Gudi Enya gu Efeso
4 Ame ngudi mu bologo mukunda nu Fumu, ngudi gumitoga ha guwenda mu luholo luatagana, ludi gudivua nu gutamegewa gumuatamegewe. 2 Khalenu nu gudibulumuisa nu gutuluga nu guhuiminyina. Khalenu nu gudivua guabonga nu akuenu nu guzumba guagasue. 3 Kalagalenu ngolo ha gukhala hamoshi mu nyuma; guhuima gukhale gifua ngonji idi gumijitshiga hamoshi. 4 Muila udi umoshi, nyuma idi imoshi, muatamegewe nji mu felela dimoshi, 5 Fumu udi mumoshi, gutshigina gudi gumoshi, gubatijiwa nji gudi gumoshi; 6 Nzambi udi mumoshi, muene Tata wa mukut’etu agasue. Udi holu dia ima yagasue mukunda nu athu agasue, mu ndaga jiagasue.
7 Nzambi wamonesele khenda jienji jiavula gudi muthu wagasue mukatshi dietu. Ndaga yene yamonegele mu luholo Klisto wahanele khapho gudi muthu wagasue mukatshi dietu. 8 Handaga yasonegewe egi: “Hakandugile muene gosa, wajile nu ahiga; wahanele athu gifua makhapho.” 9 Mbimbi eyi “wakandugile” idi mukotelesa itshi? Idi mukotelesa egi wabulumugile nji hashi, yakotelesa egi mu mavu. 10 Muthu wabulumugile, muene nji wakandugile gosa mu dilu ha gutagenesa diago ima yagasue.
11 Watombele athu ako ha gukhala apostolo, ako baprofete, ako amuangi a lukuma luabonga,* ako abambi a imeme, ako alongeshi. 12 Waatombele ha guhana formasio gudi athu a gijila, ha gutshita mudimo wa gukuatesa athu ako nu ha gutunga muila wa Klisto 13 uu nu tangua mukut’etu agasue mbatubua nu gutshigina gumoshi nu mbatujiya Mun’a Nzambi muabonga diago ha gubua athu a gukula, yakotelesa egi athu a gukula diago gifua Klisto. 14 Ngenyi tukhadigo luko gifua ana azonda adi muwunganesewa khanda nu khanda gu muhehe wagasue wa malongo a mambo, nu ndunge jiabola athu adi mukalegela ha guhuiga athu ako. 15 Uvi tuzuelenu giamatshidia, tukudisenu guzumba mu ndaga jiagasue gudi Klisto, mutuameji wetu. 16 Gudi muene, muila wagasue udi wa gudibungisa muabonga hamoshi. Itshinyi yagasue ya muila yana gudikuatesa muabonga ha guwuhana ima udi nayo funu. Gula gitshinyi giagasue gidi mukalagala mudimo wenji muabonga, yana kuatesa muila wagasue ha gukula hagula ukole mu guzumba.
17 Ngudi gumiwambela mu jina dia Fumu egi, mulandulago guwenda luko gifua muana wenda enya ha mavu awa adi mulandula matangi awo a githuhu. 18 Adi mu phipha* nu adi gualeha nu monyo wana hana Nzambi, handaga ashigo mujiya nga gima nu adi nu mitshima yakola.* 19 Atotesele gale makalegelo awo agasue abonga, ana gudihana mu ndaga jia musonyi* nu ana khala nu nzala yakola ya gukalagala ndaga jia usala jia maluholo agasue.
20 Uvi amilongeselego egi Klisto wana khala ngenyi. 21 Yesu walongesele giamatshidia, muamuvile nu amilongesele mu njila yenji. Na mudi mujiya muabonga ndaga jiene. 22 Amilongesele ha gubemba umuthu ukulu udi gudivua nu makalegelo abola muakhalele nawo thomo, anyi akhalele mumonega mu nzala jiabola jiakhalele gumihuiga. 23 Landulenu gubua athu ahe-ahe mu ngolo jidi mutuameza matangi’enu.* 24 Sudigenu umuthu uhe-uhe wafugiwe mu gudivua nu gutshigina gua Nzambi. Umuthu wene udi wabonga nu watagana.
25 Henyaha luholo muabemba mambo, zuelenu giamatshidia mukatshi dienu handaga tudi itshinyi ya muila umoshi. 26 Vuenu khabu, uvi mukalagalago gubola; mukhadigo nu khabu uu nu hashiwuga tangua. 27 Muhanyigo Diabulu njila* ya gumituma ha gukalagala gubola. 28 Nzangi ikuyigo luko; uvi akalagale mudimo wakola nu wabonga* hagula ahete gima gia guhana muthu udi nu funu ya ukuateshi. 29 Nga mbimbi imoshi yabola izogigo mu kano dienu. Uvi zuelenu phamba mbimbi jiabonga jidi muhana ngolo mu tangua diatagana, hagula jikuatese athu adi gujitegelela. 30 Muhanyigo nyuma ya Nzambi gikenene. Nzambi wamitombele* mu njila ya nyuma yene mukunda nu lusugu lua gukudiwa mu uhiga mu njila ya gibawu.
31 Bembenu umbalagaji wakola wa maluholo agasue nu khabu nu gubundumuga nu matululu nu mbimbi jiabola nu mashingo nu ndaga jiagasue jiajiya gusagesa athu. 32 Uvi dimoneselenu mutshima wabonga, khalenu gudivila khenda nu guditotesela nu mutshima umoshi gifua luholo Nzambi wamitotesele mu njila ya Klisto.