“Osobel a Kloklel a [Jehovah]”
1 A lebebil er a taem e a bltikerreng el mo er a beluu a sebechel el mo uchul a orrimel el kirel a klaumerang er a remera el Kristiano. Me a rechad te mo mekerang a lsekum te mo chelebangel aika el omelsemai? Ngera el omellach er a Bades a sebechel el ngosuterir el mo melemolem el blak a rengrir el mo er a Dios?
2 “Ng Diak Mosus er a Ngii Di Le Bleob el Chelid”: A lebebil er a taem e a omengull el banderang a loruul er ngii a rechad el ua lolechotel a bltkil a rengrir el mo er a belurir. Engdi a banderang a blechoel el omtechei aike el betok el kakerous el bleob el ngar er a eanged, el ua btuch me a dirrek el bleob el ngar er a chutem. A Dios a mle bleketakl el ochotii a uldesuel el kirel a omengull el mo er aika el bleob er a longelechel er a rechedal el kmo: “Ng diak moruul a bleob el chedum ma lechub okesiul a ngar a eanged, ma lechub e ng ngar a chutem, ma lechub e ng ngar a ralm er eungel a chutem. Ng diak mosus er a ngii di le bleob el chelid ma lechub e mongull el meluluuch er ngii, ele ngak el [Jehovah] el Dios er kau a bechecherirs el Dios.”—Exo. 20:4, 5.
3 Me a omeruul el mo outubuach e mengull er a banderang el ngii a omtechei er a Beluu ngmera el omtok er a dios el sebechel el mo uchul a meringel el cherresel? Ngera ngomtechei er ngii a banderang? A chad er a omeluches el babier el J. Paul Williams a dilu el kmo: “A olechotel a klaumerang me a bltikerreng er a rechad el mo er a belurir a mocholt el okiu a omengull er tir el mo er a banderang.” Sel The Encyclopedia Americana a melekoi el kmo: “A banderang a di ua kerus el kmal mekreos.” A banderang a olengchelel a Beluu. Me a lsekum e kede mo terrob e mengull me a lechub e kede osus er ngii, e tiang a olechotel a omengull me a bltikerreng er kid el mo er a Beluu. Me a chouaika el omeruul a ochotii el kmo kede oumerang el kmo a Beluu a mo uchul a osebeled, e tia el omeruul a omtok aike el lolekoi a Biblia el kirel a omengull el bleob.
4 A Bades a kmal bleketakl el melekoi el kmo: “Osobel a kloklel a [Jehovah].” (Psa. 3:8) Me ngdiak el sebechel a Beluu me a olengchelel el ua banderang el mo uchul a osebeled. A apostol el Paulus a milengelechel er a rekldemel el Kristiano el kmo: ‘Kemiu el betik ra renguk, mchiis er chomengull el meluluuch a bleob.’ (1 Ko. 10:14) A Rekristiano er a irechar a dimlak el teloi a ngii di el rolel a omengull el mo er a Beluu. Ngar er a babilengel a Daniel P. Mannix el Those About to Die, e ngmilluches el kmo: “Tirke el Kristiano el dimlak el kengei el mengull er a emperor er a Rom a sebeched el omekesiu a omerellir el ua omerellir a Rekristiano er chelechang el tir a diak el kengei el mengull er a banderang.” E tiang a kmal klemerang el kirir a Rekristiano er chelecha el taem. Me tir el kmal sorir el nguu a bliochel el bltkil a rengul a Jehovah a uchul me ngdiak el kengei el mo terrob e longull a banderang er a ngii di el beluu. Me sel loruul el uaisei, e te ochotii el kmo a Dios a kot er a rokui el tekoi engdi te melemolem el olengesenges er a remerreder me a llechul a beluu el ngii a diak lomtok a llechul a Jehovah. Te kmal ungil el medengei a ngerechelir el kirir el mo olengesenges a llechul a beluu me a “klisiich el ngar chomerreder.” (Rom 13:1-7) Me ngngerang a omellach el ngar er a Bades el kirel a dongitakl aike el chelitakl el uleketmokl el kirel a odengesel a beluu, el ua national anthem?
