Yoshua
9 Mafumu agasue akhalele gu khanda ya mayilo a kumbi a Yordane avuile ndaga yakalegewe. Mafumu ene akhalele gu khanda ya milundu nu gu Shefela nu mu khulo yagasue ya Kianga Giakoma,* nu ha sambua dia Libane, yakotelesa egi enya Hete, enya Amole, enya Kanana, enya Phelese, enya Hivi nu enya Yebuse. 2 Adivuile ha guya muluisa Yoshua nu Isalele.
3 Enya Gibeona avuile nji ndaga Yoshua wakalegele dimbo dia Yeliko nu dia Ayi. 4 Hene akalegele ndaga nu gutema. Ambile ima ya gudia mu sagi jia gufua, ayihagele holu dia phunda jiawo nu milondo ya matombe ya ilema ya shitu ya gukaluga nu ya gulondelela. 5 Asudigile saphata jia gufua, jia gulondelela, asudigile nji milele ya gufua. Mapha awo agasue akhalele agimigina nu agusasumuga. 6 Gungima ayile gu Gilegale gu phundo gudi Yoshua, amuwambelele nu mala a gu Isalele egi: “Tuakatuga mu gifutshi gia gualeha. Henyaha kotenu gikotelo nu esue.” 7 Uvi mala a gu Isalele awambelele enya Hivi egi: “Yajiya gukhala egi muana khala hehi nu esue. Luholo lutshi tuajiya gukota n’enu gikotelo?” 8 Avutudile Yoshua egi: “Tudi enya mudimo* aye.”
Yoshua waahudile egi: “Mudi akhuatshi? Muakatuga gui?” 9 Amuvutuile egi: “Fumu, tuakatuga mu gifutshi gia gualeha mukunda nu jina dia Yehowa Nzambi waye, handaga tuavuile lukuma luenji nu ndaga jiagasue jiakalegele muene gu Ejipitu, 10 nu ndaga jiagasue jiakalegele muene mafumu mbadi a enya Amole akhalele ha sambua diko* dia Yordane: Fumu Sihona wa gu Heshebona nu Fumu Oga wa gu Bashana, munu wakhalele gu Ashetalote. 11 Hene akulu etu nu athu agasue a mu gifutshi gietu atuwambelele egi: ‘Zulenu ima ya gudia mu njila, muye mudimone nawo. Muawambele egi: “Mbatubua enya mudimo enu, kotenu gikotelo nu esue.”’ 12 Mapha awa tuazudile ha gudia mu njila, akhalele tshuya-tshuya tangua tuakatugile gumbo dietu ha guza haha. Uvi henyaha talenu, amigina nu asasumuga. 13 Milondo ya matombe eyi ya ilema ya shitu yakhalele ihe-ihe tangua tuayizalesele, uvi henyaha yakaluga. Milele yetu yafua nu jiene saphata jietu mukunda nu vuayaje yaleha tuatshitshi.”
14 Hene mala a gu Isalele azudile* ndambo ya ima ya athu ene, uvi ahudilego Yehowa. 15 Yoshua wadivuile nawo, wakotele nawo gikotelo ha guabemba nu monyo, mafumu a athu adilogele gutuama diawo ha gunemesa gikotelo giene.
16 Masugu thathu gungima dia gukota nawo gikotelo, enya Isalele avuile egi athu ene ana khalago gualeha, ana khala hehi nawo. 17 Gungima enya Isalele ayile mu membo a athu ene mu lusugu luene lua thathu. Membo awo akhalele: Gibeona, Kefila, Belote nu Kiriyate-Yalima. 18 Uvi enya Isalele a aluishilego handaga mafumu a athu adilogele gutuama diawo mu jina dia Yehowa Nzambi wa Isalele. Hene, athu agasue asendesele guzuela ndaga jiabola mukunda nu mafumu ene. 19 Mafumu awambelele athu agasue egi: “Luholo tuadilogele gutuama diawo mu jina dia Yehowa Nzambi wa Isalele, tuajiyilego guatshita gubola. 20 Ndaga mbatuakalagala yenyeyi: Mbatuabemba nu monyo hagula Nzambi gatuvuilago khabu, handaga tuadilogele gutuama diawo.” 21 Mafumu azuelele luko egi: “Abembenu nu monyo, uvi ene mbaakhala mutshiaya khunyi nu guthaya meya mukunda nu athu agasue.” Yene ndaga mafumu awambelele enya Gibeona.
22 Yoshua waatamegele, waahudile egi: “Mukunda natshi muatuhuigi? Muazuedi egi: ‘Tuakatuga gualeha ha guza haha,’ hoho muana jinga haha, hehi nu esue? 23 Henyaha muatewa mukumbu, mbamukhala ahiga mayilago. Mbamukhala mutshiaya khunyi nu guthaya meya mukunda nu inzo ya Nzambi wami.” 24 Ene avutudile Yoshua egi: “Fumu, tuakalegele ngenyi handaga atuwambelele egi Yehowa Nzambi waye wawambelele Moize muenya mudimo wenji ha gumihana gifutshi giagasue, nu ha gushiya athu agasue a mu gifutshi giene. Tuavuile woma egi mbamutushiya,* hene tuakalegele ngenyi. 25 Henyaha tudi ha mago aye. Tutshite ndaga yagasue udi mumona egi idi yabonga nu yatagana.” 26 Ndaga yaakalegele Yoshua yenyeyi: Waahuluishile ha mago a enya Isalele, a ashiyilego. 27 Uvi sendese mu lusugu luene, Yoshua waabuishile atshiayi a khunyi nu athayi a meya mukunda nu athu agasue nu mukunda nu giwotshielo gia Yehowa ha fundo diakhalele naye gutomba muene. Wene mudimo ana tshita uu nu mangino.