Mukanda wa Thomo Gudi Enya gu Kolinto

15 Aphangi, ngudi gumiwunguluisa lukuma luabonga ngamilongesele. Muatshiginyile lukuma luene, nu ludi gumikuatesa ha gumagana tenyi. 2 Gula muasala agujinginyina gu lukuma luabonga ngamilongesele, mudi muhuluishiwa. Gula ndo, na mualabele genu gubua alandudi a Yesu.

3 Ngamiwambelele ndaga jiabalega ndando jinyi ame nji ngavuile. Ndaga jiene jidi egi Klisto wafuile mukunda nu gubola guetu gifua luholo Mukanda wa Nzambi udi guyizuela. 4 Wafundjiwe, uvi gungima dia masugu thathu, wafuzumugile gifua luholo Mukanda wa Nzambi udi guyizuela. 5 Wamonegele gudi Sefase,* gungima wamonegele nji gudi apostolo 12. 6 Gungima wamonegele gudi aphangi gubalega 500 mu tangua dimoshi. Avula mukatshi diawo tudi nawo uu nu mangino, uvi ako afuile gale. 7 Gungima, wamonegele gudi Yakoba; wamonegele nji gudi apostolo agasue. 8 Gu gisugishilo, wamonegele nji gudi ame. Uvi ame ngudi gifua mona wa gabisu.*

9 Yadiago, mukatshi dia apostolo agasue, ame ngushigo nu ndando. Ngushigo ngatagana ha gutamegewa egi mupostolo handaga ngasagesele hungu dia Nzambi. 10 Uvi ngudi mutshita mudimo owu handaga Nzambi wanguvidile khenda jiavula. Khenda jianguvidile muene jiakhalelego jia githuhu, handaga ngatshitshile mudimo wakola gubalega apostolo agasue. Ngatshitshilego mudimo wene mu ngolo jiami hakhami, uvi ngawutshitshile mu khenda jiavula jianguvidile Nzambi. 11 Ikhale ame nga ene adi mulongesa, mukut’etu agasue tuana longesa mbimbi imoshi. Enue muatshiginyile mbimbi yene.

12 Henyaha gula tudi mulongesa egi Klisto wafuzumugile gu gufua, luholo lutshi giwa athu ako mukatshi dienu adi muzuela egi gufuzumuga gua athu a gufua guakhalago guene? 13 Gula gufuzumuga gua athu a gufua guakhalago diago guene, idi mumonesa egi Klisto nji gafuzumugilego. 14 Uvi gula Klisto gafuzumugilego gu gufua, idi mumonesa egi gulongesa guetu gudi gua githuhu, gutshigina guetu nji gudi gua githuhu. 15 Idi mumonesa luko egi tudi mulongesa ndaga jia mambo mukunda nu Nzambi; handaga gula athu a gufua ajiyilego diago gufuzumuga, idi gifua tudi mumbila Nzambi mambo egi wafuzumuine Klisto gu gufua uvi muene gamufuzumuine genji ndo. 16 Hene gula athu a gufua ajiyilego gufuzumuga, idi mumonesa egi Klisto nji gafuzumugilego. 17 Luko gula Klisto gafuzumugilego gu gufua, idi mumonesa egi gutshigina guenu gudi gua githuhu, nu enue genu mu gubola uu nu mangino. 18 Idi mumonesa luko egi alandudi a Klisto anyi afuile, afuile mayilago. 19 Gula tuashile gutshigina gudi Klisto phamba mukunda nu monyo owu, na lamba dietu diabalega dia athu agasue.

20 Uvi Klisto wafuzumugile diago gu gufua. Muene udi muthu wa thomo* wafuzumugile mukatshi dia athu a gufua. 21 Gufua guajile mu njila ya muthu mumoshi. Gufuzumuga gua athu a gufua nji gudi muza mu njila ya muthu mumoshi. 22 Athu agasue ana gufua mukunda nu Adama. Luholo lumoshi nji, athu agasue mbafuzumuga mukunda nu Klisto. 23 Uvi mbayikhala muthu nu muthu mu tangua dienji: Klisto udi muthu wa thomo* mbawufuzumuga. Gungima, athu a Klisto mbaafuzumuga nji mu tangua dia guvutuga guenji. 24 Gu gisugishilo, Yesu mbawushiya baguvernema agasue, nu uhinyinyi wagasue, nu ngolo jiagasue. Gungima, mbawuvutula Ufumu gudi Nzambi wenji yago udi Sh’enji. 25 Handaga muene udi naye guhinyina uu nu tangua mbadihaga Nzambi mbalagaji jiagasue goshi’a ikanzo yenji. 26 Muene mbawukatula gufua, handaga gufua gudi mbalagaji yetu ya gisugishilo. 27 Nzambi “washile ima yagasue goshi’a ikanzo yenji.” Uvi tangua adi muzuela egi ‘Nzambi washile ima yagasue goshi’a uhinyinyi wa Klisto,’ ishigo mukotelesa egi Nzambi nji udi goshi’a uhinyinyi wa Klisto. 28 Tangua Nzambi mbawuhaga ima yagasue goshi’a uhinyinyi wa mun’enji, Mona hakhenji mbawutumagela Nzambi wahagele ima yagasue goshi’a uhinyinyi wenji, hagula egi Nzambi abue ima yagasue mukunda nu athu agasue.

