Mukanda wa Thomo wa Yone
4 Aphangi ami ngana zumba, mutshiginago mbimbi yagasue idi mumonega gifua idi mukatuga gudi Nzambi.* Uvi kambenu gujiya gula yakatuga* diago gudi muene, handaga baprofete avula a mambo azogi gale ha mavu.
2 Lulu luholo muajiya gujiya gula mbimbi imoshi idi mukatuga gudi Nzambi: Mbimbi yagasue idi mutshigina egi Yesu Klisto wajile gifua muthu, idi mukatuga gudi Nzambi. 3 Uvi mbimbi yagasue ishigo mujiya Yesu yakatugilego gudi Nzambi, idi mbimbi ya mbalagaji wa Klisto, inyi muavile egi idi muza, henyaha idi gale ha mavu.
4 Enue ana a zonda, muakatugile gudi Nzambi, muabingile baprofete a mambo, handaga muthu wana gudivua nu enue udi wakoma gubalega muthu wana gudivua nu mavu. 5 Ene akatugile ha mavu. Gishina giene ana zuela ndaga jiana katuga ha mavu nu enya ha mavu ana guategelela. 6 Uvi esue tuakatugile gudi Nzambi. Muthu wagasue wana jiya Nzambi wana gututegelela, uvi muthu wagasue gakatugilego gudi Nzambi, gana gututegelela ndo. Ndaga eyi yana gutukuatesa ha gujiya gudisha gudi mukatshi dia mbimbi ya giamatshidia nu mbimbi ya mambo.
7 Aphangi’ami ngana zumba, tulandulenu gudizumba handaga guzumba guakatugile gudi Nzambi. Muthu wagasue wana zumba athu ako udi mun’a Nzambi nu wana jiya Nzambi. 8 Gula muthu gashigo nu guzumba, muene khenji gajiyile ndo Nzambi, handaga Nzambi udi guzumba. 9 Guzumba gua Nzambi mukunda nu esue guamonelegele luholo elu: Nzambi watumile Mun’enji mumoshi ha mumoshi ha mavu hagula tuhete monyo mu njila yenji. 10 Guzumba guatuzumbile Nzambi guenyogu: Ishigo egi esue tuazumbile Nzambi, uvi muene watuzumbile nu watumile Mun’enji gifua mulambu wa gutotesela gubola* guetu.
11 Aphangi ngana zumba, gula Nzambi watuzumbile luholo elu, esue nji tudi naye guzumba athu ako. 12 Gushigo nga muthu wamonele gale Nzambi. Gula tualandula gudizumba, Nzambi mbawukhala nu esue, guzumba guenji mbagubua guatagana mukatshi dietu. 13 Mukunda nu ndaga eyi tudi mujiya egi tuana gudivua muabonga n’enji, muene wana gudivua muabonga nu esue, handaga watuhanele nyuma yenji. 14 Esue tuamonele nu tudi mulongesa egi Tata watumile Mun’enji gifua muhuluishi wa mavu. 15 Muthu wagasue watshigina egi Yesu udi Mun’a Nzambi, Nzambi wana gudivua n’enji muabonga, muene nji wana gudivua nu Nzambi muabonga. 16 Tuajiyile nu tuashile gutshigina mu guzumba Nzambi wakhala nago mukunda nu esue.
Nzambi udi guzumba, muthu wagasue udi mulandula gumonesa guzumba wana gudivua muabonga nu Nzambi, Nzambi nji wana gudivua n’enji. 17 Lulu luholo guzumba guabuishiwe guatagana mukatshi dietu, hagula tuajiyilego guvua woma ha guzuela* mu lusugu lua usopheshi, gifua luholo luana khala muthu muene, esue nji tuana khala ngenyi ha mavu awa. 18 Athu ana khala nu guzumba guatagana ana vua ndo woma. Guzumba guatagana guana kaya* woma, handaga woma wana gutukanga njila ha guya gutuama. Muthu wagasue udi muvua woma khenji gabuishiwego muthu watagana mu guzumba. 19 Tuana zumba handaga muene wadiangele gutuzumba.
20 Gula muthu wazuela egi: “Ngana zumba Nzambi,” uvi muene nu umbalagaji nu phangi’enji, udi muenya mambo. Handaga gula muthu gashigo muzumba phangi’enji yonu wana mona muene, gajiyilego guzumba Nzambi khenji gamonele ndo. 21 Muene watuhuile mukhuala owu, muthu yagasue udi muzumba Nzambi, udi naye nji guzumba phangi’enji.