Sebeched el Suub er a Ulebongel el Tekingel a Jakob—Part 1

1-2. Ngerang ngmirruul er ngii a Jakob er a mochu ulebongel er a klengar er ngii, e ngerang? (Dirrek el momes er a Siasing.)

NGBEKORD el 17 el rak a mla engelakl er a lolukl er a Kanaan el mora Ekipten ngii me a telungalek er ngii a Jakob el blak a rengul el mesiungel a Jehovah. (Gen. 47:28) Chelsel tiakid el taem e ngkmal mle dmeu a rengul el lmuut el mo kasoues ngii me a betik er a rengul el ngelekel er a Josef e mesa telungalek er ngii el rokir el lmuut el mo dmak. Engdi chelechang e a Jakob a mocha melechesuar el kmo ngdi kmedung ngmad. Me ngmilengideb er a klou a ultutelel el miting lobengkel a rengelekel el sechal.—Gen. 49:28.

² Tiakid el taem e a rechedam el bdelul a telungalek a blechoel mengideb er a rechedal a telungalek er ngii e omesterir a ulebongel el ulekrael er ngii. (Isa. 38:​1, NW) Ngar tia el miting e nglocha dirrek el mo ouchais el kmo ngtecha mo beches el bdelul a telungalek sel lemad.

3. Ngera kede suub er a Genesis 49:​1, 2?

³ Monguiu er a Genesis 49:​1, 2. Me nguaisei engdi tia mle ileakl el miting. E le Jakob a mle profet. Temel tia el miting e ngmlukreng er a Jehovah el mo ouchais a meklou a ultutelel el tekoi el mo duubech el kmal klou a bo lerellii el mora ruldidellel a rsechel. A tekingel a Jakob el mora rengelekel a mle ulaoch.

4. Ngera ungil dolatk er chelecha el bo dorriter er a ulochel a Jakob? (Dirrek el momes er a baks el “Telungalek er a Jakob.”)

⁴ Ngar tia el suobel e kede mo merriter a tekingel a Jakob el mora reteua el ngelekel el sechal: Ruben, Simeon, Levi, me a Juda. Ngar er a ongingil el suobel e kede mo mesaod a tekingel a Jakob el mo er tirke el lmuut el teai el ngelekel el sechal. Ngua bo desang, a Jakob a dimlak di lomlaoch el kirel a rengelekel el sechal, ngdirrek el ulemlaoch el kirel a ruldidellel a rsechir, el tir a cherengel a taem e te mo renged er a Israel. Sel de review er a reksi er tia el renged, e ngobeketakl el kmo a ulochel a Jakob a mlo klemerang. E oeak omerriter er kid er a tekingel a Jakob e kede mo suub a meklou a ultutelel el tekoi el sebechel ngosukid el mo odeuir a rengul a Jehovah el Demad el ngar er a eanged.

RUBEN

5. A Ruben nglocha ulemdasu el kmo ngera ngmo ngmai er a demal?

⁵ A Jakob a kot e ngmilengedecheduch er a Ruben el kmo: “[Ke] kot el ngelekek.” (Gen. 49:3) Ngii el ketengel a demal a uchul me a Ruben a locha ulemdasu el kmo ngmo chelisois a blingelel er a kloklel a demal. Nglocha dirrek el ulemdasu el kmo sel lemad a demal e ngmo bdelul a telungalek e tia el deruchall a bo loudiukes er ngii a kleblillel.

6. Ngera uchul me a Ruben a urridii a llemeltel el kot el ngalek? (Genesis 49:​3, 4)

⁶ Me nguaisei engdi a Ruben a urridii a llemeltel el kot el ngalek. (1 Kr. 5:1) E ngerang? Tela el rak er uchei e ngmlo bad lobengkel a Bilha el kankiubain er a Jakob. Ngika mle mesiungel a Rahel el bechil a Jakob el betik er a rengul el mla mad. (Gen. 35:​19, 22) A Ruben a mle ngelekel a Lea el ngike el kuk ta er a bechil a Jakob. A Ruben a locha mlo nguibes a rengul er a Bilha me a lechub e ngmlo bad lobengkel me a demal bo louketui er a Bilha e lluut el mo klou a bltkil a rengul el mora delal. Alta ngdiak dodengelii a uchul engdi kede medengei el kmo a Jehovah me a demal a kmal dimlak el sorir a tekoi el lerirellii.—Monguiu er a Genesis 49:​3, 4.