29 Gula ndo, athu adi mubatijiwa ha gubua athu a gufua mbaatshita itshi? Gula athu a gufua ajiyilego diago gufuzumuga, mukunda natshi athu adi mubatijiwa giwa ha gubua athu a gufua? 30 Mukunda natshi tudi gudinginyisa mu lamba tangua diagasue? 31 Aphangi, lusugu nu lusugu ngana mona gufua nu meso. Ngudi gumiwambela ngenyi handaga ngudi gudisunzula mukunda nu enue, alandudi a Fumi’etu Klisto Yesu. 32 Gula ngaluile nu shitu jia mu foto jia gu Efeso gifua muana tshita athu ako,* nga gubonga gutshi ngahetele? Gula athu a gufua mbaashigo mufuzumuga, na “tudienu getu, tunuenu getu handaga hamene mbatufua getu.” 33 Mudihuigigo; mafuta abola ana bolesa makalegelo abonga. 34 Vutulenu matangi’enu abonga, tshitenu ndaga jiawaha, mukalagalago gubola, handaga athu ako mukatshi dienu ashigo mujiya Nzambi. Ngudi muzuela ngenyi ha gumikuatesa musonyi.

35 Uvi muthu muko wajiya guzuela egi: “Athu a gufua mbafuzumuga luholo lutshi? Ene mbafuzumuga nu muila wa luholo lutshi?” 36 Aye udi muthu waheya! Ushigo mujiya egi gula wakuna mbuto, gutuama egi izoge* idi naye thomo gufua ba? 37 Handaga ushigo mukuna mutshi wunu wakudile gale, uvi udi mukuna mbuto ikhale mbuto ya ble nga mbuto iko itshi. 38 Uvi Nzambi wana kudisa mbuto yene gifua luholo luatshigina muene. Wana guhana mbuto yagasue muila wayo hakhayo. 39 Mila yagasue yakhalago luholo lumoshi, handaga gudi nu muila wa muthu, nu muila wa shitu, nu muila wa tunjila, nu muila wa jishui. 40 Gudi nji nu mila ya mu dilu nu mila ya ha mavu. Uvi lutumbu lua mila ya mu dilu ludi lua gudisha nu lutumbu lua mila ya ha mavu. 41 Tangua diakhala nu luholo luenji lua guhenya; mbeji yakhala nu luholo luayo lua guhenya; themua nji jiakhala nu luholo luajio lua guhenya. Uvi mu guzuela guabonga, themua nu themua yakhala nu luholo luayo lua guhenya.

42 Idi nji luholo lumoshi nu gufuzumuga gua athu a gufua. Gula muila wafundjiwa,* wana gufukha. Uvi gula wafuzumuga, wajiyilego gufukha luko. 43 Gula muila wafundjiwa,* wanago gukhala nu lutumbu. Uvi gula wafuzumuga, wana gukhala nu lutumbu. Gula muila wafundjiwa, wana khala waguleba. Uvi gula wafuzumuga, wana khala nu ngolo. 44 Hadi wene mufundjiwa, udi muila wa athu. Uvi wana gufuzumuga muila wa mu nyuma. Hene gula muila wa athu wakhala guene, muila wa mu nyuma nji udi guene. 45 Mukanda wa Nzambi udi muzuela egi: “Adama wa thomo wabuile muthu wa monyo.” Uvi Adama wa gisugishilo wabuile nyuma idi muhana monyo. 46 Muila wa mu nyuma wanago guza ha fundo dia thomo. Muila wa athu wene wana guza ha fundo dia thomo, uvi muila wa mu nyuma wana guza gu gisugishilo. 47 Muthu wa thomo wakatugile mu mavu, wafugiwe nu fuluguta dia mavu. Uvi muthu wa mbadi wakatugile mu dilu. 48 Athu a ha mavu awa adi luholo lumoshi nu muthu wafugiwe gudi Nzambi nu fuluguta dia mavu. Athu a mu dilu nji adi luholo lumoshi nu muthu wakatugile mu dilu. 49 Luholo tudi agudifuana nu muthu wafugiwe nu fuluguta dia mavu, mbatudifuana nji nu muthu wakatugile mu dilu.

50 Uvi aphangi, ngudi gumiwambela egi muila nu mahatshi yajiyilego guhingana Ufumu wa Nzambi. Muila wunu wajiya gufukha, wajiyilego guhingana muila wunu wajiyilego gufukha. 51 Tegelelenu! Ngudi gumiwambela gisuegi gia gijila: Mukut’etu agasue mbatushigo mufua, uvi mukut’etu agasue mbatusombegesa 52 mbala imoshi mu gujiamuna* gua diso tangua mbadidila phungi ya gisugishilo. Tangua phungi yene mbayidila, athu a gufua mbaafuzumuga nu mila yajiyilego gufukha. Mbatusombegesa nji. 53 Handaga muila wunu wajiya gufukha udi naye gusombegesa ha gubua muila wunu wajiyilego gufukha. Muila wunu wajiya gufua udi naye gusombegesa ha gubua muila wunu wajiyilego gufua. 54 Uvi tangua muila wago wana gufukha mbawusombegesa ha gubua muila wunu wajiyilego gufukha, mu tangua diene nji muila wunu wana gufua mbawusombegesa ha gubua muila wunu wajiyilego gufua. Ngenyi mbayitagenesa ndaga jiasonegewe mu mukanda wa Nzambi egi: “Gufua mbagukatudiwa mayilago.” 55 “Aye gufua, gubinga guaye gudi gui? Aye gufua, ngolo jiaye jidi gui?” 56 Gima giana gubata gufua gidi gubola. Ngolo jia gubola jidi Mukhuala.* 57 Uvi tudi muhana Nzambi mersi handaga wana gutukuatesa ha gubinga mu njila ya Fumi’etu Yesu Klisto!

58 Aphangi’ami ngana guzumba muavula, khalenu tenyi, dijigamesenu, khalenu tangua diagasue nu ndaga jiavula jia gutshita mu mudimo wa Fumu. Jiyenu egi mudimo wenu wakola mudi mukalagala mukunda nu Fumu ushigo wa githuhu.