1 Samuel
Es 29. Gabiddel.
Di Philishtah Drauwa Em Dawfit Nett
29 Di Philishtah henn awl iahra greeks-gnechta zammah gebrocht an Aphek, un di Israeliddah henn iahra camp ufkokt an di shpring in Jesreel.
2 Di Philishtah roolahs voahra am gay mitt iahra drubba funn hunnahts un dausends, un da Dawfit un sei mennah voahra am hinna nohch kumma mitt em Achis.
3 Di hauptmennah funn di Philishtah henn no kfrohkt, “Vass veyyich dee Hebrayah?” Da Achis hott ksawt, “Is dess nett da Dawfit, em kaynich funn Israel Saul sei gnecht? Eah voah bei miah fa ivvah en yoah, siddah da dawk es eah da Saul falossa hott biss nau, un ich habb kenn faylah kfunna in eem.”
4 Avvah di hauptmennah funn di Philishtah voahra zannich mitt eem un henn ksawt, “Shikk da mann zrikk, so es eah zrikk gayt an da blatz es du eem gevva hosht. Eah soll nett mitt uns in da Greek gay, adda eah drayt sich geyyich uns diveil es miah am fechta sinn. Vee bessah kend eah viddah kfellich vadda zu sei meishtah, es vi bei di kebb nemma funn unsah aykni mennah?
5 Is dess nett sellah Dawfit es si ksunga henn diveyya in iahra dansa:
‘Da Saul hott sei dausends doht gmacht,
un da Dawfit sei zeyya dausends’?”
6 So hott da Achis da Dawfit bei groofa un hott ksawt zu eem, “So shuah es da HAH laybt, du voahsht shtandhaftich. Un ich veah froh fa dich lossa fechta fa mich. Fumm dawk es du zu miah kumma bisht biss nau habb ich kenn faylah kfunna in diah. Avvah du kfalsht di evvahshta nett.
7 Gay zrikk in fridda. Du nix es di Philishtah roolahs nett kfald.”
8 Avvah da Dawfit hott kfrohkt, “Vass habb ich gedu? Vass hosht du kfunna geyyich dei gnecht fumm dawk es ich zu diah kumma binn biss nau? Favass kann ich nett gay fechta geyyich di feinda funn meim meishtah da kaynich?”
9 Da Achis hott ksawt, “Ich vays es du kfellich bisht in mei awwa, so vi en engel funn Gott. Avvah doch, di Philishtah hauptmennah henn ksawt, ‘Eah dauf nett nuff gay fechta mitt uns.’
10 Nau shtay free uf un faloss mitt dei mennah so kshvind es es dawk vatt meiya-free.”
11 So is da Dawfit un sei mennah free uf kshtanna da neksht meiya, un sinn zrikk in’s land funn di Philishtah ganga. Un di Philishtah sinn nuff an Jesreel ganga.