Bo Dekerekikl Aike el Soal a Rengud

A Bades a omeklatk er kid el kmo: “Ele mekngit el uldasu a ngar a reng el mei el choteklii a chad el mo omekoad, e mor a laokreng, e mo meruul a kuk bebil er a mekngit el tekoi; el mo merechorech, e omulak, e melaes er a re chad.” (Mateus 15:​19) A rengud a sebechel el mengeblad er kid e rullid el mo omdasu el kmo a tekoi el bo doruul er ngii a ungil alta ngdiak loltirakl a soal a Dios. Engdi a uriul er a bla derellii a mekngit el tekoi e kid a mocha melechesuar er ngii. Ngera sebechel el ngosukid el mo medengei aike el soal a rengud er a uchei er a bo derellii a mekngit?

KE MEKERANG E MO MEDENGEI AIKE EL SOAL A RENGUM?

Monguiu er a Biblia er a bek el sils e molebedebek aike el lolekoi.

A apostol el Paulus a milluches el kmo: “A tekingel a Dios a di ngar e mesisiich, e kuk kedorm er erbita medal el saider. Ng melobech el di ngmoech el mor sel le ngar ngii omingel a klengar ma reng.” A klemechel a Dios el ngar er a Biblia a sebechel el “merriter a urungulel ma uldesuel a rengul a chad.” (Hebru 4:12) Sel dolebedebek aike el lolekoi a Bades e ngsebechel ngosukid el mo medengei aike el soal a rengud. Ngmera el klou a ultutelel a donguiu er a Tekingel a Dios er a bek el sils e dolebedebek er ngii me bo el sebeched el mo ungil medengelii a uldesuel a Jehovah me a osengel el kirel a tekoi!

Sel dekengei a uleklatk er a Bades e doltaut a omellach er a Biblia e ngar er ngii a lerellii er a ukltked el ngii a melekoi a klemerang. (Rom 9:1) A ukltked a sebechel merrob er kid me ngdiak domdasu el kmo a mekngit el doruul er ngii a di ungil. A Biblia a dirrek el ngar er ngii a bebil er a kerebai el ngar er a chelsel el sebeched el “mela klubeled er ngii.” (1 Korinth 10:11) Sel dosuub aikang e ngsebechel ngosukid me ngdiak bo doruul a mekngit. Ngera kirel a derta er kid el meruul?

Moluluuch el mo er a Dios me lengesukau el mo medengei aike el soal a rengum.

A Jehovah a ‘omes a reng.’ (1 Kronika 29:17) Ng “lmuut el chubechubchad er a rengud e medengei a rokui el tekoi.” (1 Johanes 3:20) A Dios a diak el sebechel el mecheblad. Me a lsekum e kede ouchais aike el ngar er a uldesued me a urunguled el oeak a nglunguuch, e a Jehovah a sebechel ngosukid el mo medengei aike el soal a rengud. Ngdirrek el sebeched el olengit er a Dios me ‘lomeob er a beches el chaidireng er a chelsed.’ (Psalm 51:10) Ngkired el meluluuch me bo el sebeched el mo medengei aike el soal a rengud.

Bo mkerekikl el orrenges sel omngar er a miting er a Rekristiano.

Sel dekerekikl el orrenges aike el motobed er a miting er a Rekristiano e ngsebechel el ngosukid el mo ungil omtab aike el ngar er a rengud. Alta ngdiak leblechoel el beches a tekoi el soadel er a bek el miting, engdi sel debong e kede ngmai a ungil klemedengei er kid er a omellach er a Biblia me a uleklatk el sebechel el ngosukid el mo merriter aike el soal a rengud. Ngdirrek el oeak a nger er a rudam me a rudos er kid e ngsebechel el mo klikiid a rengud. (Osisechakl 27:17) Engdi sel dongeroid er kid me lak doldeu a rengud el kasisiich kid me a rudam me a rudos e ngsebechel el tomellid, e dirrek el mo uchul e kede mo ‘melatk er a di kid.’ (Osisechakl 18:1) Me a leuaisei e ngungil a di el kid el oker el kmo, ‘Ngak ak blechoel el mo er a rokui el miting e melai a klungiolek er ngii?’​—Hebru 10:24, 25.

