Jesus a Messias?

⁶ Ngar er ngii a tekoi el sebechel rullid me ngdiak denguu a klebkall er a Jehovah? Ngar er ngii. El ua tiang, ngsebeched el kmal mo medakt er a uldesuir a rechad el tir a diak a ungil deleuill er tir me a Jehovah. E tiang a dilubech el mo er a rebebil el merreder er a taem er a Jesus. A apostol el Johanes a milluches el kmo te uluumerang er a Jesus engdi “te di mle medakt er a re Farisi me ng dimlak le bleketakl el ouchais, me lak bo le modik er a blil ongdibel. Ng mle sorir el meruul a chisir er a re chad el kuk ngar uchei er a loruul a chisir er medal a Dios.” (Jn. 12:42, 43) Me tirke el merreder a mle kirir el mo diak lemedakt a uldesuir a re Farisi.

⁷ A Jesus a mle bleketakl el smodii a uchul me a rebetok a dimlak loumerang el kmo ng Messias. (Monguiu er a Johanes 5:39-44.) A renged er a Israel a mlo betok el rak el longiil er a Messias. Me sel taem er a lomuchel a Jesus el olisechakl, e a rebebil el milsuub er a ulochel a Daniel a locha mle medengei el kmo a Messias a kmedu el mei. Sesei el buil er a uchei e a rebetok a ulemdasu el kmo a Johanes el Techolb a Messias. (Lk. 3:15) Engdi sera lemei a Messias e tirke el sensei er a Llach a dimlak loumerang el kmo ngii a Messias. E ngera uchul? A Jesus a dilu el kmo: “Kemiu a di somiu el kaiuedanges, e bai diak molasem el mo modanges er ngikel di ngii el tang a Dios; ma le ua isei, e ng diak el sebechiu el mo oumerang er ngak.”

8, 9. Ngmekerang e a chad a nguu a klebkall er a rechad el mo er uchei er a klebkall er a Jehovah? Mosaod er a okesiu el kirel a llomes.

⁸ Ngmekerang e a chad a nguu a klebkall er a rechad el mo er uchei er a klebkall er a Jehovah? Me domekesiu er ngii el mo er a llomes. A eanged a mui er a betok el llomes. Ka molatk er a taem el mulemes er a eanged er a klebesei e mues a betok el btuch el omekllomes er ngii. Ke locha kmal mlo mechas a rengum er a klebekelel aike el btuch. (1 Ko. 15:40, 41) Engdi ngar er a bebil el beluu e ngkmal betok a dichel a dengki el rullii me ngmo meringel er kid el mes a btuch. E ngera uchul? Tiang belkul a kmo a dichel a dengki er a rael, kurand, me a meklou el blai a kmal mellomes me a lechub e nglmuut el klebokel er a dichel a btuch? Ngdiak, a dichel a dengki er a beluu a lmuut el kmeed er kid a uchul me ngmo meringel er kid el mes a btuch. Me a lsekum e ngsoad el omes a klebekelel a btuch e ngkired el mo er a basio el diak a dichel a dengki er ngii.

⁹ Me ngdi osisiu, a klebkall er a rechad a sebechel el rullii a klebkall er a Jehovah el mo ua lak a ultutelel. A rebetok a diak el kengei er a ungil chais e le te medakt er a resechelirir me a rechad er a blirir. Me a remesiungel a Jehovah a dirrek el sebechel el mo uaisei a uldesuir. El ua tiang, a ngeasek el chad a modurech el mo omerk er a klumech er a basio el lodengelterir a rechad er ngii, engdi tir a diak lodengei el kmo ngii a Sioning er a Jehovah. Ngmo medakt me ngdiak bo loldingel er tia el basio? E a kuk tang a soal el menglou er a omesiungel el mo er a Jehovah, engdi a rebebil a melenguul er ngii. Ngmo orrenges a tekingir tirke el diak lomes er a omesiou el mo er a Jehovah el klou a ultutelel? Me a lechub a chad a ruebet er a oberaod el klengit. Ngomart er a kngtil e le ngchetil el oriid a ngerechelel er a ongdibel me a lechub e ngmo tomall a rengrir a rechedal me a resechelil? A lsekum a deleuill er ngii me a Jehovah a kot el klou a ultutelel e ngmo olengit a ngeso er a remechuodel.​—Monguiu er a Jakobus 5:14-16.

10. (a) Ngera mo duubech a lsekum kede di bekikl a uldesuir a rechad el bedulkid? (b) Ngulterekokl a rengud el kirel a ngerang a lsekum kede oba klengariourreng?

