A Jesus a Ngosukid el mo er ngii a Mera el Belkul a Klengar er Kid

A JESUS a mla er ngii a mera el belkul a klengar er ngii el ua dulsaod er sel mlo merek el suobel. Me a lsoad a klengar er kid a lebo er ngii a mera el belkul, e ngkired el oltirakl er a kerebil e mo orrenges a ulekrael er ngii.

A Jehovah a mengelechel er kid el mo meruul el uaisei, el ua lemocholt er tia el bades el llechukl er bab. A dorael el uai a Jesus a uldimukl er a bo doruul a rokui el tekoi er a klengar er kid el mo oltirakl er a kerebil me a osisecheklel. A doruul el uaisei e ngmo ngosukid el nguu a kengei er a Dios e mo er ngii a mera el belkul a klengar er kid.

A osisecheklel a Jesus a mle uldimukl er ngii a omellach el sebechel ngosukid el mo oukerebai er a rolel a klengar er ngii. Kede metik a betok er aika el omellach er sel merael a chisel el Cheldechedechal el Ngar er a Rois. Ka me bo dosaod a bebil er aika el omellach me a rolel e ngsebeched el oltirakl er a chelsel a klengar er kid.

OMELLACH: “Te ngeltengat a re medengei el kmo te chebuul a lak lousbech er a Dios.”​—Mateus 5:3.

NGMEKERA TIA EL OMELLACH E RULLII A KLENGAR EL MO ER NGII A MERA EL BELKUL?

A Jesus a ulechotii el kmo a rechad a kirir el mo medengelii a Dios. Ngsoad el mo medengei a nger er a chouaika el ker el kmo: Ngera uchul me kede ngar tiang? Ngera uchul me ngkmal klou a ringel er tia el beluulechad? A Dios ngmera el omekerreu er kid? Ngar er ngii a klengar er a uriul er a kodall? Ngkired el mo medengei a nger er aika el ker me bo el sebechel el mo er ngii a mera el belkul a klengar er kid. A Jesus a mle medengei el kmo ngdi ta el Tekingel a Dios a sebechel el onger aika el ker. Me sera loluluuch el mo er a Demal, e ngdilu el kmo: “A tekingem a klemerang.” (Johanes 17:​17) A Tekingel a Dios ngmera el sebechel el ngosukid el mo medengelii a Dios e mo dmeu a rengud?

TEKOI EL DILUBECH:

A Esa a mle chad er a chelitakl el chedal a ta er a merael a chisel el band, e mla er a omerollel el mo merael a chisel el rock star. Me alta ngmle uaisei a klengar er ngii engdi ngdimlak el deu a rengul. Ngmelekoi el kmo: “Alta ngkmal mle soak el ngar tia el band, engdi ngmle soak a klengar er ngak a lebo er ngii a mera el belkul.” Cherengel a taem, e a Esa mlo medengelii a ta el Sioning er a Jehovah. Ngmelekoi el kmo: “Ak uleker er ngii a kmal betok el ker, e a bleketakl el nger er ngii el mlengai er a Biblia a rirellak el mo semeriar me ak kilengei el mo mesuub el obengkel.” Aike el tekoi el lesiluub a mla er ngii a lerellii el kirel me ngtilbir a klengar er ngii el mo er a Jehovah. Ngmelekoi el kmo: “Ngmera el mle betok a mondai er ngak er a ngar er a mong. Engdi chelechang e ngmla mo er ngii a mera el belkul a klengar er ngak.”

OMELLACH: “Te ngeltengat a re chubechubchad.”​—Mateus 5:7.

NGMEKERA TIA EL OMELLACH E RULLII A KLENGAR EL MO ER NGII A MERA EL BELKUL?

A klechubechub a uldimukl er a dolecholt a blekokeuii el mo er a rebebil e dolatk er tir. A Jesus a ulecholt a klechubechub el mo er tirke el uluusbech a ngeso. Ngkmal mle chubteterir a rechad me ngmirruul a tekoi el mo choroid aike el omekringel er tir. (Mateus 14:14; 20:30-34) Me sel doukerebai er a Jesus el olecholt a klechubechub, e ngmo er ngii a mera el belkul a klengar er kid, e le tirke el olecholt a klechubechub a mo dmeu a rengrir. (Rellir 20:35) Ngsebeched el olecholt a klechubechub el mo er a rebebil el oeak a ungil el omelekinged me a omerelled, e dengesuterir tirke el ousbech a ngeso. Ngsebechel el mo dmeu a rengud a dolecholt a klechubechub?

