Vass Haebbend Mitt Em Vann Ma Shtaubt?

Vass di Bivvel sawkt

Di Bivvel sawkt: “Di levendicha vissa es si shtauva zayla, avvah di dohda vissa nix.” (Breddichah 9:5; Psalm 146:4) So, vann miah shtauva, nix funn uns hald oh layva. Di dohda vissa nix, un kenna nix shpiahra adda du.

Du “solsht viddah eaht vadda”

Gott hott ekshplaynd vass haebbend vann miah shtauva vo eah kshvetzt hott zu da eahsht mann, Adam. Koss da Adam nett keicht hott, hott Gott ksawt zu een: “Du bisht eaht, un solsht viddah eaht vadda.” (1 Mosi 3:19) Eb Gott da Adam gmacht hott aus “samm shtawb fumm grund,” voah eah nett gvest. (1 Mosi 2:7) In da saym vayk, vann da Adam kshtauva is, is eah viddah zrikk zu di eaht ganga un voah nimmi gvest.

Sell saym ding haebbend zu selli es shtauva nau. Di Bivvel is am shvetza veyyich mensha un animals vo’s sawkt: “Si kumma awl fumm shtawb, un gayn viddah zrikk zu shtawb.”​—Breddichah 3:19, 20.

Da doht is nett’s end funn alles

Di Bivvel dutt oft sawwa da doht is vi shlohf. (Psalm 13:3; Johannes 11:11-14; Apostelgeschichte 7:60) Ebbah es inna deefah shlohf is vayst nett vass am ohgay is aus een rumm. In da saym vayk, di dohda vissa nix. Avvah, di Bivvel sawkt es Gott kann di dohda ufvekka yusht vi vann si am shlohfa veahra un kann si viddah layva gevva. (Hiob 14:13-15) Da doht is nett’s end fa selli es Gott viddah ufvekt.