7. Ngera dilubech el mora ruldidellel a rsechel a Ruben? (Dirrek el momes er a baks el “Ulebongel el Tekingel a Jakob.”)

⁷ A Jakob a dilu er a Ruben el kmo: “[Ng] diak bo le kot el klou a belkum.” Aika el tekoi a mlo klemerang. Ngdiak a olechotel er a reksi el kmo a uldidellel a rsechel a Ruben a mlo king, prist, me a lechub e ng profet. Me nguaisei engdi a Jakob a dimlak lotngeklii a ngelekel, me a ruldidellel a rsechel a Ruben a mlo ta er a kebliil er a Israel. (Jos. 12:6) A Ruben ullecholt a ungil blekerdelel er a kuk bebil er a taem, e diak olechotel a kmo ngliluut el mora deleboes.—Gen. 37:​20-22; 42:37.

8. Ngera sebeched el suub er a Ruben?

⁸ Ngera sebeched el suubii? Ngkired el loureor el meringel el mo meduch el control e oltngakl a ngibes er a deleboes. A lsekum ngmo er ngii a mengesuseu er kid el mora deleboes, e ngkired el stob e melatk er a rolel e a omerelled a mo tomellii a rengul a Jehovah, telungalek er kid, me a rebebil. Ngdiak el kired el lobes el kmo a “ikel lolalem a chad, ia ikei a bo loridm.” (Gal. 6:7) A tekoi el dilubech el mora Ruben a dirrek losisecheklid er a klechubechub er a Jehovah. Alta kede mo meridm a rsel a cheleuid el omerelled, sel dobult e bo doruul er a melemalt e ngmo ousubes er kid e omekngeltengat er kid.

SIMEON ME A LEVI

9. Ngera uchul me a Jakob a dimlak el deu a rengul er a Simeon me a Levi? (Genesis 49:​5-7)

⁹ Monguiu er a Genesis 49:​5-7. A Jakob a mocha mengedecheduch er a Simeon me a Levi. A tekingel ochotii el kmo ngkmal diak el deu a rengul er tir. A betok el rak er a uchei e a ngelekel a Jakob er a Dina a lulterebekii a Sikem el chad er a Kanaan. Me a rengelekel a Jakob el sechal a kmal ngilasech a rengrir engdi a Simeon me a Levi a dimlak lutebechel a ngesechel a rengrir. Te millekngeterir a rechad er a Sikem el kmo a lsekum te obotk e te mo rullii a budech lobengterir .Me tirka el chad a kilengei. Me te dirk mle kltkat er a botk e a Simeon me a Levi a “ngilai a olsengir e dimlak losbesubed e mor a beluu el mekodeterir a rokui el sechal.”—Gen. 34:​25-29.

10. Ngmilekera tmaut a ulochel a Jakob el kirel a Simeon me a Levi? (Dirrek el momes er a baks el “Ulebongel el Tekingel a Jakob.”)

¹⁰ A Jakob a kmal mle kesib a rengul er a omerellir tirka el teru el ngelekel. Ngulemlaoch el kmo te mo bereberriid er a beluu er a Israel el rokir. Aika el tekingel a tilaut er a betok er a 200 el rak er uriul er a lesiseb er a Beluu er a Nglat a renged er a Israel. A kebliil er a Simeon a mlo kiei er a bebil el mats er a chetemel a kebliil er a Juda. (Jos. 19:1) E a Levi a ngilai a 48 el mats el mle bereberriid er a beluu er a Israel.—Jos. 21:41.

