Manzuji
10 Gungima dia gufua gua Abimeleke, Tola mun’a Phuwa mujigulu wa Dodo muenya giphuta gia Yisakale, wabuile nzuji ha guhuluisa enya Isalele. Wakhalele gu dimbo dia Shamile gu khanda ya milundu ya Efrayime. 2 Wakhalele nzuji gu Isalele ivo 23. Gungima wafuile, amufundjile gu dimbo dia Shamile.
3 Gungima dia Tola, Yayile wazogele. Wakhalele muenya gu Gileade, wakhalele nzuji gu Isalele ivo 22. 4 Wakhalele nu ana 30, mona wagasue mukatshi diawo wakhalele muwenda holu dia phunda imoshi, akhalele nji nu membo 30. Membo ene ana tamegewa uu nu mangino egi Havote-Yayile, ana khala gu Gileade. 5 Gungima Yayile wafuile, amufundjile gu Kamona.
6 Enya Isalele akalegele luko ndaga jiabola gu meso a Yehowa, asendesele gukombelela nzambi jia Bale, nu ifuanesa ya Ashitolete nu nzambi jia gu Alama,* nu nzambi jia gu Sidona nu nzambi jia gu Moaba, nu nzambi jia enya Amona nu nzambi jia enya Filistiya. Abembele Yehowa, atunyile gumukombelela. 7 Yehowa wavidile enya Isalele khabu, waahanele ha mago a enya Filistiya nu enya Amona. 8 Asagesele enya Isalele, a amonesele lamba mu givo giene. Alanduile gusagesa enya Isalele agasue akhalele mu mavu a enya Amole gu Gileade ha sambua dia Yordane gu khanda ya mazogelo a kumbi, a asagesele ivo 18. 9 Enya Amona azawugile nji muta wa Yordane ha guluisa giphuta gia Yuda, gia Benjame nu gia Efrayime; enya Isalele avuile diago gikenene giavula. 10 Atogele Yehowa ukuateshi, azuelele egi: “Tuakalegele gubola gu meso aye, tuagubembele aye Nzambi wetu, tuasendesele gukombelela nzambi jia Bale.”
11 Uvi Yehowa wawambelele enya Isalele egi: “Ngamihuluishilego ha mago a enya Ejipitu, enya Amole, enya Amona nu enya Filistiya, 12 nu enya Sidona nu enya Amaleke nu enya Madiana tangua akhalele gumimonesa lamba ba? Tangua muakhalele mudila, ngamihuluishile ha mago awo. 13 Uvi muangubembele, muasendesele gukombelela nzambi jiko. Gishina giene mbangushigo gumihuluisa luko. 14 Wambelenu nzambi muatombele jimikuatese. Jimihuluise tangua mudi mu lamba.” 15 Uvi enya Isalele awambelele Yehowa egi: “Tuagutshitshila gubola. Tutshitshile ndaga yagasue idi yabonga gu meso aye. Uvi mangino tuhuluise, tuabuba.” 16 Akatudile nzambi jia isongo* jiakhalele mukatshi diawo, asendesele gukombelela Yehowa. Hene gabembelego luko egi enya Isalele amone malamba.
17 Gungima enya Amona adibungishile, atungile phundo yawo gu Gileade. Enya Isalele nji adibungishile, atungile phundo yawo gu Mispa. 18 Enya gu Gileade nu mafumu awo adihudile egi: “Nanyi ututuameza ha guluisa enya Amona? Muthu wagasue uza gututuameza, mbawubua fumu wa enya Gileade.”