Sinn di Goodi Sacha Reeli Funn Gott?

1. Veah hott di Bivvel kshrivva?

Ayns funn di goodi sacha es kshrivva sinn in di Bivvel sawkt es mensha layva kenna fa’immah uf di eaht. (Psalm 37:29) Di Bivvel is gmacht funn 66 diffahndi bichah. Gott hott baut 40 faythfeli mennah gyoost fa si shreiva. Da Mosi hott di eahshti fimf bichah kshrivva baut 3,500 yoah zrikk un da Aposhtel Johannes hott’s letsht buch kshrivva ivvah 1,900 yoah zrikk. Veah sei gedanka henn di Bivvel shreivah anna kshrivva? Gott hott da heilich geisht gyoost fa si vissa lossa vass fa shreiva. (2 Samuel 23:2) Si henn nett iahra aykni gedanka anna kshrivva avvah Gott sei gedanka. So reeli, di Bivvel is funn Jehova.​—Lays 2 Timotheus 3:16; 2 Petrus 1:20, 21.

Vatsh da video Veah Hott di Bivvel Kshrivva?

2. Vi kenna miah shuah sei es di Bivvel voah is?

Miah vissa di Bivvel kumd funn Gott veil’s sawkt vass kumd noch dee zeit nunnah zu’s glensht ding. Kenn mensh kann sell du. (Joshua 23:14) Yusht da Awlmechtich Gott kann aekshli sayna vass blatz nemma zayld fa mensha noch dee zeit.​—Lays Jesoiya 42:9; 46:10.

Ma dayt denka en buch funn Gott veah speshel, un es is. Billions funn kabbis funn di Bivvel sinn shund naus gevva vadda in hunnahts funn shprohcha. Di Bivvel is reeli ald, avvah feel funn di sacha es leit vissa veyyich di eaht nau, voah shund in di Bivvel kshrivva lang zrikk. Vass di 40 shreivah anna kshrivva henn is alles aynich mitt nannah.a Vass di Bivvel sawkt veyyich leevi kend yusht kumma funn da voah Gott​—da Gott funn leevi. Un sell kann alsnoch leit helfa iahra layva bessah macha. Dee sacha helft millions funn leit fa sayna es di Bivvel is Gott Sei Vatt.​—Lays 1 Thessalonicher 2:13.

Vatsh da video Vi Kenna Miah Shuah Sei es di Bivvel Voah Is?

3. Vass is di Bivvel diveyya?

Di goodi sacha es Gott havva vill fa mensha is vass’s mensht kshvetzt is diveyya in di Bivvel. Di Shrift sawkt vi mensha di gleyyaheit faloahra henn fa uf’n paradise eaht layva. Dess hott blatz gnumma lang zrikk, yusht glei noch es mensha gmacht voahra. Un’s sawkt aw vi di eaht viddah en paradise vadda zayld.​—Lays Di Offenbarung 21:4, 5.

Gott Sei Vatt hott gebodda un aw advice fa unsah layva bessah macha. Di Bivvel sawkt uns vass Gott gedu hott zu leit vann si goodi adda shlechti sacha gedu henn. Bei dess kann ma sayna vass fa Gott es eah is. So, di Bivvel kann dich helfa Gott bessah kenna. Es sawkt dich vi du Gott sei friend sei kansht.​—Lays Psalm 19:7, 11; Jakobus 2:23; 4:8.

4. Vi kansht du di Bivvel fashtay?

Deah brochure kann dich helfa di Bivvel fashtay, bei da saym vayk droh gay es da Jesus is. Eah hott ay shrift noch di neksht gyoost fa leit helfa so’s “si di Shrift fashtay henn kenna.”​—Lays Lukas 24:27, 45.

’S hott baut nix es so innaresting is es di goodi sacha es Gott sawkt. Avvah dayl leit gevva nix drumm un anri sinn fa’eiyaht diveyya. So loss nimmand dich raus shvetza. Dei hofning fa ayvich layva havva is uf zu dich, eb du may lanna vitt veyyich Gott.​—Lays Johannes 17:3.