5 Ngerang a National Anthem?: Sel The Encyclopedia Americana a melekoi el kmo: “Aike el national anthem er a beluu a olechotel a klou el bltikerreng er a rechad el mo er a belurir e dirrek el rolel a ongit el kirel a ulekrael me a ulekerreu er a Dios el mo er a rechad me tirke el merreder er a beluu.” Me aikang a di ua chelitakl er a klechelid me a lechub e nglunguuch el kirel a belurir. Ngblechoel el olengit el kirel a ungil el delengchokl er a chelsel a beluu e lolemolem el kemanget el taem. Me a remera el Kristiano ngkirir el teloi a chouaika el rolel a nglunguuch?
6 A profet el Jeremia a kiliei er a delongelir a rechad el millekoi el kmo te mesiou er a Dios. Engdi a Jehovah a dilu er ngii el kmo: “Lak moluluuch el kirir tirkal chad. Lak mllangel el olengit ma lechub e moluluuch el kirir; lak moluluuch el mengeluch er ngak, ele ng diak bo kurrenges er kau.” (Jer. 7:16; 11:14; 14:11) Ngera uchul me ngdilu el uaisei? E le ngngar er a chelsel a belurir e ngkmal mle mui er a omerechorech, koadelchad, laokreng, blulak me a omengull el bleob.—Jer. 7:9.
7 A Jesus Kristus a milecherei a kerebai er a ledu el kmo: “Ngak el olengit a diak le kirel a belulechad, e ngkirir tirikel bilskak.” (Jn. 17:9) Me a Bades a kmo “a belulechad el rokir a chederdall er ngikel mekngit” e dirrek el “mo nguemed.” (1 Jn. 2:17; 5:19) Me a leuaisei, a remera el Kristiano, ngungil er a ukltkir a loluluuch el kirel a kerruul me a kemanget el klengar er tia el blekeradel er a klechad?
8 A national anthem er a beluu a blechoel el mesaod el kmo a belurir a kuk ungil er a bebil er a beluu. Tia el uldasu a diak debetik er a uchetemel er a chelsel a Bades. Ngar sel cheldechedechal a apostol a Paulus er a Areopagus e ngdilu el kmo: “[A Jehovah el Dios a] rirelleterir ar chad ra bek el beluu el ulemekdubech er tir ra dital chad e ulemekingar er tir era bebul a chutem el rokir.” (Rel. 17:26) A apostol el Petrus a dilu el kmo “a Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.”—Rel. 10:34, 35.
9 Ngoeak a ungil el klemedengei er tir er a Biblia, e a rebetok a mla melilt el mo diak el teloi er a ngii di el rolel a omengull el banderang e longitakl aike el chelitakl el uleketmokl el kirel a odengesel a beluu. Engdi ngera te mo meruul a lsekum te mo chelebangel a chouaika el tekoi?
10 Moltngakl el Okiu a Ungil el Rolel: A King el Nebukadnesar er a Babilon er a irechar a millasem el meruul er a kltarreng er a rengedel me ngmilebii a kolt el bleob el chaus er a medideriik el beluu er a Dura. Ngkiltmeklii a klou el mur e milengemedaol er a rebdelul a beluu, me a rengarbab el chad me a rekabernor me a recounselor me a relmuut el bebil. Sera lomuchel a ongngak, e ngmle kirir tirke el kldibel el mo terrob e mengull er tia el bleob el chaus. Tirke el tedei el ngeasek el buik er a Hebru el Sadrak, Mesak me a Abednego a dirrek el mle kirir el ngar sel basio. Te milekerang e ochotii el kmo te diak el teloi er tia el rolel a omengull? Sera lomuchel a ongngak e tirke el rokui el mle kldibel a mlo terrob er medal tia el bleob el chaus, engdi tirke el tedei buik er a Hebru a di millemolem el dechor.—Dan. 3:1-12.
11 Chelecha el taem, e a rechad a mengull a banderang el oeak sel loldars a chimorir me a lechub e te nguu a chimorir el mei er a medal a bderrir me a lechub e ngulurir. A lebebil e ngkirir a rechad el meruul a ileakl el tekoi. El ua tiang, ngar er a bebil er a Beluu e a rengalek er a skuul a kirir el mo outubuach e melungel er a banderang. Me a lsekum te melemolem el dechor er sel taem el rebebil a mengull er a banderang, e a remera el Kristiano a ochotii el kmo te diak el teloi er tia el rolel a omengull.