TEKOI EL DILUBECH:

A Maria me a bechil er a Carlos a meskid a ungil el kerebai el kirel a klechubechub. A demal a Maria a mla mad a bechil e chelechang e ngdi dengarech, me a Maria me a Carlos a mla nguu el mei er a blirir me te omekerreu er ngii. A lebebil er a taem e ngmo diak a cheliuir e dirrek el kirir el orreched er ngii el mo er a osbitar sel bo er bab a sukelengel. Te melekoi el kmo te mo skareter a lebebil er a taem engdi ngdmeu a rengrir e le te medengei el kmo te omekerreu aike el bek el lousbech a demal a Maria.

OMELLACH: “Te ngeltengat a re meruul a budech.”​—Mateus 5:9.

NGMEKERA TIA EL OMELLACH E RULLII A KLENGAR EL MO ER NGII A MERA EL BELKUL?

Ngmekerang e mo er ngii a mera el belkul a klengar er kid sel doruul a budech? Ngmo ungil a deleuill er kid me tir. Ngkmal ungil a doltirakl er sel ulekrael er a Biblia el kmo: “E bor a ikel sebechiu el kie el ngar a budech kemiu ma rokui el chad.” (Rom 12:18) A “rokui el chad” a uldimukl er a rechedal a telungalek er kid me tirke el diak losisiu a klaumerang er kid me tir. Ngsebechel a klengar er kid el mo er ngii a mera el belkul a lsekum e kede meruul a budech el obengterir a “rokui el chad”?

TEKOI EL DILUBECH:

Ka molatk er a kerebil a redil el ngklel a Nair. Ngmla mo betok el rak el lechelebangel a betok el orimel el rullii el mo meringel er ngii el meruul a budech er a chelsel a delengcheklel. A bechil a chilitii er a bekord el 15 el rak er a uchei me ngdi mle ngii el omekeroul er a rengelekel. A ta er a ngelekel el sechal a uluusbech a mekngit el kar e mle blechoel el meringel a lomtebechel er ngii e dirrek el ulemekdakt er ngii me a ngelekel el redil. A Nair a oumerang el kmo aike el tekoi el lesiluub er a Biblia a mla msang a klisiich el mo meruul a budech alta ngar er a chelsel a meringel el blekeradel. Ngmelasem el diak loutoketok me a lechub e lokoad, e ngbai olecholt a blekokeuii me a klechubechub e dirrek el oba sekutaberreng el kirir a rebebil. (Efesus 4:31, 32) Ngulterekokl a rengul el kmo ngii el milsuub el mo meruul a budech a uchul me ngungil a deleuill er ngii me a rechedal a telungalek er ngii me a rebebil.

MOLATK ER A NGAR MEDAM EL TAEM

A doltirakl er a mellomes el ulekrael er a Jesus, e ngmo dmeu a rengud er a klengar er kid. Engdi a lsoad a lebo er ngii a mera el belkul a klengar er kid, e ngkired el mo medengei aike el mo er ngii er a ngar medad el taem. E le ngmekerang e sebechel a klengar el mo er ngii a mera el belkul a lsekum e kede di mo chuodel e mo smecher e mad? Me nguaisei, engdi tiaikid a klengar er chelecha el taem.

Engdi ngar er ngii a ungil chais. A Jehovah a mo omekngeltengat er tirke el melasem el merael el uai a Jesus. Ngtibir el kmo ngdi kmedung e ngmo kutmeklii a melemalt e beches el beluulechad el bo lekiei er ngii a reblak a rengrir el chad. Te mo kiei er ngii el diak a ulebengelel e mo cherrungel a klisichel a bedengir. Tiaikid a mle moktek er a Jehovah el kirir a rechad. A Tekingel a kmo: “Chelechang e a blil a Dios a ngar a delongelir a re chad! Ng mo kiei el obengterir me tir a mo chedal. A Dios a ngii a mo obengterir, e mo Dios er tir. Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”​—Ocholt 21:3, 4.

A Maria el 84 a rekil el mechas el dulsaod er ngii er sel kot el suobel a dmeu a rengul el mo omes a otutel aika el tekoi. E kau a kuk mekerang? Ngsoam el mo medengei a lmuut el betok el kirel sel “meral klengar” el mo er ngii er cheungel a omengederederel a Rengedel a Dios? (1 Timothy 6:19) A lsoam, e moker er a Resioning er a Jehovah el ngar er a beluam me a lechub e moluches el mo er tirke el milluches er tia el babier.a