“Aki Mla Metik er a Mesias”!

A bekord el eua el dart el rak er a uriul er a omelechesel sel kot el ulebongel el babier er a Chuodel el Renged el ngar er a Biblia, e a ulochel a Mika el kirel a Messias a tilaut: A Jesus a milechell er a Bethlehem. A bekord el 30 el rak er a uriul el ngar er a rak er a 29, e a uchelel a ulochel a Daniel el kirel a demiel a Messias a tilaut. A Jesus a miltecholb, e a Dios a ulemecheluch er ngii el oeak a chedaol klisiich. Ngar sel ulterekokl el temel, e ngike el lulengiil er ngii a rechad el Messias, el Uldidellel a Rasech, a mle duum!

A Jesus a di mle mereched el omuchel er a omesiungel, “el olisechakl a Ungil Klumech el kirel a Rengedel a Dios.” (Lukas 8:1) Ngdi ua ike el mildung er a ulaoch, a Jesus a mle bekokeuii, medemedemek a rengul, e mle blechoel el melatk er a rebebil. A osisecheklel a ullecholt a bltikerreng e mle sebeched el ousbech, e ngii a ulemekungil er a “re chad el mle smecher er a bek el bedengel a rakt” el omeketakl el kmo a Dios a ulebengkel. (Mateus 4:23) A remeklou me a remekekerei el chad el mlo er a Jesus a dilu aika el tekoi, el ua lullekoi a ta er a redisaiplo er ngii el kmo: “Aki mla metik er a Mesias”!​—Johanes 1:41.

A Jesus a ulemlaoch el kmo telkib el taem er a uchei er a bo lomtebechel a rokui el tekoi a Rengedel, e ngmo er ngii a mekemad, desiu me a lmuut el bebil el chelebuul er tia el beluulechad. Me ngmilengelechel er a rokui el kmo “bo mkerekikl.”​—Markus 13:37.

A Jesus a mle cherrungel el chad el millemolem el olengesenges er a Dios, engdi ngmla er ngii a recherrouel el tir a mlo uchul a kodellel. Me a kodellel a kiltmeklii sel cherrungel el tenget el mo mecherar el kired sel tekoi el Adam me a Eva a urridii, el sel omelatk er a diak a ulebengelel el klengar el ngar er a Paradis.

A kodellel a Jesus a ultutii a ulaoch, el di ua Dios el ulekisii a Jesus el ua mesisiich el anghel er a edei el klebesei er a uriul er a lemad. Me a Jesus a mlo duum er a kuk betok er a 500 el disaiplo er ngii. Uchei er a lengasech el mo er a eanged, e a Jesus a dilu er a rulebengkel me lenguu a ungil chais el kirel me a kirel a Rengedel “el mor a bek el bedengir a re chad er ker me ker.” (Mateus 28:19) Ngmle ua ngera rolel a loruul er sel klou el ureor?

​—Mlengai er a Mateus, Markus, Lukas, Johanes, 1 Korinth..