Vass fa Hofning Hott’s fa di Dohda?

1. Vass fa goodi sacha sawkt Gott veyyich di dohda?

Vo da Jesus zu Bethanien kumma is, nayksht an Jerusalem, voah sei friend Lazarus shund kshtauva gvest fa fiah dawk. Da Jesus is mitt di Maria un di Martha zu’s grawb ganga. Si voahra da Lazarus sei shveshtra. Glei, voahra feel leit datt. Denk yusht moll vi haebbi es di Maria un di Martha voahra vo da Jesus da Lazarus zrikk zu layva gebrocht hott!​—Lays Johannes 11:21-24, 38-44.

Di Martha hott shund dee goodi sacha gvist veyyich selli vo kshtauva sinn. Si hott gvist es Jehova di dohda ufvekka zayld fa viddah layva uf di eaht.​—Lays Hiob 14:14, 15.

2. Vass gebt mitt uns vann miah shtauva?

Mensha sinn gmacht funn shtawb. (1 Mosi 2:7; 3:19) Miah sinn flaysh un bloot un miah henn nett en sayl in uns es oh’hald layva. Nix funn uns bleibt am layva. Vann miah shtauva, dutt unsah brain aw, un unsah gedanka gayn zu nix. Da Lazarus hott nix ksawt vi’s voah fa kshtauva sei, koss di dohda vissa nix.​—Lays Psalm 146:4; Breddichah 9:5, 6, 10.

Dutt Gott leit shtrohfa mitt feiyah noch es si shtauva? Siddah’s di Bivvel veist es di dohda nix vissa adda shpiahra kenna, dann kenna di dohda nett soffahra. So ma kann sayna es da glawva es di dohda kshtrohft vadda inna feiyahrichi hell, nett voah is. ’S is en leek es Gott veesht gukka macht. Fa ebbes so du is nee nett in Gott sei gedanka kumma un is grausich zu een.​—Lays Jeremia 7:31; 32:35.

Vatsh da video Vass Haebbend zu Selli es Shtauva?

3. Kenna di dohda shvetza zu uns?

Di dohda kenna nett shvetza adda heahra. (Psalm 115:17) Avvah samm engel sinn veesht, un si kenna shvetza zu leit un ohlossa si veahra ebbah es shund kshtauva is. (Judas 6) Jehova hott’s fabodda fa boviahra shvetza zu di dohda.​—Lays 5 Mosi 18:10, 11.

4. Veah zayld zrikk zu layva kumma?

Millions funn leit es kshtauva sinn zayla zrikk zu layva kumma uf di eaht. Even samm es shlechti sacha gedu henn un nett gvist henn veyyich Gott zayla ufgvekt vadda funn di dohda.​—Lays Psalm 37:29; Di Apostelgeschichte 24:15.

Awl selli vo uf shtayn funn di dohda kenna no di voahret lanna veyyich Gott, un veisa es si glawva in da Jesus bei een heicha. (Di Offenbarung 20:11-13) Selli vo zrikk zu layva kumma un goodi sacha doon henn no di gleyyaheit fa layva enjoya uf di eaht fa’immah.​—Lays Johannes 5:28, 29.

5. Vass dutt Jehova uns lanna bei di dohda ufvekka?

Gott hott en hofning gevva fa di dohda bei sei Sohn shikka fa shtauva fa uns. So bei di dohda zrikk zu layva bringa, lanna miah veyyich Jehova sei leevi un vi goot-maynich es eah is even vann miah’s nett veaht sinn. Vann di dohda moll zrikk zu layva kumma, veah vetsht du’s leebsht sayna?​—Lays Johannes 3:16; Römer 6:23.