11. Ngera el ungil el tekoi a leriruul a kebliil er a Simeon me a Levi?

¹¹ A ruldidellel a rsechel a Simeon me a Levi a dimlak lomelekl a kngterir a ruchelir. A kebliil er a Levi ulechotii a blakerreng er ngii el kirel a bliochel el omengull. A Moses er a bo lolai er a Llach er a Jehovah er a Rois el Sinai e te betok el chad er a Israel a mlo mengull er a bleob el ngelekel a kerbou engdi a rechad er a Levi a dimlak. Te bai mlo obengkel a Moses el mengikiid er a renged er tia el klengit. (Exo. 32:​26-29) A Jehovah mle eklii a kebliil er a Levi e milsang a ileakl el ngerachel er a kleprist. (Exo. 40:​12-15; Ule. 3:​11, 12) Uriul er a bo lolai er a Beluu er a Nglat e a rechad er a kebliil er a Simeon a uleba blekeu loumekemad lobengterir a rechad er a Juda el meruul er a soal a Jehovah.—Men. 1:​3, 17.

12. Ngera sebeched el suub er a kerebil a Simeon me a Levi?

¹² Ngera sebeched el suubii? Lak becherei a ngasecherreng me lomekrael er a omerellem me a omelilt er kau. A lsekum ngdimlak el melemalt omeruul lekor er kau me a lechub ngbetik er a rengum, e ngmo ngmasech a rengum le kede di chad. (Psa. 4:4) Engdi ngdiak el kired el lobes el kmo a Jehovah ouketui a tekoi me a omeruul el lolechotel a ngasecherreng. (Jak. 1:20) A chad sel bo lak el melemalt omerellel el mei er kid, a lechad er a ongdibel me a lechub ngikrel ongdibel, e kede meruul el mo er ngii loltirakl omellach er a Biblia. Seikid e a ngasecherreng a diak bo luchul a tellemall. (Rom 12:​17, 19; 1 Pe. 3:9) Mo lmuut me a lsekum a rechad er a blid a meruul a tekoi el diak lodeuir a rengul a Jehovah, e lak dobes el kmo ngsebeched el ngiltii el mo ngodech er tir. Lak bo momdasu el kmo ngdiak el sebechem el lodeuir a rengul a Jehovah e diak el sebechem el nguu a klengeltengat er ngii. A Jehovah a mo ngosukau el meruul er a llemalt e mo omekngeltengat er kau el kirel.

JUDA

13. Ngera uchul me a Juda locha mlo ouedikel a rengul er a bo letemel mengedecheduch er ngii a demal?

¹³ A Jakob a next e ngmengedecheduch er a Juda. A Juda er a lerenges aika el tekingel a demal el mora rubekul e ngulterekokl el mlo ouedikel a rengul. Ngika riruul oberaod el cheleuid. Ngmlo teloi er a rebebil er ngii el meriim er a mats er a Sikem. (Gen. 34:27) E ulebengterir a rudam er ngii loterur a Josef el sibai e mulekngii a demal el kirel. (Gen. 37:​31-33) Uriul e ngmlo bad lobengkel a Tamar el bechil a ngelekel el sechal le ngulemdasu el kmo ngoteruul el dil.—Gen. 38:​15-18.

14. Ngera el ungil el tekoi a leriruul a Juda? (Genesis 49:​8, 9)

¹⁴ Me nguaisei engdi a Jakob a mlukreng el mo omekngeltengat er ngii e chotengii. (Monguiu er a Genesis 49:​8, 9.) A Juda ulechotii el kmo ngkmal melatk er a demal el chudelang. Ngdirrek el ulechotii a klechubechub el mora Benjamin el kot el kekerei el ochellel.—Gen. 44:​18, 30-34.

