Klengeltengat el Mo er Tirke el Kongei el Lmuut el Mora Belurir

A REBETOK el odam me a odos el millukl el mora ngodech el beluu el mo osiik a rolel a ungil klengar a mla lmuut el melukl el mora belurir. Bltkil a rengrir el mora Jehovah me a rengar bita er tir a uchul me te melukl el mora ike el basio lousbech er a ruumerk er a klumech. (Mt. 22:37-39) Ngera el tekoi a mle kirir el mengoit, e ngera el klengeltengat a blo loridm? Me bo dosaod er a rudam me a rudos er kid el ngar er a beluu er a Cameroon el ngar ngebard er a Africa.

“NGAR ER A MELEMALT EL BASIO EL KIREL ‘OMENGESOKES’”

Sera 1998 e a Onésime el chad er a Cameroon a millukl el mora ngodech el beluu. Ngika kiliei er cheroid el 14 el rak. A ta er a klebesei e ngmlara miting er a ongdibel e rongesii a okesiu el kirel a ureor er a berkel a klumech. A odam a dilu el kmo: “A lsekum a reteru el sechelei a mlo mengereel er a kakerous el basio e a ta er tir a koreel a kuk betok er ngke el chimong, e ngike el tang ngdiak lolukl el mo er sel basio el betok a ngikel er ngii?”

Tia el okesiu a rirellii a Onésime el mo omdasu a lmuut el mora belual el kmal mle ungil a dbechel a berkel a klumech er ngii el mo olengeseu er a rudam me a rudos. Me nguaisei, engdi mle bekikl. Ngii el mla kiei er cheroid el kemanget el taem, ngsebechel lmuut el mo smau er a blekerdelel a klengar er a belual? Me a Onésime a mlo oldingel er a belual el elolem el buil el mo melasem er tia el tekoi. Sera 2012 e ngmillukl el mong el mo kiei.

A Onésime a melekoi el kmo: “Ngmle kirek el mo smau er a kleald me a rolel a klengar. Ngar er a Blil a Ongdibel e ngmle kirek el lmuut el mo smau el dengchokl a iasumba.” Ngklikmechur e melemolem el melekoi el kmo: “Engdi sera bo el blak a renguk el orrenges a suobel er a miting e ngmlo diak kulatk a ungil kingall er aike el bebil er a Blil a Ongdibel.”

Sera 2013 e a Onésime a mlo bechil a Géraldine, el redil er a Cameroon el mle kiei er a France el etiu el rak e liluut el mora belual. Me ngera el klengeltengat a bla lengai tirka el obekel e le tir el nguu a soal a Jehovah el mo kot er a klengar er tir? A Onésime a melekoi el kmo: “Aki mlora Skuul el Kirir a Rumerk er a Rengedel a Dios e milsiou el ngar er a Bethel. E chelecha el mlo merek el rak e te lluich er a remesuub er a Biblia el teloi er a ongdibel er kemam a miltecholb. Ak mera el melechesuar el kmo, chelechang e ak ngar er a melemalt el basio el kirel ‘omengesokes.’” (Mk. 1:17, 18) A Géraldine a dochelir el kmo: “A klengeltengat el bla kngai a mla engelakl.”

DEURRENG EL DENGUU SEL LEBO ER NGII A RENGELEKED ER A KLERENG

A Judith a millukl el mora Merikel engdi ngkmal uluureng el mo menglou er a omesiungel. Ngmelekoi el kmo: “Sel ta el kbo kuldingel er a telungalek er ngak er a Cameroon, e ak blechoel el di lemangel sel kurael e le ngkirek el mechititerir a rechad el kulemuchel a omesubel a Biblia lobengterir.” Me nguaisei engdi Judith a ulemai er a rengul el lmuut el mo kiei er a belual. Ngmla er ngii a ungil urerel el mle sebechel mengkad er a ukeruul er a demal el ngar er a Cameroon. Engdi Judith a ultilii a klaumerang er ngii er a Jehovah e liluut el mo kiei er a belual. Ngouchais el kmo a lebebil e ngmo ourureng aike el ungil tekoi er a beluu er a Merikel. Me ngmilluluuch el mora Jehovah me lengesuir el ngodechii a uldesuel e dirrek el mlongeseu er a omelisiich el lengilai er a circuit overseer me a bechil.