¹⁰ Alta e ke omdasu el kmo ke kmal blak a rengum el Kristiano, engdi a ta er a odam a blechoel el mellach er kau. Ngsebechem el kongei er a omellach me ngmo uchul a klungiolem. Me a lechub e a kldidiul a rengum a uchul me ngdiak mkengei er ngii, e dirrek el chetim a lemetemall a chisem, e di ngar ngii a omesodem er a bek el tekoi. Me a lechub e ke oureor el obengterir a rudam me a rudos er kau. Ke mo meringel el omdasu el kmo ngtecha mo nguu a chetengakl el kirel a uldesuem me a meringel el urerem? A lsekum ke uaisei, e lak mobes el kmo “a ngariou a rengul chad a mo chetengakl.”​—Osi. 29:23.

11. Ngkirel el mo ua ngerang a uldesued sel lechat er kid a rechad? E ngera uchul?

¹¹ A remechuodel me a rudam el meringel el oureor el meruul a ngerechelir er a ongdibel a kirir el mo kerekikl me lak losiik a chetengakl er a rechad. (1 Ti. 3:1; 1 Th. 2:6) Ngmo ua ngerang a uldesuel a odam a lsekum a rebebil a chemat er ngii el kirel a tekoi el lerirellii? Ngulterekokl el diak bo lomekedechor er a btangch er ngii el ua King el Saul. (1 Sa. 15:12) Engdi ngmo omdasu el kmo a tekoi el lerirellii a mileketmokl e le Jehovah el ullengeseu er ngii? Ngkongei el kmo ngmo ungil a tekoi el loruul a lsekum a Jehovah a melemolem el olengeseu e omekngeltengat er ngii? (1 Pe. 4:11) Me a uldesued sel lechat er kid a rebebil a ochotii el kmo ngsoad a ua ngera el klebkall.​—Osi. 27:21.

“NG SOMIU EL OLTIRAKL A IKEL SOAL A DEMMIU”

12. Ngera uchul me a rebebil el Chijudea a ultngeklii a klemechel a Jesus?

¹² A mekngit el urunguled a sebechel el mo uchul e ngdiak denguu a klebkall er a Jehovah. Ngsebechel el mo uchul e ngdiak dekengei er a klemerang. (Monguiu er a Johanes 8:43-47.) El ua tiang, a Jesus a dilu er a rebebil el chad er a Judea el ultngeklii a klemechel el kmo te di meruul a soal a demerir el Diabelong.

13, 14. (a) Ngera te dmung a remerriter a tekoi el kirel a chad el mengedecheduch me a brain er kid? (b) Kede mekerang a dolilt er a chad el soad el orrenges er ngii?

¹³ A lebebil er a taem e ngdi soad el orrenges a soad el tekoi. (2 Pe. 3:5) A Jehovah a riruul a brain er kid el sebechel el diak lomtab a bebil er a cherrodech. Ka bo mchelellakl e momtab a kakerous el cherrodech el sebechem el orrenges. Nglocha dimlak momtab aikang er a uchei. E ngerang? Alta e a brain er kau a rruul el sebechel el orrenges a kakerous el cherrodech, engdi ngrullau me ngsebechem el di omtab er a chimo er ngii. Engdi ngmeringel er a brain er kid el meruul er tia el tekoi sel dorrenges er a rebebil el mengedecheduch. A remerriter a tekoi a mla metik el kmo ngdi sebeched el orrenges er a ta el chad er a ta el taem. El belkul a kmo a lsekum a reteru el chad a mengedecheduch er kau er a osisiu el taem, e ke ngiltii a tang el ngike el soam el mo orrenges er ngii. Tirke el Chijudea er a taem er a Jesus a mle sorir el oltirakl a soal a demerir el Diabelong a uchul me te millilt el diak lorrenges er a Jesus.

¹⁴ A Biblia a dmu el kmo a “llomeserreng” me a “klebelung” a ua losumech a tekoi el mei er kid. (Osi. 9:1-5, 13-17) Engdi ngar er ngii a techelled el melilt a tekoi. Me kede mo orrenges er techang? Ngike el soad el oldeu er a rengul. A lsekum kede sib er a Jesus, e kede mo orrenges e oltirakl er ngii. (Jn. 10:16, 27) Me a Jesus a dilu el kmo “tirkel chedal ngii el klemerang orrenges er ngak.” (Jn. 18:37) E dirrek el ‘diak lodengelii a ngerel a ngodech el chad.’ (Jn. 10:5) Tirke el ngariou a rengrir el oltirakl er a Jesus a mo nguu a klebkall er a Dios.​—Osi. 3:13, 16; 8:1, 18.

