Ke Medengei el Kmo Ngerang?

A rechad er a Rom te mo kongei er a chad el ua Jesus el mlad er a teluo el kerrekar, me ngmedakl?

A REBETOK a medengelii a cheldecheduch el kirel a Jesus el kmo ngmildeel er a delongelir a reteru el merechorech. (Mt. 27:35-38) Me nguaisei engdi ngngar ngii a klautok el kirel a kmo, ngmera el melemalt a omesodel a Biblia el kirel a Jesus el kmo te kiltmeklii a bedengel er uriul e nguu el loia er a debull el kliokl er a rois.​—Mk. 15:42-46.

A rebebil er a rumtok a Ebangkelio oumededenger el kmo, a chad el medeel a bo lekengei er ngii el nguu a ungil omelakl, el ua mo medakl er a debull el kliokl er a rois. Te bai oumerang el kmo tirke el medengerenger el lulekodeterir a mle ngodech omeruul el mo er tir. A journalist Ariel Sabar a milluches er a babier er a Smithsonian el mesaod er a uchul me a rebebil oumerang el uaisei. Ngkmo: “A okodellel a chad a blals el mlo er tirke el kot el mekngit el chad, me sei a uchul me a rebebil chellimosk a melenguul er a uldasu el kmo, a rechad er a Rom a mo kongei er a reuaisei el chad me te nguu a ungil omelakl.” A rechad er a Rom a mle sorir el omekrur chouaitirka el chad me a bedengir a mle blechoel el di medechel er a teluo el kerrekar el kelel a charm. Aike el mo medechel er ngii a lechoit er a debull.

Me nguaisei, a omengiis el chutem a mla ochotii a kuk ngodech el omesaod el kirir a rebebil Chijudea el lulekodeterir. Sera 1968 e te miltik a chiuesel a chad el lulekodir er a taem el Jesus a mla er tia el chutem. Te miltik aika el chiuis er a debellel a ta el telungalek er a Chijudea el kmeed er a Jerusalem. Aika el chiuis a lebiltik er a baks el rruul er a bad el okedongall el ossuary, e tia blil aike el mla mo medirt el chiuesir a rechad. A ta er aika el chiuis a mle kotel ochil a chad. Ngmle deleel er a deel el 4.5 el ints a klemengetel. A Sabar a kmo: “Tia el chiuesel a chad el ngklel a Yehochanan, a milekodir a ultekengir a rechad el kirel a debellel a Jesus.” Tia el “kotel ochil a Yehochanan a ochotii el kmo, a rechad er a Rom a kilengei er a rechad er a taem er a Jesus el mlo okodall me ngsebechir el nguu a omelakl er a Rechijudea.”

A kotel ochil a Yehochanan a dirk mekdubech a betok el uldasu el kirel a mle teletelel a ledelii a Jesus er a kerrekar. Me nguaisei engdi ngbleketakl el kmo a rebebil el mlo okodall a mle ungil omelakl er tir el dimlak di lemechoit er a debull. Me ngkmal sebeched loumerang aike el lolekoi a Biblia el kirel a omelakl er a Jesus. Tia el ocholt oltirakl aike el lolekoi a Biblia.

E sel lmuut el klou a ultutelel, a Jehovah ulemlaoch el kmo a Jesus a mo medakl er a debellel a merau el chad, e kmal diak a chad el sebechel torebengii a otutel a tekingel a Dios.​—Isa. 53:9; 55:11.