Mukanda wa Matayo

21 Tangua ahetele gu Betefage gu Mulundu wa Mitshi ya Olive, hehi nu Yelusalema, Yesu watumine alandudi enji mbadi. 2 Waawambelele egi: “Ndenu mu dimbo dinyi mudi mumona. Hamuangina mu dimbo diene, mbamusanga phunda ya gujitshiga nu mutumba wenji. Jijitululenu mungubatele najio. 3 Gula muthu wamihula, muwambelenu egi: ‘Fumu udi najio funu.’ Muene mbawujibemba gatshididi ha guza.”

4 Yakalegewe ngenyi ha gutagenesa ndaga yadiangele guzuela profete egi: 5 “Wambela mon’a mukhetu wa gu Siona egi: ‘Tala! Fumi’aye udi muza gudi aye, udi muthu wahuima, udi muza holu dia phunda, ayi, holu dia mutumba wa phunda, mun’a shitu inyi yana bata ginemo.’”

6 Alandudi ayile, akalegele gifua muaawambelele Yesu. 7 Amubatelele phunda nu mutumba wa phunda yene, ahagele milele* yawo holu, Yesu wakhalele holu diajio. 8 Athu avula akhalele mubamba milele yawo ya holu mu njila, ako akhalele mubatula thango jia mitshi mujibamba mu njila. 9 Athu akhalele muya gutuama dienji nu anyi akhalele muza gungima dienji akhalele muzuela mu dijui diakola egi: “Nzambi tuagububila, huluisa Mun’a Davidi! Gusuanguluga gukhale nu muthu udi muza mu jina dia Yehowa! Nzambi tuagububila egi umuhuluise mu fundo dia gudinyinyiga udi!”

10 Hanginyile Yesu mu Yelusalema, dimbo diagasue diabuile nyiga-nyiga; athu akhalele gudihula egi: “Yowu nanyi?” 11 Athu avula akhalele muzuela egi: “Yowu profete Yesu wa gu Galilea mu dimbo dia Nazaleta!”

12 Yesu wanginyile mu tempelo, wakayele athu akhalele musumbisa nu musumba ima muene. Wasendumuine mesa a athu akhalele musombegesa makuta nu nguasa jia athu akhalele musumbisa mayembe.* 13 Waawambelele egi: “Yasonegewe egi: ‘Inzo yami mbayitamegewa egi inzo ya isambu,’ uvi enue muayibuisa inzo ya nzangi.” 14 Ifofo nu ikata yayile ha fundo diakhalele muene mu tempelo, wayisagele.

15 Tangua mafumu a nganga-nzambi nu alongeshi a mikhuala amonele ndaga jia gushimana jiakhalele muene mutshita nu luholo ana a mala akhalele mukaluguga mu tempelo egi: “Nzambi tuagububila, huluisa Mun’a Davidi!” avuile khabu. 16 Awambelele Yesu egi: “Umuvua ndaga jidi muzuela ene?” Yesu wazuelele egi: “Ayi. Enue khenji muatangelego egi: ‘Lutumbu luaye ludi muzoga mu makano a ana azonda nu ana a itebe’ ba?” 17 Waabembele, wazogele mu dimbo, wayile gu Betaniya, wabandele guene.

18 Hakhalele muene muvutuga mu dimbo mu gimenegena gia mutshiatshia, wavuile nzala. 19 Wamonele mutshi wa figi wakhalele gu khulo ya njila. Wasuenele gu mutshi wene, uvi gasangelego nga bundu dimoshi phamba mayiji ene-ene, wawambelele mutshi wene egi: “Aye mbawushigo muhaga luko mabundu.” Mutshi wene wamiginyine mbala imoshi. 20 Tangua alandudi amonele ndaga yene, adihudile mangololo. Azuelele egi: “Luholo lutshi mutshi wa figi wajiya gumigina mbala imoshi?” 21 Yesu waavutudile gamba: “Ngudi gumiwambela giamatshidia egi gula mudi nu gutshigina, mushigo musha iphapha,* mbamukalagala gifua luholo ngatshitshi mutshi owu wa figi. Luko, mbamuwambela mulundu owu egi, ‘Katuga haha, nda ubue mu kianga,’ yene mbayikalegewa. 22 Gula mudi nji nu gutshigina, ndaga yagasue mbamutoga mu gisambu mbamuyiheta.”