12 E kuk mekerang a lsekum tia el omeruul a meketmokl me sel bo dedechor e ngolechotel a kmo kede mengull er a banderang? El ua tiang, oleko a ta el ngalek er a skuul a mengilt el mo dechor er rikl el mengull er a banderang, e a rokui el ngalek er a skuul a kirir el mo dechor er a chelsel a classroom er tir el olecholt el kmo te teloi er tia el omengull. A lsekum kede mo dechor er seikid el taem, e tiang a olechotel a kmo kede kongei el mo teloi er sel lomengull el loruul er ngii ngike el omtechei el ngalek er a skuul. Ngngar er a chelsel tia el blekeradel, e ngsebeched el melemolem el dengchokl a lsekum ngdiak el soad el mo teloi er ngii. E kuk mekerang a lsekum a rengalek er a skuul a mla mo dechor er uchei er a lomuchel tia el omeruul? A bo el uaisei, e sel dolemolem el dechor e ngdiak el belkul a kmo kede kongei el teloi er tia el omeruul.
13 Oleko a chad a mo kirel el lorreked er a banderang, alta e ngdiak longull er ngii, engdi ngkirel el orreked er ngii el ngar er a parade me a lechub e ngchelsel a class, me bo el sebechir a rebebil el mengull er ngii. A bo leuaisei, e ngike el chad a diak el ‘chiis er chomengull el meluluuch a bleob’ el ua losaod a Bades, e ngbai belkul a kmo ngmera el kongei er tia el rolel a omengull. Me tia el omeruul a di osisiu el mo er a chad el mo teloi a parade el melisiich a bltikerreng el mo er a beluu, e le ngochotii el kmo ngii a kongei aike el tekoi el lolisiich a parade. Me a remera el Kristiano a kmal kirir el oltngakl aika el omeruul.
14 Sel taem el lorael a chelitakl er a national anthem, e a rechad a mo dechor el olechotel a kmo te kongei aika el tekoi er tia el chelitakl. A bo el uaisei e a Rekristiano a kirir el melemolem el dengchokl. Engdi a lsekum te mla mo dechor er uchei er a lomuchel a national anthem e ngdiak a belkul el bo ledengchokl. Ngdimlak el lolilt el mo dechor el ileakl el kirel a national anthem. Ma lmuut el tang, a lsekum a rechad a kmal kirir el mo dechor e mengitakl, e a bo dedechor e lak a dongitakl, e ngdiak el belkul a kmo kede kongei aika el tekoi el ngar er sel chelitakl.
15 “Mo Kedeldar a Klikiid Lukltkiu”: A uriul er a losaod aike el blebelir a rechad el kmo ngdiak el sebechel el oureor el lolengeseu, e a ta er a milluches er a psalm a dilu el kmo: “Tirkel rokui el mirruul e oumeral ulsirs a bleob el chelid, a mo ua ikel bleob el chelid el le riruul.” (Psa. 115:4-8) Me ngbleketakl el kmo a ngii di el rolel a ureor el meruul a klalo el mo uchul a chetengakl, el ua banderang er a beluu, a diak el kengei a remesiungel a Jehovah el mo meruul. (1 Jn. 5:21) Ngdirrek el sebechel el mo duubech a blekeradel el mo kirel a Kristiano el ochotii el kmo ngdi ta el Jehovah a longull er ngii, e diak el kengei el mengull a banderang me sel beluu el lomtechei er ngii.
16 El uaitiang, a merreder er a ureor a locha mo oldurech er a chad er a urerel el mo mererd me a lechub e ngoltengel er a banderang. Ngdi mo ultuil er a ukltkel ngika el chad el mo kongei el meruul er tia el ureor me a lechub e ngdiak. A lsekum e ngngar er ngii a rechad el dechor el mengull er a banderang er sel taem el loruul er tia el ureor, e tiang a olechotel a kmo ngteloi er tia el omengull el banderang.
