Vass Is Gott Sei Reich?

1. Vass is Gott Sei Reich?

Gott Sei Reich is en government in da himmel. Es zayld da blatz nemma funn awl anri governments un macha es Gott sei villa gedu vatt in da himmel un uf di eaht. Dee sacha es Gott Sei Reich du zayld sinn goot. Mensha braucha en bessah government un Gott Sei Reich zayld glei acht gevva uf sell. Es zayld alli ebbah uf di eaht zammah bringa in aynichkeit.​—Lays Daniel 2:44; Matthäus 6:9, 10; 24:14.

En reich muss en kaynich havva. Jehova hott sei Sohn, Jesus Christus, da Kaynich gmacht funn Sei Reich.​—Lays Di Offenbarung 11:15.

Vatsh da video Vass Is Gott Sei Reich?

2. Favass is da Jesus da besht Kaynich?

Gott Sei Sohn is da besht Kaynich veil eah goot-maynich is un eah shtayt fa vass recht is. (Matthäus 11:28-30) Un, eah is mechtich genunk fa leit helfa koss eah zayld roola ivvah di eaht funn da himmel. Noch es eah uf kshtanna is funn di dohda, is eah nuff in da himmel ganga un hott gvoaht uf di rechts seit funn Jehova. (Hebräer 10:12, 13) Mitt zeit, hott Gott een di macht gevva fa shteahra roola.​—Lays Daniel 7:13, 14.

3. Veah zayld roola mitt da Jesus?

En drubb es “di heilicha” kaysa sinn, zayla roola mitt da Jesus im himmel. (Daniel 7:27) Di eahshti heilicha voahra da Jesus sei faythfeli aposhtla. Jehova hott ohkalda fa faythfeli mansleit un veibsleit raus laysa fa di heilicha sei biss nau. Yusht vi da Jesus, si vadda zrikk gebrocht zu layva mitt en geishtlich leib.​—Lays Johannes 14:1-3; 1 Korinther 15:42-44.

Vi feel leit gayn in da himmel? Da Jesus hott si en “glenni drubb” kaysa. (Lukas 12:32) Vann si moll awl datt sinn, no zayla’s 144,000 sei. Si zayla no roola ivvah di eaht mitt da Jesus.​—Lays Di Offenbarung 14:1.

4. Vass hott gevva vo da Jesus kshteaht hott roola?

Gott Sei Reich hott kshteaht roola in 1914.a ’S eahsht ding es da Jesus gedu hott vo eah Kaynich vadda is, voah da Satan un sei demons nunnah shmeisa zu di eaht. Da Satan is no zannich vadda un hott kshteaht druvvel macha gans ivvah di eaht. (Di Offenbarung 12:7-10, 12) Siddah sell, sinn mensha iahra druvla yusht shlimmah un shlimmah vadda. Greek, earthquakes, grankeda gans ivvah, un nett genunk ess-sach, sinn awl part funn en “zaycha” es Gott Sei Reich glei ivvah nemma zayld funn awl di sacha uf di eaht.​—Lays Lukas 21:7, 10, 11, 31.

5. Vass is Gott Sei Reich am du?

Bei breddicha gans ivvah di veld, is Gott Sei Reich shund amma grohsi drubb zammah bringa funn alli sadda leit. Millions funn daymeedichi leit sinn am unnich da Jesus sei rool kumma. Gott Sei Reich zayld acht gevva uf si so’s si nett umkumma, vann’s moll awl dee veeshti sacha ab funn di eaht butzt. Alli ebbah es vill vass Gott Sei Reich bringa zayld, sett lanna fa da Jesus heicha.​—Lays Di Offenbarung 7:9, 14, 16, 17.

Deich an zeit, es en 1,000 yoah lang is, zayld’s Reich gedu greeya vass Gott hott vella fa mensha fa shteahra mitt. Di gans eaht zayld en paradise vadda. No, zayld da Jesus sell Reich viddah zrikk gevva zu sei Faddah. (1 Korinther 15:24-26) Is’s ennich ebbah es du sawwa vetsht veyyich Gott Sei Reich?​—Lays Psalm 37:10, 11, 29.