Mukanda wa Thomo Gudi Timote
1 Ame Phaula, mupostolo wa Klisto Yesu, mu gutshigina gua Nzambi Muhuluishi wetu nu gua Klisto Yesu felela dietu, 2 ngudi musonegela Timote,* udi diago mun’ami mu mudimo wa Fumu wetu.
Nzambi Tata wetu nu Fumu wetu Yesu Klisto aguvile khenda jiavula nu agukuatese ha gukhala mu guhuima.
3 Tangua ngakhalele mutshigina guya gu Maseduane, ngagutogele ha gusala gu Efeso. Henyaha nji ngudi gugutoga ha gusala guene ha guwambela athu ako hagula alongesago malongo ako, 4 alandulago mene jia mambo nu senga jia akhakha. Ndaga jia luholo lulu jiana khalago nu ndando nga hazonda, uvi jiana zola matangi a githuhu anyi ashigo gudivua nu ndaga jiana gutulongesa Nzambi ha gukolesa gutshigina guetu. 5 Ngudi muhana malongo wawa hagula tukhale nu guzumba gudi mukatuga mu mutshima wabonga nu wa phelegeta nu mu gutshigina gua giamatshidia. 6 Athu ako atunyile ndaga jiji, adinginyishile mu izuele-zuele ya githuhu. 7 Ana tshigina gukhala alongeshi a mukhuala, uvi ndaga ana zuela nu ana buila ene jigi-jigi ana gujikotelesa ndo nga hazonda.
8 Tudi mujiya egi Mukhuala wakhala wabonga gula muthu udi guwukalegela mu luholo luatagana. 9 Tudi mujiya nji egi mukhuala wahagewego mukunda nu athu abonga, uvi wahagewe mukunda nu athu ana shiya mukhuala nu athu ana lumbuga nu athu anago gunemesa Nzambi, nu enya gubola, nu athu adi mutuna athu ako,* nu athu anago gunemesa ndaga jia gijila, nu athu ana shiya ash’awo nu in’awo nu ana shiya athu ako, 10 athu ana tshita uthambi,* mala ana bungisa muila nu mala n’ako, athu ana kuya athu n’ako, enya mambo, athu anago gutagenesa ndaga ana laya* nu ndaga jiko jiagasue jishigo gudivua nu malongo abonga* 11 adi mukatuga gudi Nzambi wa gusuanguluga nu adi gudivua nu lukuma luabonga lua gutumbuga luanguhuile muene.
12 Ngudi muhana mersi avula gudi Fumu wetu Klisto Yesu wanguhanele ngolo. Wanguhanele mudimo handaga wamonele egi ngudi ya gujinginyina. 13 Ha thomo ngakhalele mushinga Nzambi, ngakhalele musagesa athu, ngakhalelego nji munemesa athu. Uvi Klisto wanguvidile khenda handaga ngakhalelego mujiya ndaga ngakhalele mukalagala nu ngakhalelego nu gutshigina. 14 Fumu wanguvidile khenda jiavula, wanguhanele gutshigina nu wanguzumbile handaga ngudi mulandudi wa Klisto Yesu. 15 Mbimbi eji jialandula jidi jiatagana nu jidi naye gutshiginyiwa diago: Klisto Yesu wajile ha mavu ha guhuluisa enya gubola. Ame ngudi muthu wa thomo mukatshi dia athu ene. 16 Ame ngudi muthu wa thomo mukatshi dia enya gubola, uvi anguvidile khenda hagula Klisto Yesu amonese guhuiminyina guenji. Wangubuishile gifezegeselo mukunda nu athu agasue mbaahaga gutshigina gudi muene ha guheta monyo wa mayilago.
17 Fumu wa ivo nu ivo yonu gajiyilego gufua* ganago gumonega, Nzambi mumoshi ha mumoshi, anemesewe nu atumbuishiwe ivo nu ivo. Amen.
18 Mun’ami Timote, ngudi guguhana malongo wawa adi gudivua nu mbimbi jiadiangele guzuela baprofete mukunda nu aye. Mbimbi jiene mbajigukuatesa ha gulandula gulua ita yabonga 19 nu gubamba gutshigina nu mutshima waphelegeta. Athu ako ana khalago luko nu mutshima waphelegeta, hene, gutshigina guawo guabolele gifua masuwa ashiwuga mu muta. 20 Himene nu Alekisandele adi mukatshi dia athu ene. Ngaahanyi ha mago a Satana hagula ndola ngaahanyi yaakuatese ha gujiya egi ashigo naye gushinga Nzambi.