Gudi Enya gu Kolosai
3 Gula muafuzumuiwe hamoshi nu Klisto, landulenu gukamba ndaga jia mu dilu, fundo Klisto udi ya gukhala gu koko dia madia dia Nzambi. 2 Khalenu mutangiza ndaga jia mu dilu, uvi jia ha mavu ndo. 3 Handaga muafile, monyo wenu wasuegewe nu Klisto mu gudivua nu gutshigina gua Nzambi. 4 Klisto udi monyo wetu, tangua mbadimonega muene, enue nji mbamumonega n’enji mu lutumbu luenji.
5 Shiyenu nzala jiagasue jia itshinyi ya muila wenu* mu ndaga yatadila uthambi,* usala, nzala yakola ya gubungisa muila, ngina jiabola nu nzala ya ima yavula, handaga nzala ya ima yavula idi luholo lumoshi nu gukombelela isongo. 6 Nzambi mbawuvua khabu jiakola gudi athu adi mukalagala ndaga eji. 7 Thomo enue nji muakhalele mukalagala* ndaga jia luholo elu. 8 Uvi henyaha bembenu ndaga eji jiagasue: khabu, gubundumuga, khuta, mashingo nu mbimbi jiabola jiajiya guzoga mu makano enu. 9 Mudimbilago mambo mukatshi dienu. Katulenu umuthu ukulu* nu makalegelo enji. 10 Sudigenu umuthu uhe-uhe. Umuthu wene wana gubua uhe-uhe mu njila ya ujiyi wa giamatshidia mu gudivua nu gifuanesa gia Muthu wawufugile. 11 Mu ndaga yatadila umuthu uhe-uhe, gudisha gushigo mukatshi dia muenya Greke nga muenya Yuda, muthu wambiwe gu mukanda nga muthu gambiwego gu mukanda, ngenji nga muenya Sekutia,* muhiga nga muthu gashigo muhiga; uvi Klisto udi ima yagasue mukatshi dia ima yagasue.
12 Luholo mudi athu Nzambi watombele, athu a gijila ana zumba muene, sudigenu khenda jiavula nu gisemo nu gudibulumuisa nu gutuluga nu guhuiminyina. 13 Khalenu mukanga mutshima mu ndaga jia athu ako, khalenu nji guditotesela nu mutshima wagasue, ngatshima gudi nu muthu udi nu mulonga nu muthu muko. Khalenu guditotesela gifua luholo Yehowa wamitotesele gubola guenu nu mutshima umoshi. 14 Holu dia ndaga eji tuatanga, sudigenu guzumba handaga guzumba gudi gifua shinga yana gutujitshiga ha gukhala hamoshi.
15 Guhuima gua Klisto gukhale mu mitshima yenu,* Nzambi wamitamegele hagula mukhale muila umoshi, mukhale nji mu guhuima. Ngenyi, khalenu muhana mersi tangua diagasue. 16 Malongo a Klisto azale mu mitshima yenu hagula mukhale nu gutema. Landulenu gulongesa nu guhana athu ako gikhesa* mu njila ya ngimbo, nu ngimbo jidi mutumbuisa Nzambi nu ngimbo jia mu nyuma ha guhana mersi. Yimbilenu Yehowa nu mutshima wenu wagasue. 17 Ndaga jiagasue mudi muzuela nu mudi mukalagala, jikalagalenu mu jina dia Fumu Yesu. Hanenu Tata Nzambi mersi mu njila yenji.
18 Akhetu, tumagelenu alumi’enu handaga alandudi a Fumu Yesu adi naye gukalagala ngenyi. 19 Enue mala, khalenu muzumba akaji’enu. Mukhadigo guakalegela ndaga jiakola jiajiya guasagesa.* 20 Ana, tumagelenu mvuaji jienu mu ndaga jiagasue, handaga gutshita ngenyi guana suanguluisa Fumu. 21 Enue atata, mukhadigo mutshita ndaga jiajiya guhana an’enu khabu* hagula alebigo muila. 22 Enue ahiga, tumagelenu mafumu enu mu ndaga jiagasue. Mukhadigo guatumagela phamba tangua athu adi gumitala ha guasuanguluisa, uvi khalenu guatumagela nu mutshima umoshi ha gunemesa* Yehowa. 23 Ndaga yagasue mudi mukalagala, ikalagalenu nu mutshima wenu wagasue nu ngolo jienu jiagasue gifua mudi muyikalegela Yehowa uvi athu ndo. 24 Handaga mudi mujiya egi Yehowa mbawumihana lufuto. Tshitenu mudimo gifua ahiga mukunda nu Fumu Klisto. 25 Muthu udi mukalagala gubola, Nzambi mbawumuhana ndola mukunda nu gubola guakalegele muene handaga Nzambi ganago gukhala nu lutondo.