Seind Faythfel zu Nannah

Jehova sawkt miah missa faythfel sei aus leevi. (Shpricha 3:3) Dess is reeli importand in eiyah keiyaht layva, koss vann ma nett faythfel is, is kenn trost datt. Un’s nemd trost so’s leevi vaxa kann.

Dee veld macht’s als haddah fa keiyahri leit fa faythfel bleiva zu nannah. Fa dei keiyaht layva protekta, musht du dee zvay sacha du.

1 DU KEIYAHT LAYVA HOHCH ACHTA

VASS DI BIVVEL SAWKT: “Keiyaht layva soll hohch gacht sei.” (Hebräer 13:4) Fa dei keiyaht layva hohch achta, musht du macha es es ayns funn di importandshti sacha is in dei layva. Es sett kumma eb anri sacha.

Jehova vill havva es du dei partner nayksht an dei hatz haldsht un es diah layva enjoyet mitt-nannah. (Breddichah 9:9) Eah mach’s playn es du immah aus gukka setsht fa dei partner un diah seddet awl zvay gukka fa veyya fa nannah haebbi macha. (1 Korinther 10:24) ’Sis so shay vann yaydah vann gebraucht un apreeshayt shpiaht.

VASS DU KANSHT:

• Shpendet oft zeit mitt-nannah, un gebb dei partner awl dei attention

• Denk nett yusht “mich” avvah “uns”

2 PROTEKT DEI HATZ

VASS DI BIVVEL SAWKT: “Ennich ebbah es en veibsmensh glushtich ohgukt hott shund di ay gebrocha in sei hatz.” (Matthäus 5:28) Vann ma even yusht oh’hald denka diveyya, inna vayk is ma shund nett faythfel zu em sei partner.

Jehova sawkt “Heet dei hatz” (Shpricha 4:23; Jeremia 17:9) Fa dess du, musht du acht gevva vass du dei awwa losht sayna. (Matthäus 5:29, 30) Du vi da Hiob hott. Eah hott fashprocha in sei hatz fa nett en annah veibsmensh glushtich ohgukka. (Hiob 31:1) Fashprech in dei hatz fa selayva nett pornography adda nakkichi piktahs gukka. Sei shuah fa nee nett en glushta havva fa ennich ebbah es nett dei partner is.

VASS DU KANSHT:

• Mach’s playn zu anri es du immah faythfel bleiva zaylsht zu dei partner

• Denk vi dei partner shpiaht, un shtobb ennichah relationship es dei partner badra dayt