Mukanda wa Luka
8 Tangua diazonda gungima, Yesu wayile mu membo akoma nu mu membo azonda mulongesa nu gumuanga lukuma luabonga lua Ufumu wa Nzambi. Apostolo 12 akhalele n’enji, 2 nu akhetu anyi azolewe nyuma jiabola nu asagewe gu misongo, akhalele n’enji. Madiya wa gu Magadala, yonu Yesu wazolele bademo sambadi, 3 nu Yoana mukaji’a Kuza, muenya mudimo wa Helode; nu Suzana; nu akhetu ako avula, akhalele mukalegela ima yawo ha guakuatesa.
4 Athu avula adibungishile nu athu akatugile mu membo agudisha anyi ajile gudi Yesu. Muene waahanele gifezegeselo egi: 5 “Muthu mumoshi wazogele ha gukuna mbuto; hakhalele muene mukuna, mbuto jiko jiabuile mu khulo ya njila, athu ajidiatele nu tunjila tuajidile. 6 Mbuto jiko jabuile holu dia maseso, tangua jiazogele jiamiginyile handaga jiakhalelego nu meya. 7 Mbuto jiko jiabuile moshi’a mitshi ya miya. Mitshi yene yakudile najio hamoshi nu yajilangele. 8 Uvi mbuto jiko jiabuile mu mavu abonga, jiakudile, jiahagele mabundu 100.” Hamanesele muene guzuela ndaga eji, wazuelele mu dijui diakola egi: “Muthu udi nu matshui a guvua, avue.”
9 Uvi alandudi enji amuhudile gula gifezegeselo giene giakhalele mukotelesa itshi. 10 Muene waawambelele egi: “Enue amihuile luendu lua gukotelesa ndaga jia gisuegi jia Ufumu wa Nzambi. Uvi gudi athu ako ndaga jiagasue jidi mu ifezegeselo, handaga ene adi mutala, uvi ashigo mumona. Adi mutegelela, uvi ashigo muvua nu ashigo mukotelesa. 11 Gifezegeselo egi gidi mukotelesa egi: Mbuto jidi mbimbi ya Nzambi. 12 Mbuto jinyi jiabuile mu khulo ya njila jidi athu anyi ana guvua mbimbi, uvi Diabulu waza waakatula nayo mu mitshima yawo hagula ene ayitshiginago nu ahuluishiwago. 13 Mbuto jinyi jiabuile holu dia seso jidi athu ana guvua mbimbi, ayitshigina nu gusuanguluga guagasue, uvi ana khalago nu miji. Ana guyitshigina mu tangua diazonda, uvi tangua ana gulolewa, ana gubua gawo. 14 Mbuto jinyi jiabuile moshi’a mitshi ya miya jidi athu ana guvua mbimbi ya Nzambi, uvi gikenene nu umonyi nu gusuanguluga gua ndaga jia ha mavu awa yana guawunganesa nu guakanga njila diago, ngenyi anago guhaga mabundu abonga. 15 Mbuto jinyi jiabuile mu mavu abonga jidi athu adi nu mitshima yabonga diago. Hadi muvua ene mbimbi, adi guyibamba mu mitshima yawo nu adi muhaga mabundu nu gufubidila guagasue.
16 “Gushigo nu muthu wana lemesa muenda gungima awutshuigi longa nu awuhagi goshi’a gitanda, uvi wana guwuhaga holu dia gihagelo gia muenda hagula egi athu adi mungina amone kiajiji. 17 Handaga gima giagasue giasuegewe mbagisologa, gima giagasue giasuegewe muabonga diago mbagijiyiwa nu mbagimonega haphelo. 18 Hene, temienu mu luholo luenu lua gutegelela, handaga muthu udi nu gima mbaamuhana iko yavula, uvi muthu gashigo nu gima, nu giene gidi mutangiza muene egi udi nagio, mbaamutambula nagio.”
19 Gungima gin’enji nu aphangi’enji ajile ha gumutala, uvi akhalelego nu luholo lua guheta fundo diakhalele muene, handaga athu akhalele avula. 20 Athu amuwambelele egi: “Gin’aye nu aphangi’aye adi hanze adi mutshigina gugumona.” 21 Uvi muene waavutudile egi: “Gin’ami nu aphangi’ami, adi athu adi mutegelela mbimbi ya Nzambi nu adi guyitumagela.”
22 Lusugu lumoshi, Yesu nu alandudi enji anginyile mu wato, muene waawambelele egi: “Tuyenu ha sambua diko dia kianga.” Hene ayile. 23 Uvi hakhalele ene muzawuga, Yesu wabandele tulo. Funji yakola yasendesele gubunda mu kianga, meya akhalele muzala mu wato wawo; ene akhalele mutshigina gufua. 24 Amuzugishile, amuwambelele egi: “Mulongeshi, Mulongeshi, tudi mutshigina gufua!” Muene wazugile, wabalele* funji nu matshipha-tshipha akola. Funji yahuile, kianga giahenele tedie. 25 Gungima waahudile egi: “Gutshigina guenu gudi gui? Uvi ene avile woma wavula, ashimanele, akhalele muzuela egi: “Yowu muthu wa luholo lutshi? Muene udi muwambela funji nu meya, yene idi gumuvuila.”
