Jeremia
Es 5. Gabiddel.
Jerusalem Iahra Sinda
5 “Gay uf un ab deich di shtrohsa funn Jerusalem,
gukk un nemm’s ei;
such deich di shtatt iahra shtrohsa.
Vann du ay mensh findsht
es eahlich is un di voahheit sucht,
dann fagebb ich di shtatt.
2 Even vann si sawwa, ‘Bei em levendicha HAH,’
doch doon si falsh shveahra.”
3 Oh HAH, sinn nett dei awwa am gukka fa di voahheit?
Du hosht si kshlauwa, avvah si kshpiahra’s nett;
du hosht si shiah ausgrivva,
avvah si henn sich nett fabessaht.
Si henn iahra ksichtah haddah gmacht es shtay,
un henn’s nett gedu fa sich bekeahra.
4 Ich habb gedenkt, “Dess sinn yusht di oahma,
si sinn nett zu shmeaht,
fa si vissa em HAH sei vayk nett,
adda vass recht is in iahrem Gott sei awwa.
5 So dann, gayn ich zu di evvahshti
un shvetz zu eena;
Si sedda geviss em HAH sei vayk vissa,
un vass recht is in iahrem Gott sei awwa.”
Avvah awl funn eena henn aw’s yoch abgebrocha,
un henn di banda abgrissa.
6 Fasell kumd en layb aus em bush un macht si doht,
en volf funn di vildahnis zayld si fareisa,
en leopard leit un vatsht si in iahra shtett,
un reist si in shtikkah vann si naus gayn,
fa iahra sinda sinn grohs
un si halda oh vekk drayya funn Gott.
7 “Favass sett ich dich fagevva?
Dei kinnah henn mich falossa,
un henn kshvoahra bei selli es nett gettah sinn.
Ich habb folshtendich kseikt fa si,
doch henn si di ay gebrocha,
un sinn in di huahra iahra heisah kshprunga.
8 Si sinn goot-kfeedahdi hengshta mitt lusht
un henn glusht noch anri iahra veivah.
9 Sett ich si nett shtrohfa fa dess?” sawkt da HAH.
“Sett ich nett ayva vadda mitt en folk vi sell?
10 Gay deich iahra vei-goahra un fadaub si,
avvah du si nett folshtendich fadauva.
Reis iahra nesht ab funn di vei-shtekk,
fa si heahra nett zumm HAH.
11 Di leit funn Israel un di leit funn Juda
henn mich folshtendich nunnah gedrayt,”
sawkt da HAH.
12 Si henn glowwa veyyich em HAH;
si henn ksawt, “Eah zayld nix du!
Evil kumd nett ivvah uns;
miah zayla nett’s shvatt un hungahs-noht sayna.
13 Di brofayda sinn yusht vind,
Gottes vatt is nett in eena;
so loss sell es si sawwa veyyich uns,
gedu vadda zu eena.”
14 Fasell sawkt da HAH, da Awlmechtich Gott;
“Veil di leit selli vadda ksawt henn,
dann mach ich mei vadda in deim maul vi en feiyah,
un dee leit vi’s hols es es feiyah ufbrend.”
15 Da HAH sawkt, “Oh haus funn Israel,
ich zayl en leit geyyich eich bringa funn veit ab.
Si sinn en leit funn lang zrikk un sinn mechtich;
diah kennet iahra shprohcha nett shvetza
un kennet si nett fashtay.
16 Iahra arrow-sekk sinn vi uffeni grayvah,
si sinn awl mechtichi greeks-gnechta.
17 Si zayla eiyah eahnda un ess-sach uf fressa,
si fressa eiyah boova un mayt uf,
si zayla eiyah shohf un kee uf fressa,
si fressa eiyah vei-shtekk un feiya-baym uf.
Si zayla di eigmavvahdi shtett nunnah hakka mitt iahra shvatt,
dee eigmavvahda shtett es diah eich falosset druff.
18 Doch in selli dawwa,” sawkt da HAH, “zayl ich kenn gans end macha mitt eich.
19 Un vann leit frohwa, ‘Favass hott da HAH unsah Gott dess gedu zu uns?’ dann zaylsht du eena sawwa, ‘Vi diah mich falossa hend un fremdi gettah gedeend hend in eiyah ayya land, so nau zaylet diah fremdi leit deena in en land es nett eiyahs is.’
20 Losset dess vissa gmacht sei im Haus fumm Jakob,
un sawwet’s zumm Haus funn Juda:
21 Heichet dess ab, diah leit unni eisicht
un es nix fashtaynd,
diah hend awwa, avvah kennet nett sayna,
un hend oahra, avvah kennet nett heahra.
22 Seddet diah eich nett feicha veyyich miah?” sawkt da HAH.
“Seddet diah nett ziddahra fannich miah?
Ich habb da sand gmacht fa en lein am say nohch macha,
en ayvichi lein es da say nett drivvah gay kann.
Di vella kenna rolla, avvah’s dutt si kenn goot,
si kenna roahra, avvah si kenna nett drivvah gay.
23 Avvah dee leit sinn shteibahrich un henn en fashtokt hatz,
si sinn vekk gedrayt un difunn gloffa.
24 Si sawwa nett in iahra hatza,
‘Vella da HAH unsah Gott firchta,
deah es uns da free-yoah un shpoht-yoah reyyah gebt
an di recht zeit,
un es uns di eahn gebt alli yoah.’
25 Eiyah evili vayya henn dee sacha vekk kalda funn eich;
eiyah sinda henn goodi sacha funn eich kalda.”
26 “Gottlohsi mennah sinn unnich mei leit;
si fashtekla sich un voahra vi mennah es fekkel fanga,
un setza iahra nets fa mennah fanga.
27 Vi en hundah sei keahb foll fekkel macht,
so sinn iahra heisah foll uneahlich shtoft;
deich sell sinn si reich un shteik vadda.
28 Si sinn grohs un fett vadda,
iahra evili verka henn kenn end;
si richta nett eahlich,
un shtayn nett uf fa selli unni eldra,
un gevva di oahma iahra recht nett.
29 Sett ich si nett shtrohfa fa dess?” sawkt da HAH.
“Sett ich nett auseeva mitt so en folk vi dess?
30 En shlimm un shreklich ding
hott blatz gnumma im land:
31 Di brofayda broffetzeiya leeya,
di preeshtah roola vi si vella
un mei leit gleicha’s vi sell.
Avvah vass zaylet diah du vann dess moll awl end?”