Mukanda wa Mbadi wa Mafumu

5 Guakhalele nu muthu mumoshi wa lutumbu, jina dienji diakhalele Namana. Wakhalele fumu wa masuta a fumu wa gu Siliya, fumu wenji wakhalele musuanguluga n’enji muavula handaga Yehowa wahuluishile enya Siliya mu njila yenji. Wakhalele suta dia ngolo, uvi wakhalele nu misongo ya hute.* 2 Tangua masuta a enya Siliya ayile muluisa Isalele, akuatele mona wa mukhetu mumoshi wazonda mu gifutshi gia Isalele. Mona muene wabuile muenya mudimo wa mukaji’a Namana. 3 Lusugu lumoshi, mona muene wawambelele mukaji’a Namana egi: “Gula fumu wami waya gudi profete gu Samaliya, mbawudi gumusaga misongo yenji ya hute!” 4 Wayile* muwambela fumu wenji ndaga jiazuelele mona wa mukhetu wa gu Isalele.

5 Hene fumu wa gu Siliya wazuelele egi: “Nda luenyelu! Ngudi mutuma mukanda gudi fumu wa gu Isalele.” Namana wazudile batalanta* 10 a utadi wa siliva nu bashekele 6 000 a wolo nu milele 10, wayile. 6 Wahanele fumu wa gu Isalele mukanda. Mukanda wene wakhalele muzuela egi: “Ngatuma muenya mudimo wami Namana nu mukanda owu hagula umusage misongo yenji ya hute.” 7 Tangua fumu wa gu Isalele watangele mukanda wene, watawile milele yenji, wazuelele egi: “Ame ngudi Nzambi ha gushiya muthu nga ha gumubemba nu monyo ba? Muene wangutumina muthu yowu egi ngumusage misongo yenji ya hute! Mushigo mumona egi udi gungukambela malungu!”

8 Uvi tangua Elisha, muthu wa Nzambi wa giamatshidia, wavuile egi fumu wa gu Isalele watawula milele yenji, wamutumidile mbimbi mbala imoshi egi: “Mukunda natshi watawula milele yaye? Ngabuba, ngutumine muthu muene hagula ajiye egi gu Isalele gudi nu profete.” 9 Hene, Namana wajile nu tubalu tuenji nu phusu-phusu jienji jia ita, wamaganele gutuama dia inzo ya Elisha. 10 Uvi Elisha watumile muthu ha guya gumuwambela egi: “Nda udivomvue mu muta wa Yordane mbala 7, ngenyi muila waye mbawuvutuga gifua luholo wakhalele thomo, mbawubua waphelegeta.” 11 Uvi Namana wavuile khabu, wavutugile, wakhalele muya nu guzuela egi: “Ngatangijile egi: ‘Mbawuza mumagana gutuama diami, gungima mbawukombelela Yehowa Nzambi wenji, mbawubalegesa koko guenji holu dia misongo yami ya hute ha guyisaga.’ 12 Muta wa Abana nu wa Phalephale gu Damase ushigo wabonga gubalega mita yagasue ya gu Isalele? Ngajiyilego guzua meya guene hagula nguphelegete ba?” Gungima wabalumugile, wavutugile nu khabu jiakola.

13 Enya mudimo enji asuenele hehi n’enji, amuwambelele egi: “Tata, gula nga profete wagutogi ha gutshita ndaga yakola, wakhalelego naye guyitshita ba? Na mukunda natshi wajiyilego gutshita ndaga yaguwambela muene egi: ‘Zua meya uphelegete?’” 14 Hene Namana wabulumugile, wadivomvuele mu muta wa Yordane mbala 7 gifua muamuwambelele muthu wa Nzambi wa giamatshidia. Gungima misongo yenji ya hute yahuile, muila wenji wabuile gifua muila wa mona wazonda.*