15. Ngoeak a ngera el rolel e ngtilaut a klengeltengat el mora Juda?

¹⁵ A Jakob ulemlaoch el kmo a Juda mo mengeteklir a rudam er ngii. Me nguaisei engdi tia el ulaoch a dimlak el mereched el tmaut. Ngmle bekord el 200 el rak er uriul er a letobed er a Ekipten a rechad er a Israel e a Juda a kot el losaod er ngii el kmo mengetakl er a rebebil er ngii. Ngika uleba medal omerael el mora Beluu er a Nglat. (Ule. 10:14) Betok el rak er uriul er tiang e a Juda mle oked er omelai er a Beluu er a Nglat. (Men. 1:​1, 2) Me a David el ta er a uldidellel a rsechel a Juda a kot er tirke el betok el king el tilobed er a kebliil er a Juda. Engdi ngngar ngii a lmuut el betok.

16. Ngmilekera tmaut a ulaoch el ngar er a Genesis 49:10? (Dirrek el momes er a baks el “Ulebongel el Tekingel a Jakob.”)

¹⁶ A Jakob uluuchais el kmo ngike el mo Mengedereder er a rokui el chad el mo cherechar a mo uldidellel a rsechel a Juda. (Monguiu er a Genesis 49:10.) Ngikang a Jesus Kristus. A ta el anghel a millekoi el kirel a Jesus el kmo: “A Rubak el Dios a mo rullii el mo king el ua uchelel er a David.” (Lk. 1:​32, 33) A Jesus a dirrek el lomekedong er ngii el “ngikel Laion er a kebliil er a Juda.”—Och. 5:5.

17. Ngmekera sebeched loukerebai er a rolel e a Jehovah omes er a rebebil?

¹⁷ Ngera sebeched el suubii? A Jehovah ulemekngeltengat er a Juda alta ngriruul oberaod el cheleuid. Engdi a rudam er ngii, te mlo melatk el kmo a Jehovah ngngera ngomes er ngii er a Juda? Alta ngdiak dodengei a mlara uldesuir engdi kede medengei el kmo a Jehovah ulemes a ungil er a Juda e ulemekngeltengat er ngii el kirel. Ngmekera sebeched loukerebai er a Jehovah? A ta er a kldemed el Kristiano sel lenguu a ileakl el techall, e nglocha mo soad el melatk a kngtil ngii el chad. Engdi ngdiak el soad el lobes el kmo a Jehovah dmeu a rengul er aike el lungil blekerdelel. A Jehovah omes a ungil er a remengull er ngii. Me debora tkurrebab el klisiched el mo uai ngii.

18. Ngera uchul me kede ousbech er a kllourreng?

¹⁸ A lmuut el ta er a tekoi el desuubii er a experience er a Juda a kired el mo oba kllourreng. A Jehovah oltaut a telbilel engdi ngdiak leblechoel el mo meruul er ngii er a taem me a rolel el de expect er ngii. A ruldidellel a rsechel a Juda dimlak di lemereched el mo mengeteklir a rechedal a Dios. Engdi te uleba blakerreng el support er tirke el lullutk er tir a Jehovah a ble Levait el Moses, Josua el chad er a Efraim, me a lechub e ng King Saul el chad er a Benjamin. Kid me de dirrek el mo support er a ngii di el chad el Jehovah ngiltii el mo omekrael er kid er chelecha el taem.—Heb. 6:12.

19. Ngera sebeched el suub er a Jehovah er tia el omesoded er a ulebongel el tekingel a Jakob el mo er tirke el kot el teuang el ngelekel?

¹⁹ Ngera kede mla suub er tia el omesoded er a ulebongel el tekingel a Jakob el mo er tirke el kot el teuang el ngelekel? Ngbleketakl el kmo a “rolel a lomes a chad a diak el ua rolel a lomes a Dios.” (1 Sa. 16:​7, NW) A Jehovah kmal klou a rengul e soal lousubes. Me alta ngdiak el deu a rengul sel deruul a mekngit, engdi ngdirrek el diak expect er a remesiungel el mo perfect. Ngkmal sebechel omekngeltengat er a rechad el riruul oberaod el cheleuid er a ngar er a mong a lsekum te mera el obult e mo meruul a llemalt. Ngar er a ongingil el suobel e kede mo merriter aike el ledilung a Jakob el mo er tirke el teai el medechel el ngelekel.