26 Gu gisugishilo, ahetele gu mavu a enya Gelasa, ha sambua diko dia Galilea. 27 Hazogele Yesu mu wato, muthu mumoshi wakhalele musagesewa gudi bademo wazogele mu dimbo, wajile gumutagana. Sendese mualeha, muthu muene gakhalelego luko musudiga milele, gakhalelego luko mukhala monzo, uvi wakhalele mukhala gu malumba.* 28 Tangua diamonele muene Yesu, wakalugile, wabuile hashi gutuama dienji, wazuelele mu dijui diakola egi: “Aye Yesu, Mun’a Nzambi wa Gudinyinyiga, mulonga utshi udi nawo nu ame? Ngagububila, ungusagesago.” 29 (Handaga Yesu wawambelele nyuma yabola yakhalele gudi muthu muene ha guzoga. Nyuma yene yakhalele gumusagesa muavula.* Akhalele gumujitshiga malenge muavula gu mago nu gu malu, ahagele nji athu ha gumubamba. Uvi muthu muene wakhalele mubatula malenge ene; demo diakhalele gumutuma ha guya gudikhalela hakhenji.) 30 Yesu wamuhudile egi: “Jina diaye nanyi?” Muene wazuelele egi: “Musunga,” handaga bademo avula anginyile gudi muthu muene. 31 Ene amububidile hagula gaatumigo mu wina dishigo nu gisugishilo. 32 Ha fundo diene guakhalele nu ngulu jiavula jiakhalele mudia holu dia mulundu, nyuma jiene jiabola jiabubidile Yesu hagula ajihane njila ha guya mungina mu ngulu jiene. Muene wajihanele njila. 33 Hene bademo azogele gudi muthu muene, ayile mungina gudi ngulu. Ngulu jiagasue jiakatugile muphushi gu mulundu, jiadimbile mu kianga, jiafuile. 34 Tangua abambi a ngulu amonele ndaga yene, alengele, ayile mutela athu a mu dimbo nu a mu membo ako a hehi lumene lua ndaga yene.
35 Athu azogele ha guya mutala ndaga yene. Tangua ahetele ha fundo diakhalele Yesu, asangele yala muene wazolewe bademo wagusudiga gale milele, wavi gale muabonga, wagukhala hashi mu malu a Yesu. Woma waakuatele. 36 Athu anyi amonele ndaga jiagasue jinyi jiakalegewe, a atelele lumene lua luholo luasagewe muthu wakhalele nu bademo. 37 Athu avula a gu khanda ya enya Gelasa awambelele Yesu ha gukatuga mu mavu awo, handaga avile woma wavula. Hene, Yesu wanginyile mu wato, wayile genji. 38 Muthu wazolewe bademo wakhalele mububila Yesu ha guya n’enji, uvi Yesu wamuvutuile, wamuwambelele egi: 39 “Vutuga gumbo diaye, nda uwambele athu ndaga ya gukalegela Nzambi.” Muthu muene wayile, wawambelele athu a mu dimbo diagasue ndaga ya mukalegele Yesu.
40 Tangua diavutugile Yesu ha sambua diko dia kianga, athu avula amuyambele nu gusuanguluga guagasue, handaga akhalele gumunengena. 41 Uvi muthu mumoshi wajile, jina dienji Yayilo; muene wakhalele mutuameji wa sinagoga. Wabuile mu malu a Yesu, wasendesele gumububila ha guya gumbo dienji, 42 handaga mun’enji mumoshi ha mumoshi wa mukhetu wa ivo 12 wakhalele mutshigina gufua.
Hakhalele Yesu muya, athu avula akhalele n’enji kuma-kuma. 43 Guakhalele nu mukhetu mumoshi wakhalele muzoga mahatshi ivo 12. Gushigo nga muthu wabingile ha gumusaga. 44 Wayile gungima dia Yesu, wakuatele songi ya mulele wenji wa holu, mahatshi akhalele gumuzoga abatugile mbala imoshi. 45 Yesu wahudile egi: “Nanyi wangukuata?” Athu agasue akhalele mutuna, Phetelo wamuwambelele egi: “Mulongeshi, athu avula adi gugujieta nu adi naye kuma-kuma.” 46 Uvi Yesu wazuelele egi: “Muthu mumoshi wangukuata, handaga ngudi gudivua egi ngolo jianguzoga.” 47 Tangua diakotelesele mukhetu muene egi Yesu wajiyile ndaga yene, wajile nu gudigita, wabuile gu malu enji, wazuelele ha meso a athu agasue gishina amukuatele nu luholo asagewe mu tangua diene. 48 Uvi Yesu wamuwambelele egi: “Mun’ami, gutshigina guaye guagusaga. Nda mu guhuima.”
49 Hakhalele muene muzuela, muthu mumoshi wakatugile gumbo dia mutuameji wa sinagoga wazuelele egi: “Mun’aye wa mukhetu wafui gale; bemba gusagesa luko Mulongeshi.” 50 Havile Yesu ndaga yene, wamuwambelele gamba: “Uvuigo woma, khala phamba nu gutshigina, mun’aye mbawuhuluishiwa.” 51 Tangua diahetele Yesu gu inzo, watunyishile athu ako ha gungina. Wanginyile phamba nu Phetelo nu Yone nu Yakoba nu sh’a mona nu gin’a mona. 52 Athu agasue akhalele mudila nu gikenene giavula mukunda nu mona muene. Muene waawambelele egi: “Bembenu gudila, handaga mona gafilego, uvi udi mubanda tulo.” 53 Ene asendesele gumulela handaga akhalele mujiya egi mona udi wa gufua. 54 Uvi wakuatele mona muene gu koko, wamuwambelele mu dijui diakola egi: “Mun’ami, zuga mu molu!” 55 Mona muene wafuzumugile,* wazugile mu molu mbala imoshi, Yesu waawambelele ha gumuhana ima ya gudia. 56 Mvuaji jia mona muene jiasuangulugile muavula; uvi Yesu waalezele egi awambelago nga muthu mumoshi ndaga yene.