Me a Judith a melebedebek er a klengar er ngii el kmo: “Ngkmal dmeu a renguk e le chelsel edei el rak e ngmlo er ngii a reteua el ngelekek er a klereng.” Ngulemuchel el mesiou el special pioneer. E chelecha el taem e ngmesiou lobengkel a bechil er a Sam-Castel el oldingel ongdibel. Me nguaisei, engdi ngera dilubech el mora demal? A Judith me a telungalek er ngii a mle sebechir el metik er a osbitar er a ta er a beluu el kilengei el sponsor er a demal er a lebora botk. Ngdmeu a rengud e le ngdi mlo ungil a rokui el tekoi.

MELECHESUAR A ULEKERREUIL A JEHOVAH

A odam el Victor a millukl el mora Canada. Ngika kmal mlo melatk er a skulel er a uriul er a lechiuii a suobel er a Ongkerongel el mesaod el kirel a ngarbab el skuul. Me ngika chilitii a skuul er a university e mlo melai a training el kirel a ureor el ousbech a technology. Ngmelekoi el kmo: “Tia ngilsukak me ngmle sebechek el mereched el metik er a urerek e omuchel el pioneer, el tekoi el kmal meketeketa er a le soak el meruul er ngii.” A uriul e a Victor a mlo bechil a Caroline me te dilak el terung el mo oldingel er a beluu er a Cameroon. Sera lebong e te dirrek el mlora branch office er tia el beluu. A rebebil er a rudam a millisiich er tir el mo melatk a me mesiou er a beluu er a Cameroon. A Victor a kmo, “Ngdimlak a ungil luchul e aki mo kotouar er tir. Aki dirrek el ulemekbeot er a klengar er kemam me ngmle sebecham el kongei er tia el ongit.” Me alta Caroline a mla er ngii a bebil secherel engdi te kilengei el melukl.

Me a Victor me a Caroline a ulemuchel el mesiou el regular pioneer el mo olengeseu er a rebetok el kmal semeriar er a Biblia. Ngmle sebechir el diak loureor e ousbech a savings er tir el telkib el taem. A uriul e te liluut el mora Canada el mo oureor el sesei el buil me bo el sebechir el lmuut el mora Cameroon e melemolem el pioneer. Ngera el klengeltengat a bla lengai? Te mlora Skuul el Kirir a Rumerk er a Rengedel a Dios, e milsiou el special pioneer, e chelecha e te mesiou el oureor el omekedechor. A Victor a kmo: “Ngmlo sebecham el melechesuar a ulekerreuil a Jehovah er a klengar er kemam e le ki chilitii a rolel a klengar el mle somam.”

DEURRENG EL BO DOLECHESUAR ER NGII SEL DENGESUTERIR A RECHAD EL TONGET A KLENGAR ER TIR EL MORA JEHOVAH

Sera 2002 e a Alain el ta er a ngalek er a skuul er a university er a Germany a chiliuii a tract el Kemiu el Ngeasek​—Ko Mo Mekerang a Klengar er Kemiu? A tekoi el lechiluiu a ngilsuir el mo meruul a beches el turrekong er ngii. Me sera 2006 e ngmlora Ministerial Training School me te mle assign er ngii el mora Cameroon, el beluu el lemlechell er ngii.

Sera lebora Cameroon e ngmiltik er a part-time el urerel. Uriul e ngmiltik er a lmuut el ungil ureor engdi mle bekikl el kmo tia mo kosadel a temel el omerk er a klumech. Me sera lenguu ongit el mo special pioneer e ngkmal di mle mereched el kongei. A merreder er a urerel a mle soal omsa lmuut el klou el udoud engdi ngmle kotouar e mlo special pioneer. A uriul e ngmlo bechil a Stéphanie, el odos el kiliei er a France el betok el rak. Ngera el omelsemai a blo lechebangel a Stéphanie er a lolukl el mora Cameroon?