23 Tangua dianginyine muene mu tempelo, mafumu a nganga-nzambi nu malemba a athu asuenene gudi muene hakhalele muene mulongesa. Amuhudile egi: “Gui wazudi ngolo jia gukalagala ndaga eji? Nanyi waguhanyi ngolo jiene?” 24 Yesu waalezele egi: “Ame nji ngudi gumihula muhu. Gula muanguhana mvutu, nguza gumiwambela gula mu ngolo jia nanyi ngudi mutshita ndaga eji. 25 Gubatiza gua Yone guakatugile gui? Mu dilu nga gudi athu?” Uvi ene asendesele guzuela egi: “Gula tuazuela egi, ‘Guakatugile mu dilu,’ muene uza gutuhula egi, ‘Mukunda natshi muatunyine giwa gumutshigina?’ 26 Uvi gula tuazuela egi, ‘Guakatugile gudi athu,’ tudi muvua woma wa athu, handaga mukut’awo agasue ana tshigina egi Yone udi profete.” 27 Hene awambelele Yesu egi: “Tushigo mujiya.” Muene waawambelele egi: “Ame nji ngushigo gumiwambela gula mu ngolo jia nanyi ngudi mutshita ndaga eji.

28 “Muamona gikuatshi? Yala mumoshi wakhalele nu an’enji muyadi. Wayile mumona mona wa thomo, wamuwambelele egi: ‘Mun’ami, nda ukalagale mudimo mu dihia dia vinyo mangino.’ 29 Mona muene wavutudile egi: ‘Ngushigo muya.’ Uvi gungima wavile gikenene, wazugile, wayile. 30 Yala muene wayile gudi mona wa mbadi, wamuwambelele nji ha guya mukalagala mudimo mu dihia dia vinyo. Mona muene wamuvutudile egi: ‘Ayi Tata, ngudi muya.’ Uvi gungima gayilego. 31 Mona mutshi mukatshi dia an’awa mbadi wakadigile gutshigina gua sh’enji?” Ene azuelele egi: “Mona wa thomo.” Yesu waalezele gamba: “Ngudi gumiwambela giamatshidia egi afutshishi a gitadi nu akhetu a thambi, mbaadiangela gungina gutuama dienu mu Ufumu wa Nzambi. 32 Handaga Yone wajile, wamidijigile ndaga yabonga mudi naye gutshita, uvi enue muatunyile gusha gutshigina gudi muene. Uvi afutshishi a gitadi nu akhetu a thambi ashile gutshigina guawo gudi muene. Muamonele nji ndaga eyi, uvi muavilego gikenene luholo muatunyile gusha gutshigina gudi muene.

33 “Tegelelenu gifezegeselo giko: Yala mumoshi wakhalele nu mavu enji, wadimine dihia dia vinyo, wadimbile mu luphango. Wahagele wina wa gikameno gia vinyo nu watungile inzo yaleha; wawambelele adimi ha gusala mutala dihia diene dia vinyo, muene wayile gu gifutshi giko gualeha. 34 Hataganele sungi ya gukatula mabundu a vinyo, watumine enya mudimo enji ha guya gudi adimi hagula amuhane shinda dienji. 35 Adimi akuatele enya mudimo, abetele mumoshi, ashiyile muko, asonele muko maseso. 36 Watumine enya mudimo ako avula gubalega anyi a thomo, uvi adimi a akuatele, a atshitshile gifua luholo akalegele enya mudimo a thomo. 37 Gu gisugishilo watumine mun’enji, wazuelele egi: ‘Ene mbaanemesa mun’ami.’ 38 Tangua adimi amonele mona muene, azuelele egi, ‘Yowu muene mbawuzula dihia dia vinyo, izenu tumushiye hagula tuzangule dihia dia vinyo!’ 39 Hene amukuatele, amubishidile hanze ya dihia dia vinyo, gungima amushiyile. 40 Tangua mbadiza fumi’a dihia dia vinyo, itshi muene mbagakalagala adimi awa?” 41 Mafumu a nganga-nzambi nu malemba a athu azuelele egi: “Muene mbawashiya handaga ene adi athu abola, mbawuhana dihia dia vinyo gudi adimi anyi mbaamuhana shinda dienji mu sungi ya gukatula mabundu.”

42 Yesu waawambelele egi: “Enue khenji muatangelego mu Mukanda wa Nzambi egi: ‘Seso diabishidiwe gudi atungi, diene diabuile seso dia thomo dia ha khomo.* Diakatugile gudi Yehowa nu idi ndaga ya gushimana gu meso etu’ ba? 43 Gishina giene ngudi gumiwambela egi, Ufumu wa Nzambi mbawumitambuiwa, mbawuhanewa gudi gifutshi ginyi mbagihaga mabundu. 44 Muthu wagasue wabua ha seso eyi mbawubogoga. Uvi muthu wagasue seso eyi mbayibuila mbawutshiongomoga.”

45 Tangua mafumu a nganga-nzambi nu Afalese avuile ifezegeselo ya Yesu, akotelesele egi Yesu wakhalele guawambele ene. 46 Atshiginyile gumukuata, uvi avuile woma wa athu avula akhalele hene, handaga athu ene akhalele mutshigina egi Yesu udi profete.