15 Namana wavutugile gudi muthu wa Nzambi wa giamatshidia nu athu agasue akhalele n’enji.* Wamaganele gutuama dienji, wazuelele egi: “Henyaha ngajiya egi gushigo nu Nzambi muko ha mavu agasue, phamba gu Isalele. Ngabuba, zula kado* ngudi guguhana ame muenya mudimo waye.” 16 Uvi Elisha wamuwambelele egi: “Ngudi guguwambela giamatshidia mu jina dia Yehowa Nzambi wa monyo, munu ngana kombelela* egi, ngushigo muzula kado gaye.” Namana wamububidile ha guzula kado, uvi Elisha watunyile diago. 17 Gu suga, Namana wazuelele egi: “Gula watuna gaye, wajiya guhana njila hagula anguhane ndambo ya mavu a mu gifutshi gigi anyi phunda jiyadi jiajiya gubata, handaga ame muenya mudimo waye mbangushigo luko muhana milambu ya guwotshia nga milambu iko gudi nzambi jiko, phamba gudi Yehowa. 18 Uvi Yehowa angutotesele mukunda nu ndaga imoshi: Tangua fumu wami wana ngina mu inzo* ya Limona ha gufugama gutuama dienji, wana zegemena gu koko diami, hene ngudi naye nji gufugama mu inzo ya Limona. Ngabuba, Yehowa angutotesele ame muenya mudimo waye tangua mbangukhala mufugama mu inzo ya Limona.” 19 Elisha wamuwambelele egi: “Nda mu guhuima.” Gungima adikhaphele. Namana wakhalele wayi gale ndambo gualeha, 20 Gehazi, muenya mudimo wa Elisha muthu wa Nzambi wa giamatshidia, wazuelele mu mutshima wenji egi: “Fumu wami wabemba Namana muenya Siliya ha guya, uvi watuna guzula ima yamubatela muene. Ngudi gudiloga mu jina dia Yehowa Nzambi udi nu monyo egi, ngudi mulandula Namana phushi, nguzule ndambo ya ima.” 21 Hene Gehazi walanduile Namana. Tangua Namana wamonele muthu muza phushi gungima dienji, watulugile ha phusu-phusu yenji ha gumutagana. Wamuhudile egi: “Mulonga utshi?” 22 Wamuvutudile egi: “Gushigo nu mulonga. Fumu wami wangutumi, wazuela egi: ‘Ngakatuga guyamba mavuala mbadi a gu khanda ya milundu ya Efrayime, adi nji ana a baprofete. Ngabuba, ahane talanta imoshi ya utadi wa siliva nu milele mbadi.’” 23 Namana wazuelele egi: “Zula batalanta mbadi.” Wamububidile, wambile batalanta mbadi a utadi wa siliva nu milele mbadi mu makuba mbadi. Wayihanele gudi enya mudimo enji mbadi, ene ayile nayo gutuama, Gehazi muza gungima.

24 Tangua ahetele gu Ofele,* Gehazi wazudile ima yakhalele mubata athu ene, wayihagele monzo yenji. Waawambelele ha guvutuga. Havutugile athu ene, 25 Gehazi wavutugile gumbo dia fumu wenji. Elisha wamuhudile egi: “Gehazi, wakhala gui?” Uvi muene wazuelele egi: “Fumu, ngayilego nga guma.” 26 Elisha wamuwambelele egi: “Udi mutangiza egi ngushigo mujiya egi walandula* muthu muene, gungima muthu muene watuluga ha phusu-phusu yenji ha guza gugutagana ba? Udi mutangiza egi didi tangua dia guzula utadi wa siliva nga milele nga maji a olive nga mahia a vinyo nga imeme nga ngombe nga enya mudimo a mala nga a akhetu ba? 27 Henyaha, hute dia Namana didi gugukuata, mbadikhala nji gudi ajigulu aye mayilago.” Hute diamukuatele, diakhalele dilaphe gifua neje. Wakatugile mbala imoshi gutuama dia Elisha.