Ngmelekoi el kmo: “Ngmlo er ngii a bebil secherek me a tekoi el kchatar er ngii engdi mle sebechek el metik a rolel a ukeruul el kmal ngilsukak.” Tirka el obekel a millemolem el outekangel e mlukngeltengat. A Alain a kmo: “Sera ki bo moldingel er a Katé el basio el mlara ikrel a beluu, e aki miltik er a rechad el mle sorir el mesuub er a Biblia. A uriul e aki mlo mesuub a Biblia lobengterir el ousbech er a dengua. A teru er tir a miltecholb e mlo er ngii a group er a publishers er tia el basio.” A Stéphanie a dirrek el melekoi el kmo: “Ngdiak a deurreng el mo uai sel dengesuterir a rechad el tonget a klengar er tir el mora Jehovah. Ngmlo sebecham el melechesuar er tia el deurreng el betok el taem er a ki molukl el me kiei er tiang.” Chelecha el taem e a Alain me a Stéphanie a mesiou el oldingel a ongdibel.

“KEMAM A MERUUL ER SEL KIRAM EL MERUUL ER NGII”

A Gisèle a miltecholb er a lengar er a skuul er a kltoktang er a Italy. Ngika kmal chilat er a rolel a klengar er tirke el pioneer el obekel el milsuub el obengkel, e dirrek el mle soal el mo menglou er a omesiungel. Me ngulemuchel el mesiou el regular pioneer e merekui er a skulel.

A Gisèle a mla er ngii a urungulel el mo menglou er a omesiungel er a belual er a Cameroon engdi ngmla er ngii a tekoi el milengesang er a uldesuel. Ngmelekoi el kmo: “Ngmle kirek el olutii a llemeltek el kiei er a Italy e mo kiei el cheroid er a resechelik me a telungalek er ngak el ngar er a Italy.” Me nguaisei engdi sera May 2016 e a Gisèle a liluut el mora Cameroon. A uriul er a bo le bechil a Léonce e a branch office er a beluu er a Cameroon a ullengit er tir me lolukl el mora Ayos, el mats el kmal lousbech er a ruumerk er a klumech.

Ngmle uangera klengar er a Ayos? A Gisèle a melekoi el kmo: “Ngblechoel mo melai betok el sandei el diak a dengki me ngdiak el sebecham el charge a dengua er kemam. Oumesingd el taem e ngdimlak loureor a dengua er kemam. Ak milsuub el mo meduch el meruul a kall el lousbech a ngau me a idungel. E sel leklebesei e aki ousbech a otoel me a wheelbarrow el mo melai a ralm er a madedok e le ngdimlak le betok a rechad er ngii.” Te milekera tirka el obekel e outekangel? A Gisèle a kmo: “Chedaol reng er a Jehovah, ulengesuil a bechik, me a omelisiich me a ngeso er a udoud er a telungalek er kemam me a resechelimam a ngilsukemam el outekangel.”

A Gisèle ngdmeu a rengul er a omelilt er ngii el lmuut el mora belual? Ngmelekoi el kmo: “Ochoi! Ngkmal diak kuumededenger. Aki mlo chelebangel a omelsemai er a uchelel e kora mlo mechitechut a rengmam, engdi sera ki bo mesisiich e ngak me a bechik a mlo melechesuar el kmo kemam a meruul er sel kiram el meruul er ngii. Me aki oumerang er a Jehovah e omelechesiu er kemam el kmeed er ngii.” A Léonce me a Gisèle a mlora Skuul el Kirir a Rumerk er a Rengedel a Dios e chelecha e te mesiou el temporary special pioneer.

Tirke el kongei el lmuut el mora belurir a ua rechad er a omenged el tir oba blekeu el osiik a ngikel alta te mo chelebangel er a kngtil a eanged. Te kongei el chemoit aike el sorir el tekoi me bo el sebechir el ngosuterir tirke el melemalt a rengrir el kongei er a klumech er a Renged. A Jehovah a kmal diak bo lobes er a meringel el urerir, el olecholt er a bltikerreng el kirel a ngklel. (Neh. 5:19; Heb. 6:10, BT) A lsekum e kau a kiei er a ngodech el beluu e a beluam a ousbech er a ruumerk er a klumech er a Renged, e ngsebechem el lmuut el mo remei? A betok el klengeltengat a mengiil er kau a omkengei el lmuut el mora beluam.​—Osi. 10:22.