A RENGUD NGCHOITIKIKID EL MO MERUUL A NGERANG?

A rengud a sebechel mengeblad er kid e rullid me kede mo meruul a betok el cheleuid el tekoi. Kede mo mesaod a euang: otirel a kerruul, usbechel a rrom, tirke el dolilt er tir el mo sechelid, me aike el rolel a omilil el doruul.

Otirel a kerruul.

Kid a rruul el soad el mengetmokl aike el tekoi el dousbech er a klengar er kid. Me nguaisei, engdi a Jesus a ulemeklatk el kirel a uldasu el kmo a kerruul a klou a ultutelel. Ngar er a ta er aike el okesiu er ngii, e a Jesus a mesaod er a ta er a merau el chad el kmal mle mui a bek el soko er ngii, me ngdimlak a basio el sebechel bo lomelechang aike el bla loridm. Me ngmillekoi el kmo: Ak “mo melecha er ngii a ikel bo kngai er a dellemelek ma ikel bebil er a kloklek. Isei e ak mo dmu el kmo, ke ngeltengat el chad! Ng ngar ngii er kau a ikel rokui el mousbech el kirel a betok el rak. Bo le kie rengum, e monga e molim, e moldeu er a rengum!” Me nguaisei, engdi ngika el merau el chad a dimlak lutebengii el kmo ngsebechel el di mad er sel kesus.​—Lukas 12:16-20.

Sel dorael el mo meklou el chad, e ngsebeched el kmal mo kerekikl el kirel a ulekerreuid sel bo demechuodel, me kede mo melatk el kmo ngdi ungil a doureor sel letemel a miting me a lechub e ngdiak doruul a ngerecheled a Rekristiano. Ngkired el omekerreu er kid me ngdiak bo doba chouaisei el uldasu. Me a lechub e kede dirk ngeasek e melechesuar el kmo a mui el taem el omesiou a kot el ungil rolel a ureor. Nguaisei, engdi kid ngdiak bo deteloi er ngii e le kede omdasu el kmo ngkirel ngar er ngii a ududed? Kid ngkired el mo er sel tkurrebab el sebeched el mo merau er medal a Dios? Ngtecha medengei el kmo ngmo ua ngerang a klukuk er kid?

Usbechel a rrom.

A Osisechakl 23:20 a melekoi el kmo: “Lak mobengterir a re chad el sekengim er a mesisiich el ilumel.” A lsekum a chad a kmal soal melim a rrom, e ngsebechel el mo omdasu el kmo ngdi ungil a lolim a rrom er a bek el taem. Me nglocha mo melekoi el kmo ngdiak lolim el mo cheltelaol e ngbai melim me bo el sebechel el mo ungil a rengul. Me a lsekum e kede omdasu el uaisei, e ngmla mo kired el mera el merriter el kmo ngera sel kmal soal a rengud.

Tirke el dolilt er tir el mo sechelid.

Kede ulterekokl el diak el sebeched el olechib er kid er a rechad el diak loumerang el ngar er a skuul, ureor, me sel doldingel a obliil. Engdi ngkuk ta er a tekoi a lsekum e kede milil el obengterir, e meruul a deleuill er kid lobengterir. Kid kede omdasu el kmo ngdi subed a dobengterir e le ngungil a blekerdelir? A Biblia a omeklatk el kmo: “Lak kom mecheblad. A dobengkel a dengerenger el chad, e kede mo chelutel er ngii.” (1 Korinth 15:33) Me ngdi ua telkib el dechudech el sebechel el rullii a ralm el mo kikiongel, a klausechelei el obengterir a rechad el diak loluu er a Dios a sebechel el kikingelii a deleuill er kid el obengkel. E tiang a mo uchul e kede mo oltirakl a blekerdelir me a teletelir a loubail me a longedecheduch me a loruul a tekoi.

Rolel a omilil el doruul.