17 A lsekum e ngdiak lebo er ngii a ileakl tekoi el meketmokl er a temel omererd me a otengelel a banderang, e tiang a di ua sel loureor el melai a chesechesel me a lechub e ngmengeseches a chesimer, me sel lomkais e longesimer a mado el mengetmokl er sel basio el loureor er ngii. Ngar tiaikid el blekeradel, e a banderang a di olengchelel a Beluu, me sel loruul a tekoi el uldimukl er ngii a mererd e oltengel er a banderang, e ngkmal di mo ultuil er ngii el melilt el ousbech er a mla muksau el ukltkel el kirel a omellach er a Biblia. (Gal. 6:5) A ukltkel a chad a sebechel el mo uchul e ngmo olengit er a merrederel me ngmo ngiltii a ta er a chad el mo meruul er ngii. E a kuk ta er a Kristiano a sebechel el kongei el meruul er ngii a lsekum e ngdiak a ileakl el tekoi el meketmokl er sel taem. A klou a ultutelel el tekoi a kmo, a remera el mengull er a Dios a kirir el kerekikl er a ‘klikiid lukltkir’ er medal a Dios.—1 Pe. 3:16.
18 Ngdiak a ultekengel a Bades el kirel a chad el mo oureor me a lechub e ngmo er a chelsel a basio, el uai a obis er a kabelment me a skuul el ngar er ngii a banderang er ngii. A banderang a dirrek el sebechel el meues er a stamp er a bost, me a license plate er a mlai, me a lechub e ngbebil er a klalo el loruul a kabelment. A usbechel aika el klalo a diak el belkul a kmo a chad a ua longull er a banderang. A klou a ultutelel er tiang, a diak el sel banderang me a lechub e ngolangch el domes er ngii, e ngbai sel uldesuel a chad me a omengull er ngii el bedul aika el klalo.
19 A banderang a blechoel el meues er a mado, chesimer, mlai, tebel, me a lmuut el bebil er a klalo. Ngdirrek el sebechel el mochar a bail el ngar er ngii a banderang er ngii. Ngar er a bebil er a beluu e ngmelemall er a llach a lsekum e kede oubail aika el bail. Engdi a lsekum e ngdiak lolemall er a llach, e ngera ngochotii er a uldesuel a chad el kirel tia el beluulechad a lsekum e ngoubail aika el bail? A Jesus Kristus a millekoi el kirel a rulebengkel el kmo: “Te diak le klalo ra belulechad, el ua ngak el diak kklalo ra belulechad.” (Jn. 17:16) Ngdirrek el kired el melatk er a rekldemed er a klaumerang. Tia ngsebechel el tomall a ukltkir a rebebil? Ngsebechel el choitechetur a urungulel a chad el soal melemolem el mesisiich a klaumerang er ngii? A Paulus a milellach er a Rekristiano el kmo: “Mo mketkelii a ungil ma mekngit, e mklikiid e diak molibesongel.”—Fil. 1:10.
20 “Bekokuii ra Ngiidil Chad”: Me chelecha el lorael el mo mekngit a blekeradel er tia el beluulechad er a chelsel aika el “blsechel a ringel,” e a bltikerreng el mo er a beluu a di merael el mo klou. (2 Ti. 3:1) Me tirke el betik a rengrir er a Dios lak lobes el kmo a osobel a kloklel a Jehovah. Ngkirel el di ngii el tang a dongull er ngii. A rechapostol er a Jesus er a ledu er tir el mo meruul a tekoi el melemall a llechul a Jehovah, e te dilu el kmo: “Ngkired loltirakl ra Dios ra bai doltirakl rar chad.”—Rel. 5:29.
21 A apostol el Paulus a milluches el kmo, “a mesiungel a Rubak lak loutoketok, e bai le bekokuii ra ngiidil chad.” (2 Ti. 2:24) Me a leuaisei, a Rekristiano a melasem el mo chad er a budech, e olecholt a omengull me a delemedemek, sel lousbech er a mla muksau el ukltkir el kirel a omellach er a Biblia el melilt a tekoi el kirel a omengull el banderang me a omengitakl el national anthem.