Hohch Leet

 2 Eah kist mich mitt di kussa funn seim maul,

fa dei leevi is may leeblich es vei.

 3 Dei salb-ayl shmakt goot;

dei nohma is vi goot-shmakkich salb-ayl.

Kenn vunnah doon di mayt dich gleicha!

 4 Nemm mich vekk mitt diah—vella kshvind gay!

Mei kaynich hott mich in sei shtubb gebrocht.

 Miah froiya uns un sinn fraylich ivvah dich;

miah preisa dei leevi may es vei.

Di ufrichticha leeva dich.

 5 Ich binn shvatz, avvah doch leeblich,

diah yungi mayt funn Jerusalem,

vi di tents funn Kedar,

un di tent-curtains fumm Solomon.

 6 Gukket mich nett oh veil ich shvatz binn;

di sunn hott mich dunkel gmacht.

Mei maemm iahra boova voahra zannich mitt miah,

un henn mich gmacht in di vei-goahra shaffa,

avvah mei ayknah vei-goahra habb ich fasaumd.

 7 Sawk miah, du es mei sayl leeb hott,

vo dusht du dei shohf vayda lossa,

un vo dusht du dei shohf roowa lossa ivvah middawk?

Favass sett ich rumm gay gukka,

bei di drubba funn dei freind?

 8 Vann du dess nett vaysht, du shenshti unnich veibsleit,

dann gay di kshpuahra funn di shohf nohch

un vayt dei yungi gays

nayksht an di tents funn di shohf-heedah.

 9 Ich fagleich dich, mei leeblichi,

zu en shayni geils-mah es eikshpand is

zu ayns fumm Pharao sei veyya.

10 Dei bakka sinn shay, gedekt mitt keshtlichi kedda,

un dei hals mitt shnuahra funn pearls.

11 Miah macha diah goldichi oahra-rings

eiksetzt mitt silvah.

12 Diveil es da kaynich an seim dish voah,

voah da kshmakk funn mei goot-shmakkich ayl in di luft.

13 Mei beleebdah is zu miah vi en sekli mitt goot-shmakkich myrrhe

es zvishich mei brisht leit.

14 Mei beleebdah is vi goot-shmakkichi blumma

es bleeya in di vei-goahra funn Engedi.

15 Du bisht so shay, mei beleebshti!

Du bisht so shay!

Dei awwa sinn vi dauva awwa.

16 Du bisht so shay, mei beleebdah,

un so blesiahlich!

Do vo miah leiya is alles gree.

17 Di balka funn unsah haus sinn cedar-baym,

un di cypress-baym di ceiling.