Hohch Leet

3 Di gans nacht lang uf meim bett

habb ich gegukt fa sellah es mei hatz leeb hott;

ich habb gegukt fa een avvah habb een nett kfunna.

 2 Ich zayl uf shtay nau un naus in di shtatt gay;

ich zayl deich di grohsa un glenna shtrohsa gay.

Ich zayl sucha fa sellah es mei hatz leeb hott.

Ich habb gegukt fa een avvah habb een nett kfunna.

 3 Di vatsh-mennah henn mich kfunna,

vi si rumm heah in di shtatt ganga sinn.

“Hend diah sellah ksenna es mei hatz leeb hott?”

 4 Grawt noch demm es ich si falossa habb,

habb ich sellah kfunna es mei hatz leeb hott.

Ich habb een kohva un habb nett gay glost funn eem

biss ich een zu mei maemm iahra haus gebrocht habb,

an di shtubb es ich geboahra voah drinn.

 5 Diah yungi mayt funn Jerusalem, ich frohk eich,

im nohma funn di hash un di vilda diahra im feld,

es diah dee leevi nett ufvekket un fahinnahret

biss es di leevi kfellich is.

 6 Veah is dess es am ruff kumma is funn di vildahnis

es shtawb macht vi shmohk am in di hay gay,

mitt goot-shmakkich myrrhe un insens

es gmacht is funn di fakawfah iahra shpeis?

 7 Ei gukk moll, ’sis em Solomon sei bett am gedrawwa vadda,

un’s sinn sechtzich greeks-gnechta dibei,

di shteikshta in Israel.

 8 Yaydahs funn eena drawkt en shvatt

un si sinn awl goodi fechtah,

alli mann hott en shvatt an sei seit henka

grisht fa di kfoah funn di nacht.

 9 Da Kaynich Solomon hott sich deah shtool macha glost;

deah is gmacht aus cedar-hols funn Lebanon.

10 Di poshta sinn gmacht funn silvah;

un da bodda is gmacht funn gold.

Da sitz is ivvah-gezowwa mitt purpel duch,

un di yunga mayt funn Jerusalem

henn’s alles shay gmacht inseit.

11 Gaynd naus, diah yungi mayt funn Zion

un gukket an da Kaynich Solomon mitt seim krohn,

da krohn es sei maemm uf een gedu hott

uf em dawk funn sei hochtzich,

da dawk es sei hatz fraylich voah.