“TIA KLEBKELLIU”

15. Ngera uchul me a Paulus a dilu el kmo a ringelel a mlo uchul a klebkellir a rechad er a Efesus?

¹⁵ Kede mekerang e ngosuterir a rebebil el mo nguu a klebkall er a Dios? A ta er a rolel a kerebai er kid el kirel a ducherreng. A Paulus a milluches el mo er a ongdibel er a Efesus el kmo: “Ma kulengit er kemiu me lak le moalech a rengmiu el kirel a ikel ringel el mer ngak el kiriu, e tia klebkelliu.” (Efe. 3:13, BT) Ngera uchul me a Paulus a dilu el kmo a ringelel a mlo uchul a klebkellir a rechad er a Efesus? Alta e ngmle chelebangel a ringel, engdi a omerellel el ullengeseu er a rudam er ngii a meketeklii el kmo a omesiunged el mo er a Dios a kirel mo kot el klou a ultutelel er a klengar er a Kristiano. Oleko a Paulus a mlo mechitechut a rengul, e a rudam er ngii a mle sebechir el mo omdasu el kmo a klausechelei er tir me a Jehovah, omesiungir, me a omeltkir a diak a ultutelel. Me ngokiu a kerebil el kirel a ducherreng e a Paulus a ulechotii el kmo a bo doltirakl er a Kristus e ngkuk klou a belkul er a ngii di lengerang.

16. Ngera dilubech el mo er a Paulus er a lengar er a Listra?

¹⁶ Ka molatk er sel blakerreng me a dechal a rengul a Paulus el kmal millisiich er a rudam er ngii. A Rellir 14:19, 20 a ouchais a tekoi el dilubech el mo er a Paulus er a lengar er a Listra el kmo: “E a re bebil chad er a Judea el mlar a Antiok er a Pisidia el mong ma re mlar a Ikonium a milengesuseu er a seked el mo obengterir e metechii a Paulus er a bad e kurekersii el otebedii er a beluu, ele tulemdasu el kmo ng mla mad. Ngdi ruumerang er ser a bo le chelludel el meliuekl er ngii, e ng milekiis e liluut el mor a beluu, e a bo le kukuk e ngii ma Barnabas a mirrael el mor a Derbe.” Ngulterekokl el kmal mle meringel er a Paulus el merael er tia el 60 el mael el omerael er a uriul er a lobetech er a bad el kilo ngmad!

17, 18. (a) Ngmilekerang a Timothy e mlo medengei a tekoi el lechilarm a Paulus er a lengar er a Listra? (b) Ngmilekerang a ducherreng er a Paulus e melisiich er a Timothy?

¹⁷ A Timothy ngmla er sei er sera lobetech a Paulus? Nglocha uaisei, engdi a babier er a Rellir a diak losaod er ngii. Engdi a Timothy a mle medengelii a tekoi el dilubech, e le Paulus a milluches er a ongeru el babilengel el mo er ngii el kmo: “Ngdi kau itia er cho moltirakl a osisecheklek, ma blekerdelek.” A Timothy a dirrek el mle medengei el kmo a Rechijudea a ngiluu a Paulus el otebedii er a Antiok e a rebebil er tir a millasem el ometech er ngii er a beluu er a Ikonium.​—2 Ti. 3:10, 11; Rel. 13:50; 14:5, 19.

¹⁸ A Timothy a mle medengei el kmo a Paulus a mle meduch a rengul el outekangel aika el meringel el blekeradel. Me ngulterekokl a Timothy el siluub a betok el tekoi er ngii. Me sera lluut a Paulus el mo oldingel er a Listra, e ngmlo medengei el kmo a Timothy a kmal mle ungil el kerebai er a ongdibel, me “a re bek el oumerang el mlar a Listra ma Ikonium a kmal chilat er a Timothy.” (Rel. 16:1, 2) Sesei el taem er a uriul e a Timothy a mlo sebechel el meruul a meklou el ngerachel er a ongdibel.​—Fil. 2:19, 20; 1 Ti. 1:3.

19. Ngmekerang a ducherreng er kid e ngosuterir a rebebil?

¹⁹ A lsekum kede melemolem el meruul a soal a Dios, e a omerelled a sebechel el olengeseu er a rengeasek el kmal mo ungil el mesiungel a Dios. A rengeasek a omes er kid e mesuub er a rolel a dongedecheduch er a rechad sel doldingel, e ileakl er sel taem el dechelebangel er a meringel el blekeradel er a klengar. A Paulus a dilu el kmo nguluutekangel a betok el tekoi me bo el sebechel el ngosuterir a rebebil el mo nguu a diak a ulebengelel klengar.​—2 Ti. 2:10.

20. Ngera uchul me kede melemolem el osiik er a klebkall er a Dios?

²⁰ Ngar er ngii a ungil el uchul me ngkired el melemolem “el mo modanges er ngikel di ngii el tang a Dios.” (Jn. 5:44; 7:18) A Jehovah a mesterir a diak a ulebengelel klengar tirke el osiik a klebkall er ngii. (Monguiu er a Rom 2:6, 7.) Me a ducherreng er kid a sebechel el ngosuterir a rebebil el melemolem el blak a rengrir e mo nguu a diak a ulebengelel klengar. Me lak bechei a ngii di lengerang me lerellau el mo diak mchetengakl er medal a Dios.