Mukanda wa Yakoba
4 Gui gudi mukatuga ita nu nguma mukatshi dienu? Jishigo mukatuga gu nzala jienu jia muila jidi mulua mukatshi dienu ba?* 2 Mudi nu nzala ya ima uvi mushigo guyiheta. Mudi mulandula gushiya athu nu guvua nzala ya ima yangane, uvi mushigo muheta nga gima gimoshi. Mudi mulandula guzola nguma nu gulua ita. Mushigo muheta, handaga mushigo mulomba. 3 Tangua mudi mulomba, mushigo muheta handaga mudi mulomba nu matangi abola ha gutagenesa nzala jienu jia muila.
4 Enue athu muatunyile Nzambi,* mushigo mujiya egi gukuata ufuta nu mavu guana buisa muthu mbalagaji wa Nzambi ba? Hene, muthu wagasue udi mukuata ufuta nu mavu, udi gudibuisa muene hakhenji mbalagaji wa Nzambi. 5 Enue mudi mutangiza egi mbimbi ya Nzambi yalabele guzuela egi: “Khadilo dia guvua nzala ya ima yangane tuana khala nadio, diana gututuma ha gukhala nu nzala ya ima yavula”? 6 Uvi khenda jiavula jiana gutumonesela Nzambi, jiana gutukuatesa ha gubinga khadilo diene. Mukanda wa Nzambi udi muzuela egi: “Nzambi udi mbalagaji wa enya lulendo, uvi wana monesa khenda jiavula gudi athu a gudibulumuisa.”
7 Hene, tumagelenu Nzambi; uvi khalenu mbalagaji jia Diabulu. Ngenyi, muene mbawulenga gualeha nu enue. 8 Suenenu hehi nu Nzambi, muene mbawusuena hehi nu enue. Enue enya gubola, wevenu mago enu. Enue mudi nu giphapha, phelegetesenu mitshima yenu. 9 Khalenu nu lamba mu mitshima, vuenu gikenene, dilenu. Gulela guenu gubue gudila, gusuanguluga guenu gubue gikenene. 10 Dibulumuisenu gutuama dia Yehowa, muene mbawumikanduisa.
11 Aphangi, bembenu guzuela ndaga jiabola mukunda nu athu ako. Muthu wagasue udi muzuela ndaga jiabola mukunda nu phangi’enji nga udi musophesa phangi’enji, udi muzuela ndaga jiabola mukunda nu mukhuala nu udi musophesa mukhuala. Gula muthu udi musophesa mukhuala, gashigo mutumagela mukhuala, uvi udi nzuji. 12 Muthu mungoshi phamba wana hana mikhuala, muene nji udi Nzuji. Muene wajiya guhuluisa, nga gushiya. Uvi aye udi nanyi ha gusophesa phangi’aye?
13 Henyaha tegelelenu, enue athu muana zuela egi: “Mangino nga hamene mbatuya gu dimbo dinyi, mbatubalegesa givo gimoshi guene, mbatutshita mungenda, mbatuheta makuta.” 14 Uvi mushigo mujiya ndaga mbayimibuila hamene. Handaga mudi gifua gimbundu-mbundu giana zoga mukunda nu tangua diazonda, gungima gitotshi. 15 Uvi mudi naye guzuela egi: “Gula Yehowa watshigina, mbatukhala nu monyo, mbatutshita gima gigi, nga gima ginyi.” 16 Uvi mudi gudihala nu gudisunzula guagasue. Gudihala gua luholo elu gushigo guabonga. 17 Hene, gula muthu udi mujiya luholo lua gutshita ndaga yabonga, uvi muene nu guyitshita ndo, watshita gubola.