Ke Medengei el Kmo Ngerang?

Te milekera reprist er a templo er a taem er a rekot el Kristiano a rsechel a charm el lullenget er a olengetongel?

BEK el rak e a reprist er a Israel er a irechar a millenget a betok el telael el charm er a olengetongel er a templo. A doltirakl a tekingel a Josephus el Chijudea el chad er a reksi, e a temel a Baskua e te millenget a betok er a 250,000 el ngelekel a sib. Me ngkmal mle betok a rasech el moitel er a olengetongel. (Lev. 1:​10, 11; Ule. 28:​16, 19) Te milekera ika el rasech?

A remengiis a chutem a mla kmisii a chutem el meliuekl er sel lemla er ngii a templo er a taem er a Jesus. Te mla metik er a rolel e a rasech ulemaoch el tobed er a templo.

Molatk a eru el tekoi el lurruul me lolemolem el beches a olengetongel:

• Blsibs er cheungel a olengetongel: A omesodel a baoch el tobed er a olengetongel a debetik er ngii er a Mishnah, el ngii a cheldellel aike el rokui el llecherir a Rechijudea el melluches er a uriul er a rak er a 200. Tia el babier a melekoi el kmo: “Ngmla er ngii a teblo el blsibs er a bkul olengetongel . . . el rasech me a ralm el lullab el melubs er a olengetongel a ulemaoch el ruebet er ngii e ngomaoch el tuobed el mora dellas er a Kidron.”

  A remengiis a chutem a kongei aike el llechukl er tia el babier. A The Cambridge History of Judaism a confirm el kmo ngsebeched el metik er a klou el drainage system er bita er a templo. Ngmelekoi el kmo: “Tia locha luluusbech er ngii loltobed a ralm el urrachem er a rsechel aike el charm el lullenget er a templo.”

• Ngmle betok a ralm: A reprist uluusbech a betok el ralm el melubs a rasech el loltobed er a olengetongel e melubs er ngii el mo beches. Te millai a betok el ralm er a mats. Ngmla er ngii a rolel a ralm er a chelsel a mats el mora olengetongel e dirrek el mla er ngii a blekeek el ralm el sebechir el lousbech. A Joseph Patrich el mengiis a chutem a kmo: “Tia el ileakl el rolel omelai el ralm me a otebedel a mekikiongel el ralm er a templo a dimlak a uai ngii er tiakid el taem.”