Aike el beches el klekedall el uai a computer a uchul a betok el bedengel a ongelaod el diak el ungil el kirir a Rekristiano. A Paulus a milluches el kmo: ‘Ng diak le kirel a ngii di le mengelengalek el omeruul ma lechub e ng nglemokel el di telkib el medu er a delongeliu.’ (Efesus 5:3) Engdi ngkuk mekerang a lsekum e ngsoad el omes me a lechub e kede orrenges a kmung ngerang el mekngit? Kede locha mo melekoi el kmo a rebek el chad a kirir el olengull, e aike el lolilt el mo meruul a diak a omesodir a rechad er ngii. Me nguaisei engdi ngkired el omtab er a ulekrael er a Paulus e mo diak domes me a lechub e dorrenges a ngii di el ngerang el mekngit.

NGSEBECHED EL MELODECH A BLEKERDELED

A lsekum e kede mlecheblad el mo oltirakl aike el soal a rengud e blechoel el melekoi el kmo aike el mekngit el tekoi el doruul a di ungil, e ngsebeched el ngmodech a blekerdeled. (Efesus 4:22-24) Ka me dorriter a teblo el kerebai er chelecha el taem.

A Miguela a mle kirel el melodech er a uldesuel el kirel a kerruul. Ngmelekoi el kmo: “Ngak me a bechik me a ngelekek el sechal a chad er a beluu el omes a ocheral aike el beches e kot el ungil el klekedall el uai a computer el klou a ultutelel. A ta el taem, e ak mlo mechesang el di mengereker aike el sebechek, e ulemdasu el kmo ngsebechek el di meruul er tiang e diak bo el soak a kerruul. A uriul e ak mlo medengei el kmo a lsekum ak di melemolem el oltoir a tekoi er a kerruul e ak di meruul er ngii el diak a ulebengelel. Ak milluluuch el mo er a Jehovah el kirel aike el ngar er a uldesuek me a renguk, e dirrek el uluuchais er ngii el kirel a urungulam el telungalek el somam el mesiou er ngii el mui el taem. Ngmlo sebecham el omekbeot er a klengar er kemam e millukl el mo er a basio el uluusbech a klou el ngeso, e a uriul er isei e aki mlo teloi er a mui el taem el omesiou. Aki mla mo medengei el kmo ngdiak ki mousbech a betok el klalo me bo lungil a klengar er kemam.”

A tekoi el dilubech el mo er a Lee a ochotii el kmo ngdi mle ngii el merriter er ngii a uchul me ngmlo diak lobengterir a remekngit el klausechelei. Ngmelekoi el kmo: “Sel kuureor e ak blechoel el obengterir a rechad er a ngodech el beluu el olterau a kloklir. Ak mle medengei el kmo ngkmal klou a omelim el rrom sel letemel aika el miting er kemam, engdi ngmle soak el tekoi. A lebebil er a taem e ak kmal mlo imis el melim, engdi a uriul e ak kmal uluuchel er a renguk. Ngmle kirek el mera el merriter er a renguk. A uleklatk el okiu a Tekingel a Dios me a ngeso er a remechuodel a ngilsukak el mo medengei el kmo ak di ulsiik er a resechelik el tir a diak el betik a rengrir er a Jehovah. Chelechang e ak melasem el di meruul a urerek el okiu a dengua e diak kubengterir tirke el olterau a klalo a lsekum e ngdiak el kirek.”

Ngkired el mo medengei aike el soal a rengud. A bo doruul er tiang, e ngkired el osiik a ngelsuil a Jehovah el oeak a nglunguuch, e melatk el kmo “ngii a medengei a bertelel a reng.” (Psalm 44:21) A Dios a dirrek el milskid a Tekingel, el sebeched el ousbech er ngii el ua dirk. (Jakobus 1:22-25) Ngdirrek el kmal klou a ultutelel aike el uleklatk el dengai el okiu a babilenged a Rekristiano me aike el miting er kid! Ngokiu aika el tekoi, e ngmo sebeched el kerekikl er a rengud e melemolem el merael er a rael er a llemalt.